1 Samuel 29

Ilonggo (Ang Biblia (1982))

← Chapter 28 Jump to: Chapter 30 →

1Karon ang mga Filistinhon nagtipon sing tingub sang tanan nila nga kasoldadosan sa Afec; kag ang mga Israelnon nagpahamtang sing dologan sa luyo sang tuburan nga yara sa Jezreel.

2Ang mga ginoo sang mga Filistinhon nag-agi sa mga ginatus kag sa mga linibo, kag si David kag ang iya mga tawo nag-agi sa olihi gid upud kay Aquis,

3niyan nagsiling ang mga principe sang mga Filistinhon, “Ano bala ang ginahimo sini nga mga Hebreo diri?” Kag si Aquis nagsiling sa mga principe sang mga Filistinhon, “Indi bala ini si David, ang alagad ni Saul nga hari sang Israel, nga upud sa akon sini nga mga adlaw ukon sini nga mga tuig, kag wala ako sing nakita nga sayup sa iya kutub sang nagsaylo sia sa akon tubtub sini nga adlaw?”

4Apang ang mga principe sang mga Filistinhon naakig sa iya; kag ang mga principe sang mga Filistinhon nagsiling sa iya, “Pabalika ang tawo, agud nga magpauli sia sa iya duug nga gintangdo mo sa iya; kag dili sia pagpadulhoga upud sa aton sa inaway, basi nga sa inaway manginkasumpung naton sia. Kay sa ano bala ini nga tawo magpasag-uli sang iya kaugalingon sa iya ginoo? Indi bala paagi sa mga olo sini nga mga tawo?

5Indi bala ini si David, nga nahanungud sa iya nag-ambahanay sila sa mga saut, ‘Si Saul nakapaty sang iya linibo, Kag si David sang iya linaksa’?”

6Niyan gintawag ni Aquis si David kag nagsiling sa iya, “Sa nagakabuhi ang Ginoo, ikaw matarung, kag ang imo paggowa kag ang imo pagsulud upud sa akon sa kasoldadosan maayo sa akon itololok; kay wala ako sing nakita nga malaut sa imo kutub sang adlaw sang imo pag-abut sa akon tubtub sini nga adlaw. Wala sing sapayan ang mga ginoo wala mahamuut sa imo.

7Gani karon magbalik; kag maglakat sa paghidait, agud nga indi mo mapaakig ang mga ginoo sang mga Filistinhon.”

8Kag si David nagsiling kay Aquis, “Apang ano bala ang nahimo ko? Ano bala ang nakita mo sa imo alagad sa kadugayon nga yara ako sa atubangan mo tubtub sini nga adlaw, nga indi ako makalakat kag makaaway batok sa mga kaaway sang akon ginoo nga hari?”

9Kag si Aquis nagsabat kag nagsiling kay David, “Nakahibalo ako nga ikaw maayo sa akon itololok subong sang manugtunda sang Dios; wala sing sapayan ang mga principe sang mga Filistinhon nagsiling, ‘Dili sia magtaklad upud sa aton sa inaway.’

10Busa karon bangon ka sing aga pa upud sang mga alagad sang imo ginoo nga nagaupud sa imo; kag sa makabangon kamo sing aga pa kag may kasanag, magtaliwan.”

11Gani si David nagbangon sing aga pa sia kag ang iya mga tawo, sa pagtaliwan sa pagkaaga sa pagbalik sa duta sang mga Filistinhon. Apang ang mga Filistinhon nagtaklad sa Jezreel.

← Chapter 28 Jump to: Chapter 30 →