1 Samuel 13

Ika 2018 Bible

← Chapter 12 Jump to: Chapter 14 →

1Ahụa ohu kẹ Sọlụ nọdị nị wẹ d'e kin ẹ eze ifọnrinfọn. Ogẹn o gi kịpụ Izrẹlụ ahụa ẹbụọ,

2ya Sọlụ nọ họrị madụ nnụ-uku-ẹtọ (3,000) imẹ Izrẹlụ: imẹ wẹ, nnụ-uku ẹbụọ e sọn ẹ nọdị Mik'mashị lẹ alị-ugu rị Bẹtẹlụ, nnụ-uku ohu e sọn nwa a wụ Jonatanị nọdị Gibia rị alị Bẹnjamini. Ọ nọ sị ndị-agha ndị họdụnị la.

3Jonatanị maye ndị-agha Filistia a nọdị Gẹba, ndị Filistia nọ nụ a. Sọlụ nọ zi ndị nke ẹ gbu opi ghagbarị alị Izrẹlụ, wẹ hị, “Ndị Hibru, nụn'a!

4Sọlụ maye ndị-agha Filistia a nọdị Gẹba; ize ndị Izrẹlụ a bangụọ nwan ndị Filistia.” Ya ndị Izrẹlụ ile nọ nụ ya wụ ozi, wẹ nọ kpọ ndị-agha Izrẹlụ ile d'e kunrun Sọlụ imẹ Gil'galụ.

5Ndị Filistia nkẹ nọ zu nị wẹ lụsọn Izrẹlụ agha. Wẹ kị ụgbọ-ẹshin nnụ-uku iri-kwasị-ọgụn lẹ madụ nnụ-uku isin gi ẹshin a lụ agha, cheni igunrun ndị agha bu ọda kẹ ẹjan rị mkpẹnrẹn ohimin. Wẹ nọ shi Mik'mashị d'e weri ọnọdị agha, ẹbamịn ọwụwa-ẹnyanwụn Bẹt-Avẹni.

6Mgbe ndị Izrẹlụ gi hụn nị ọnọdị ndị nke wẹ a jọpụ njọ lẹni ihiẹn arịnịnị ndị agha wẹ nkẹ mma, wẹ nọ warịma imẹ okporo lẹ imẹ ọfịa lẹ ebe ọmụma hi-ogbe rịsọnmẹ lẹ imẹ olu lẹ imẹ ọmị;

7o nwọnghọdẹ ndị Hibru fetu Iyi Jọdanị, shi alị Gadị lẹ Gilẹdị. Sọlụ nkẹ aghanị Gil'galụ pụ. Ẹhụ hụ a ma ndị ile ịya lẹ wẹ gba nọdị nni makẹ egun.

8Sọlụ e chepụ akpọhịn ẹsa Samuẹlụ kaye o k'e gi bịa, Samuẹlụ abịakwọnị Gil'galụ, bụ ndị agha Sọlụ hụ a la Sọlụ tọ.

9Ya Sọlụ nọ sị wẹ, “Kpụnhannị nị m anụ wẹ k'e gi chụn ẹjan w'a dụn ọkụn lẹ ẹjan-ekele.” Ya Sọlụ nọ gi ẹka a chụn ẹjan w'a dụn ọkụn.

10Ọ chụngụ hụ ẹjan ahụn w'a dụn ọkụn, Samuẹlụ nọ bịa. Sọlụ nọ jẹnmẹ d'e kele ẹ.

11Samuẹlụ nọ sị a, “Kị wụ ihiẹnni i mẹ?” Sọlụ nọ sị a, “Mgbe m gi hụn kẹ ndị-agha m rị a pụ, hụn nị y'a bịanị ogẹn i ku, hụn nị ndị Filistia e gbakikomẹgụọ imẹ Mik'mashị d'a lụ agha,

12m nọ sị enwẹn m, ‘Ndị Filistia k'a bịa tan Gil'galụ d'a maye m, bụ m'e ke rịọ Osolobuẹ n'o yeni ẹnyi ẹka.’ M nọ sị nị m gwarị gi ẹka m chụn ẹjan w'a dụn ọkụn.”

13Samuẹlụ nọ sị, “Y'e mẹọlẹ ihiẹn nzuzu! Y'e mẹọlẹ ihiẹn Osolobuẹ wụ Chuku i sị ị y'e mẹlẹ. Omẹni ẹlẹ hụn i m'ẹ, nkẹ Osolobuẹ e mẹ i kịsọnmẹ Izrẹlụ.

14Kanị y'a kịkọzị; Osolobuẹ a chọrịgụọ onyẹ obi ịya lẹ ịya wụ ohu; o tumẹgụọ a onyẹ-ndu ndị nke ẹ, makẹni y'e mẹọlẹ ihiẹn Osolobuẹ sị y'e mẹlẹ.”

15Samuẹlụ nọ gha Gil'galụ pụ, shi Gibia rị alị Bẹnjamini. Sọlụ nkẹ nọ gụn ndị ịya lẹ wẹ rị, wẹ rị ihiẹn nọkẹ madụ ọgụn-iri kwasị nnụ (600).

16Sọlụ lẹ Jonatanị nwa a lẹ ndị wẹ lẹ wẹ wị hụ Gibia rị alị Bẹnjamini. Ndị Filistia nkẹ hụ Mik'mashị e che.

17Ya ndị-agha Filistia nọ gha ebẹhụ wẹ rị e che imẹ Mik'mashị zipụ itu ndị-agha ẹtọ jẹnkọ d'a gha azụụn ichẹn-ichẹn maye ndị Izrẹlụ: Itu ohu nọ dọn ihun Ọfra hụn rị alị Shụalụ,

18itu hụn ẹbọ e dọn ihun Bẹt-Họrọnụ; hụn mẹ wẹ ẹtọ e dọn ihun alị hụ rị okẹn hụn wẹ nọ e legha Ọdanmgbugbu Zẹbo lẹ atụ.

19Ogẹn ahụn, onwọndẹni kaka akpụ onyẹ ohu a kpụ ụzụn imẹ alị Izrẹlụ ile. Ndị Filistia anịnị wẹ, makẹni ndị Filistia sị, “O ru tan ndị Hibru a kpụma ọpịa-agha mọbụ obo.”

20Ndị Izrẹlụ e jẹn ẹka ndị Filistia d'e sụọn ihiẹn wẹ gi a dụkpọ alị, azi, anyụn lẹ ọpịa-gọrịnị wẹ gi a ghọ ihiẹn-ugbo.

21Ụzọ ẹbụọ imẹ ẹtọ egho ọrụn-ụhụọhịn kẹ wẹ gi e sụọn ihiẹn wẹ gi a dụkpọ alị lẹ azi, e gi ụzọ ohu imẹ ụzọ ẹtọ e sụọn anyụn wẹ gi a rụn ọrụn lẹ ọkpọ wẹ gi e du efin.

22Ufiri ẹ, hụnnị agha dan, onwọnni akpụ onyẹ-agha ohu imẹ wẹ ile sọnkọ Sọlụ lẹ Jonatanị gi ọpịa-agha mọbụ obo; Sọlụ lẹ Jonatanị nwa a sụọ gi!

23Imẹ ndị-agha Filistia bịa aghanị, itu ohu e jẹngụọ d'e weri ọnọdị agha ebe w'a gha e fetu ugu Mik'mashị.

← Chapter 12 Jump to: Chapter 14 →