1 Samuel 14 — Ilonggo (Ang Biblia (1982))

1Sa isa ka adlaw si Jonatan nga anak ni Saul nagsiling sa pamatan-on nga lalaki nga nagdala sang iya hinganib, “Kari ka, makadto kita sa pamakud sang mga Filistinhon nga yadto sa unhan sa pihak.” Apang wala sia magsugid sa iya amay.

2Si Saul nagpabilin sa higad gid sang Gabaa sa idalum sang granada nga yara sa Migron; ang katawohan nga nag-upud sa iya mga anum ka gatus ka lalaki,

3kag si Ahias nga anak ni Ahitub, utud ni Icabod, anak ni Finees, anak ni Eli, ang sacerdote sang Ginoo sa Siloi nagasuklub sang efod. Kag ang katawohan wala makahibalo nga si Jonatan naglakat.

4Sa tunga sang mga lubluban, nga ginhimulatan sa pagtaklad ni Jonatan pakadto sa pamakud sang mga Filistinhon, may gasanggasang nga bato sa pihak kag may gasanggasang nga bato sa pihak; ang ngalan sang isa Boses, kag ang ngalan sang isa Sene.

5Ang isa ka gasanggasang nagbuklod sa aminhan sa atubang sang Micmas, kag ang isa sa bagatnan sa atubang sang Gabaa.

6Busa si Jonatan nagsiling sa pamatan-on nga nagdala sang iya hinganib, “Kari ka, makadto kita sa pamakud sini nga mga dicircuncidado; ayhan ang Ginoo magahikot tungud sa aton; kay wala sing makasablag sa Ginoo sa pagluwas paagi sa madamu ukon paagi sa diotay.”

7Kag ang iya manugdala sang hinganib nagsiling sa iya, “Himoa ang tanan nga yara sa imo tagiposoon; dayon ka, yari karon, ako nagaupud sa imo, sono sa imo tagiposoon.”

8Niyan si Jonatan nagsiling, “Yari karon, magatabok kita pakadto sa mga tawo, kag magpakita kita sa ila.

9Kon magsiling sila sa aton sing subong sini, ‘Hulat kamo tubtub nga kami magkadto sa inyo,’ niyan magapahimonong kita sa aton duug, kag indi magtaklad sa ila.

10Apang kon magsiling sila sa aton sing subong sini, ‘Taklad kamo sa amon,’ niyan magataklad kita; kay ang Ginoo nagtugyan sa ila sa aton kamut. Kag ini mangintanda sa aton.”

11Gani nagpakita sila nga duha sa pamakud sang mga Filistinhon; kag ang mga Filistinhon nagsiling, “Yari karon, ang mga Hebreo naggowa sa mga boho nga ila ginpanagoan.”

12Kag ang mga lalaki sang pamakud nagsabat kay Jonatan kag sa iya manugdala sang hinganib, kag nagsiling, “Taklad kamo sa amon, kag pakitaan kamo namon sing isa ka butang.” Kag si Jonatan nagsiling sa iya manugdala sang hinganib, “Taklad ka sa olihi nakon; kay ang Ginoo nagtugyan sa ila sa kamut sang Israel.”

13Niyan si Jonatan nagtaklas sa iya mga kamut kag sa iya mga tiil, kag sa olihi niya ang iya manugdala sang hinganib. Kag napukan sila sa atubangan ni Jonatan, kag ang iya manugdala sang hinganib nagpatay sa ila sa olihi niya;

14kag yadto nga nahauna nga pagpamatay, nga ginhimo ni Jonatan kag sang iya manugdala sang hinganib, mga duha ka pulo ka lalaki sa sulud sang daw tunga sa acre nga duta.

15Kag may pagkurug sa dologan, sa latagon, kag sa tunga sang bug-os nga katawohan; ang pamakud kag ang mga manggugubat nagkurug man sila; nagkurug ang duta; gani may tama kadaku nga pagkurug.

16Kag ang mga bantay ni Saul sa Gabaa sang Benjamin naglantaw; kag yari karon, ang kadam-an nawala kag nagapakadto pakari sila.

17Niyan si Saul nagsiling sa katawohan nga yara upud sa iya, “Isipa ninyo karon kag tan-awa kon sin-o ang naglakat gikan sa aton.” Kag sang naisip nila, yari karon, si Jonatan kag ang iya manugdala sang hinganib wala didto.

18Kag si Saul nagsiling kay Ahias, “Dalha diri ang kaban sang Dios.” Kay ang kaban sang Dios yadto sa katawohan sang Israel sadto nga tion.

19Kag sang nagapakighambal pa si Saul sa sacerdote, ang kagahud nga didto sa dologan sang mga Filistinhon nagdayon kag nagdugang; kag si Saul nagsiling sa sacerdote, “Idolog ang imo kamut.”

20Niyan si Saul kag ang tanan nga katawohan nga yara upud sa iya nagtipon sing tingub kag nagkadto sa inaway; kag yari karon, ang espada sang tagsa ka tawo batok sa iya isigkatawo, kag may daku gid nga kagumon.

21Karon ang mga Hebreo nga upud sa mga Filistinhon subong sadto anay kag nagtaklad upud sa ila sa dologan, gikan sa duta sa palibut, bisan sila man nagtingub sa mga Israelnon nga yara upud kay Saul kag kay Jonatan.

22Subong man, ang tanan nga tawo sang Israel nga nagpanago sa kabakoloran sang Efraim sang nakabati sila nga ang mga Filistinhon nagpalagyo, bisan sila man naglagas sing tuudtuud sa ila sa inaway.

23Gani ang Ginoo nagluwas sang Israel sadto nga adlaw; kag ang pag-inaway nagligad sa luyo sang Bet-aven.

24Kag ang mga tawo sang Israel nalisdan sadto nga adlaw; kay si Saul nagpasumpa sa katawohan, nga nagasiling, “Pinakamalaut ang tawo nga nagakaon sing bisan ano nga kalan-on tubtub sa kahaponon kag ako matimalusan sa akon mga kaaway.” Gani wala sing bisan sin-o sang mga tawo nga nagtilaw sing kalan-on.

25Kag ang bug-os nga katawohan nagsulud sa talon; kag may dugus sa duta.

26Kag sang nag-abut ang katawohan sa talon, yari karon, ang dugus nagtolo, apang wala sing tawo nga nagbutang sang iya kamut sa iya baba; kay ang katawohan nahadluk sang sumpa.

27Apang si Jonatan wala makabati sang pagpasumpa sang iya amay sang katawohan; busa ginbayaw niya ang ukbung sang iya bilogon nga yara sa iya kamut, kag gintusmog ini sa suludlan sang dugus, kag ginbutang ang iya kamut sa iya baba; kag ang iya mga mata nagsanag.

28Niyan ang isa sang katawohan nagsiling, “Ang imo amay nagpasumpa sing malig-on sa katawohan, nga nagasiling, ‘Pinakamalaut ang tawo nga nagakaon sing kalan-on sini nga adlaw.’” Kag ang katawohan lata.

29Niyan si Jonatan nagsiling, “Ang akon amay nagpagamo sang duta; tan-awa kon paano nga nagsanag ang akon mga mata, bangud nga nagtilaw ako sing diotay sini nga dugus.

30Daw ano pa bala kon ayhan ang katawohan nakakaon sing hilway karon nga adlaw sang inagaw nga nakita nila gikan sa ila mga kaaway; kay karon wala sing daku nga kamatay sa mga Filistinhon.”

31Ginlaglag nila sadto nga adlaw ang mga Filistinhon kutub sa Micmas tubtub sa Ayalon. Kag ang katawohan tama kakotoy;

32nagdamhag ang katawohan sa inagaw, kag nagkuha sing mga carnero kag mga baka kag mga tinday sang baka, kag ginpatay sila sa duta; kag ang katawohan nagkaon sa ila pati sang dugo.

33Niyan ginsugid nila kay Saul, “Yari karon, ang katawohan nakasala batok sa Ginoo, nga nagakaon sila sing dugo.” Kag nagsiling sia, “Kamo nagmaluib; paligiri ninyo ako sing daku nga bato sini nga adlaw.”

34Kag si Saul nagsiling, “Pag-alaplaag kamo sa katawohan, kag isiling sa ila, ‘Dalhan ako diri sang tagsa ka tawo sang iya baka nga lalaki kag sang tagsa ka tawo sang iya carnero, kag ihawon sila diri, kag kaonon; kag dili kamo magpakasala sa Ginoo sa pagkaon sang dugo.’” Gani nagdala ang tagsa ka tawo sang iya baka sadto nga gab-i, kag gin-ihaw sila didto.

35Kag nagpatindug si Saul sing halaran sa Ginoo; ang amo nahauna nga halaran nga ginpatindug niya sa Ginoo.

36Niyan si Saul nagsiling, “Magdulhog kita sa kagab-ihon batok sa mga Filistinhon kag magkuha kita sing inatihan tubtub sa pagpamanagbanag; indi ta sila pagbilinan sing tawo.” Kag sila nagsiling, “Himoa ang ginapakamaayo mo.” Apang nagsiling ang sacerdote, “Magpalapit kita diri sa Dios.”

37Kag si Saul nagpangayo sing laygay sa Dios, “Magadulhog ako bala batok sa mga Filistinhon? Itugyan mo bala sila sa kamut sang Israel?” Apang sia wala magsabat sa iya sadto nga adlaw.

38Kag si Saul nagsiling, “Palapit kamo diri, kamo nga tanan nga pangolo sang katawohan; kag kilalaha kag tan-awa kon diin nagikan ini nga sala sini nga adlaw.

39Kay sa nagakabuhi ang Ginoo nga nagaluwas sang Israel, bisan ini kay Jonatan nga akon anak, mapatay sia sing totoo.” Apang wala sing tawo sa tunga sang bug-os nga katawohan nga nagsabat sa iya.

40Niyan nagsiling sia sa bug-os nga Israel, “Didto kamo sa pihak, kag ako kag si Jonatan nga akon anak manginsa isa ka pihak.” Kag ang katawohan nagsiling kay Saul, “Himoa ang ginapakamaayo mo.”

41Busa si Saul nagsiling, “O Ginoong Dios sang Israel, ipahayag ang matarung.” Kag si Jonatan kag si Saul ginkuha sa papalad; apang ang katawohan nahilway.

42Niyan si Saul nagsiling, “Papalari ako kag si Jonatan nga akon anak.” Kag ginkuha si Jonatan.

43Niyan si Saul nagsiling kay Jonatan, “Sugiri ako sang imo nahimo.” Kag nagsugid sa iya si Jonatan, “Nagtilaw ako sing diotay nga dugus sa ukbung sang bilogon nga yari sa akon kamut; yari ako, kinahanglan ako mapatay.”

44Kag si Saul nagsiling, “Ang Dios maghimo sang amo kag labi pa man; kay sa pagkamatuud mapatay ka, Jonatan.”

45Niyan ang katawohan nagsiling kay Saul, “Mapatay bala si Jonatan, nga naghikot sini nga daku nga kaluwasan sa Israel? Malayo sa ini! Sa nagakabuhi ang Ginoo, wala sing isa ka bohok sang iya olo nga maholog sa duta; kay naghikot sia upud sa Dios sini nga adlaw.” Gani si Jonatan ginluwas sang katawohan, sa bagay nga wala sia mapatay.

46Niyan si Saul nagtaklad gikan sa paglagas sa mga Filistinhon; kag ang mga Filistinhon nagpauli sa ila kaugalingon nga duug.

47Sang nabawi ni Saul ang ginharian sa Israel, nagpakig-away sia sa tanan niya nga kaaway sa palibut, batok sa Moab, batok sa mga anak sang Amon, batok sa Edom, batok sa mga hari sang Soba, kag batok sa mga Filistinhon; bisan diin sia iya magliso ginlaglag niya sila.

48Kag nag-isganan sia, kag naglaglag sang mga Amalecnon, kag nagluwas sang Israel gikan sa mga kamut sang mga nag-agaw sa ila.

49Karon ang mga anak nga lalaki ni Saul amo si Jonatan, si Isui, kag si Malquisua; kag ang mga ngalan sang iya duha ka anak nga babayi amo ini: ang ngalan sang panganay si Merab, kag ang ngalan sang manghud si Micol;

50kag ang ngalan sang asawa ni Saul si Ahinoam nga anak ni Ahimaaz. Kag ang ngalan sang pangolo sang iya kasoldadosan si Abner nga anak ni Ner, tiyo ni Saul;

51si Cis amay ni Saul, kag si Ner nga amay ni Abner anak nga lalaki ni Abiel.

52May inaway nga matama batok sa mga Filistinhon sa tanan nga adlaw ni Saul; kag kon makita ni Saul ang bisan sin-o nga tawo nga gamhanan, ukon ang bisan sin-o nga tawo nga isganan, ginapaimpon niya sa iya.