1 Chronicles 15

Ika 2018 Bible

← Chapter 14 Jump to: Chapter 16 →

1Ogẹn Defidi gi rụnrụngụ ụlọ ndị ọ rụn imẹ Obodo Defidi, ọ nọ mẹmẹ ebe Ẹkpẹti Chuku jẹnkọ d'a nọdị, tumẹ Ọdụ o jẹnkọ d'a rị.

2Defidi nọ sị, “Onwọnni onyẹ ọzọ e bu Ẹkpẹti Chuku karị ndị Livaị, makẹni uwẹ kẹ Osolobuẹ họrị k'a gha e bu Ẹkpẹti Osolobuẹ, a nọ ihun Osolobuẹ a rụn jẹnrin ejẹn.”

3Defidi nọ kpọkwama Izrẹlụ ile imẹ Jerusalẹm d'e buhẹ Ẹkpẹti Osolobuẹ ebe o rụntọn'a;

4ọ kpọkikomẹ ẹbozo Ẹrọnụ lẹ ndị ebọn Livaị ibe wẹ:

5Ebozo Kohatị rịn'a wụ Uriẹlụ onyẹ-ndu ebozo hụ lẹ madụ ọgụn isin ndị nke ẹ.

6Ebozo Mẹrari rịn'a wụ Asaya onyẹ-ndu wẹ lẹ ndị nke ẹ mmadụ ọgụn-mmanaị.

7Ebozo Gẹshọnụ rịn'a wụ Juwẹlụ onyẹ-ndu wẹ lẹ ndị nke ẹ mmadụ iri kwasị ọgụn-isin.

8Ebozo Ẹlizafanị rịn'a wụ Shẹmaya onyẹ-ndu wẹ lẹ ndị nke ẹ mmadụ ọgụn-iri.

9Ebozo Hibrọnụ rịn'a wụ Ẹliẹlụ onyẹ-ndu wẹ lẹ ndị nke ẹ mmadụ ọgụn-ẹnọ.

10Ebozo Uziẹlụ rịn'a wụ Aminadabụ onyẹ-ndu wẹ lẹ ndị nke ẹ mmadụ mmẹbụọ kwasị ọgụn-isẹn.

11Defidi nọ kpọ Zadọkụ lẹ Abiata wụ ndị nchụn-ẹjan lẹ ndị Livaị ibe wẹ ndịnị wụlẹni ndị nchụn-ẹjan: Uriẹlụ, Asaya, Juwẹlụ, Shẹmaya, Ẹliẹlụ lẹ Aminadabụ.

12Ọ sị wẹ, “Ọnụ wụ ndị-isi ebọn Livaị; ụnụ lẹ ndị Livaị ibe ọnụ k'e dọn enwẹn ọnụ nsọ, nị ụnụ hụn ụzọ buhẹ Ẹkpẹti Osolobuẹ, Chuku Izrẹlụ, bu ẹ che ebe m kwademẹn'ẹ.

13Makẹni ẹlẹ ụnụ ndị Livaị bu ẹ ogẹn nẹi haịn Osolobuẹ wụ Chuku gi mẹ ẹnyi ihiẹn o mẹ ẹnyi: ẹnyi efen'ẹ ofufe hụ kẹ Iwu dọn ku.”

14Ya ndị nchụn-ẹjan lẹ ndị ebọn Livaị ibe wẹ nọ dọn enwẹn wẹ nsọ, kẹni wẹ hụn ụzọ buhẹ Ẹkpẹti Osolobuẹ, Chuku Izrẹlụ.

15Ndị Livaị nọ fayesọnmẹ akp'osisi ndị hụ wẹ gi e bu Ẹkpẹti Chuku, gi wẹ buru ẹ isi-uvun kẹ Mozizi hụn Osolobuẹ zi dọn gwa wẹ.

16Defidi nọ gwa ndị-isi ndị Livaị, ndị hụn wụlẹni ẹbozo Ẹrọnụ ndị nchụn ẹjan, sị wẹ tumẹ umunẹ wẹ nị w'a bụ ẹbụ-ịghọghọ, e gi ihiẹn-egu e du ẹ: kẹ ụbọ-layẹ kẹ ụbọ-hapụ kẹ kpajaị (simbalụ) w'a fịangbama.

17Ya ndị Livaị nọ tumẹ Hẹmanị nwa Juwẹlụ lẹ onyẹ Livaị ibe ẹ wụ Asafụ nwa Bẹrẹkia lẹ Ẹtanị nwa Kushaya onyẹ Livaị ibe wẹ hụn wụ ebozo Mẹrari;

18uwẹ lẹ umunẹ wẹ ndịnị hụn a hansọnni wẹ: Zẹkaraya, Jaaziẹlụ, Shẹmiramọtụ, Jehiẹlụ, Uni, Ẹliabụ, Bẹnaya, Maaseya, Matitịa, Ẹlifẹlẹhu, Miknẹya, Obẹdi-Ẹdọm lẹ Jẹyẹlụ — hụn wụsọnmẹ ẹbozo ndị e che nche Ọdụ-Osolobuẹ.

19Ndị-egu wụ Hẹmanị, Asafụ lẹ Ẹtanị sikọ d'a gha a kụ kpajaị (simbalụ) wẹ gi igwe-bronzu mẹmẹ;

20Zẹkaraya, Aziẹlụ, Shẹmiramọtụ, Jehiẹlụ, Uni, Ẹliabụ, Maaseya lẹ Bẹnaya sikọ d'e gi ụbọ-layẹ a kpọye olu alamọtụ, olu shi elu;

21Matitịa, Ẹlifẹlẹhu, Miknẹya, Obẹdi-Ẹdọm, Jẹyẹlụ lẹ Azazia sikọ d'e gi ụbọ-hapụ a kpọye olu shẹminiti lụa alị — kẹ onyẹ rị e du ẹbụ dọn ku.

22Kenania hụn kị ndị Livaị kẹ oku ẹbụ ịja-mma rị ẹka a, makẹni ọ marịngụọ ẹnya a.

23Bẹrẹkia lẹ Ẹl'kana k'e che Ẹkpẹti Osolobuẹ nche.

24Ndị nchụn-ẹjan wụ Shẹbania, Joshafatị, Natanẹlụ, Amasaị, Zẹkaraya, Bẹnaya lẹ Ẹliẹza sikọ d'a gha e gbu opi (ọdụ) ihun Ẹkpẹti Chuku. Obẹdi-Ẹdọm lẹ Jehia k'a rịzị ndị k'e che Ẹkpẹti Osolobuẹ nche.

25Ya kẹ Defidi lẹ ndị-isi alị Izrẹlụ lẹ ndị-isi agha kịsọnmẹ ndị-agha nnụ-uku nọ gi ịghọghọ jẹnmẹ iwe Obẹdi-Ẹdọm d'e buhẹ Ẹkpẹti Nkwerigbama Osolobuẹ.

26Makẹni Osolobuẹ yeni ndị Livaị hụ bu Ẹkpẹti Nkwerigbama Osolobuẹ ẹka, wẹ nọ gi okẹn-efin ẹsa lẹ ebulu ẹsa chụnnị Osolobuẹ ẹjan.

27Defidi yi ẹwuru tueni wẹ gi ezigbo linẹni kpa, kẹ ya kẹ ndị Livaị ahụn bu Ẹkpẹti ahụn kẹ ndị rị a bụ ẹbụ kẹzi Kenania hụn kị ndị ọkụ-ẹbụ. Defidi yihụzị ẹwuru-ẹfọdụ hụ wẹ gi linẹni kpa hụn ndị nchụn-ẹjan e yiye elu ẹ.

28Ẹrịra kẹ ndị Izrẹlụ ile dọn bulụa Ẹkpẹti Nkwerigbama Osolobuẹ, e yi oro, e gbu opi igwe lẹ ọdụ, a kụ kpajaị (simbalụ), a kpọ ụbọ rị ichẹn-ichẹn.

29Ogẹn Ẹkpẹti Nkwerigbama Osolobuẹ gi banla imẹ Obodo hụ Defidi tụn imẹ Jerusalẹm, nwunyẹ Defidi wụ Mikalụ nwa Sọlụ hụ windo e lee ile. Ogẹn o gi hụn Eze wụ Defidi k'ọ rị e tẹn egu, a wụhunmẹ, ọ nọ legberi ẹ imẹ obi ẹ.

← Chapter 14 Jump to: Chapter 16 →