1 Samuel 2

Ilonggo (Ang Biblia (1982))

← Chapter 1 Jump to: Chapter 3 →

1Si Ana man nagpangamuyo kag nagsiling, “Ang akon tagiposoon nagakasadya sa Ginoo; ang akon sungay ginbayaw sa Ginoo. Ang akon baba naghitad sa ibabaw sang akon mga kaaway, bangud nga nagakalipay ako sa imo kaluwasan.

2“Wala na sing balaan subong sa Ginoo, wala na sing iban luwas sa imo; wala na sing igang kaangay sang amon Dios.

3Dili na kamo maghambal sing lakas kabugalon, ang pagkapalabilabihon dili maggowa sa inyo baba; kay ang Ginoo Dios sang ihibalo, kag ginatimbang niya ang mga binuhatan.

4Ang mga pana sang gamhanan nga mga tawo ginbali, apang ang mga nagkasandad nawagkusan sing kusug.

5Ang mga busug nagpahinakay nga sa kalan-on, apang ang mga gutum wala na paggutuma. Hoo, ang baw-as nag-anak sing pito, apang ang may madamu nga anak nagakag-as.

6Ang Ginoo nagapatay kag nagabuhi; sia nagapapanaug sa Sheol kag nagabatak.

7Ang Ginoo nagapaimol kag sia nagapamanggad; sia nagapapakubus, sia nagabayaw man.

8Sia nagabangon sang imol gikan sa yab-ok; ginabayaw niya ang nawad-an gikan sa tumpok sang higko, sa pagpalingkod sa ila kaupud sa mga principe kag pagpanubli sang trono sang himaya. Kay iya sang Ginoo ang mga haligi sang duta, kag ginpahamtang niya sa ibabaw nila ang kalibutan.

9“Sia magabantay sang mga tiil sang iya mga balaan; apang ang mga malauton pahipuson sa kadudulman; kay tungud sa kusug indi maglandas ang tawo.

10Ang mga nagasumpung sa Ginoo dugmokon; batok sa ila magadaguub sia kutub sa langit. Hukman sang Ginoo ang mga ukbung sang duta; magahatag sia sing kusug sa iya hari, kag magabayaw sang sungay sang iya hinaplas.”

11Niyan si Elcana nagpauli sa Rama sa iya balay. Kag ang bata nag-alagad sa Ginoo, sa atubangan ni Eli nga sacerdote.

12Karon ang mga anak ni Eli mga lalaki nga huroshuros; wala sila makakilala sa Ginoo.

13Ang batasan sang mga sacerdote sa katawohan amo nga kon ang bisan sin-o nga tawo magdolot sing halad, ang alagad sang sacerdote nag-abut, nga nagadala sang kaw-it nga tatlo sing ngipon, samtang ginalaga ang unud,

14kag ginasuntok niya ini sa sulud sang kalaha, ukon sa tatso, ukon sa kawa, ukon sa kolon; ang tanan nga madala sang kaw-it sa unud ginakuha ini sang sacerdote. Amo ini ang ginhimo nila sa Silo sa tanan nga Israelnon nga nag-abut didto.

15Hoo, sa wala pa masonog nila ang sapay, nag-abut ang alagad sang sacerdote kag nagsiling sa tawo nga naghalad, “Hatag ka sing unud nga asalon tungud sa sacerdote; kay indi sia magkuha sa imo sing unud nga linoto, kondi hilaw.”

16Kag kon magsiling sa iya ang tawo, “Sonogon anay nila ang sapay, kag ugaling magkuha sono sa naluyagan sang imo kalag,” niyan masiling sia, “Indi, kondi ihatag mo ini sa akon karon; kag kon indi, kuhaon ko ini sa palugus.”

17Sa amo ang sala sang mga pamatan-on nga lalaki tama gid kadaku sa atubangan sang Ginoo; kay gintamay sang mga tawo ang dolot sang Ginoo.

18Si Samuel nag-alagad sa atubangan sang Ginoo nga bata pa, nga natakdan sang efod nga lino.

19Kag ginhimoan sia sang iya iloy sing bayo nga diotay kag ginadala ini sa iya tuigtuig, kon magtaklad sia kaupud sang iya bana sa pagdolot sang tinuig nga halad.

20Niyan ginpakamaayo ni Eli si Elcana kag ang iya asawa, kag nagsiling, “Ang Ginoo maghatag sa imo sing kaliwatan sa sini nga babayi tungud sang pangabay nga ginpangayo sa Ginoo ”; gani niyan nagpauli sila sa ila kaugalingon nga puluy-an.

21Kag ginduaw sang Ginoo si Ana, kag nagpanamkon sia kag nag-anak sing tatlo ka lalaki kag duha ka babayi. Kag ang bata nga si Samuel nagtubo sa atubangan sang Ginoo.

22Karon si Eli tama na katigulang, kag nakabati sia sang tanan nga ginhimo sang iya mga anak nga lalaki sa bug-os nga Israel, kag kon paano nga naghulid sila sa mga babayi nga nag-alagad sa ganhaan sang layanglayang nga tiliponan.

23Kag nagsiling sia sa ila, “Ngaa bala nagahimo kamo sang amo nga mga butang? Kay ako nakabati sang inyo malaut nga mga paghisayo gikan sa sini nga bug-os nga katawohan.

24Indi, mga anak ko; kay indi maayo nga sugid ang akon nabatian; ginapalalis ninyo ang katawohan sang Ginoo.

25Kon makasala ang isa ka tawo batok sa isa, hukman sia sang Dios; apang kon makasala ang isa ka tawo batok sa Ginoo, sin-o bala ang magaampo tungud sa iya?” Apang sila wala magpamati sa tingug sang ila amay; kay ang Ginoo naghunahuna sa pagpatay sa ila.

26Karon ang bata nga si Samuel nagdayon sa pagtubo kag nagdugang sa kahamuut sa Ginoo kag sa mga tawo.

27Kag may nag-abut nga tawo sang Dios kay Eli, kag nagsiling sa iya, “Amo ini ang ginasiling sang Ginoo, ‘Nagpahayag ako sa balay sang imo amay sang didto sia sa Egipto nga ulipon sa balay ni Faraon.

28Kag ginpili ko sia gikan sa tanan nga kabikahan sang Israel nga mangin-akon sacerdote, sa pagsaka sa akon halaran, sa pagsonog sing incienso, sa pagsuklub sing efod sa atubangan nakon; kag ginhatag ko sa balay sang imo amay ang tanan nga dolot tungud sa kalayo gikan sa katawohan sang Israel.

29Ngaa bala niyan gintapak ninyo ang akon mga halad kag ang akon mga dolot nga akon ginsogo sa akon puluy-an, kag ginpadunggan mo ang imo mga anak nga lalaki labaw pa sa akon sa pagpatambok sang inyo kaugalingon sa mga ali sang tanan nga dolot sang akon katawohan nga Israel?’

30Busa ang Ginoo ang Dios sang Israel nagasiling: ‘Sa pagkamatuud ako nagsiling nga ang imo panimalay kag ang panimalay sang imo amay maglakat sa atubangan nakon sing dayon’; apang karon ang Ginoo nagasiling: ‘Magmalayo ini sa akon; kay ang mga nagapadungug sa akon padunggan ko, kag ang mga nagatamay sa akon tamayon.

31Yari karon, nagaabut ang mga adlaw, nga akon utdon ang imo butkon kag ang butkon sang panimalay sang imo amay, agud nga wala sing tigulang nga tawo sa imo panimalay.

32Niyan makita mo ang kapipit-an sang akon puluy-an sa tanan nga manggad nga ihatag sang Dios sa Israel; kag wala na sing tigulang nga lalaki sa imo panimalay sa gihapon.

33Ang imo tawo nga indi ko pag-utdon gikan sa akon halaran magapahuyus sang imo mata kag magapasubo sang imo tagiposoon; kag ang tanan nga dugang sang imo panimalay mapatay sa pamukadkad sang ila panuigon.

34Kag amo ini ang tanda sa imo nga magaabut sa imo duha ka anak nga lalaki, kay Ofni kag Finees: sila nga duha mapatay sa isa ka adlaw.

35Kag magabangon ako nga sa akon sing isa ka sacerdote nga matutum, nga magahimo sono sang yari sa akon tagiposoon kag sa akon hunahuna; kag magapatindug ako sa iya sing isa ka balay nga malig-on, kag magalakat sia sa atubangan sang akon hinaplas sa gihapon.

36Kag ang tagsatagsa nga mabilin sa imo balay magakari kag magayaub sa iya tungud sa isa ka bilog nga pilak kag isa ka bilog nga tinapay, kag magasiling, “Ginaampo ko sa imo, ibutang ako sa isa sang mga palangakuan sang mga sacerdote, agud nga makakaon ako sing isa ka hungit nga tinapay.” ’”

← Chapter 1 Jump to: Chapter 3 →