1 Samuel 21

Ilonggo (Ang Biblia (1982))

← Chapter 20 Jump to: Chapter 22 →

1Niyan nag-abut si David sa Nob kay Ahimelec nga sacerdote; kag si Ahimelec nagsugata nga nagakurug kay David, kag nagsiling sa iya, “Ngaa bala isa ka lamang, kag wala sing tawo upud sa imo?”

2Kag nagsiling si David sa sacerdote nga si Ahimelec, “Ang hari nagtugyan sa akon sing hilikuton, kag nagsiling sa akon, ‘Wala sing bisan sin-o nga tawo nga makahibalo sang hilikuton nga ginapadala ko ikaw, kag sang akon ginsogo sa imo.’ Ako nagtangdo sang mga pamatan-on nga lalaki sa amo kag sa amo nga duug.

3Busa karon, ano bala ang yara sa imo kamut? Hatagi ako sing lima ka bilog nga tinapay sa akon kamut, ukon ang bisan ano nga yara.”

4Kag ang sacerdote nagsabat kay David, “Wala ako sing tinapay nga kinaugali sa akon kamut, ‘Kondi may tinapay nga balaan; kon lamang ang mga pamatan-on nakapahilayo sa mga babayi.”

5Kag si David nagsabat sa sacerdote, “Sa pagkamatuud ang mga babayi nahilayo sa amon sing mga tatlo ka adlaw; sang paggowa ko, ang mga suludlan sang mga pamatan-on balaan, bisan nga ini pagpanlakatan nga kinaugali; daw ano pa gid bala kabalaan sang ila mga suludlan karon nga adlaw?”

6Gani ginhatag sa iya sang sacerdote ang tinapay nga balaan; kay didto wala sing iban nga tinapay kondi ang mga tinapay nga inugpahayag, nga ginkuha sa atubangan sang Ginoo, sa pagbutang sing mga tinapay nga mainit sa adlaw nga ginkuha ini.

7Karon sadto nga adlaw yadto didto ang isa ka tawo sang mga alagad ni Saul, nga nagpabilin sa atubangan sang Ginoo; ang iya ngalan si Doeg nga Edomnon, ang pangolo sang mga manugbantay sang kahayupan nga iya ni Saul.

8Kag si David nagsiling kay Ahimelec, “Wala bala diri sa kamut mo sing bangkaw ukon espada? Kay wala ko madala ang akon espada ukon ang akon mga hinganiban upud sa akon, bangud nga ang hilikuton sang hari nagkinahanglan sing pagdali.”

9Kag ang sacerdote nagsiling, “Ang espada ni Goliat nga Filistinhon, nga imo ginpatay sa nalupyakan sang Ela, yari karon, naputus ini diri sa panapton sa likod sang efod; kon buut mo kuhaon ina, kuhaa ini, kay wala na sing iban luwas sina diri.” Kag nagsiling si David, “Wala na sing iban nga kaangay sina; ihatag sa akon ini.”

10Kag si David nagtindug kag nagpalagyo sadto nga adlaw sa kahadluk kay Saul, kag nagkadto kay Aquis nga hari sang Gat.

11Kag ang mga alagad ni Aquis nagsiling sa iya, “Indi ini bala si David nga hari sang duta? Wala bala sila mag-ambahanay nahanungud sa iya sa mga sinaut, ‘Si Saul nagpatay sang iya linibo, Kag si David sang iya linaksa’? ”

12Kag ginhuptan ni David sa iya tagiposoon ini nga mga polong, kag nahadluk sing tama kay Aquis nga hari sang Gat.

13Gani nagbaylo sia sang iya pagginawi sa atubangan nila, kag nagpakabuang sa tunga sa mga kamut nila, kag nagkudlitkudlit sa mga takup sang gawang, kag ginpailig niya ang iya laway sa iya bungut.

14Niyan si Aquis nagsiling sa iya mga alagad, “Yari karon, ginatan-aw ninyo nga ang tawo buang; ngaa bala nga gindala ninyo sia sa akon?

15Nakulangan bala ako sing buang nga mga tawo, nga gindala ninyo ini nga tawo sa pagpabuangbuang sa atubangan nakon? Magasulud bala ini nga tawo sa akon balay?”

← Chapter 20 Jump to: Chapter 22 →