2 Kings 11

Ika 2018 Bible

← Chapter 10 Jump to: Chapter 12 →

1Ogẹn Atalia wụ nnẹ Ahazia gi hụn a nị Ahazia nwa a wụ eze a nwụnhụn, ọ nọ gbu ndị ile rị ebọn eze.

2Kanị nwẹnẹ-okpoho Ahazia wụ Jehoshẹba nọ gi nzuzue papụ Jụashị (Jehụashị) nwa Ahazia, imẹ ụmụ eze ndị ahụn wẹ chọ nị wẹ gbu. Jehoshẹba lẹ Ahazia wụ ụmụ Joram hụn Ahazia risọn eze. Jehoshẹba nọ bu nwata hụ lẹ onyẹ a pan'a zuemẹ imẹ mmughẹ makẹ Atalia gha a hụn a; ya wẹ nọlẹni gbu nwata hụ.

3Ya lẹ hụn ahụn a pan'a nọ warị imẹ Ụlọ-nsọ Osolobuẹ ọrọgbọ ahụa isin Atalia gi rị a kị alị Juda.

4Hụn mẹ ahụa ẹsa Atalia kịma, Jehoyada onyẹ-isi nchụn-ẹjan nọ zi wẹ d'a kpọhan'a ndị ọkị-agha a kị ndị-agha ọgụn-isẹn ọgụn-isẹn lẹ ndị kị ndị-agha Karaịtị lẹ ndị eze gi e che ẹhụ. Ọ nọ wẹhẹ wẹ imẹ Ụlọ-nsọ Osolobuẹ. Ya ọ nọ mẹ wẹ kwe ẹ nkwa, sị wẹ kun ẹfan Osolobuẹ imẹ Ụnọ-nsọ Osolobuẹ ebẹhụ. Ya ọ nọ ghọsị wẹ nwa eze.

5Ọ nọ sị wẹ, “Lee ni ihiẹn ụnụ sikọ d'e mẹ: Ụnụ ile ndị rị ọrụn ụhụọhịn izu-ikẹn jẹnkọ d'e kebe enwẹn ụnụ ụzọ ẹtọ: itu ohu jẹnkọ d'e che obi-eze;

6itu ohu jẹnkọ d'e che Ọnụ-mgbọn Sọ; itu ohu jẹnkọ d'a rị ọnụ-mgbọn — nọdị azụụn ndị e che eze nche, gi usọnrọn che Ụlọ-Osolobuẹ lẹ enwẹn ẹ nche.

7Nke itu ẹbụọ hụn rịlẹni ọrụn ụhụọhịn izu-ikẹn, ọnụ ile jẹnkọ d'e che eze nche imẹ Ụlọ-nsọ.

8Nọhunmẹ ni eze; onyẹ-onyẹ ya kwọndọn ihiẹn-ọgụn a ẹka. Onyẹ ọwụlẹ nọzụnhan ebe ụnụ rị, ọnụ e gbu ẹ. Nọkunmẹkwọ nị eze ọhụnma ebe ọwụlẹ o jẹnkọ.”

9Ya ndị ọkị-agha hụ nọ mẹchanrịn kẹ Jehoyada onyẹ-isi nchụn-ẹjan dọn ku. Onyẹ-onyẹ nọ kịha itu ẹ, kẹ ndị rị ọrụn ụhụọkịn izu-ikẹn kẹ ndị rịlẹni, wẹ ile nọ bịa d'e kunrun Jehoyada onyẹ-isi nchụn-ẹjan.

10Ọ nọ kpọnye wẹ obo lẹ akpaịn Eze Defidi kịtọ mbụ-mbụ rị imẹ Ụlọ-nsọ Osolobuẹ.

11Ya ndị nche hụ, onyẹ-onyẹ lẹ ihiẹn-ọgụn rị a ẹka, nọ werisọnmẹ ọnọdị, nọhunmẹ eze, ihun Ụnọ-Osolobuẹ lẹ enwẹn lẹ ukpo nchụn-ẹjan hụ rị ebẹhụ, gha azụụnnị d'e ru azụụnnị.

12Jehoyada nọ nwan wepụha Jụashị nwa eze, bu okpu-eze che ẹ isi; ye ẹ Ẹhụhụọ Iwu Osolobuẹ. Wẹ nọ hukpu ẹ udẹn-ntumẹ, kin ẹ eze, ndị alị hụ ile nọ kpọ ẹka, yi, “Agụ, isi i chei!”

13Ogẹn Atalia gi nụ ụzụn ahụn ile ndị nche lẹ ndị alị rị a zụn, ọ nọ jẹn d'e kunrun wẹ imẹ Ụlọ-nsọ Osolobuẹ.

14O lee ẹnya, e lee eze k'o wuzo ẹhụ adansụn rị ihun Ụlọ-nsọ, ebẹhụ ndị-nze a nọdị. Ndị ọkị-agha lẹ ndị e gbu opi turuyeni eze, ndị alị hụ ile hụ a ghọghọ, e gbu opi. Ya kẹ Atalia rị a kịnị nọ dọwa ẹwuru o yi, e yi, “Nnupụ-isi! Nnupụ-isi!!”

15Onyẹ-isi nchụn-ẹjan wụ Jehoyada nọzị sị ndị ọkị-agha hụ, “We ni okpoho hụ che etintin ụnụ ndị agha, ụnụ e dupụ a imẹ Ụlọ-nsọ ebeni; onyẹ sọnmẹ ẹ, ụnụ e gi ọpịa-agha gbu hụnyẹ.” Jehoyada sị, “Ẹlẹ imẹ Ụlọ-nsọ Osolobuẹ ebeni kẹ wẹ k'a nọ gbu ẹ.”

16Ya wẹ nọ nwụndọn ẹ, e we w'ẹ ghafe ebe ẹshin gha a banye obi-eze, nọ ebẹhụ gbu ẹ.

17Jehoyada nọ mẹ ndị alị lẹ eze kwe nkwa nị wẹ k'e bini Osolobuẹ, mẹzikwọ ndị alị lẹ eze wẹ kwetarị nkwa.

18Ndị alị hụ ile nọ shi ụlọ-mmọn Baalụ: a kụtu w'ẹ; a kụkpọchanrịn wẹ ukpo nchụn-ẹjan lẹ ihiẹn ile rịn'a w'a rụa, gbu ohẹn mmọn Baalụ wụ Matanị tọ ihun ukpo nchụn-ẹjan ndị hụ. Jehoyada wụ onyẹ nchụn-ẹjan nọ tumẹ ndị nche ye Ụlọ-nsọ Osolobuẹ.

19O weri ndị kịsọnmẹ ndị-agha ọgụn-isẹn ọgụn-isẹn, ndị Karaịtị lẹ ndị e che eze nche lẹ ndị alị hụ ile, wẹ ile nọ gha imẹ Ụlọ-nsọ Osolobuẹ weri eze, gha ọnụ-mgbọn ndị nche, weban a obi-eze. Eze nọ nwan nọdị ukpo-eze.

20Ya ndị alị hụ ile nọ ghọghọ. Obodo nọ mẹ jụụ, makẹni e gigụọ wẹ ọpịa-agha gbu Atalia tọ obi-eze.

21Jụashị (Jehụashị) rị nwa ahụa ẹsa k'ọ kịma.

← Chapter 10 Jump to: Chapter 12 →