1 Chronicles 20

Ika 2018 Bible

← Chapter 19 Jump to: Chapter 21 →

1Mbidọn ahụa, ogẹn ndị-nze gi e jẹn agha, Jụabụ nọ kịrị ndị-agha Izrẹlụ jẹnmẹ agha. Ọ nọ tikpọ alị ndị Amọnụ la iwi. Ọ nọ nwan shi isi-alị wẹ wụ Raba, kehunmẹ ẹ. Defidi nkẹ hụ Jerusalẹm. Jụabụ a lụsọn ndị Raba agha, tikpọpụ obodo wẹ.

2Defidi e ru ẹ, ọ nọ weri okpu-eze goru rị eze wẹ isi. A ma w'a, ọ gba kilo mmisẹn kwasị ọgụn (35); ihiẹn-mma ṅanrannị jun ẹ. Wẹ nọ bu ẹ che Defidi isi. Ihiẹn Defidi kwarị imẹ obodo hụ e hikẹmẹkẹ.

3Ọ nọ kpọnpụha ndị rị ebẹhụ, wa ọrụn igu-alị lẹ igbu-osisi ye wẹ olu. Ihiẹnni kẹ Defidi mẹ imẹ obodo ndị Amọnụ ile. O mẹgụ Defidi lẹ ndị-agha a ile nọ lashi Jerusalẹm.

4O mẹgụ, agha nọ suni ndị Izrẹlụ lẹ ndị Filistia imẹ obodo Gẹza. Ogẹn ahụn kẹ Sibẹkaị onyẹ Husha gi gbu Sipaị onyẹ ebọn Rẹfa, ndị adụn-aran, ya ndị Filistia nọ rị okpuru ndị Izrẹlụ.

5Omẹgụzị, agha nọ suzini ndị Izrẹlụ lẹ ndị Filistia, Ẹl'hananị nwa Jaịrị nọ gbu nwẹnẹ Golịatị onyẹ Gatị wụ Lami. Lami bu obo hụn ẹka a han kẹ ẹgbe wẹ gi a kpa ẹkwa.

6Imẹ agha ọzọ, hụn wẹ nọ obodo Gatị lụ, o nwọn okẹnnyẹ ohu pụ-ẹka, hụn nwọn mkpịnsịn-ẹka isin-isin lẹ mkpịnsịn-ụkụ isin-isin: wẹ ile wụ ẹnọ kwasị ọgụn. Ya nwẹn wụzị onyẹ ebọn adụn-aran Rafa.

7Ogẹn o gi kpari Izrẹlụ, Jonatanị nwa Shimia nwẹnẹ Defidi nọ gbu ẹ.

8Ndịnị wụ ndị adụn-aran Rafa hụn rị Gatị; Defidi lẹ ndị-agha a gbu wẹ.

← Chapter 19 Jump to: Chapter 21 →