1 Chronicles 26

Ika 2018 Bible

← Chapter 25 Jump to: Chapter 27 →

1Ndịnị wụ itu ndị e che nche ọnụ-mgbọn rịsọnmẹ Ụlọ-nsọ. Ndị ebozo Kora rịn'a: Mẹshẹlẹmia nwa Kore hụn rị ụmụ Asafụ wụ ohu.

2Ụmụ ikẹnnyẹ Mẹshẹlẹmia wụ ndịnị: Zẹkaraya nwa-ibuzọ a, Jediẹlụ nwa a ọb'ẹbụọ, Zẹbadịa nwa a ọb'ẹtọ, Jatniẹlụ nwa a ọb'ẹnọ,

3Ẹlam nwa a ọb'isẹn, Jehohananị nwa a ọb'isin, Ẹliẹhonaị nwa a ọb'ẹsa.

4Ụmụ ikẹnnyẹ Obẹdi-Ẹdọm wụ ndịnị: Shẹmaya nwa-ibuzọ a, Jehozabadị nwa a ọb'ẹbụọ, Jụa nwa a ọb'ẹtọ, Saka nwa a ọb'ẹnọ, Natanẹlụ nwa a ọb'isẹn,

5Amiẹlụ nwa a ọb'isin, Isaka nwa a ọb'ẹsa, Pẹwulẹtaị nwa a ọb'ẹsatọ. (Eziẹ, Osolobuẹ gọzi Obẹdi-Ẹdọm agọzi.)

6Nwa Obẹdi-Ẹdọm wụ Shẹmaya mụzịkwọ ikẹnnyẹ wẹ gi oku wẹ e dọn imẹ ẹbozo nẹdi wẹ, makẹni wẹ wụ ndị dikẹn wẹ marịn-amarịn.

7Ẹfan ụmụ Shẹmaya ndị hụ wụ: Otni, Rẹfẹlụ, Obẹdi lẹ Ẹl'zabadị; umunẹ Shẹmaya wụ Ẹlihu lẹ Sẹmakia wụzịkwọ ndị dikẹn.

8Ndịnị ile wụ ẹbozo Obẹdi-Ẹdọm; wẹ lẹ ụmụ wẹ lẹ umunẹ wẹ wụ ndị dikẹn hụn nwọn ndụn wẹ gi a rụn ọrụn ahụn. Wẹ rị mmadụ ẹbụọ kwasị ọgụn-ẹtọ wụ ndị nke Obẹdi-Ẹdọm.

9Ụmụ ikẹnnyẹ Mẹshẹlẹmia lẹ umunẹ ẹ wụzịkwọ ndị dikẹn — wẹ rị mmadụ mmẹsatọ.

10Ụmụ ikẹnnyẹ Hosa onyẹ ebozo Mẹrari wụ ndịnị: Shimri nwa a ibuzọ — kanị ẹlẹ Shimri kẹ wẹ bu ụzọ mụ, nẹdi ẹ ye ẹ ọnọdị nwa-ibuzọ;

11Hil'kia wụ ọb'ẹbụọ; Tẹbalịa wụ ọb'ẹtọ; Zẹkaraya wụ ọb'ẹnọ — ikẹnnyẹ Hosa mụ lẹ umunẹ ẹ rị mmẹtọ.

12Wẹ dọnmẹsọnmẹ ndịnị itu-itu ye okpuru ndị-isi ẹbozo wẹ kẹ wẹ dọn dọnmẹ ndị Livaị ibe wẹ makẹ ọrụn Ụlọ-nsọ Osolobuẹ.

13Utẹn Osolobuẹ kẹ wẹ nyansọnmẹ gi tumẹ ẹbozo-ẹbozo ọnụ-mgbọn wẹ k'e che — kẹ ndị uku kẹ ndị-nta.

14Shẹlẹmia kẹ utẹn Ọnụ-mgbọn rị ihun Ụlọ-nsọ, ibẹka Ọwụwa Ẹnyanwụn weri. Wẹ nọ nyannị nwa a okẹnnyẹ wụ Zẹkaraya hụn wụ ezigbo onyẹ-ndụnmọdụn utẹn, utẹn nọ werin'ẹ Ọnụ-mgbọn hụn rị ẹbamịn-ugu.

15Utẹn Ọnụ-mgbọn rị azụụn ẹka-nni, ibẹka Ndịdan-mirin (Saụtụ), weri Obẹdi-Ẹdọm, wẹ nọ keye ụmụ a ikẹnnyẹ ebe w'e kpọntọ ihiẹn-oriri.

16Nke Shupu lẹ Hosa wụ Ọnụ-mgbọn rị ibe azụụn — ibẹka Ọdịdan ẹnyanwụn lẹ Ọnụ-mgbọn Shalẹkẹti hụn w'a gha a pụ ụzọ hụ rị mkpọnyin. Itu ohu chegụ, hụn e sọnn'ẹ e che:

17ụhụọhịn-ụhụọhịn, ndị Livaị isin e che nche ihun — azụụn ọwụwa ẹnyanwụn, ẹnọ e che nche ẹbamịn ugu, ẹnọ e che ẹbamịn ndịdan-mirin; ẹbụọ-ẹbụọ kẹ wẹ a rị e che ebe w'e kpọntọ ihiẹn-oriri.

18Nke ezi-ọgwa hụn rị ibe azụụn — ibe sikọ ọdịdan-ẹnyanwụn, mmadụ ẹnọ a nọdị ụzọ hụ rị mkpọnyin, ẹbụọ a nọdị imẹ ezi-ọgwa ahụn lẹ enwẹn ẹ.

19Ẹrịra kẹ wẹ dọnmẹsọnmẹ ndị e che nche Ọnụ-mgbọn ndị rịsọnmẹ Ụlọ-nsọ, ndị ebozo Kora lẹ ẹbozo Mẹrari.

20Ndị Livaị ibe wẹ ndịnị wụ ndị e lepụ ebe wẹ e butọsọnmẹ ihiẹn ẹnya — kẹ ndị rị imẹ Ụlọ Chuku kẹ ndị wẹ gisọnmẹ kwanị Osolobuẹ rị ụzọ ọzọ.

21Imẹ ndị ikpụlọ Ladanị, hụn wụzị Libni, onyẹ ẹbozo Gẹshọnụ, onyẹ-isi ikpụlọ rịn'a wụ Jehiẹli;

22ikẹnnyẹ Jehiẹli mụ wụ Zẹtam lẹ nwẹnẹ ẹ wụ Juwẹlụ. Uwẹ kẹ aza ndị w'e dọnmẹ goru lẹ ihiẹn ndị ọzọ rị imẹ Ụlọ-nsọ Osolobuẹ rị ẹka.

23Nke ndị ebozo Amram lẹ Iziha lẹ Hibrọnụ lẹ Uziẹlụ, ndịnị wụ ndị wẹ lẹ ụmụ Jehiẹli gba e che nche:

24Shẹbuẹlụ onyẹ ebozo Gẹshọm nwa Mozizi kẹ aza w'e dọnmẹ goru lẹ ihiẹn ndị ọzọ rị ẹka — ya wụ ndị hụn rị imẹ Ụlọ-nsọ.

25Umunẹ ẹ rịn'a wụ ndị ebozo Ẹliẹza nwẹnẹ Gẹshọm nwa Mozizi — uwẹ wụ ndịnị: Rehabia, Jẹshaya, Joram, Zikri lẹ Shẹlomiti.

26Shẹlomiti lẹ umunẹ ẹ e lepụ ihiẹn ndị wẹ gi kwanị Osolobuẹ ẹnya — ndị hụ ile Eze wụ Defidi lẹ ndị-isi ikpụlọ ichẹn-ichẹn gisọnmẹ kwanị Osolobuẹ, ndị hụn ndị-isi agha kị itu agha ichẹn-ichẹn gi kwanị Osolobuẹ — kẹ ndị-isi agha kịsọnmẹ ndị-agha ọgụn-iri kwasị nnụnaị kẹ ndị kịsọnmẹ madụ ọgụn-isẹn ọgụn-isẹn lẹzi hụn ndị-isi agha ọzọ gi kwanị Osolobuẹ.

27Ihiẹn ndị wẹ kwalụa agha kẹ wẹ nọ weri ndịnị gi kwanị Osolobuẹ nị wẹ gi dọnzi Ụlọ-nsọ Osolobuẹ.

28Ihiẹn ile Samuẹlụ onyẹ-amụma lẹ Sọlụ nwa Kishi lẹ Abna nwa Nẹ lẹ Jụabụ nwa Zeruaya gisọnmẹ kwanị Osolobuẹ lẹ ihiẹn ndị ọzọ ile wẹ gi kwanị Chuku rị ẹka Shẹlomiti lẹ umunẹ ẹ.

29Nke ndị ebozo Iziha rịn'a wụ Kenania lẹ ụmụ a ikẹnnyẹ, ọrụn wẹ ye wẹ ẹlẹ ọrụn rị imẹ Ụlọ-nsọ; uwẹ kẹ wẹ tumẹ ndị-isi lẹ ndị e dọnzi oku imẹ Izrẹlụ.

30Ndị ebozo Hibrọnụ rịn'a wụ Hashabia lẹ umunẹ ẹ rị ikẹnnyẹ ọgụn-isẹn kwasị nnụ-ẹnọ — uwẹ kẹ wẹ tumẹ nị wẹ e lepụ ọrụn Osolobuẹ ile lẹ ọrụn eze ẹnya imẹ Izrẹlụ ile rị ẹbamịn Ọdịdan-ẹnyanwụn Iyi-Jọdanị.

31Imẹ ndị Hibrọnụ hụ, Jẹria wụ onyẹ-isi — nọkẹ kẹ wẹ dọn detọ ndị ikpụlọ wẹ isi-isi. Hụn mẹ ahụa ọgụnnaị Defidi kịma, wẹ nọ leban ẹnya ebe wẹ detọsọnmẹ ẹfan ịhịan — wẹ nọ hụn a nị o nwọnsọnmẹ ndị Livaị ebozo Hibrọnụ wụ ndị dikẹn wẹ marịn amarịn rị obodo Jaza hụn rị Gilẹdị.

32Jẹria nwọn ndị dikẹn lẹ ndị isi ikpụlọ ọgụn-mmisẹn kwasị nnụ-isin (2,700), Eze wụ Defidi nọ bu ndị Izrẹlụ rị azụụn hụn ẹbọ, nfetu Iyi-Jọdanị — hụn wụ ebọn Rubẹni lẹ ebọn Gadị lẹ azụụn ebọn Manasẹ ohu che wẹ ẹka, nị wẹ hụn ụzọ e lepụ ihiẹn ile gbasharị ihiẹn Osolobuẹ lẹ ndị gbasharị eze ẹnya.

← Chapter 25 Jump to: Chapter 27 →