1 Chronicles 23

Ika 2018 Bible

← Chapter 22 Jump to: Chapter 24 →

1Ogẹn Defidi gi kagụ ẹgẹdi, kakpụkpọ, ọ nọ kin nwa a wụ Solomọnụ eze Izrẹlụ.

2Ọ nọ kpọkikomẹ ndị-isi ile rị Izrẹlụ, wẹ lẹ ndị nchụn-ẹjan lẹ ndị Livaị ibe wẹ wụlẹni ndị nchụn-ẹjan.

3Wẹ nọ gụn ndị Livaị rị ahụa iri kwasị ọgụn shi elu, wẹ ile rị ikẹnnyẹ nnụ-uku mmẹsatọ-kwasị-ọgụn (38,000).

4Defidi nọ sị, “Imẹ ndịnị, mmadụ nnụ-uku ẹnọ-kwasị-ọgụn (24,000) k'a rị a rụn ọrụn rị Ụlọ-nsọ Osolobuẹ; mmadụ nnụ-uku (6,000) k'a wụ ndị-isi lẹ ndị e dọnzi oku;

5Mmadụ nnụ iri (4,000) k'a gha e che nche ọnụ-mgbọn ichẹn-ichẹn rị Ụlọ-nsọ; mmadụ nnụ iri (4,000) k'a gha e gi ihiẹn-egu ndị ahụn m butọ wẹ gi a ja Osolobuẹ mma a ja a mma.”

6Defidi dọnmẹ ndị Livaị ẹbozo-ẹbozo kẹ ụmụ Livaị nẹdi wẹ kanị dọnsọnmẹ dịan: ebozo Gẹshọnụ wụ ibuzọ, o sọn nke Kohatị, o sọn nke Mẹrari.

7Ndị Gẹshọnụ wụ ẹbozo Ladanị lẹ ẹbozo Shimei.

8Ẹbozo Ladanị wụ ụmụ Jehiẹlụ, hụn wụ nwa-ibuzọ Ladanị lẹ ụmụ Zẹtam lẹ ụmụ Juwẹlụ: wẹ rị ẹtọ.

9Ẹbozo Shimei nwa Ladanị wụ ụmụ Shẹlomọtụ, ụmụ Haziẹlụ lẹ ụmụ Haranị: wẹ rị ẹtọ. Uwẹ wụ ndị-isi ikpụlọ ẹbozo Ladanị.

10Ẹbozo Shimei nwa Gẹshọnụ wụ ụmụ Jahatị, ụmụ Ziza hụn wụzị Zina, ụmụ Jeushi lẹ ụmụ Bẹrịa. Uwẹ wụ ụmụ ikẹnnyẹ Shimei mụ lẹ ẹbozo wẹ: ẹnọ kẹ wẹ rị.

11Jahatị wụ nwa-ibuzọ, o sọn Ziza. Jeushi lẹ Bẹrịa amụkanị ikẹnnyẹ, ya wẹ nọ weri wẹ nọkẹ ikpụlọ ohu, ye wẹ ọrụn ohu.

12Ikẹnnyẹ Kohatị mụ wụ Amram, Iziha, Hibrọnụ lẹ Uziẹlụ: mmadụ ẹnọ.

13Ikẹnnyẹ Amram nwa Kohatị mụ wụ Ẹrọnụ lẹ Mozizi. Osolobuẹ dọnmẹ Ẹrọnụ ichẹn kẹni ọ hụn ụzọ e dọnmẹ ihiẹn ndị kachanrịn nsọ nsọ, kẹni ya lẹ ebozo ẹ wụferi ndị a chụnyeni Osolobuẹ ẹjan, a nọ ihun ẹ a rụn ọrụn, e gi ẹfan a a gọzi — e mẹ ihiẹn ndịnị jẹnrin ejẹn.

14Nke Mozizi, odibo Osolobuẹ, edọnmẹni wẹ ụmụ a ichẹn, wẹ dọngbama wẹ lẹ ndị Livaị ibe wẹ.

15Ikẹnnyẹ Mozizi mụ wụ Gẹshọm lẹ Ẹliẹza.

16Nke Gẹshọm, nwa ibuzọ a wụ Shẹbuẹlụ mụ ndị rị nwan ẹbozo ẹ.

17Ẹbozo Ẹliẹza wụ ụmụ Rehabia nwa-ibuzọ a. Ẹliẹza amụnị okẹnnyẹ ọzọ, kanị Rehabia nwa a mụ ikẹnnyẹ bu ọda.

18Nke Iziha nwa Kohatị, Shẹlomiti nwa ibuzọ a mụ ndị rị nwan ẹbozo ẹ.

19Ẹbozo Hibrọnụ nwa Kohatị wụ ụmụ Jẹria nwa-ibuzọ a, ụmụ Amaria nwa a ọb'ẹbụọ lẹ ụmụ Jahaziẹlụ nwa a ọb'ẹtọ lẹzi ụmụ Jekamịam nwa a nke ẹnọ.

20Ẹbozo Uziẹlụ nwa Kohatị wụ ụmụ Maịka nwa-ibuzọ a lẹ ụmụ Ishia nwa a ọb'ẹbụọ.

21Ikẹnnyẹ Mẹrari mụ wụ Mali lẹ Mushi. Ẹbozo Mali wụ ụmụ Ẹliẹza lẹ ụmụ Kishi.

22Ẹliẹza nwa Mẹrari amụnị ikẹnnyẹ o we nwụnhụn, ikpoho sụọ k'ọ mụ. Ụmụ Kishi nwẹnẹ nẹdi wẹ lụrụ wẹ.

23Ẹbozo Mushi wụ ụmụ Mali nwa Mushi lẹ ụmụ Ẹda lẹ ụmụ Jẹrimọtụ: ẹtọ kẹ wẹ rị.

24Wẹ ile wụ ebozo Livaị, ikp'ụlọ-ikp'ụlọ, kẹ wẹ dọnsọnmẹ detu ẹfan onyẹ-onyẹ ogẹn wẹ gi gụn wẹ; wẹ wụ ndị rugụ ahụa ọgụn shi elu hụn a rụn ọrụn imẹ Ụlọ-nsọ Osolobuẹ:

25makẹni Defidi e kuọlẹ sị, “Ebe omẹni Osolobuẹ wụ Chuku Izrẹlụ e yegụọ ndị nke ẹ ezumikẹn, ebe o mẹni ọ bịagụọ d'e biri imẹ Jerusalẹm jẹnrin ejẹn,

26ẹlẹzi hụn ndị Livaị e gi e buhunmẹ Ọdụ-nsọ mọbụ ihiẹn ọwụlẹ wẹ gi a rụn ọrụn imẹ ẹ.”

27Ịya kẹ wẹ gụnnị nwan ndị Livaị rị nwa ahụa ọgụn shi elu, ihiẹn ikpanzụụn Defidi sị wẹ mẹ.

28Ọrụn ndị Livaị wụ iyeni ẹbozo Ẹrọnụ ẹka a rụn ọrụn rị imẹ Ụlọ-nsọ Osolobuẹ, hụn wụ ilepụ ezi rịsọnmẹ Ụlọ-nsọ ẹnya lẹ mmughẹ ndị hụ wẹ rụn nyanmanị Ụlọ-nsọ lẹ idọn ihiẹn ile rị nsọ nsọ lẹ ịrụn ọrụn ndị ọzọ ile rị imẹ Ụlọ Chuku —

29kẹ ihiẹn gbashịarịnị brẹdi ahụn wẹ butọ elu teburu kẹ ọka wẹ gweriẹn wẹ gi a chụn ẹjan ọka kẹ biskiti wẹ ghalẹni e buche yisti kẹ ishi brẹdi lẹ ihiẹn ndị wẹ e shi nọkẹ brẹdi kẹ ịgwọ oyiye ndị wẹ gi ofugbọn-olivu a gwọ kẹ ilele kẹ ihiẹn han mọbụ k'o buhan ọda.

30Ndị Livaị nwọnzikwọ e wuzo ụtụntụn ile a kpanmịn Osolobuẹ, a ja a mma, e mẹzi ẹrịra ogẹn ẹnyasị

31lẹ ogẹn ọwụlẹ ndị nchụn-ẹjan gi e wẹhẹni Osolobuẹ ẹjan w'a dụn ọkụn, kẹ Ụhụọhịn Ezumikẹn kẹ Mmẹmmẹ Ifọn-ọhụn kẹ mmẹmmẹ ọwụlẹ wẹ tumẹ imẹ Iwu. Wẹ k'a gha a rụn ọrụn ihun Osolobuẹ ogẹn ile, e zu ọnụ a rụn ọrụn a, e gi usọnrọn wẹ tumẹni wẹ a rụn a.

32Ndị Livaị nwọn e lepụ Ọdụ-ozuzu lẹ Ebẹhụ rị nsọ ẹnya; uwẹ jẹnkọ nwan d'a rị e jẹnni umunẹ wẹ wụ ụmụ Ẹrọnụ ozi nị w'a rụn ọrụn wẹ imẹ Ụlọ-nsọ Osolobuẹ.

← Chapter 22 Jump to: Chapter 24 →