1 Samuel 26

Ilonggo (Ang Biblia (1982))

← Chapter 25 Jump to: Chapter 27 →

1Niyan nag-abut ang mga Zifhanon kay Saul sa Gabaa, nga nagasiling, “Wala bala si David nagapanago sa bakolod sang Haquila, nga yara sa atubang sang desierto?”

2Gani si Saul nagtindug kag nagdulhog pakadto sa kamingawan sang Zif, nga may tatlo ka libo ka lalaki nga pinili sa Israel upud sa iya, sa pagpangita kay David sa kamingawan sang Zif.

3Kag si Saul nagpahamtang sing dologan sa bakolod sang Haquila, nga yara sa atubang sang desierto sa luyo sang dalan. Apang si David nagpuyo sa kamingawan; kag sang nakita niya nga si Saul nag-abut sa olihi niya sa kamingawan,

4si David nagpadala sing mga lampitaw, kag nakahangup nga sa pagkamatuud si Saul nag-abut.

5Niyan si David nagtindug kag nag-abut sa duug diin si Saul nagpahamtang sing dologan; kag nakita ni David ang duug nga ginhigdaan ni Saul, kag ni Abner nga anak ni Ner, ang pangolo sang iya kasoldadosan; si Saul nagahigda sa tunga sang mga karo, kag ang katawohan nahamtang sa dologan sa palibut niya.

6Niyan si David nagsiling kay Ahimelec nga Hethanon, kag kay Abisai nga anak ni Sarvia, utud ni Joab, “Sin-o bala ang magadulhog kaupud nakon kay Saul sa dologan?” Kag nagsiling si Abisai, “Ako magadulhog upud sa imo.”

7Gani si David kag si Abisai nagkadto sa katawohan sa kagab-ihon; kag didto si Saul nagahigda nga nagakatolog sa tunga sang mga karo, nga ang iya bangkaw nabugsok sa duta sa iya olohan; kag si Abner kag ang katawohan nagahigda sa palibut niya.

8Niyan si Abisai nagsiling kay David, “Gintugyan sang Dios ang imo kaaway sa imo kamut sining adlaw; busa karon ako ang pabun-a sa iya sang bangkaw sa duta sa isa ka pagbuno, kag indi ko na sia pagbun-on sa ikaduha.”

9Apang si David nagsiling kay Abisai, “Dili sia paglaglaga; kay si sin-o bala ang makauntay sang iya kamut batok sa hinaplas sang Ginoo, kag manginwalay sala?”

10Kag si David nagsiling, “Sa nagakabuhi ang Ginoo, ang Ginoo magasakit sa iya; ukon ang iya adlaw nga ikamatay magaabut; ukon magadulhog sia sa inaway kag mawala.

11Ang Ginoo nagadumili nga mag-untay ako sang akon kamut batok sa hinaplas sang Ginoo; apang kuhaa karon ang bangkaw nga yara sa iya olohan, kag ang tibud sang tubig, kag maglakat kita.”

12Gani ginkuha ni David ang bangkaw kag ang tibud sang tubig sa olohan ni Saul; kag nagpalayo sila. Walay tawo nga nakakita sini, ukon nakahibalo, kag wala sing bisan sin-o nga nakamata; kay tanan sila nagakatolog, bangud nga ang isa ka hamook nga katologon gikan sa Ginoo naholog sa ila.

13Niyan si David nagkadto sa pihak, kag nagtindug sa putokputokan sang bukid sa malayo, nga may kalaparan sa ulut nila;

14kag nagsinggit si David sa katawohan, kag kay Abner nga anak ni Ner, nga nagasiling, “Wala ka bala nagasabat, Abner?” Niyan si Abner nagsabat, “Sin-o ka bala nga nagasinggit sa hari?”

15Kag si David nagsiling kay Abner, “Indi bala ikaw lalaki nga isganan? Sin-o bala ang kaangay sa imo sa Israel? Ngaa bala niyan nga wala mo pagbantayi ang imo ginoo nga hari? Kay may nagsulud nga isa sang katawohan sa paglaglag sang hari nga imo ginoo.

16Ining butang nga imo nahimo indi maayo. Sa nagakabuhi ang Ginoo, bagay ka sa kamatayon, bangud nga wala ninyo pagbantayi ang inyo ginoo, ang hinaplas sang Ginoo. Kag karon tan-awa kon diin ang bangkaw sang hari, kag ang tibud sang tubig nga yara sa iya olohan.”

17Nakilala ni Saul ang tingug ni David, kag nagsiling, “Imo bala ini tingug, anak kong David?” Kag si David nagsiling, “Akon ini tingug, ginoo ko, O hari.”

18Kag nagsiling sia, “Ngaa bala nagalagas ang akon ginoo sa iya alagad? Kay ano bala ang nahimo ko? Ano bala nga malaut ang yari sa akon kamut?

19Busa karon magpamati ang akon ginoo nga hari sang mga polong sang iya alagad. Kon ang Ginoo ang nagsugyot sa imo batok sa akon, pabatona sia sing halad; apang kon mga anak sila sang mga tawo, pakamalauton sila sa atubangan sang Ginoo, kay gintabog nila ako sining adlaw agud nga manginwalay bahin ako sa panublion sang Ginoo, nga nagasiling, ‘Lakat, alagda ang iban nga mga dios.’

20Busa karon, indi maholog ang akon dugo sa duta malayo sa atubangan sang Ginoo; kay naggowa ang hari sang Israel sa pagpangita sang bitik, subong sang isa nga nagapangayam sing pitaw sa kabukiran.”

21Niyan si Saul nagsiling, “Nakasala ako; balik ka, anak kong David, kay indi na ako maghimo sing malain sa imo, bangud nga ang akon kabuhi mahal sa imo mga mata sining adlaw; yari karon, ako nagpakabuang, kag nagsayup sing lakas.”

22Kag si David nagsabat, “Yari ang bangkaw, O hari! pakaria ang isa sang mga pamatan-on kag magkuha sini.

23Ang Ginoo magabayad sa tagsa ka tawo sang iya pagkamatarung kag sang iya pagkatutum; sa bagay nga ang Ginoo nagtugyan sa imo sa akon kamut karon nga adlaw, kag indi ako buut mag-untay sang akon kamut batok sa hinaplas sang Ginoo.

24Yari karon, subong nga ang imo kabuhi ginpakamahal gid sining adlaw sa akon mga mata, sa amo pakamahalon gid ang akon kabuhi sa mga mata sang Ginoo, kag luwason niya ako sa tanan nga kangitngitan.”

25Niyan si Saul nagsiling kay David, “Bulahan ka, anak kong David! Mangingamhanan ka kag magalandas sa pagkamatuud.” Gani si David nagpadayon sa iya dalanon, kag si Saul nagpauli sa iya duug.

← Chapter 25 Jump to: Chapter 27 →