1 Samuel 6

Ilonggo (Ang Biblia (1982))

← Chapter 5 Jump to: Chapter 7 →

1Ang kaban sang Ginoo pito ka bulan sa duta sang mga Filistinhon.

2Kag ang mga Filistinhon nagtawag sang mga sacerdote kag sang mga manugpakot nga nagasiling, “Ano bala ang himoon ta sang kaban sang Ginoo? Pakitai kami kon paano ang pagpadala namon sini sa iya duug.”

3Nagsiling sila, “Kon ipadala ninyo ang kaban sang Dios sang Israel, indi ninyo pag-ipadala nga wala sing dala, kondi balusi gid ninyo sia sing halad-tungud-sa-paglapas. Niyan magaayo kamo, kag makilala ninyo ngaa bala nga wala makuha ang iya kamut sa inyo.”

4Niyan nagsiling sila, “Ano bala ang halad-tungud-sa-paglapas nga amon ibalus sa iya?” Nagsiling sila, “Lima ka almoranas kag lima ka ilaga nga bulawan, sono sa kadamuon sang mga ginoo sang mga Filistinhon; kay isa ka kalalat-an sa inyo tanan kag sa inyo mga ginoo.

5Gani maghimo kamo sing mga larawan sang inyo mga almoranas kag mga larawan sang inyo mga ilaga nga naghalit sang duta, kag maghatag kamo sing himaya sa Dios sang Israel; ayhan mapahaganhagan niya ang iya kamut gikan sa inyo kag gikan sa inyo mga dios kag gikan sa inyo duta.

6Ngaa bala niyan ginapatig-a ninyo ang inyo mga tagiposoon subong sang pagpatig-a sang mga Egiptohanon kag ni Faraon sang ila mga tagiposoon? Sang nakahikot sia sing makatilingala sa tunga nila, wala bala nila pagtuguti nga maglakat ang katawohan, kag nagtaliwan sila?

7Busa karon, kuha kamo kag magaman sing bag-o nga karo kag duha ka baka nga gatasan nga wala pa matakdi sing gota, kag itakud ninyo ang mga baka sa karo, apang ipauli ninyo sa balay ang ila mga tinday.

8Kag kuhaa ninyo ang kaban sang Ginoo kag itungtung ini sa karo, kag ibutang ninyo sa suludlan sa kilid sini ang mga huluyason nga bulawan, nga ginabalus ninyo sa iya nga halad-tungud-sa-paglapas. Niyan ipadala ini, agud nga maglakat sia.

9Kag tan-awa; kon nagataklad sia sa dalanon sang iya kaugalingon nga dulunan, pakadto sa Bet-semes, niyan sia nakahimo sa aton sini nga daku nga kalaut; apang kon indi, niyan mahibaloan ta nga indi iya kamut ang nagsakit sa aton, isa ka hitabo ini nga nahanabu sa aton.”

10Ang mga tawo naghimo sang subong, kag nagkuha sing duha ka baka nga gatasan kag gintakud sila sa karo, kag ginpugo sa balay ang ila mga tinday.

11Kag ginbutang nila ang kaban sang Ginoo sa karo, kag ang suludlan nga may ilaga nga bulawan kag mga larawan sang ila mga almoranas.

12Kag ang baka nga gatasan nag-agi sa dalanon nga matadlong pakadto sa Bet-semes sa dalan sang banwa, nga nagaima sa nagalakat sila; wala maglipas sa too ukon sa wala, kag ang mga ginoo sang mga Filistinhon nagsonod sa ila tubtub sa dulunan sang Bet-semes.

13Karon ang mga taga-Bet-semes nagaani sang ila trigo nga alanyon sa nalupyakan; kag ginbayaw nila ang ila mga mata kag nakita ang kaban, kag nagkalipay sila sa pagtan-aw sini.

14Ang karo nag-abut sa latagon ni Josue nga Bet-semesnon, kag nagdolog didto. May daku nga bato didto; kag ginbis-ak nila ang kahoy sang karo kag gindolot ang mga baka nga gatasan nga halad-nga-sinonog sa Ginoo.

15Kag ginpapanaug sang mga Levinhon ang kaban sang Ginoo kag ang suludlan nga yara upud sa iya, diin nasulud ang mga huluyason nga bulawan, kag ginbutang sila sa ibabaw sang daku nga bato; kag ang mga tawo sang Bet-semes nagdolot sing mga halad-nga-sinonog kag naghalad sing mga halad sa Ginoo sa amo nga adlaw.

16Kag sang nakita ini sang lima ka ginoo sang mga Filistinhon, nagbalik sila sa Ecron sa amo nga adlaw.

17Ini sila amo ang mga almoranas nga bulawan, nga ginbalus sang mga Filistinhon sa Ginoo sa halad-tungud-sa-paglapas: tungud sa Asdod isa, tungud sa Gasa isa, tungud sa Ascalon isa, tungud sa Gat isa, tungud sa Ecron isa;

18ang mga ilaga man nga bulawan, sono sa kadamuon sang tanan nga banwa sang mga Filistinhon nga ila sang lima ka ginoo, tingub ang mga banwa nga may kuta kag ang mga minoro sa uma. Sa daku nga bato, diin gintungtung nila ang kaban sang Ginoo, amo ang saksi sa latagon ni Josue nga Bet-semesnon tubtub sini nga adlaw.

19Kag ginpatay niya ang mga tawo sang Bet-semes, bangud nga nagsid-ing sila sa kaban sang Ginoo; ginpatay niya sa katawohan ang kalim-an ka libo kag kapitoan ka tawo, kag ang katawohan naglalaw bangud nga ang Ginoo nagsamad sang katawohan sa daku nga kamatay.

20Niyan ang mga tawo sa Bet-semes nagsiling, “Sin-o bala ang makasarang magtindug sa atubangan sang Ginoo, sini nga Dios nga balaan? Kag kay sin-o bala sia magataklad gikan sa aton?”

21Gani nagpadala sila sing mga manugbalita sa mga pumuluyo sang Kiryat-jearim, nga nagasiling, “Gin-uli sang mga Filistinhon ang kaban sang Ginoo. Dulhog kamo kag pataklara ninyo ini sa inyo.”

← Chapter 5 Jump to: Chapter 7 →