1 Chronicles 17

Ika 2018 Bible

← Chapter 16 Jump to: Chapter 18 →

1Ogẹn Defidi gi birigụ obi-eze ẹ, ọ nọ sị onyẹ-amụma wụ Natanị, “Lee m kẹ m bi imẹ obi-eze wẹ gi osisi sida rụn, bụ Ẹkpẹti Nkwerigbama Osolobuẹ rị imẹ ọdụ w'a kpụkpọrị.”

2Natanị nọ sị Defidi, “Mẹ ihiẹn ọwụlẹ rị ị obi, makẹni Chuku hụ ị azụụn.”

3Uhinhin ahụn, Chuku nọ gwa Natanị oku, sị,

4“Jẹn d'a sị odibo m wụ Defidi, ‘Lee ihiẹn Osolobuẹ ku: Ẹlẹ ịyụ k'a tụnnị m ụlọ m k'e bi.

5Kete m ghalẹ Ijiptu wepụha ndị Izrẹlụ d'e ru tannị, m'e ke bitu imẹ ụlọ. Ọdụ-ọdụ kẹ m'e bi, e bisọnmẹ ebe rị ichẹn-ichẹn.

6Ebe ile m nọdị imẹ Izrẹlụ ile, elee onyẹ-ndu ọwụlẹ m tumẹ n'o lepụ ndị nke m ẹnya kẹ m jụtu, “Kị haịn i gilẹni tụnị m ụlọ osisi sida?” ’

7“Sị nwan odibo m wụ Defidi, ‘Osolobuẹ nwọn ihiẹn ile sị: imẹ ọfịa wẹ nọ a zụn anụ, ebe i rị e du atụnrụn, kẹ m gha weri i, tumẹ i n'ị kịma ndị nke m wụ Izrẹlụ.

8A nọyegụọnị m'ị ebe ile i jẹn; e gbupụgụọnị m'ị ndị iṅẹnrẹn i ile. M jẹnkọ nwan d'e mẹ wẹ nụma ẹfan ị rịkẹ nke ndị kachanrịn okẹn-ịhịan a wụ elu-ụwa.

9M k'e ye ndị nke m wụ Izrẹlụ ebe w'a nọdị, kụn wẹ ye ebahụn, e nwọnrin wẹ ebe obibi nke wẹ, e yebehi wẹ wẹ nsọngbu. Ndị-njọ abịangbukọzị wẹ kẹ wẹ dọn mẹ wẹ mbụ

10lẹzi kẹ wẹ dọn rị e mẹ wẹ kete m tumẹmẹni ndị nke m wụ Izrẹlụ ndị-ndu. M k'e welụa ndị-iṅẹnrẹn i ile alị. “ ‘M rị nwan a gwa ị nị mmẹ wụ Osolobuẹ jẹnkọ d'a tụnn'ị ụlọ:

11I bigụ elu i la rịkẹ ndị nẹdi i, m k'e wepụha nwa ị ohu n'o rikin i eze, onyẹ ohu imẹ ụmụ ị ikẹnnyẹ; m k'e mẹ alị-eze ẹ turu.

12Ịya wụ onyẹ hụn k'a tụnnị m ụlọ; m k'e mẹ ukpo-eze ẹ rị jẹnrin ejẹn.

13M k'a wụrụ nẹdi ẹ, ịya nwẹn k'a wụrụ nwa m; emẹbehikọ m'a kẹ nẹdi e mẹ nwa — kẹ m dọn mẹbehi Sọlụ hụn i nọkin ẹnya a.

14M k'e tumẹ ẹ n'ọ kị iwe m lẹ alị-eze m jẹnrin ejẹn; ukpo-eze ẹ k'a rị jẹnrin e jẹn.’ ”

15Ya Natanị nọ gwachanrịn Defidi ihiẹn ile Osolobuẹ ku.

16Ya kẹ Defidi nọ jẹn, nọdị alị ihun Osolobuẹ, sị a, “Euu, Osolobuẹ hụn wụ Chuku, onyẹ kẹ m wụ, kịnị kẹ ikpụlọ m wụ, hụn i gi we m ru ibeni ile?

17Kanị ọ nọ nwan kẹ sị hụnnị e hini i ẹnya, Chuku, y'e kugụọzị nwan ihiẹn rị ihun banyeni ikpụlọ odibo i. Euu, Osolobuẹ hụn wụ Chuku, ị rị e mẹ m nọkẹsị mmẹ kachanrịn ịhịan ile ọghọ e nwọn.

18“Kịnị kẹ mmẹ wụ Defidi k'a sịzị ị nwan banyeni ọghọnị i ye mmẹ wụ odibo i? Y'a marịnghọ odibo i.

19Euu, Osolobuẹ, y'e gigụọ ufiri odibo i lẹ uche i mẹ okẹn ihiẹnni, mẹ ịhịan marịn okẹn-ihiẹn ndịnị ile i kwe nkwa wẹ!

20“Euu Osolobuẹ, onwọnkwọnị onyẹ nọ kẹ ịyụ! Chuku ọzọ arịzị a karị ịyụ — nọkẹ kẹ ntịn ẹnyi dọn nụ a.

21Elee ndị nọ kẹ ndị nke i wụ Izrẹlụ — alị ohu rị ụwa hụn Chuku gi ẹka a jẹn d'a gbarị nị wẹ wụrụ ndị nke ẹ, n'o gi ẹ nwọnrin ẹfan lẹ n'ọ hụn ụzọ mẹsọnmẹ okẹn ihiẹn lẹ ahụnlele a tụ egun, ihiẹn ndị hụn ị rụnsọnmẹ ebe ị nọ chụ ndị alị ichẹn-ichẹn i chụpụnị ndị nke i hụn ị gbapụha alị Ijiptu.

22Ị nọ gi ndị nke i wụ Izrẹlụ wụrụ nke i jẹnrin-ejẹn, yụ wụ Osolobuẹ a wụrụ Chuku wẹ.

23“Osolobuẹ, nị nwan nkwa i kwe banyeni odibo i lẹ ikpụlọ a rịsọnmẹ. Dodo mẹ ihiẹn i kwe nkwa a,

24kẹn'ọ bụn, ẹfan ị a kpọgbarị, a sị wẹ, ‘Osolobuẹ ihiẹn ile rị okpuru ẹ, hụn ndị Izrẹlụ e fe wụ Chuku Izrẹlụ nke-esi!’ Ikpụlọ odibo i wụ Defidi e turusọnmẹ ihun i.

25“Ịyụ wụ Chuku m a ghọsịgụọ odibo i n'ị k'e mẹ ẹbozo ẹ kịsọnmẹ, ya kẹ odibo i gi nwan nwọn obi mẹjẹnmẹn'i ekpereni.

26Heuu, Osolobuẹ, ịyụ wụ Chuku! Y'e kwegụọ odibo i nkwa ndịnị rị mma.

27Ọ sụọgụọ ị nwan n'ị gọzi ikpụnọ odibo i, n'ọ hụn ụzọ rịsọnmẹ jẹnrin ejẹn — ihun i, makẹni ịyụ wụ Osolobuẹ a gọzigụọ a, o k'a wụsọnmẹ ihiẹn wẹ gọzi jẹnrin ejẹn.”

← Chapter 16 Jump to: Chapter 18 →