1 Chronicles 18

Ika 2018 Bible

← Chapter 17 Jump to: Chapter 19 →

1O mẹgụ, Defidi nọ mẹri ndị Filistia, bu wẹ che okpuru ẹ; o weri Gatị lẹ ụmụ obodo ndị nọhunmẹn'ẹ, hụn te rị okpuru ndị Filistia.

2Defidi e mẹrizi ndị Mụabụ, wẹ nọ rị okpuru ẹ, a tụhan'a ụtụ wẹ gi e fe ẹ.

3O rukwọrị Hamatị d'a lụsọn Hadadeza wụ eze Zoba agha, ogẹn Hadadeza gi jẹnmẹ n'o d'e weri mkpẹnrẹn Iyi-Yufretisi cheni ebe ọ rị a kị.

4Defidi nọ narịn Hadadeza ụgbọ-ẹshin agha nnụ-uku, ndị-agha nnụ-uku ẹsa (7,000) gi ụgbọ-ẹshin a lụ agha lẹ ndị-agha nnụ-uku ọgụn (20,000) gi ụkụ e jẹn agha. Ọ nọ tụbepụchanrịn ẹshin ndị hụ ile a dọkpụn ụgbọ-ẹshin akwanran rị wẹ azụụn nkpụkụ, latọ ọgụn-isẹn sụọ.

5Ogẹn ndị Aram rị Damaskọsụ gi bịa d'e yeni Hadadeza wụ eze Zoba ẹka, ya Defidi nọ gbu mmadụ nnụ-uku ẹbụọ-kwasị-ọgụn (22,000) imẹ wẹ.

6Ọ nọ bu ndị-agha tọ alị-eze Aram rị Damaskọsụ, ndị Aram nọ rị okpuru ẹ, a tụhan'a ụtụ wẹ gi e fe ẹ. Osolobuẹ yechanrịn Defidi mmẹri ebe ile o jẹn.

7Defidi e kpọnrinzighọ akpaịn goru ndị ọkị-agha Hadadeza bu, kpọnlụa wẹ Jerusalẹm.

8Defidi nọzị gha Tẹba lẹ Kunu, obodo ndị rịsọnmẹ alị Hadadeza, buru igwe-bronzu bugbu enwẹn ẹ ọda. Bronzu ndịnị kẹ Solomọnụ gi mẹmẹ “Ohimin” bronzu (Tankị mirin uku hụ) lẹ adansụn ẹbụọ lẹ ihiẹn rịsọnmẹ ichẹn-ichẹn wẹ gi igwe-bronzu mẹmẹ.

9Mgbe Towu wụ eze Hamatị gi nụ nị Defidi e mẹrichanrịngụọ ndị agha Hadadeza eze Zoba,

10ọ nọ zi nwa a okẹnnyẹ wụ Hadoram d'e kele eze wụ Defidi liyen'ẹ ẹka o gi mẹri Hadadeza, hụn o mẹni o teọlẹ ya lẹ Towu lụma agha. Hadoram buhẹ ihiẹn ile rị ichẹn-ichẹn wẹ gi goru lẹ siliva lẹ igwe-bronzu mẹmẹ.

11Eze wụ Defidi nọ we ihiẹn ndịnị kwanị Osolobuẹ, uwẹ lẹ siliva lẹ goru ndị hụn o bunarịnsọnmẹ alị ile o mẹri: alị Ẹdọm lẹ alị Mụabụ lẹ ndị Amọnụ lẹ ndị Filistia lẹzi ndị Amalẹki.

12Abishaị nwa Zeruaya gbu ndị Ẹdọm nnụ-uku mmẹsatọ (18,000) imẹ Ọdanmgbugbu-nnu.

13O bu ndị agha tọ Ẹdọm, ndị Ẹdọm ile nọ rị okpuru Defidi. Osolobuẹ ye Defidi mmẹri ebe ile o jẹn.

14Defidi kịchanrịn Izrẹlụ ile, e mẹni ndị nke ẹ ile ihiẹn rị mma lẹ ihiẹn furuni.

15Jụabụ nwa Zeruaya wụ onyẹ-isi ndị-agha, Jehoshẹfatị nwa Ahiludu e dọnmẹ ẹkụkwọ;

16Zadọkụ nwa Ahitubu lẹ Ahimẹlẹkị nwa Abiata wụ ndị nchụn-ẹjan; Shav'sha wụ akanwe;

17Bẹnaya nwa Jehoyada kị ndị Kẹrẹtị lẹ ndị Pẹlẹtị, ndị ahụn e che Defidi nche; ụmụ Defidi wụsọnmẹ ndị-isi kanị hụn a nọkunmẹ eze.

← Chapter 17 Jump to: Chapter 19 →