1 Samuel 1

Ika 2018 Bible

Jump to: Chapter 2 →

1O nwọn okẹnnyẹ ohu w'a kpọ Ẹl'kana, onyẹ ikpụlọ Zufu, ndị alị Rama hụn rị elu òke Ifrem. Ẹl'kana nị wụ nwa Jẹroham nwa Ẹlihu nwa Tohu nwa Zufu onyẹ Livaị alị Ifrem.

2Ẹl'kana nwọn inyẹnmẹ ẹbụọ. Ẹfan ohu wụ Hana. Ẹfan hụn ẹbọ wụ Pẹnina. Pẹnina mụ ụmụ, kanị Hana amụnị.

3Ahụa-Ahụa, Ẹl'kana e jẹn Shilo d'e fe ofufe, a chụnyeni Osolobuẹ Ihiẹn Ile rị okpuru ẹ ẹjan. Ogẹn hụ, ụmụ Ẹlaị ẹbụọ wụ Hof'ni lẹ Finẹhasị, ndị nchụn-ẹjan Osolobuẹ, rị ọrụn imẹ Shilo.

4Wẹ ru ebẹhụ, n'o ru ụhụọhịn Ẹl'kana k'e gi chụn ẹjan, o ye Pẹnina nwunyẹ ẹ lẹ ụmụ a anụ ohu-ohu.

5Kanị o ye Hana ụzọ ẹbụọ makẹni ihiẹn Hana sụọ a ọda; kanị, Osolobuẹ kpọkin Hana ẹkpa-nwa.

6Pẹnina nwunyẹ-di Hana hụ a kọ a ọnụ ọda-ọda makẹni Osolobuẹ kpọkin ẹ ẹkpa-nwa, a kọ a ya hụn e gbu mmọn a.

7Ẹrịra k'o mẹ gha ahụa d'e ru ahụa. Ogẹn ọwụlẹ Hana gi jẹn Ụlọ Osolobuẹ, Pẹnina sikọ d'a kọrịrị a ọnụ d'e runi Hana a kwan ẹkwan, jụ ihiẹn-oriri.

8O ru, Ẹl'kana di ẹ hụ a sị a, “Hana, k'ị rị a kwannị? Kị haịn i gilẹni e ri ihiẹn-oriri? Kị ize rị e zen'i? Akanị m'ị mkpa karị ụmụ-ikẹnnyẹ iri?”

9Ụhụọhịn ohu, ebe wẹ rịzị Shilo, e rigụ wẹ ihiẹn-oriri ragụ, Hana nọ lihi. Ẹlaị wụ onyẹ nchụn-ẹjan nọdị alị elu oche ẹ hụn rị ụsụọ ọnụmụzọ Ụnọ Osolobuẹ.

10Hana hụ e gi ụya rị a obi a kwan ezigbo ẹkwan, a kpọku Osolobuẹ.

11Ọ nọ kwe Osolobuẹ nkwa, sị, “Osolobuẹ Ihiẹn ile rị okpuru ẹ, dodo, omẹni y'e mẹ omikẹn lee ụfụ rị odibo i obi, nyanhan m, omẹni y'a zọnị odibo i, nị y'e ye m okẹnnyẹ, m sikọ d'e yekin y'ẹ; ọ k'a wụchanrịn nke i o we nwụn; onwọnni ogẹn w'e gi kọ a ntutu.”

12Ẹlaị hụ e lee ẹ ebẹhụ ọ rị e mẹ ekpere.

13Hana hụ e mẹ ekpere imẹ obi ẹ, ụgb'ọnụ a hụ e mẹhunmẹ bụ arị wẹ a nụ olu ẹ; Ẹlaị nọ nwan ro ni manya rị a tụ a.

14Ọ nọ sị Hana, “K'ị ranị nwan manya a tụ? Y'a rabehikọ manya tụ?!”

15Ọ nọ sị a, “Mba-o, Diọkpa! M rị e ri ụya; aranị m manya ọwụlẹ: kẹ hụn a tụnị kẹ hụn ghalẹni a tụ! Kama, m rị a gwa Osolobuẹ k'ọ rị m.

16Dodo erokwọlẹ nị nwa ị wụ eje-okpoho! Ekpere kẹ m rị e mẹ ebeni yeni okẹn-ụfụ lẹ ụya rị m obi.”

17Ẹlaị nọ sị “Lama nwan, ihiẹn emẹ i. Osolobuẹ ndị Izrẹlụ ya mẹni i ihiẹn ị rịọ a.”

18Hana nọ yi oro sị, “Euu Diọkpa, y'e mẹkẹni odibo i!” Ọ nọ jẹnmẹ; ọ nọ ri ihiẹn-oriri; o rọnmẹzini ihun.

19Ogẹn eki gi fọn, ikpụnọ hụ ile nọ zọtẹnhin, e jẹngụ wẹ d'e fe Osolobuẹ ofufe kẹ wẹ e mẹ mbu, ya wẹ nọ lakin Rama. Ẹl'kana lẹ Hana a ranhịn, Osolobuẹ nọ nyanhan Hana.

20O mẹgụ, Hana nọ tụrụ imẹ, mụ okẹnnyẹ. Ọ nọ gụn a “Samuẹlụ”, sị, “M rịọnarịn Osolobuẹ ya.”

21Ahụa a bọ, Ẹl'kana lẹ ikpụlọ a ile nọ jẹnmẹzi nị wẹ d'a chụnyeni Osolobuẹ ẹjan nke ahụa ahụn lẹzi n'o d'e mẹzu nkwa o kwe Osolobuẹ.

22Kanị Hana ejẹnni. Ọ sị di ẹ, “Nwatanị karayezi hachanrịngụ ẹran, e jẹn m; e weri m'ẹ jẹn ihun Osolobuẹ d'e gi ẹ kwanị Osolobuẹ — ọ nọdịchanrịn ebẹhụ.”

23Ẹl'kana nọ sị a, “Mẹ hụn ọwụlẹ ka mma ẹnya ị. Nọdị nwan n'ị hagụ a ẹran. Osolobuẹ ya dodo yeni i ẹka mẹzu nkwa ị.” Ya Hana nọ nọdị ụlọ zụn nwata ahụn d'e ru mgbe ọ ha a ẹran.

24Ogẹn nwata hụ gi hagụ ẹran, Hana nọ weri ẹ, k'o mẹhanlẹ nwata, werizi efin ahụa ẹtọ lẹ manya lẹ ọka-witi wẹ gweriẹn k'e jun adana ẹtọ lẹ mkpikpi, wẹhẹ ẹ Ụlọ Osolobuẹ imẹ Shilo.

25E gbugụ wẹ efin hụ gi chụnyeni Osolobuẹ ẹjan, wẹ nọ wẹhẹni Ẹlaị nwata hụ.

26Hana nọ sị a, “Diọkpa, mmẹ nwa ị rọ! Ma isi i, mmẹ wụ okpohonẹi wuzo ebeni ogẹnnẹi e mẹ ekpere a rịọ Osolobuẹ.

27M rịọ Osolobuẹ nwanị; o yegụọ m nwan ihiẹn m rịọ a.

28M rị nwan e we ẹ e ye Osolobuẹ; nke Osolobuẹ k'o k'a wụ o we nwụn.” Wẹ nọ nọ ebẹhụ fe Osolobuẹ ofufe.

Jump to: Chapter 2 →