1 Chronicles 29

Ika 2018 Bible

← Chapter 28 Jump to:

1Ya Eze wụ Defidi nọ sị wẹ ile zuni: “Solomọnụ nwa m, hụn Osolobuẹ họrị wụhụ nwata, o ke marịn ihiẹn, bụ ọrụn wẹ jẹnkọ d'a a rụn e hikẹ, makẹni ọnwan ẹlẹ obi-eze ịhịan mmaka kanị nke Osolobuẹ wụ Chuku.

2A nwangụọ m ikẹn m ile kwademẹ ihiẹn w'e gi rụn Ụlọ-nsọ Chuku m: goru w'e gi rụn ihiẹn-goru lẹ siliva w'e gi rụn ihiẹn-siliva lẹ igwe-bronzu w'e gi rụn ihiẹn igwe-bronzu lẹ igwe-mmaka w'e gi rụn ihiẹn igwe-mmaka lẹ osisi w'e gi rụn ihiẹn-osisi; wẹ lẹ ọmụma ndị e gbukeni: kẹ ọnik'si wẹ k'a kụnma ẹhụ ihiẹn ichẹn-ichẹn kẹ tọkwọịzị, lẹ ndị e nwun ichẹn-ichẹn lẹ ndị ọzọ rị ichẹn-ichẹn lẹzi mabụlụ; e kpọntọgụọ m wẹ ile ọda-ọda.

3“Ọzọzị, makẹni ụlọ-nsọ Chuku m nị a rịka m obi, m rị nwan e ye goru lẹ siliva m dọnmẹ nke ẹka m e cheni ihiẹn ndị hụ ile m wepụha rịkẹ eze nị wẹ gi tụn ụlọnị rị nsọ, ụlọ Chuku m:

4m rị e ye ezigbo goru alị Ofiri hụn jun ẹkpa uku nnụ-uku (3,000) lẹ siliva wẹ chanchan ọhụnma jun ẹkpa uku nnụ-uku ẹsa (7,000). Ịya kẹ wẹ k'e gi ma ụsụọ-ẹjan ụlọ ahụn;

5ịya kẹ wẹ k'e gizi mẹmẹ ihiẹn goru lẹ ihiẹn siliva; ndị omẹ-nka jẹnkọ d'e gi wẹ rụn ihiẹn ile wẹ sikọ d'a rụn. Onyẹ chọ nwan n'o ye ihiẹn tannị gi kwanị Osolobuẹ?”

6Ya kẹ ndị ahụn ile nọ wepụhachanrịn obi wẹ ile ye: ndị isi ikpụlọ ichẹn-ichẹn lẹ ndị kị ebọn ichẹn-ichẹn alị Izrẹlụ lẹ ndị ọkị-agha uku lẹ ọkị-agha nta lẹ ndị-isi ọrụn eze:

7e ye wẹ nị wẹ gi rụn ụlọ-nsọ Chuku, goru jun ẹkpa uku nnụ-uku ẹsa (5,000) lẹ akpụrụ goru nnụ-uku iri (10,000), siliva jun ẹkpa uku nnụ-uku iri (10,000), igwe-bronzu jun ẹkpa uku nnụ-uku mmẹsatọ (18,000) lẹ igwe-mmaka jun ẹkpa uku nnụ-uku ọgụn-isẹn (100,000).

8Onyẹ ọwụlẹ hụn nwọn ọmụma ndị ahụn pụ-ichẹn e gbukeni nọ wẹhẹ wẹ ebe wẹ e butọ ihiẹn ụlọ Osolobuẹ, bu ẹ che ẹka Jehiẹlụ onyẹ Gẹshọnụ.

9Ndị alị hụ a ghọghọ, makẹni wẹ ile wepụha obi ye Osolobuẹ ihiẹn wẹ ye; Defidi nke ẹ ghọghọzịkwọ ọda-ọda.

10Defidi nọ nọ idẹnya ndị Izrẹlụ ile zuni ja Osolobuẹ mma, sị, “Ịja-mma ya rịn'ị, Osolobuẹ, Chuku Izrẹlụ nẹdi ẹnyi, ya rịnị ị jẹnrin-ejẹn k'o dọn rị gha alị lala.

11Ịyụ kachanrịn, ikẹn wụzịkwọ nke i; ọghọ lẹ ikpẹn lẹ mgbaye wụchanrịn nke i — makẹni ihiẹn ile rị igwere lẹ ụwa wụ nke i. Alị eze wụ nke i, Osolobuẹ; ịyụ ka ihiẹn ile.

12Ẹka ị kẹ akụ-lẹ-ụba lẹ mgbaye gha a bịa; ịyụ a kị ihiẹn ile. Ikẹn lẹ ọkịkị rị ị ẹka, hụn i gi e bushi ịhịan ile elu, lẹ hụn i gi e ye wẹ ikẹn.

13Osolobuẹ ẹnyi, ẹnyi rị nwan a kpanmịn ị, a ja ị mma makẹni y'e nwọnkẹ ẹfan.

14“Kanị, onyẹ kẹ m wụ? Onyẹ kẹ ndị nke m wụ, hụn ẹnyi gi s'ẹka yehan ẹnịna? Ẹka ị kẹ ihiẹn ile gha a bịa; ẹka ị kẹ ẹnyi nọ nwọnhẹn ihiẹn ẹnyi ye i nwan.

15Abịamabịa lẹ itumunyẹ kẹ ẹnyi wụhụ ẹnya ị, kẹ ndị nẹdi ẹnyi ile kanị dọn wụ. Ndụn ẹnyi elu-ụwa nọhụ k'e onyinyọn ghalẹni a tọ.

16Euu Osolobuẹ wụ Chuku ẹnyi, ihiẹn ndịnị ile ẹnyi ye nị wẹ gi tụnnị ị ụlọ-nsọ hụn Ẹfan-nsọ ị k'a rị, ghachanrịn ẹka ị bịa; ịyụ nwọn wẹ ile.

17“Chuku m, a marịnghọ m nị y'e lele obi, nị ihiẹn kụrụ ọtọ a sụọ ị ụsụọ. M wepụha obi m ye ihiẹn ndịnị ile m ye, ẹlẹni o nwọn ihiẹn ọzọ m chọkọ. M rịzịkwọ nwan a ghọghọ makẹni a hụnọlẹ m kẹ ndị nke ị rị ebeni dọn gi obi wẹ ye i ihiẹn.

18Euu Osolobuẹ, Chuku ndị nẹdi ẹnyi kanị wụ Ebraham, Aziki lẹ Izrẹlụ, dodo mẹ adụdụ nọ ẹnịna rịferi ndị nke i obi, y'e mẹ obi wẹ rịchanrịn ebe ị rị.

19Y'e yezikwọ Solomọnụ nwa m ikẹn n'o gi obi ẹ ile e mẹchanrịn ihiẹn ọwụlẹ ị sị a mẹ lẹ ihiẹn ị chọ lẹ uhi i lẹ ihiẹn o k'e gi tụnchanrịn ụlọ-nsọnị pụ-ichẹn m butọnị ihiẹn ndịnị ile.”

20Ya kẹ Defidi nọ sị ndị Izrẹlụ ile zuni, “Ja nị Osolobuẹ wụ Chuku ọnụ mma.” Wẹ ile nọ ja Osolobuẹ wụ Chuku ndị nẹdi wẹ mma; wẹ nọ hulụa isi, yechanrịn Osolobuẹ lẹ eze ọghọ.

21Eki e fọn, wẹ nọ chụnyeni Osolobuẹ ẹjan ichẹn-ichẹn. A chụnye wẹ ẹjan w'a dụn ọkụn, okẹn-efin nnụ-uku lẹ ebulu nnụ-uku lẹ ụmụ-atụnrụn nnụ-uku, ndịnị lẹ oyiye manya e sọnni wẹ; a chụnyezini wẹ ndị Izrẹlụ ile ẹjan ndị ọzọ bu ọda.

22A nọ wẹ ihun Osolobuẹ rị, ra, ụhụọhịn ahụn, ghọghọ ọda-ọda. Ya wẹ nọ kinzi Solomọnụ nwa Defidi eze okinkin nke mgbe ẹbụọ, nọ idẹnya Osolobuẹ hukpu ẹ udẹn-ntumẹ n'ọ wụrụ onyẹ-ọkịkị, tumẹ Zadọkụ onyẹ-isi nchụn-ẹjan.

23Solomọnụ e weri ọnọdị elu-ukpo eze, kịmanị Osolobuẹ, rikin eze nẹdi ẹ Defidi. Ihiẹn masịn'a, Izrẹlụ ile hụ e humẹn'ẹ isi.

24Ndị ile gi ọkwa lẹ ndị odogun-agha ile lẹ ụmụ-ikẹnnyẹ eze wụ Defidi kwezikwọ nkwa ụhụọhịn ahụn wẹ tumẹ Solomọnụ nị wẹ k'a rị okpuru ẹ.

25Osolobuẹ ye Solomọnụ ọghọ ọda-ọda ẹnya Izrẹlụ ile, ye ẹ ọghọ-eze hụn ndị-nze bu ẹ ụzọ kị Izrẹlụ nwọntulẹni.

26Defidi nwa Jese kịchanrịn Izrẹlụ ile.

27Ahụa ọgụnnaị k'ọ kị Izrẹlụ: ahụa ẹsa k'ọ nọ Hibrọnụ kị, nọ Jerusalẹm kị ahụa mmẹtọ kwasị ọgụn.

28Ọ ka ẹgẹdi ọhụnma-ọhụnma n'o d'a nwụnhụn, tọ ọda-ọda, kpa akụ-lẹ-ụba, nwọn ọghọ. Solomọnụ nwa a nọ rikin ẹ eze.

29Ihiẹn ndị mẹ ogẹn Eze wụ Defidi gi kị, gha mbidọn d'e ru njẹndemẹ, rịsọnmẹ ẹkụkwọ Samuẹlụ onyẹ a hụn ụzọ lẹ ẹkụkwọ Natanị onyẹ-amụma lẹ ẹkụkwọ Gadị onyẹ-amụma:

30kẹ ọkịkị a lẹ ikẹn ọ kpa kẹ ihiẹn ile mẹni hụn gbashịarị ya lẹ Izrẹlụ lẹ alị-eze ile rị alị ndị ọzọ rịzị ẹkụkwọ ndịnị.

← Chapter 28 Jump to: