1 Chronicles 19

Ika 2018 Bible

← Chapter 18 Jump to: Chapter 20 →

1O tebe, eze ndị Amọnụ wụ Nahashi a nwụnhụn, nwa a wụ Hanunu nọ rikin ẹ eze.

2Defidi nọ sị enwẹn ẹ, “M k'e mẹ Hanunu nwa Nahashi kẹ ọwụ, makẹni nẹdi ẹ mẹ m kẹ ọwụ.” Ya kẹ Defidi nọ han ndị ụkọ d'a hụn Hanunu hụn nẹdi ẹ gi nwụn. Ogẹn ndị Defidi zi gi bịa d'e kunrun Hanunu imẹ alị Amọnụ nị wẹ hụn a makẹ ọnwụn nẹdi ẹ,

3ndị-isi alị Amọnụ nọ sị eze wẹ wụ Hanunu, “I roni Defidi zihẹ ndịnị d'a rọkọ i obi makẹni ọ rị e ye nẹdi i ọghọ? Y'a marịn nị ndịnị bịa d'e gi nzuzue chọpụha kẹ alịnị nọ nị wẹ hụn ụzọ bịa d'e mẹri ẹ?”

4Ya Hanunu nọ kwọndọn ndị hụ Defidi zihẹ, kọpụsọnmẹ wẹ ẹtu, be oghe yesọnmẹ ẹkwa wẹ ahanmahan ikẹn, sị wẹ la.

5Ogẹn wẹ gi bịa d'a gwa Defidi ihiẹn wẹ mẹ ndị ahụn o zi ozi, ọ nọ zi ozi jẹnni wẹ — makẹni erikẹ wẹ ụya. Wẹ nọ sị wẹ, “Eze sị, ‘Nọdị nị Jẹriko d'e ru mgbe ẹtu ụnụ rukingụ, ụnụ kebe lụa.’ ”

6Ogẹn ndị Amọnụ gi hụn a nị a kpasugụọ wẹ Defidi iwe ọda-ọda, eze ndị Amọnụ wụ Hanunu lẹ ndị Amọnụ nọ zi ẹkpa siliva uku nnụ-uku jẹnni ndị Aram-Naharaịm, ndị Aram-Maaka lẹ ndị Zoba, nị wẹ ye wẹ ụgbọ-ẹshin agha lẹ ndị e nyin ụgbọ-ẹshin a lụ agha.

7E we wẹ nwan, ụgbọ-ẹshin agha nnụ-uku mmẹbụọ kwasị ọgụn (32,000) lẹ ndị gi wẹ a lụ agha; e wezi we eze alị Maaka lẹ ndị-agha a. Ya kẹ eze alị Maaka lẹ ndị-agha a nọ bịa d'a nọdị ẹhụ obodo Mẹdẹba, ndị Amọnụ nkẹ nọ ghasọnmẹ obodo wẹ kpọnpụha ndị-agha d'a lụ agha.

8Defidi a nụ ihiẹnni, ọ nọ zi Jụabụ lẹ ndị-agha Izrẹlụ ile d'e kunrun wẹ.

9Ndị Amọnụ a pụha, dọn ogele agha ẹhụ ebe wẹ gha a banye obodo wẹ, ndị-nze ndị hụ bịa d'e yeni wẹ ẹka e weri ọnọdị azụụn wẹ nọ a rụn ugbo.

10Ogẹn Jụabụ gi hụn kẹ wẹ dọnsọnmẹ ogele agha ihun lẹ azụụn, ke ya lẹ ndị Izrẹlụ ye etintin, ọ nọ họrị ndị kachanrịn ọgụn a lụ imẹ ndị-agha Izrẹlụ, kịrị wẹ d'a lụsọn ndị Aram agha.

11Ọ kị ndị họdụnị che okpuru Abishaị nwẹnẹ ẹ, zi wẹ d'a lụsọn ndị Amọnụ.

12Jụabụ sị, “Omẹni ndị Aram a karịma m ẹka, y'a bịa d'a zụọpụha m; kanị, omẹni ndị Amọnụ a karịma ị ẹka, a bịa m d'a zụọpụha ị.

13Jikẹnmẹ, atụlẹ egun nị ẹnyi lụnị ndị nke ẹnyi lẹ obodo ndị wụ nke Chuku ẹnyi ọgụn. Osolobuẹ k'e mẹ ihiẹn rị a mma ẹnya a.”

14Ya kẹ Jụabụ lẹ ndị-agha ya lẹ wẹ wị nọ jẹnmẹ d'a lụsọn ndị Aram, d'e ru ni wẹ nọ gbaman'a ọsọ.

15Mgbe ndị Amọnụ gi hụn a nị ndị Aram a gbama ọsọ, wẹ nwẹn nọ gbamanị Abishaị nwẹnẹ Jụabụ ọsọ, gbaban imẹ obodo wẹ. Ya Jụabụ nọ kịrị ndị-agha Izrẹlụ lakin shi Jerusalẹm.

16Ogẹn ndị Aram nkẹ gi hụn a nị ndị Izrẹlụ e mẹrigụọ wẹ, wẹ nọ zi ozi, kpọkikomẹ ndị-agha Aram ile rị nfetu Iyi-Yufretisi, tumẹ Shofakị hụn wụ ọkị-agha Hadadeza nọ kị wẹ d'a lụzị.

17Defidi a nụ ihiẹn ndị Aram rị e mẹ, ọ nọ kpọgbama ndị-agha Izrẹlụ ile, kịrị wẹ fetu Iyi-Jọdanị. Ọ nọ jẹnburu wẹ, dọn ndị agha a ọhụnma ihun wẹ, ya ndị Aram nọ lụma Defidi lẹ ndị Izrẹlụ agha,

18kanị, asanị wẹ ẹka che ndị Izrẹlụ ọgụn, wẹ nọ gbama ọsọ. Defidi gbu ndị-agha nnụ-uku ẹsa (7,000) gi ụgbọ-ẹshin agha lẹ ndị-agha nnụ-uku ọgụn-ẹbụọ (40,000) gi ụkụ. O gbuzighọ Shofakị hụn wụ ọkị-agha wẹ.

19Ogẹn ndị ahụn rịsọnmẹ okpuru Hadadeza eze alị Aram gi hụn a nị Izrẹlụ e mẹrigụọ wẹ, wẹ nọ jẹn d'e we enwẹn wẹ ye Defidi, wẹ nọ rị okpuru ẹ. Ndị Aram ekwezini yeni ndị Amọnụ ẹka.

← Chapter 18 Jump to: Chapter 20 →