1 Samuel 28

Ika 2018 Bible

← Chapter 27 Jump to: Chapter 29 →

1Ogẹn ahụn, o nwọn ogẹn ndị Filistia gi kịrị ndị-agha wẹ d'a lụsọnzi Izrẹlụ ọgụn. Akishi nọ sị Defidi, “Y'a marịngụọ nị ịyụ lẹ itu i sikọ d'e sọn mmẹ lẹ ndị-agha ẹnyi jẹn agha nụ.”

2Defidi nọ sị a, “I jẹnkọ nwan d'e gi ẹnya ị hụn ihiẹn odibo i k'a s'ẹka mẹ.” Ya kẹ Akishi nọ sị Defidi, “Ọ hụghọ mma; m k'e gi i họnrin onyẹ m gi e che ẹhụ d'e ru ọnwụn.”

3Samuẹlụ a nwụnhụngụọ ogẹn ahụn; ndị Izrẹlụ ile a kwangụọ a, li ẹ imẹ obodo ẹ wụ Rama. Sọlụ nkẹ a chụpụgụọ ndị ile a gba ẹfa lẹ ndị ile a ma ozun e du mmọn e ku imẹ alị Izrẹlụ.

4Ndị-agha Filistia nọ zu imẹ Shunẹm d'e weri ọnọdị agha; Sọlụ nkẹ nọ kpọgbama ndị-agha Izrẹlụ ile, wẹhẹ wẹ ile imẹ Gil'bụa d'e weri ọnọdị agha.

5Ogẹn Sọlụ gi hụn ndị-agha Filistia, egun nọ tụma a; obi a nahịn a.

6Ọ nọ jụ Osolobuẹ ihiẹn o k'e mẹ, kanị Osolobuẹ ashịarịn'a: o gini nrọ shịarị a, o gini utẹn-Osolobuẹ wẹ gi a marịn uche ẹ shịarị a, o gini ndị-amụma shịarị a.

7Sọlụ nọ gwarị sị idibo ẹ, “D'a chọnị nị m okpoho a gba ẹfa, nị m jụ a ihiẹn m k'e mẹ.” Wẹ nọ sị a, “Ohu hụ Ẹndọ.”

8Sọlụ nọ kẹnhutọ makẹ wẹ gha a marịn a, yiri ẹkwa ọzọ. Ịya lẹ ikẹnnyẹ ẹbụọ nọ gi imẹ abalị chọburu okpoho hụ. Sọlụ nọ sị okpoho hụ, “Jụnị m onyẹ-mmọn ajụjụ; kpọpụhanị m onyẹ m jẹnkọ d'a kpọ ẹfan.”

9Okpoho hụ nọ sị a, “Kanị y'a marịnghọ ihiẹn Sọlụ mẹ, n'ọ chụpụchanrịngụọ ndị ile a gba ẹfa alịnị lẹ ndị ile e sọn ndị-mmọn e ku. K'ị kpọnị nị m nwan ọnyan n'i gbu m?”

10Sọlụ nọ kun Osolobuẹ, sị, “Ma Osolobuẹ, egikọ wẹ ihiẹnni ye i afụnfụn.”

11Okpoho ahụn nọ sị, “Onyẹ m'a kpọpụhanị ị?” Sọlụ nọ sị a, “Kpọpụhanị m Samuẹlụ.”

12Ogẹn okpoho hụ gi hụn Samuẹlụ, ọ nọ dọbepụ oro, sị Sọlụ, “K'i mẹni m ẹro? Ịyụ wụ Sọlụ!”

13Ya eze nọ sị a, “Atụlẹ egun. K'ị rị a hụn?” Ọ nọ sị a, “M rị a hụn mmọn gha imẹ alị pụla.”

14Sọlụ nọ jụ a, “Nanị k'ọ nọ?” Ọ nọ sị, “Okẹnnyẹ ka ẹgẹdi yi ẹkwa tueru alị pụla.” Ya Sọlụ nọ marịn nị Samuẹlụ rọ, ọ nọ hulụan'a isi alị, ye ọghọ.

15Samuẹlụ nọ sị Sọlụ, “K'ị kpọpụhanị m? K'i rị e yeni m nsọngbu?” Sọlụ nọ sị a, “M rị okẹn nsọngbu. Ndị Filistia rị a lụsọn m agha, kanị Osolobuẹ a gbakitọgụọ m azụụn. Ọ rịzịnị a za m — kẹ ndị-amụma kẹ nrọ — onwọnzini hụn o gi a za m. Ịya kẹ m kpọnị ị nwan, n'ị hụn ụzọ gwa m ihiẹn m k'e mẹ.”

16Samuẹlụ nọ sị a, “K'ị rị nwan a jụnị m, ebe o mẹ ni Osolobuẹ a gbakitọgụọ ị azụụn, họnrin eṅẹnrẹn i?

17Osolobuẹ e mẹgụọ nwan ihiẹn ọ gha ọnụ m ku. Osolobuẹ a napụgụọ ị ọkịkị alị-eze Izrẹlụ, w'ẹ ye onyẹ ohu imẹ ndị ẹhụ ị wụ Defidi.

18Makẹni y'e mẹni ihiẹn Osolobuẹ sị ị mẹ, y'e mẹni ndị Amalẹki ihiẹn ọ chọ n'o gi iwe-lẹ-ọnụma a mẹ wẹ, ya kẹ Osolobuẹ gi mẹ i ihiẹnni tannị.

19Osolobuẹ jẹnkọ nwan d'e bu kẹ ịyụ kẹ ndị Izrẹlụ che ẹka ndị Filistia mẹri; ekile, ịyụ lẹ ụmụ ị ikẹnnyẹ jẹnkọ d'a rị ebeni m rị. Osolobuẹ k'e buzikwọ ndị-agha Izrẹlụ che ẹka ndị Filistia mẹri.”

20Ozigbo hụ, Sọlụ nọ dan, fiẹnrin alị mọmọmọ, makẹni egun ihiẹn Samuẹlụ ku a tụgbugụọ a. Akpụ ndụn ohu arịzị a, makẹni o rini ihiẹn ọwụlẹ ụhụọhịn ahụn gbegbegbe, kẹ efinaị kẹ uhinhin.

21Ogẹn okpoho ahụn gi bịa ebe Sọlụ rị, hụn a nị ihiẹnni mẹhunmẹ ẹ ọda-ọda, ọ nọ sị Sọlụ, “Lee ẹ, mmẹ wụ odibo i okpoho e mẹgụọ ihiẹn ị sị m mẹ. M bu ndụn m che ọb'ẹka mẹ ihiẹn ị sị m mẹ.

22Gọn nwan odibo i ntịn dodo! Nị m ye i ihiẹn-oriri, n'i ri, n'ị hụn ndụn gi lama.”

23Sọlụ a jụ, sị, “Erikọ m.” Kanị ndị ịya lẹ uwẹ wị nọ sọn okpoho hụ rịọ a, ọ nọ gọn wẹ ntịn. Ọ nọ gha alị ebe ọ dantọ lihi ọtọ, nọdị elu bẹdi.

24Okpoho hụ nwọn nwa-efin ọ zụntọ ụlọ. Ọ nọ gbu ẹ ọgbahu-ọgbahu, kpọnrin ọka wẹ gwe, gwọ a, gi ẹ mẹmẹ brẹdi yisti rịlẹni.

25Ọ nọ buhẹni Sọlụ lẹ ndị ya lẹ wẹ wị ya, wẹ nọ ri. Wẹ nọ lihi ọtọ, gizi uhinhin hụ lama.

← Chapter 27 Jump to: Chapter 29 →