bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
1 Samuel 14
1 Samuel 14
Ika 2018 Bible
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 15 →
1
Ụhụọhịn ohu, Jonatanị nwa Sọlụ nọ sị okorọbịa e bun'ẹ ihiẹn ọgụn, “Pụha, nị ẹnyi shi ọgbọ ndị-agha Filistia hụnnị rị azụụn hụn ẹbọ.” Kanị, Jonatanị agwanị nẹdi ẹ.
2
Ogẹn ahụn Sọlụ rị mkpẹnrẹn Gibia ukun pomegraneti ohu rị Migrọnụ. Ya lẹ ihiẹn rịkẹ madụ ọgụn-iri kwasị nnụ (600) rị ebẹhụ.
3
Onyẹ nchụn-ẹjan wụ Ahija rị imẹ ndịnị; o yi ẹfọdụ, ẹwuru ọrụn ndị nchụn-ẹjan. Ahija wụ nwa Ahitubu, nwẹnẹ Ikabodu nwa Finẹhasị. Finẹhasị wụ nwa Ẹlaị onyẹ nchụn-ẹjan Osolobuẹ imẹ Shilo. Onwọnni onyẹ marịnnị Jonatanị a pụgụọ.
4
Mkpọnyin rị azụụnnị lẹ azụụnnị ebẹhụ Jonatanị chọ n'ọ fetu shi ebe ndị-agha Filistia rị; ohu kẹ w'a kpọ Bozẹzi, hụn ẹbọ kẹ w'a kpọ Sẹnẹ;
5
imẹ mkpọnyin ndịnị, ohu rị ẹbamịn-ugu, ihun Mik'mashị, hụn ẹbọ rị ẹbamịn ndịdan-mirin, nkọ shi Gẹba.
6
Jonatanị nọ nwan sị okorọbịa hụ e bun'ẹ ihiẹn ọgụn, “Bịa nị ẹnyi fetu d'e kunrun ndị Filistia ndịnị kwalẹni ugun ghalẹni e fe Osolobuẹ. Ikẹnkwọ Osolobuẹ e mẹyeni ẹnyi. Makẹni, onwọnni hụn Osolobuẹ ghalẹni e gi a zụọpụha, kẹ ndị bu ọda kẹ ndị bulẹni ọda!”
7
Hụn e bun'ẹ ihiẹn-ọgụn nọ sị, “Mẹ ihiẹn ile rị ị obi. M rịchanrịn ị azụụn, kẹ imẹ obi m kẹ umẹ-ndụn m ile.”
8
Jonatanị nọ sị, “Pụha nwan; ẹnyi jẹnkọ d'e fetu buru wẹ; ẹnyi jẹnkọ d'a nị wẹ legha ẹnyi.
9
Wẹ sị ẹnyi, ‘Cheri ni nwan ebẹhụ nị ẹnyi kunrun ọnụ!!’ ẹnyi a kụsị, ẹnyi eburukọzị wẹ;
10
kanị, wẹ sị, ‘Nyinhẹn ni nwan ebeni nị ẹnyi mẹ ụnụ ihiẹn,’ ẹnyi e nyinrin, makẹni ẹnyi jẹnkọ d'e gi ẹ marịn nị Osolobuẹ e wegụọ wẹ che ẹnyi ẹka nị ẹnyi mẹri wẹ.”
11
Wẹ ẹbụbụọ nọ we enwẹn wẹ ghọsị ndị-agha Filistia hụ ndị Filistia dọnmẹ ebẹhụ. Ya ndị Filistia hụ nọ yi, “Lee ni! Ndị Hibru a ghagụọ imẹ ọnụ ndị hụ wẹ rụbansọnmẹ gbepụhama!”
12
Wẹ nọ kpọcheni Jonatanị lẹ hụn e bun'ẹ ihiẹn-ọgụn, sị wẹ, “Bịa nị nwan ebeni — nị ẹnyi mẹ ụnụ ihiẹn!” Ya kẹ Jonatanị nọ sị hụn e bun'ẹ ihiẹn-ọgụn, “Nyinsọnmẹ m; Osolobuẹ e wegụọ wẹ ye ẹnyi ndị Izrẹlụ mẹri!”
13
Ya Jonatanị nọ nyinrin, ụkụ lẹ ẹka k'o gi nyinkọ, hụn e bun'ẹ ihiẹn-ọgụn sọnkọ a nsọn-ụkụ. Jonatanị hụ a kụtu ndị Filistia, hụn e bun'ẹ ihiẹn-ọgụn hụ e sọn ẹ, e gbu wẹ.
14
Ihiẹn nọ kẹ madụ ọgụn kẹ Jonatanị lẹ hụn e bun'ẹ ihiẹn-ọgụn gbu imẹ ọgụn ibuzọ hụ. Ebe wẹ fetu gbukọ wẹ e rughọ ogige wẹ nọ a gba bọlụ gbegbegbe!
15
Ya kẹ okẹn egun nọ nwụn ndị-agha Filistia ile, kẹ ndị rị ebe ọdụ agha w'a nọdị kẹ ndị wẹ butọsọnmẹ ebe rị ichẹn-ichẹn kẹ ndị rị ọnụ-agha; ẹhụ a mama wẹ nni, alị nọ mẹhunmẹ. Okẹn ẹhụ-ọmụma nni hụn gha ẹka Osolobuẹ bịa rọ.
16
Ndị wụ ẹnya Sọlụ imẹ Gibia alị Bẹnjamini nọ hụn kẹ igunrun ndị-agha Filistia rị a gha azụụn ile a gbapụ, ya wẹ nọ gwa a;
17
Sọlụ nọ sị ndị ya lẹ wẹ wị, “Kpọkikomẹ ni ndị-agha nị ẹnyi marịn onyẹ pụnị.” Ogẹn wẹ gi lele ẹ, wẹ nọ hụn a nị Jonatanị lẹ hụn e bun'ẹ ihiẹn-ọgụn wụ ndị rịlẹn'a.
18
Ya Sọlụ nọ sị Ahija, “Buhẹ Ẹkpẹti-nsọ Osolobuẹ!” (Ndị Izrẹlụ bu Ẹkpẹti-nsọ hụ ebẹhụ).
19
Kanị ogẹn ahụn Sọlụ gi rị a gwa onyẹ nchụn-ẹjan oku, oro lẹ isusu hụ rị ọgbọ ndị Filistia hụ a waye, ọwaye, ọwaye. Sọlụ nọ sị Ahija, “Latọgụ!”
20
Sọlụ lẹ ndị-agha ile ya lẹ wẹ rị ebẹhụ nọ zu, jẹnmẹ agha. E ru wẹ ebẹhụ, wẹ nọ hụn okẹn isusu rị imẹ igunrun ndị Filistia, wẹ hụ e gbudẹ ibe wẹ!
21
Ndị Hibru hụn te banyegụnị ndị Filistia, burudẹ wẹ ebe wẹ ziẹntọ, nọ nwan banyeni ndị Izrẹlụ wẹ lẹ Sọlụ lẹ Jonatanị wị.
22
Ogẹn ndị Izrẹlụ te warịsọnmẹ alị ugu Ifrem gi nụ nị ndị Filistia gbakọ ọsọ, wẹ nọ ban ọgụn hụ, chụma wẹ ụkụ-akpalẹ-alị.
23
Ẹrịra kẹ Osolobuẹ dọn zụọpụha ndị Izrẹlụ ụhụọhịn ahụn; ọgbọ agha nọ shi Bẹt-Avẹni.
24
Ndị-agha Izrẹlụ nkẹ hụn ihiẹn ụhụọhịn ahụn, makẹni Sọlụ e yeọlẹ wẹ ẹfan Osolobuẹ kun, sị, “D'e ru ẹnyasị, d'e ru mgbe m mẹgwarịchanrịngụ ndị iṅẹnrẹn m, okẹnnyẹ ọwụlẹ hụn ri ihiẹn-oriri jẹnkọ d'e họnrin onyẹ wẹ bụ ọnụ!” Ufiri ẹ, onwọnni onyẹ ri ihiẹn anaị imẹ wẹ ile.
25
Ogẹn ndị agha hụ ile gi banye ẹgboko, mirin-ẹnwụn jun alị ebẹhụ ile.
26
A banhan wẹ ẹgboko hụ, hụn mirin-ẹnwụn rị e shiẹnpụhanị, kanị onwọnni onyẹ buche ẹka ọnụ, makẹni egun ẹfan Osolobuẹ wẹ kun rị a tụ wẹ.
27
Kanị Jonatanị anụnị nị nẹdi ẹ ye wẹ ẹfan Osolobuẹ kun, ọ nọ rụ ọkpọ rị a ẹka ye imẹ ụlọ-ẹnwụn, ra mirin-ẹnwụn. Ọ ragụ a, ndụn nọ ban a.
28
Ya kẹ onyẹ ohu imẹ wẹ nọ sị a, “Nẹdi i yekwọ ndị-agha iwu, kun ẹfan Osolobuẹ ye ẹ, sị, ‘Onyẹ ri ihiẹn-oriri tannị o họnrin onyẹ wẹ bụ ọnụ!’ Ya haịn ndụn gi rị a gụ onyẹ ọwụlẹ.”
29
Jonatanị nọ sị, “Nẹdi m e mẹọlẹ alịnị ile uke. Lee nwan kẹ ndụn banhan m hụnnị m danmịn ẹkẹrẹ mirin-ẹnwụnnị.
30
Nkẹ ọ rịka mma o mẹni ndị-agha te riberi ihiẹn ndị wẹ bunarịn ndị-iṅẹnrẹn ẹnyi tannị. Nkẹ ẹnyi e gbukarị nwan ndị Filistia ẹnịna!”
31
Ndụn gụ ndị Izrẹlụ ọda-ọda ụhụọhịn hụ kẹ wẹ gbugụ ndị Filistia gha Mik'mashị d'e ru Aịjalọnụ.
32
Wẹ nọ gi ẹnya ẹgụn sọn ihiẹn ndị ahụn wẹ nwọnhẹn imẹ agha, werisọnmẹ atụnrụn lẹ efin lẹ ụmụ-efin gbu, ja wẹ tọ alị, rigbama wẹ lẹ ẹdeke.
33
Ya onyẹ ohu nọ sị Sọlụ, “Lee ẹ, ndị-agha ẹnyi rị e mẹkwọ Osolobuẹ njọ-o, wẹ rị e ri anụ lẹ ẹdeke ẹ!” Sọlụ nọ sị, “Mbubu-azụụn kẹ ụnụ rị e bu Osolobuẹ!” Ọ nọ sị “Chọ nị ọmụma hi-ogbe kperehẹ ebeni ozigbo.”
34
Ya ọ nọ sị “Jẹn ni d'e kunrun wẹ, sị wẹ ‘Onyẹ-onyẹ ya wẹhẹ efin lẹ atụnrụn ọ chọ n'o gbu d'a nọ ihun m ebeni gbu ẹ, ri. Emẹzilẹ ni Osolobuẹ njọ e ri anụ lẹ ẹdeke ẹ.’ ” Ya onyẹ ọwụlẹ nọ buhẹ efin ẹ uhinhin hụ, nọ ebẹhụ gbu ẹ.
35
Sọlụ nọ rụnnị Osolobuẹ ukpo nchụn-ẹjan ebẹhụ; ọhụn wụ ukpo nchụn-ẹjan ibuzọ ọ rụn.
36
Omẹgụ, Sọlụ nọ sị wẹ “Nị ẹnyi gi ni uhinhinni chụsọnmẹ ndị Filistia, d'e runi eki e fọn, e gbu wẹ, a kwarị ihiẹn wẹ; ẹnyi edọnmẹkọ kaka akpụ onyẹ ohu imẹ wẹ ndụn!” Wẹ nọ sị a, “Mẹ hụn ọwụlẹ ka ị mma.” Kanị onyẹ nchụn-ẹjan nọ sị, “Nị ẹnyi jụgụdẹ Osolobuẹ.”
37
Ya Sọlụ nọ jụ Osolobuẹ sị, “Nị ẹnyi chụ ndị Filistia? Nị i we wẹ ye ẹnyi mẹri?” Kanị Osolobuẹ ashịarịn'a ụhụọhịn hụ.
38
Ya kẹ Sọlụ nọ sị, “Ụnụ ile ndị ndu-agha, bịa nị ebeni, nị ẹnyi chọpụha njọ wẹ mẹ tannị.
39
Ma Osolobuẹ hụn gbapụha Izrẹlụ, onyẹ mẹ njọ hụ jẹnkọ d'a nwụnrịrị, ọ sụọn'a Jonatanị nwa m rọ!” Kanị onwọnni onyẹ agha ku ihiẹn ọwụlẹ.
40
Ya Sọlụ nọ sị ndị Izrẹlụ ile, “Wuzo ni ebẹhụ; mmẹ lẹ Jonatanị jẹnkọ d'e wuzo ebeni.” Wẹ nọ sị a, “Mẹ ihiẹn ka ị mma ẹnya.”
41
Ya Sọlụ nọ mẹ ekpere jẹnni Osolobuẹ wụ Chuku Izrẹlụ, sị, “Euu Osolobuẹ, Chuku Izrẹlụ, kị haịn i gilẹni kẹ za m tannị? Dodo, ghọsị ẹnyi onyẹ mẹ njọ: omẹni mmẹ mọbụ Jonatanị nwa m, gi Urim za; kanị omẹni ndị họdụnị, ndị nke i rọ, gi Tumim za.” Utẹn Osolobuẹ nọ weri Jonatanị lẹ Sọlụ, nị uwẹ buhẹ oku, ọ hịan ndị hụn ẹbọ, ndị-agha Izrẹlụ, nị ẹlẹ wẹ.
42
Sọlụ nọ sị, “Nyan nwan utẹn Osolobuẹ onyẹ mẹ njọ hụ imẹ mmẹ lẹ Jonatanị.” Utẹn nọ nwụn Jonatanị.
43
Sọlụ nọ sị Jonatanị, “Gwa m ihiẹn i mẹ.” Jonatanị nọ sị a, “Mirin-ẹnwụn mmaka mẹhụ ẹkẹrẹ kẹ m gi ọnụnụ ọkpọ m danmịn. Ọhụn kẹ m jẹnkọ d'a nwụnhụnnị?”
44
Sọlụ nọ sị, “Chuku ya mẹ m ihiẹn, mẹshidẹ m'ẹ ikẹn, omẹni ịyụ wụ Jonatanị a nwụnnị!”
45
Kanị wẹ ile nọ buche ọnụ, sị Sọlụ, “Nị Jonatanị nwụnhụn, Onyẹ nwẹn mẹ ihiẹn Izrẹlụ gi nwọnhẹn okẹn mgbapụhanị tannị? O mẹkọ! Ma Osolobuẹ, onwọnni akpụ ntutu ohu rị a isi jẹnkọ d'a dantọ alị, makẹni eyemẹka Osolobuẹ kẹ o gi mẹ ihiẹnni tannị.” Ẹrịra kẹ wẹ dọn zụọpụha Jonatanị, wẹ nọzilẹni gbu ẹ.
46
Ya Sọlụ nọ chụbehi ndị Filistia, ndị Filistia nọ lakin alị wẹ.
47
Mgbe Sọlụ gi werigụ ọnọdị a ukpo eze Izrẹlụ, ọ nọ lụsọn ndị iṅẹnrẹn wẹ rị azụụn ile agha: ndị Mụabụ, ndị Amọnụ, ndị Ẹdọm, ndị nze Zoba lẹ ndị Filistia. Ebe ọwụlẹ o dọn ihun, mmẹri-mmẹri k'o mẹri.
48
Ọ nụ agha ọhụnma-ọhụnma, mẹri ndị Amalẹki, zụọpụha Izrẹlụ ẹka ndị te e gbu wẹ a kwarị ihiẹn wẹ.
49
Ụmụ Sọlụ ikẹnnyẹ wụ Jonatanị, Ish'vi lẹ Mal'ki-Shụa. Ẹfan nwa a onyẹchẹn okpoho wụ Mẹrabụ, nke okpoho hụn nta wụ Mikalụ.
50
Ẹfan nwunyẹ ẹ wụ Ahinụam nwa Ahimaazị. Onyẹ ndu-agha Sọlụ wụ Abna nwa Nẹ. Nẹ wụ nwẹnẹ nẹdi Sọlụ.
51
Kishi nẹdi Sọlụ lẹ Nẹ nẹdi Abna wụ ụmụ Abiẹlụ.
52
D'e ru ni ogẹn Sọlụ a gụ, ndị Izrẹlụ lẹ ndị Filistia lụsọnmẹ eje-agha; Sọlụ hụnọlẹ odogun-agha mọbụ onyẹ egun ghalẹni a tụ, o we ẹ cheni ndị-agha a.
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 15 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31