2 Kings 12

Ika 2018 Bible

← Chapter 11 Jump to: Chapter 13 →

1Hụn mẹ ahụa ẹsa Jehu kịma ndị Izrẹlụ ẹbamịn-ugu kẹ Jehụashị họnrin eze Juda, azụụn hụn ẹbọ. Jehụashị nọ Jerusalẹm kị Juda; ahụa ọgụnnaị k'ọ kị. Ẹfan nnẹ ẹ wụ Zibịa onyẹ Biẹshẹba.

2Jụashị mẹchanrịn ihiẹn rị mma ẹnya Osolobuẹ ọrọgbọ hụ ile onyẹ-isi nchụn-ẹjan wụ Jehoyada gi e ye ẹ ndụnmọdụn.

3Kanị, ofufe hụ wẹ rị a dan Iwu e fe Osolobuẹ ebe jẹnsọnmẹ elu a kụsịkwọnị, ndị alị hụkwọ e jẹn ebẹhụ d'a chụnnị Osolobuẹ ẹjan, a mụ nsẹnsi.

4Jụashị sị ndị nchụn-ẹjan, “Weri ni egho ile w'e wẹhẹ d'e ye oyiye rị nsọ imẹ Ụlọ-nsọ Osolobuẹ: kẹ egho ụtụ-isi kẹ hụn wẹ gi mẹzu nkwa wẹ kwe Osolobuẹ kẹ egho ịhịan gi uche ẹ wẹhẹ Ụlọ Osolobuẹ.

5Onyẹ nchụn-ẹjan ọwụlẹ ya narịnsọnmẹ ndị jẹnkọ d'e wẹhẹn'ẹ egho oyiye wẹ, nị wẹ gi ẹ dọnzi ebe ọwụlẹ wẹ hụn wiwini imẹ Ụlọ-nsọ.”

6Kanị ndị nchụn-ẹjan edọnzikwọnị Ụlọ-nsọ nwẹn d'e rukwọrị hụn mẹ ahụa ẹtọ kwasị ọgụn eze wụ Jehụashị kịma.

7Ya kẹ eze wụ Jụashị nọ kpọ Jehoyada wụ onyẹ-isi nchụn-ẹjan lẹ ndị nchụn-ẹjan ndị ọzọ, sị wẹ, “Kị haịn ụnụ gilẹni rị e dọnzi ihiẹn ndị wẹ wiwi imẹ Ụlọ-nsọ? Anarịnzilẹ ni ndị rị e wẹhẹni ụnụ egho oyiye wẹ; kama, we n'ẹ ye ndị rị e gi ẹ dọnzi Ụlọ-nsọ.”

8Ndị nchụn-ẹjan nọ kweri nị anarịnkọzị wẹ egho ọwụlẹ lẹzi nị egikọ wẹ ẹka wẹ dọnzi Ụlọ-nsọ.

9Jehoyada wụ onyẹ-isi nchụn-ẹjan nọ weri ẹkpẹti ohu, be oghe mẹ ẹkẹrẹ ye elu ẹ, bu ẹ che ụsụọ ukpo nchụn-ẹjan, azụụn ẹka-nni onyẹ bankọ imẹ Ụlọ-nsọ Osolobuẹ. Ndị nchụn-ẹjan hụn e che nche ọnụmụzọ ahụn hụ e bu egho ile ịhịan wẹhẹ Ụlọ Osolobuẹ e che imẹ ẹkpẹti hụ.

10Wẹ hụn a nị egho rị imẹ ẹkpẹti ahụn e bugụọ ọda, akanwe eze lẹ onyẹ-isi nchụn-ẹjan a bịa d'a gụn egho hụ wẹ wẹhẹ imẹ Ụlọ-nsọ Osolobuẹ, kpọn ẹ yesọnmẹ ẹkpa;

11e we wẹ egho hụ wẹ gụn ye ndị wẹ buche ọrụn idọnzi Ụnọ-nsọ hụ ẹka wẹ. Wẹ hụ e gi ẹ a kụ ndị kapịnta lẹ ndị e gbe ụlọ rị e dọnzi Ụlọ-nsọ Osolobuẹ ụgwọ,

12lẹzi ndị e dọn ụlọ lẹ ndị e be ọmụma; wẹ hụ e gizi ẹ e ṅọn osisi, e ṅọn ọmụma ndị wẹ begụ wẹ gi e dọnzi Ụlọ-nsọ Osolobuẹ — lẹzi ihiẹn ile wẹ rị e gi e dọnzi Ụlọ-nsọ.

13Egini wẹ egho hụ w'e wẹhẹ imẹ Ụlọ-nsọ Osolobuẹ mẹmẹ afẹrẹ siliva mọbụ nwa-mbu ukpẹ mọbụ afẹrẹ ndị w'e huye ihiẹn ndị w'e fekpu mọbụ opi mọbụ ihiẹn goru mọbụ siliva ọzọ ọwụlẹ wẹ gi e mẹ ihiẹn imẹ Ụlọ-nsọ Osolobuẹ;

14ndị ọrụn ke wẹ gi ẹ kụ — ndị rị e gi ẹ e dọnzi Ụnọ-nsọ Osolobuẹ.

15Ajụnị wẹ ndị wẹ ye egho hụ kụ ndị ọrụn ụgwọ ihiẹn wẹ gi egho hụ mẹ, makẹni wẹ rụn nke ịhịan-esi.

16Ebucheni wẹ egho ndị wẹ gisọnmẹ chụn ẹjan onyẹ-ikpe-ma lẹ ẹjan-njọ imẹ Ụlọ-nsọ Osolobuẹ: nke ndị nchụn-ẹjan rọ.

17Ogẹn ahụn kẹ Hazaẹlụ eze Aram gi jẹn d'a maye obodo Gatị ọgụn, weri ẹ. Ọ nọ buli n'o d'a maye obodo Jerusalẹm,

18Jụashị wụ eze Juda nọ kpọnrin ihiẹn ile rị nsọ hụn Jehoshẹfatị, Jehoram lẹ Ahazia — ndị nẹdi ẹ bu ẹ ụzọ kị Juda — gisọnmẹ kwanị Osolobuẹ lẹ oyiye ile ya nwẹn gi kwanị Osolobuẹ lẹ goru ile rị ebe w'e dọnmẹ ihiẹn imẹ Ụnọ-nsọ Osolobuẹ kẹ ndị ile rị imẹ obi-eze. Ọ nọ bu wẹ ile zijẹnni Hazaẹlụ eze Aram. Ya Hazaẹlụ nọ ha Jerusalẹm ye.

19Ihiẹn ndị ọzọ mẹni kẹ Jụashị rị a kị rị imẹ ẹkụkwọ w'e detọ ihiẹn ndị mẹ ogẹn ndị-nze Juda.

20O mẹgụ, ndị-isi ẹ nọ zun'ẹ umẹ, gbu ẹ tọgbọ imẹ Bẹt-Milo hụ rị ụzọ Sila.

21Ndị gbun'ẹ wụ Jozabadị nwa Shimiatị lẹ Jehozabadị nwa Shoma. Ọ nwụnhụn, ndị Juda nọ li ẹ ye ebe wẹ liye ndị nẹdi ẹ imẹ Obodo hụ Defidi tụn. Amazia nwa a nọ rikin ẹ eze ẹ.

← Chapter 11 Jump to: Chapter 13 →