1 Chronicles 5

Ika 2018 Bible

← Chapter 4 Jump to: Chapter 6 →

1Ẹfan ụmụ-ikẹnnyẹ Rubẹni nwa-ibuzọ Izrẹlụ: (Rubẹni wụ nwa-ibuzọ, kanị ogẹn o gi rụ bẹdi nẹdi ẹ wụ Izrẹlụ, sọn mgba nẹdi ẹ ranhịn, wẹ nọ we ọnọdị nwa-ibuzọ ye ụmụ Josẹfụ nwa Izrẹlụ. Ya haịn ẹfan a gilẹni rị ọnọdị nwa-ibuzọ ebe wẹ deye ẹfan ẹbozo Izrẹlụ.

2K'o mẹlẹru nị Juda wụ nwan ndị ka ọda imẹ umunẹ wẹ ile lẹni ẹka wẹ kẹ eze gha pụha, ọnọdị nwa-ibuzọ wụkwọ nwan nke Josẹfụ.)

3Ndịnị wụ nwan ụmụ-ikẹnnyẹ Rubẹni nwa ibuzọ Izrẹlụ: Hanọkụ, Palu, Hẹzrọnụ lẹ Kami.

4Ẹbozo Juwẹlụ wụ ndịnị: Shẹmaya, Gọgụ, Shimei

5Maịka, Riaya, Baalụ

6lẹ Bira hụn eze alị Asiria Tiglatị-Pilesa nwụnrụn shi alị ọzọ. Ogẹn hụ, Bira wụ onyẹ-isi ndị ebọn Rubẹni.

7Ndịnị wụ umunẹ ẹ — kẹ wẹ dọn detọ wẹ ẹbozo-ẹbozo gha isi d'e ru alị: Jẹyẹlụ hụn wụ onyẹ-isi, Zẹkaraya,

8lẹ Bẹla nwa Azazị nwa Shẹma nwa Juwẹlụ. Wẹ bichanrịn ẹgbata Arụa lẹ Ugu Nebo lẹ Baalụ-Miọnụ.

9Ẹbamịn ọwụwa-ẹnyanwụn, alị wẹ bi ruzidẹ mkpẹnrẹn alị-ọkpọnkụn hụn ya lẹ Iyi Yufretisi nọ okẹn nkọnị, makẹni anụ wẹ a barahịgụọ imẹ Gilẹdị ebe wẹ rị.

10Ogẹn hụ Sọlụ gi wụ eze Izrẹlụ kẹ wẹ gi lụsọn ndị Hagri agha, wẹ nọ mẹri ndị Hagri, bikin alị wẹ, jun ẹbamịn ọwụwa ẹnyanwụn Gilẹdị.

11Ndị Gadị bikunmẹ ndị Rubẹni imẹ Bashanị d'e rukwọrị Salẹka

12Juwẹlụ wụ onyẹ-isi ndị Gadị, Shafam wụ ọb'ẹbụọ — ọ bịa d'e ru Janaị lẹ Shafatị; imẹ Bashanị kẹ wẹ bi.

13Umunẹ wẹ kịsọnmẹzi ikpụlọ ichẹn-ichẹn wụ Maịkẹlụ, Mẹshulam, Shẹba, Joraị, Jakanị, Zia lẹ Ẹba: wẹ rị madụ ẹsa.

14Ndịnị wụ ụmụ-ikẹnnyẹ Abihailu nwa Huri nwa Jarụa nwa Gilẹdị nwa Maịkẹlụ nwa Jẹshishaị, nwa Jado nwa Buzu.

15Ahị nwa Ab'diẹlụ nwa Guni wụ onyẹ-isi ikpụlọ wẹ.

16Ndị Gadị bisọnmẹ Gilẹdị lẹ Bashanị lẹ ụmụ-alị ndị fihunmẹ Bashanị lẹzi ọfịa ndị ahụn ile wẹ nọ a zụn anụ imẹ alị Sharọnụ d'e ru ebe ile ọfịa hụ ru.

17Ogẹn Jọtam gi wụ eze Juda lẹ ogẹn Jerobụam gi wụ eze Izrẹlụ Ẹbamịn ugu kẹ wẹ gi detọ ẹbozo ndị Gadị ndịnị.

18Ndị Rubẹni lẹ ndị Gadị lẹ Mgbube Manasẹ nwọn mmadụ ọgụnnaị arịa nnụ mmẹbụọ kwasị nnụ-uku ọgụnnaị (44,760) ma lụ agha, ikẹnnyẹ ka ẹhụ ma bu akpaịn lẹ ọpịa-agha, ikẹnnyẹ mazị gi ụta lụ agha, ikẹnnyẹ wẹ zụn ọzụnzụn agha.

19Wẹ nọ maye ndị Hagri lẹ ndị Jẹtọ lẹ ndị Nafishi lẹ ndị Nodabụ ọgụn.

20E nwọnhẹnkẹ wẹ eyemẹka imẹ agha hụ, Chuku haịn wẹ gi mẹri ndị Hagi lẹ ndị ile wẹ lẹ ndị Hagri wị — makẹni wẹ kwanghọsị a imẹ agha ahụn. Ọ za wẹ ekpere makẹni wẹ gi ẹ dọn ẹnya.

21A kịrị wẹ anụ ndị Hagri: anyịnyan-mkpukpuke nnụ-uku iri-kwasị-ọgụnnaị (50,000), atụnrụn nnụ-uku iri kwasị ọgụn mmẹbụọ (250,000) lẹ jaki nnụ-uku ẹbụọ (2,000); a nwụnrụnzịkwọ wẹ ịhịan — madụ nnụ-uku ọgụn-isẹn (100,000).

22Ndị wẹ gbu buzikwọ ọda, makẹni Osolobuẹ lụ agha hụ. Wẹ nọ biri alị ahụn d'e ru mgbe wẹ gi nwụnrụn wẹ lẹ ndị Izrẹlụ ibe wẹ shi alị ọzọ.

23Mgbube Manasẹ ahụn wẹ lẹ ndị Rubẹni lẹ ndị Gadị rị azụụn ohu barahị abarahị; wẹ bi alị ahụn gha Bashanị d'e ru Baalụ-Hẹmọnụ hụn wụ Sẹnịru (Ugu Hẹmọnụ).

24Ndị kịsọnmẹ ikpụlọ ichẹn-ichẹn wụ Ẹfẹ, Ishi, Ẹliẹlụ, Az'riẹlụ, Jerimaya, Hodavia lẹ Jadiẹlụ. Wẹ wụsọnmẹ ndị odogun-agha egun ghalẹni a tụ, ndị w'a nụ ẹfan wẹ; wẹ wụsọnmẹ ndị-ichẹn ikpụlọ wẹ rị ichẹn-ichẹn.

25Kanị, egini wẹ Iwu hụn kwọngbama wẹ lẹ Chuku ndị nẹdi wẹ bi, e wesọnmẹ wẹ enwẹn wẹ e ye mmọn ichẹn-ichẹn ndị alị ahụn e fe, ndị nwẹn Chuku tikpọ we alị wẹ ye wẹ.

26Ya kẹ Chuku Izrẹlụ nọ nu Pulu, eze Asiria (hụn wụzị Tiglatị-Pilesa), ọ nọ nwụnrụn ndị Rubẹni lẹ ndị Gadị lẹ mgbube ebọn Manasẹ rị azụụn hụ, we wẹ shi alị ndị ọzọ: alị Hala, Habọ, Hara lẹ mkpẹnrẹn Iyi Gozanị. Wẹ rịsọnmẹ nwan ebẹhụ d'e ru tannị.

← Chapter 4 Jump to: Chapter 6 →