1 Chronicles 28

Ika 2018 Bible

← Chapter 27 Jump to: Chapter 29 →

1Defidi kpọgbama ndị ile gi ọkwa imẹ Izrẹlụ, wẹ nọ zu imẹ Jerusalẹm. Ndị isi ebọn ichẹn-ichẹn hụ a; ndị ọkị-agha a kị itu-agha ichẹn-ichẹn eze hụ a — kẹ ndị hụn a kị ndị agha nnụ-uku kẹ ndị hụn a kị ndị agha ọgụn-isẹn; ndị ile e lepụnị eze lẹ ụmụ a ikẹnnyẹ ihiẹn lẹ anụ ile hụzị ebẹhụ; ndị ahụn ile wẹ wara ye ọkwa uku ọgwa eze hụ a; ndị odogun-agha hụ a. Ndị ile wụ ndị hụ ebẹhụ.

2Eze wụ Defidi nọ wuzo ọtọ, sị, “Umunẹ m lẹ ndị nke m, gọn ni m ntịn. M te bu ẹ obi nị m k'a tụn ebe Ẹkpẹti Nkwerigbama Osolobuẹ k'a nọdịchanrịn, ebe Chuku ẹnyi k'a tụkwasị ụkụ, m nọ kwademẹ ihiẹn m'e gi tụn a.

3Kanị Chuku nọ sị m, ‘Ẹlẹ ịyụ k'a tụnnị m ụlọ, makẹni ị wụ onyẹ-agha lẹ ni y'e gbuọlẹ ịhịan ọda.’

4“Kanị, mmẹ kẹ Osolobuẹ wụ Chuku Izrẹlụ gha imẹ ezi-lẹ-ụlọ ẹnyi ile họrị d'a wụrụ eze Izrẹlụ jẹnrin ejẹn. Ịya họrị ebọn Juda n'ọ wụrụ onyẹ-ndu; ọ nọ gha imẹ ebọn Juda họrị ikpụnọ nẹdi m; ọ nọ sụọ a n'ọ họrị m imẹ ụmụ nẹdi m mụ, tumẹ m eze Izrẹlụ ile.

5“Eziẹ Osolobuẹ e yegụọ m ikẹnnyẹ bu ọda — kanị imẹ ikẹnnyẹ ile m mụ, nwa m wụ Solomọnụ kẹ Osolobuẹ họrị n'ọ nọdị ukpo Izrẹlụ, alị-eze Osolobuẹ, kị a.

6Ọ sị m: ‘Solomọnụ nwa ị wụ onyẹ hụn k'a tụn ụlọ m lẹ ezi-ọgwa ndị jẹnkọ d'a rịn'a, makẹni a họrịgụọ m'a n'o họnrin nwa m, e họnrin m nẹdi ẹ.

7M k'e mẹ alị-eze ẹ turu jẹnrin ejẹn, omẹni o mẹsọnmẹghọ ihiẹn m ku lẹ iwu m rị ichẹn-ichẹn, kẹ wẹ dọn nwan rị e mẹ ẹ tannị.’

8“M rị nwan idẹnya Izrẹlụ ile lẹ igunrun ndị nke Osolobuẹ a gwakẹnmẹ ụnụ hụn Osolobuẹ rị a nụ: Dọnrinkwọ nị ẹnya mẹ ihiẹn ile Osolobuẹ wụ Chuku sị ụnụ mẹ, nị ụnụ hụn ụzọ nwọnrin ezigbo alịnị, we ẹ ye ẹbozo ụnụ n'ọ wụferi ukuu wẹ.

9“Ịyụ nwẹn wụ Solomọnụ nwa m, marịnkwọ Chuku nẹdi i, y'e wechanrịn enwẹn i kwan'a, wepụhachanrịn obi fe ẹ. Makẹni, Osolobuẹ e lele obi ọwụlẹ, a ghọtachanrịn ihiẹn ịhịan rị e ro. Ị chọ a, ọ nị ị hụn a; kanị ị gbakitọ a azụụn, ọ jụ ị tọ jẹnrin ejẹn.

10Lee ẹ nwan, Osolobuẹ a họrịgụọ ị d'a tụn ụlọ-nsọ wẹ k'a nọ e fe ẹ. Jikẹnmẹ, n'ị rụn ọrụn hụ.”

11Ịya kẹ Defidi nọ ye Solomọnụ nwa a ihiẹn o setọ wẹ k'e leri tụn ụlọ-nsọ hụ — kẹ ibẹrẹ-nta w'a ghagụ wẹ kebe banye Ụlọ-nsọ kẹ ụnọ ndị rịn'a kẹ mmughẹ ndị wẹ k'e dọnmẹ ihiẹn kẹ mmughẹ ndị rị ibe elu ẹ kẹ mmughẹ rịsọnmẹ imẹ ẹ kẹ Ebẹhụ kachanrịn nsọ w'a nọ a chụn ẹjan mgbarị-isi.

12Defidi yechanrịn a ihiẹn o k'e leri tụn ihiẹn ile Mmọn Osolobuẹ buche Defidi obi banyeni ezi-ọgwa lẹ ezi-ẹgodo ụlọ-nsọ Osolobuẹ lẹ mmughẹ ile fihunmẹn'ẹ lẹ mmughẹ ndị wẹ k'e butọ ihiẹn ụlọ-nsọ Chuku lẹ ndị wẹ k'e butọ ihiẹn ndị wẹ gi kwanị Osolobuẹ.

13Defidi nọzị gwa Solomọnụ itu-itu o dọnmẹsọnmẹ ndị nchụn-ẹjan lẹ ndị Livaị lẹ ndị ile jẹnkọ d'a rụn ọrụn imẹ ụnọ-nsọ Osolobuẹ, gwazị a oku ihiẹn ndị wẹ gisọnmẹ a rụn ọrụn imẹ ụnọ-nsọ.

14Ọ gwazị a ibe goru lẹ siliva ole-ole wẹ k'e gi mẹmẹsọnmẹ ihiẹn goru lẹ siliva ile wẹ k'e gi rụn ihiẹn ichẹn-ichẹn imẹ ụlọ-nsọ:

15ibe goru ole-ole wẹ kẹ gi mẹmẹ obu-ukpẹ goru ndị hụ lẹ ukpẹ wẹ. Ọ gwazịghọ ole wẹ gi mẹmẹ obu-ukpẹ ohu-ohu lẹ ukpẹ ẹ lẹ ibe siliva ole w'e gi mẹmẹ obu-ukpẹ siliva ohu-ohu lẹ ukpẹ ẹ: obu-ukpẹ ọwụlẹ lẹ goru mọbụ siliva ọrụn a chọ;

16ọ gwazị a ibe goru ole w'e gi rụn teburu w'e butọ brẹdi-nsọ w'e wepụhanị Osolobuẹ lẹ ibe siliva ole-ole w'e gi mẹmẹ teburu siliva ohu-ohu.

17Defidi gwazị Solomọnụ ibe goru ole wẹ k'e gi mẹmẹ ndụndụn lẹ afẹrẹ w'e gi e fekpu lẹ mkpu, ibe goru ole wẹ sikọ d'e gi mẹmẹ afẹrẹ goru ohu-ohu lẹzi ibe siliva ole-ole w'e gi mẹmẹ afẹrẹ siliva ohu-ohu.

18Ọ gwazị Solomọnụ kẹ goru wẹ chanchan ọhụnma-ọhụnma wẹ sikọ d'e gi rụn ukpo-nsẹnsị k'a han. Ọ gwazị a kẹ wẹ k'a dọn mẹmẹ okun Ẹkpẹti-nkwerigbama, ụgbọ ahụn bu ndị chẹrobu ẹbụọ hụ nwọn nku wẹ gi goru kpụ hụn shịapụsọnmẹ nku wẹ kpu Ẹkpẹti-nkwerigbama Osolobuẹ.

19Defidi nọ sị Solomọnụ, “Ihiẹnni ile wẹ detu ebeni nọchanrịn kẹ Osolobuẹ dọn ghọsị m, ihiẹn ile wẹ sikọ d'a rụn lẹ kẹ wẹ k'a dọn rụn wẹ.”

20Defidi nọ nwan sị Solomọnụ nwa a, “Kakẹnmẹ. Kwọndọn obi i, n'ị rụn ọrụn ahụn. Atụkwọlẹ egun mọbụ nị ndụn gụ ị, makẹni Osolobuẹ hụn wụ Chuku — hụn wụ Chuku m — nọyen'i anọyeni. Ọ nịkọ ụya ri i mọbụ la i tọ y'e we rụngụ ọrụn ile rị ụlọ-nsọ Osolobuẹ.

21“E lee itu ichẹn-ichẹn ndị nchụn-ẹjan lẹ ndị Livaị hụn jẹnkọ d'a rụn ọrụn ile rị ụlọ-nsọ Chuku! Ndị ile wepụha obi wẹ lẹ ndị ile marịn ọrụn nka ichẹn-ichẹn sikọ d'e yen'i ẹka rụn ihiẹn ile rị ọrụn ahụn; ndị isi lẹ ndị mmaka ile k'e mẹ ihiẹn ọwụlẹ ị sị wẹ mẹ.”

← Chapter 27 Jump to: Chapter 29 →