1 Samuel 6

Ika 2018 Bible

← Chapter 5 Jump to: Chapter 7 →

1Ogẹn Ẹkpẹti Osolobuẹ gi nọpụ alị ndị Filistia ifọn ẹsa,

2ndị Filistia nọ kpọ ndị ohẹn-mmọn wẹ lẹ ndị a gbanị wẹ ẹfa, jụma wẹ sị, “Nanị kẹ ẹnyi e mẹ Ẹkpẹti-Osolobuẹ? Gwa nị ẹnyi kẹ ẹnyi e dọn zikin ẹ alị a.”

3Wẹ nọ sị wẹ, “Ụnụ jẹnkọnị d'e bukin Ẹkpẹti mmọn Izrẹlụ, agbakwọlẹ n'a ẹka zila a, gi ni oyiye onyẹ-ikpe-ma du ẹ ụla, kẹni ụnụ dịnhịn; ụnụ jẹnkọ d'e e gi ẹ marịn ihiẹn ẹka a gilẹni gụ ụnụ ẹhụ.”

4Wẹ nọ jụ wẹ, “Kị ẹnyi k'e gi ye oyiye onyẹ-ikpe-ma?” Wẹ nọ sị wẹ, “Ihiẹn isẹn wẹ gi goru kpụ hụn nọ ke ihiẹn-ofifi fi ịhịan lẹ oke isẹn wẹ gizi goru kpụ; isẹn ahụn ndị-ọkịkị Filistia rị, makẹni emu ohu hụ rị a kụ kẹ ụnụ kẹ ndị rị a kị ụnụ.

5Kpụ ni ihiẹn-ofifi ndị hụ lẹ oke ndị hụ rị e wiwi alị ụnụ, ụnụ e gi wẹ ye mmọn Izrẹlụ ọghọ. Ikẹnkwọ o sekin ẹka mẹbehi ụnụ lẹ mmọn ụnụ lẹ alị ụnụ ihiẹn ọ rị e mẹ ụnụ.

6Kị ụnụ rị a kpọkinni obi kẹ ndị Ijiptu lẹ Fẹro dọn mẹ? Ogẹn o gi gi ẹka ikẹn sọn wẹ, ahatuni wẹ ndị Izrẹlụ nị wẹ jẹnmẹ ebe wẹ jẹnkọ?

7“Kwademẹ ni nwan trọkụ ọhụn, ụnụ e weri efin ẹbụọ mụnị wẹ kẹnmẹtulẹni ẹgbụn ọrụn. Kẹn ni efin ndị hụ limẹ trọkụ hụ, ka napụ nị wẹ ụmụ wẹ d'a kpọkin ye ụgba-anụ.

8Weri ni Ẹkpẹti Osolobuẹ hụ, ụnụ a dọ a ye imẹ trọkụ hụ, bu ihiẹn goru ndị ahụn ụnụ zijẹnkọn'a hụn wụ oyiye onyẹ-ikpe-ma che imẹ ẹkpẹti ichẹn butọ ụsụọ a, ụnụ e zi ẹ lama.

9Ka e lekwọ n'a: o dọn ihun ẹgbẹrẹ alị a, ibe Bẹt-Shẹmẹshi alị Izrẹlụ, ya wụ nị Osolobuẹ zihẹni ẹnyi okẹn nsọngbuni. Kanị omẹni o dọnni ihun ebẹhụ, ya wụ nị ẹlẹ Osolobuẹ ti ẹnyi ẹka, nị nsọngbuni bịa nke ẹ.”

10Wẹ nọ mẹ ihiẹn wẹ sị wẹ mẹ, limẹ efin ẹbụọ nọ ẹrịra ye trọkụ, kpọkin ụmụ wẹ ye imẹ ụgba-anụ,

11a dọ wẹ Ẹkpẹti Osolobuẹ ye elu trọkụ hụ, ya lẹ ẹkpẹti hụ wẹ buche oke goru lẹ ihiẹn-ofifi goru.

12Eziẹ-eziẹ, efin ndị hụ nọ buli, dọn ihun Bẹt-Shẹmẹshi ozigbo-ozigbo, ghasọnmẹ ụzọ hụ, yikọ “Muuu! Muuu!” jẹnkọ; akụyeni wẹ ẹka-nni, akụyeni wẹ ẹka-ekpẹn. Ndị-ọkịkị ndị Filistia nọ sọn wẹ d'e rukwọrị okẹn wẹ lẹ Bẹt-Shẹmẹshi.

13Ogẹn hụ, ndị Bẹt-Shẹmẹshi rị imẹ ugbo wẹ imẹ ọdanmgbugbu, e be ọka-witi. Ogẹn wẹ gi lee ẹnya, hụn Ẹkpẹti Osolobuẹ, wẹ nọ ghọghọ.

14Trọkụ hụ e ru ugbo Joshụa onyẹ Bẹt-Shẹmẹshi, ọ nọ kụsị ẹhụ ọmụma ohu hi-ogbe. Ya ndị Bẹt-Shẹmẹshi nọ jagi osisi wẹ gi rụn trọkụ hụ, gi ẹ fiye ọkụn, gi efin ndị hụ chụnyeni Osolobuẹ ẹjan w'a dụn ọkụn,

15ndị Livaị nọ butu Ẹkpẹti Osolobuẹ hụ lẹ ẹkpẹti hụ wẹ buche ihiẹn goru ndị hụ, bu wẹ che elu ọmụma uku hụ. Ụhụọhịn ahụn, ndị Bẹt-Shẹmẹshi nọ chụnyeni Osolobuẹ ẹjan w'a dụn ọkụn, chụnyezin'ẹ ẹjan ichẹn-ichẹn.

16Ndị-ọkịkị isẹn Filistia hụ hụnchanrịn ihiẹnni ile. Omẹgụ, wẹ nọ lakin Ẹkrọnụ ụhụọhịn ohu hụ.

17Ndịnị wụ ihiẹn-ofifi goru hụn obodo isẹn rị alị Filistia wẹhẹ gi chụnyeni Osolobuẹ ẹjan onyẹ-ikpe-ma: ohu wụ nke Ash'dọdụ; ohu wụ nke Gaza; ohu wụ nke Ash'kẹlọnụ; ohu wụ nke Gatị; ohu wụ nke Ẹkrọnụ.

18Oke goru ndị hụ sọnn'ẹ nọkinzị ẹnya obodo isẹn ndị hụ, obodo isẹn hụn ndị-ọkịkị Filistia nọ a kị — obodo isẹn wẹ tụnhunmẹ mgbọn lẹ ụmụ alị ndị fihunmẹni wẹ. Ọmụma uku ahụn wẹ dọ Ẹkpẹti Osolobuẹ ye elu ẹ turuhụkwọ nwan imẹ ugbo Joshụa onyẹ Bẹt-Shẹmẹshi d'e ru tannị, a shịa ẹri ihiẹn ndịnị.

19Kanị Osolobuẹ gbu ikẹnnyẹ ndị Bẹt-Shẹmẹshi iri kwasị ọgụn ẹtọ makẹni wẹ feye ẹnya imẹ Ẹkpẹti Osolobuẹ hụ. Ndị alị ahụn nọ kwan ọda-ọda yeni ẹka hụ zeni Osolobuẹ gi sọn wẹ.

20Ya ndị Bẹt-Shẹmẹshi nọ sị, “Onyẹ jẹnkọ d'a s'ẹka turu ihun Osolobuẹ, Chukuni rị nsọ? Onyẹ kẹ ẹnyi e bu nwan Ẹkpẹtini jẹnni n'ọ gha ẹnyi ẹka pụ?”

21Ya wẹ nọ zi ozi jẹnni ndị Kiriatị-Jiarim, sị wẹ, “Ndị Filistia e bukinhẹngụọ Ẹkpẹti Osolobuẹ. D'e buru n'ẹ shi alị ụnụ.”

← Chapter 5 Jump to: Chapter 7 →