1 Samuel 10

Ilonggo (Ang Biblia (1982))

← Chapter 9 Jump to: Chapter 11 →

1Niyan si Samuel nagkuha sang suludlan sang lana kag ginbobo ini sa iya olo, kag ginhalukan sia kag nagsiling, “Indi bala nga ang Ginoo naghaplas sa imo nga manginprincipe sa ibabaw sang iya panublion?

2Kon makataliwan ka sa akon karon nga adlaw makita mo ang duha ka lalaki sa luyo sang lulubngan ni Raquel sa dulunan ni Benjamin sa Selsa, kag sila magasiling sa imo, ‘Ang mga asno nga imo ginlakat sa pagpangita nakita, kag karon ang imo amay nag-untat sa pagkabalaka sa mga asno kag nalangkag sa imo, nga nagasiling, “Ano bala ang himoon ko nahanungud sa akon anak?” ’

3Niyan kutub didto magpadayon ka kag magaabut ka sa terebinto sang Tabor; didto sugataon ka sang tatlo ka tawo nga nagataklad sa Dios sa Bet-el, ang isa nagadala sing tatlo ka tinday nga kanding, ang isa nagadala sing tatlo ka bilog nga tinapay, kag ang isa nagadala sing isa ka panit nga suludlan sang alak.

4Kag maga-abiabi sila sa imo kag magahatag sa imo sing duha ka bilog nga tinapay, nga batonon mo sa ila kamut.

5Sa tapus sina magakadto ka sa bakolod sang Dios, diin ang pamakud sang mga Filistinhon; kag kon mag-abut ka didto sa banwa, masugata mo ang isa ka kabon sang mga manalagna nga nagadulhog gikan sa duug nga mataas nga may salterio, panderita, lantoy, kag arpa sa una nila, nga nagapanagna sila.

6Niyan ang Espiritu sang Ginoo magaabut sing gamhanan sa imo, kag magapanagna ka kaupud nila kag mabalhin sa tuhay nga tawo.

7Karon kon mag-abut sa imo ining mga tanda, maghimo ka sono sa kahigayonan nga magaabut sa imo, kay ang Dios upud sa imo.

8Kag magdulhog ka sing una sa akon sa Gilgal; kag yari karon, magadulhog ako sa imo sa pagdolot sing mga halad-nga-sinonog kag sa paghalad sing mga halad-sa-paghidait. Maghulat ka sing pito ka adlaw, tubtub nga ako mag-abut sa imo kag magpahayag sa imo sang imo himoon.”

9Sang nagtalikod si Saul gikan kay Samuel, ang Dios nagbalhin sang iya tagiposoon; kag tanan yadtong tanda nahanabu sadtong adlaw.

10Sang pag-abut nila didto sa bakolod, yari karon, isa ka kabon sang mga manalagna nagsugata sa iya; kag ang Espiritu sang Dios nag-abut sing gamhanan sa iya, kag nagpanagna sia sa tunga nila.

11Kag sang nakita sang tanan nga nakakilala sa iya anay kon paano nga nagpanagna sia kaupud sang mga manalagna, ang katawohan nagsinilingay, “Ano bala ini nga nag-abut sa anak ni Cis? Si Saul bala sa tunga man sang mga manalagna?”

12Kag ang isa sa among duug nagsabat, “Kag sin-o bala ang amay nila?” Busa nahimo ining hulubaton, “Si Saul bala sa tunga man sang mga manalagna?”

13Sang nakatapus sia sa pagpanagna, nagkadto sia sa mataas nga duug.

14Ang tiyo ni Saul nagsiling sa iya kag sa iya alagad, “Diin bala kamo magkadto?” Kag sia nagsiling, “Sa pagpangita sang mga asno; kag sang wala namon makita sila, nagkadto kami kay Samuel.”

15Kag ang tiyo ni Saul nagsiling sa iya, “Ginaampo ko sa imo, sugiri ako sang ginsiling sa imo ni Samuel.”

16Kag si Saul nagsiling sa iya tiyo, “Nagsugid sia sa amon sing maathag nga ang mga asno nakita na.” Apang nahanungud sa ginharian, nga ginpamolong sa iya ni Samuel, wala niya sia pagsugiri.

17Karon gintawag sing tingub ni Samuel ang katawohan sa Ginoo sa Mizpa;

18kag nagsiling sia sa katawohan sang Israel, “Amo ini ang ginasiling sang Ginoo, ang Dios sang Israel, ‘Ako nagpataklad sang Israel gikan sa Egipto, kag ginluwas ko kamo sa kamut sang mga Egiptohanon kag sa kamut sang tanan nga ginharian nga nagpigus sa inyo.’

19Apang sa sining adlaw ginsikway ninyo ang inyo Dios, nga sia gid nagaluwas sa inyo sa tanan ninyong kalalat-an kag sa inyo kalisdanan; kag nagsiling kamo sa iya, ‘Dili! kondi butangi kami sing hari sa ibabaw namon.’ Busa karon mag-atubang kamo sa Ginoo sono sa inyo mga kabikahan kag sono sa inyo mga linibo.”

20Niyan ginpapalapit ni Samuel ang tanan nga kabikahan sang Israel, kag ang kabikahan ni Benjamin ginkuha.

21Ginpapalapit niya ang kabikahan ni Benjamin sono sa ila mga panimalay, kag ang panimalay sang mga taga-Matri ginkuha; kag si Saul nga anak ni Cis ginkuha. Apang sang ginpangita sia nila, wala sia makita.

22Gani nagpamangkot pa sila sa Ginoo, “May tawo pa bala nga magakari diri?” kag ang Ginoo nagsabat, “Yari karon, nagpanago sia sa tunga sang mga dinala.”

23Niyan nagdalagan sila kag ginkuha sia gikan didto; kag sang nagtindug sia sa tunga sang katawohan, naglabaw pa sia sa bisan kay sin-o sang katawohan kutub sa iya mga abaga pa ibabaw.

24Kag si Samuel nagsiling sa bug-os nga katawohan, “Nakita bala ninyo sia nga ginpili sang Ginoo? Wala sing kaangay niya sa bug-os nga katawohan.” Kag ang bug-os nga katawohan nagsinggit, “Mabuhi ang hari!”

25Niyan si Samuel nagsugid sa katawohan sang kahimtangan sang ginharian; kag ginsulat ini sa tolon-an kag ginpahamtang ini sa atubangan sang Ginoo. Niyan ginpapauli ni Samuel ang bug-os nga katawohan, ang tagsa ka tawo sa iya balay.

26Si Saul man nagpauli sa iya balay sa Gabaa, kag nag-upud sa iya ang kasoldadosan nga ang tagiposoon nila gintandug sang Dios.

27Apang ang pila ka mga tawo nga huroshuros nagsiling, “Paano bala nga pagluwas sini nga tawo sa aton?” Kag gintamay sia nila, kag wala nila sia pagdalhi sing dolot. Apang sia naghipus.

← Chapter 9 Jump to: Chapter 11 →