1 Chronicles 12

Ika 2018 Bible

← Chapter 11 Jump to: Chapter 13 →

1Ọnwan wụ ikẹnnyẹ ndị bịa Zik'lagị d'a bannị Defidi ogẹn o gi gha Izrẹlụ gbapụnị eze wụ Sọlụ nwa Kishi. Wẹ rị ndị odogun-agha hụn yen'ẹ ẹka lụ agha ichẹn-ichẹn ọ lụ.

2Wẹ wụ ndị a gba ụta, ndị ma gi ẹka ọwụlẹ gba ụta lẹ araba: kẹ ẹka-nni kẹ ẹka-ekpẹn. Wẹ ile wụ ndị ebọn eze wụ Sọlụ onyẹ ebọn Bẹnjamini. Wẹ wụ ndịnị:

3Ahiẹza onyẹ-isi wẹ lẹ Jụashị ụmụ Shẹmaa onyẹ Gibia, Jeziẹlụ lẹ Pẹlẹtị ụmụ Az'mavẹti, uwẹ lẹ Bẹraka lẹ Jehu onyẹ Anatọtụ

4lẹzi Ishmaya onyẹ Gibiọnụ. Ishmaya rị imẹ Ndị Odogun-agha iri kwasị ọgụn Ahụn; onyẹ-isi k'ọ wụ imẹ wẹ Iri kwasị ọgụn. Ndị ọzọ hụn bịa d'a bannị Defidi wụ Jerimaya, Jahaziẹlụ, Johananị, Jozabadị onyẹ Gẹdẹra,

5Ẹluzaị, Jẹrimọtụ, Bịalia, Shẹmarịa lẹ Shẹfatịa onyẹ Harufu;

6Ẹl'kana, Ishia, Azarẹlụ, Jo-eza lẹ Jashobịam — ndị ẹbozo Kora;

7Jo-ẹla lẹ Zẹbadịa ụmụ Jẹroham, ndị Gẹdọ.

8O nwọnzighọ ndị Gadị pụha d'a bannị Defidi ebẹhụ ọ nọ e che ẹhụ imẹ atụ. Ndị odogun-agha egun ghalẹni a tụ kẹ wẹ wụ, wẹ kwademẹ agha; wẹ ma gi akpaịn lẹ obo lụ agha. Ihun wẹ a tụ egun kẹ nke ẹwọrọ; w'e be nkanran kẹ ele rị elu-ugu.

9Ẹza kị wẹ, Obadaya wụ ọb'ẹbụọ, Ẹliabụ wụ ọb'ẹtọ.

10Mishmana wụ ọb'ẹnọ, Jerimaya wụ ọb'isẹn.

11Ataị wụ ọb'isin, Ẹliẹlụ wụ ọb'ẹsa,

12Johananị wụ ọb'ẹsatọ, Ẹl'zabadị wụ ọb'itenẹi,

13Jerimaya wụ ọb'iri, Mak'banaị wụ ube mmanaị.

14Ndị Gadị ndịnị wụ ndị isi-agha — ndị ka ntịn imẹ wẹ kị mmadụ ọgụn-isẹn, ndị kanị kị mmadụ nnụ-uku.

15Uwẹ fetu Iyi-Jọdanị imẹ ifọn ibuzọ, ogẹn o gi junpụha ọnụ, chụzịza ndị ile bi ọdanmgbugbu Jọdanị, kẹ ndị bi ẹbamịn ọwụwa-ẹnyanwụn kẹ ndị bi ẹbamịn ọdịdan-ẹnyanwụn.

16O nwọnzighọ ndị ọzọ gha ebọn Bẹnjamini lẹ ebọn Juda bịa d'a bannị Defidi ebẹhụ fụ ọrụn ọbanye ọ warị.

17Ya Defidi nọ pụha d'e kunrun wẹ, sị wẹ, “Omẹni ihiẹn rị mma kẹ ụnụ bịanị, nị ẹka kẹ ụnụ bịa d'e yeni m, ọ sụọghọ m nị mmẹ lẹ ụnụ nọgbama. Kanị omẹni orire kẹ ụnụ bịa d'e re m ye ndị iṅẹnrẹn m, bụ onwọnni eje-ihiẹn rị m ẹka, Chuku ndị nẹdi ẹnyi ya hụn a, gi ẹ kin ụnụ ikpe.”

18Ya kẹ Mmọn (Chuku) nọ nu Amasaị hụn a kị Ndị Odogun-agha Iri kwasị ọgụn Ahụn, ọ nọ sị: “Defidi, nke i kẹ ẹnyi wụ! Nwa Jese, ẹnyi lẹ ịyụ wị! Ihun-ihun kẹ w'a gha a hụn ị; ihun-ihun kẹ w'a gha a hụn ndị e yeni i ẹka; makẹni Chuku i k'e yen'i ẹka.” Ya Defidi nọ nabanhan wẹ, gi wẹ họnrinsọnmẹ ndị a kịn'a itu ichẹn-ichẹn e jẹnn'ẹ ọgụn.

19O nwọnzighọ ndị ebọn Manasẹ hụn bannị Defidi ogẹn o gi sọnjẹnkọ ndị Filistia d'a lụsọn Sọlụ agha. (Kanị, ya lẹ itu ẹ eyenini ndị Filistia ẹka, makẹni ogẹn ndị-isi alị Filistia gi zugụ, wẹ nọ sị a lama, sị, “O ru ẹ tan o gi isi ẹnyi channị di-nwọnn'ẹ wụ Sọlụ ẹnya!”)

20Ogẹn Defidi gi nwan lashikọ Zik'lagị kẹ ndị Manasẹ ndịnị latọ eze wụ Sọlụ gi bann'a: Adnaha, Jozabadị, Jediẹlụ, Maịkẹlụ, Jozabadị ọzọ, Ẹlihu lẹ Zilẹtaị. Wẹ kịsọnmẹ ndị-agha nnụ-uku imẹ ebọn Manasẹ.

21Wẹ yeni Defidi ẹka lụsọn itu ichẹn-ichẹn ndị e gbu a kwarị, makẹni wẹ ile wụ ndị odogun-agha egun ghalẹni a tụ lẹ ndị ọkị-agha.

22Ụhụọhịn-ụhụọhịn kẹ ndị rị ichẹn-ichẹn gi rị a bịacheni d'a bannị Defidi — d'e runi ndị-agha a a barahị nọkẹ ebe Osolobuẹ nọ e kokomẹ ndị-agha.

23Ọnwan wụ mmadụ ole kwademẹ agha d'e kunrun Defidi imẹ Hibrọnụ, d'e we ọkịkị alị-eze Izrẹlụ rị ẹka Sọlụ ye Defidi kẹ Osolobuẹ dọn ku:

24Ndị ebọn Juda hụn busọnmẹ akpaịn lẹ obo, kwademẹgụ agha, rị mmadụ nnụ mmẹsa (6,800).

25Ndị ebọn Simiọnụ, ndị odogun-agha hụn kwademẹgụ agha wụ mmadụ ọgụn mmisẹn kwasị nnụ mmẹsa (4,600).

26Ndị ebọn Livaị wụ mmadụ ọgụn-iri kwasị nnụ mmanaị (4,600),

27Jehoyada hụn wụ onyẹ-ndu ikpụlọ Ẹrọnụ lẹ mmadụ ọgụn-isẹn kwasị nnụ-itenẹi (3,700) ya lẹ wẹ wị rị imẹ ndịnị;

28Zadọkụ, okorọbịa hụn wụ odogun-agha egun ghalẹni a tụ lẹ ndị ikpụlọ wẹ ẹbụọ kwasị ọgụn hụn wụ ndị-isi agha rịzị imẹ wẹ.

29Ndị ebọn Bẹnjamini rịn'a, ndị ebọn Sọlụ wẹ, rị mmadụ ọgụn iri kwasị nnụ ẹsa (3,000) — ndị ka ọda imẹ wẹ te rịchanrịnnị ikpụlọ Sọlụ.

30Ndị ebọn Ifrem rịn'a rị mmadụ nnụ mmẹbụọ kwasị ọgụnnaị (20,800), ndị-odogun egun ghalẹni a tụ, hụn w'a nụ ẹfan wẹ imẹ ebọn wẹ.

31Ndị rịn'a hụn wụ ndị azụụn ohu imẹ ebọn Manasẹ rị mmadụ nnụ isẹn kwasị ọgụnnaị wẹ kpọ ẹfan zi d'e kin Defidi eze.

32Ndị ebọn Isaka rịn'a rị mmadụ ọgụn-iri, ndị-isi ndị-isi uwẹ lẹ umunẹ wẹ ile sọnhẹnni wẹ — ndị marịn ihiẹn furu Izrẹlụ k'e mẹ lẹ ogẹn furu w'e gi mẹ ẹ.

33Ndị ebọn Zẹbulọnụ rịn'a rị mmadụ nnụ-isẹn kwasị nnụ-ọgụn-isin (50,000), ndị marịn ẹnya agha, kwademẹgụ agha, busọnmẹ ihiẹn-ọgụn ile rị ichẹn-ichẹn — wẹ bịa d'e gichanrịn obi wẹ yeni Defidi ẹka.

34Ndị ebọn Naf'tali rịn'a wụ ndị-isi agha ọgụn-iri kwasị nnụnaị (1,000) lẹ ndị-agha nnụ mmẹbụọ lẹ mkpikpi kwasị nnụ ọgụn-ẹnọ rị okpuru wẹ (37,000).

35Ndị ebọn Danị rịn'a, hụn kwademẹgụ agha bịa rị ọgụn-iri kwasị nnụ mmanaị kwasị nnụ ọgụn ẹtọ (28,600).

36Ndị ebọn Asha, ndị marịn ẹnya agha, hụn kwademẹ agha bịa, rị nnụ ọgụn isẹn (40,000).

37Ndị nfetu Iyi Jọdanị rịn'a, ndị rị ibe ọwụwa ẹnyanwụn Iyi Jọdanị — ya wụ ndị ebọn Rubẹni, ebọn Gadị lẹ azụụn nke ẹbụọ imẹ ebọn Manasẹ — rị nnụ ọgụn mmisẹn (120,000); wẹ busọnmẹ ihiẹn-ọgụn rị ichẹn-ichẹn.

38Ndịnị ile wụ ndị-agha, hụn wepụha enwẹn wẹ nị wẹ lụ agha ebe-lẹ-ebe ndị isi agha jẹnkọ d'e zi wẹ. Wẹ bịa Hibrọnụ makẹni a kwademẹchanrịngụọ wẹ obi wẹ nị wẹ jẹnkọ d'e kin Defidi eze Izrẹlụ. Ndị Izrẹlụ ile họdụnị kwerizikwọ ihiẹn ohu hụ — nị wẹ jẹnkọ d'e kin Defidi eze.

39Ndịnị lẹ Defidi nọ ri, ra — akp'ọhịn ẹtọ — makẹni ndị ikpụlọ wẹ buyesọnmẹ wẹ ihiẹn-oriri.

40Ndị nke wẹ hụzị a ghakwọrị Isaka, Zẹbulọnụ lẹ Naf'tali e gi anyịnyan-jaki, anyịnyan-mkpukpuke, anyịnyan-mulu lẹ okẹn-efin e buhẹsọnmẹ ihiẹn-oriri. Ọka wẹ gweriẹn e jun, kẹ figi lẹ mkpụrụ vaịnị wẹ pịngbama kikọ kẹ manya kẹ ofigbọn-olivu kẹ efin kẹ atụnrụn, wẹ ile e jun — makẹni alị Izrẹlụ ile rị a ghọghọ.

← Chapter 11 Jump to: Chapter 13 →