2 Kings 2

Ika 2018 Bible

← Chapter 1 Jump to: Chapter 3 →

1O rugụọ ogẹn Osolobuẹ k'e gi gi ufere-ohiohi buru Ẹlaịja lashi elu-igwee. Ẹlaịja lẹ Ẹlaịsha gha Gil'galụ pụkọ.

2Ẹlaịja nọ sị Ẹlaịsha, “Nọdị ebeni, nị Osolobuẹ zi m Bẹtẹlụ.” Kanị Ẹlaịsha nọ sị a, “Ma Osolobuẹ lẹ isi i, aghakọ m ebe ị rị pụ.” Wẹ ẹbụọ nọ wịrị shi Bẹtẹlụ.

3Itu ndị-amụma rị Bẹtẹlụ nọ bịa d'e kunrun Ẹlaịsha, jụ a, “Y'a a marịnghọ nị Osolobuẹ k'a napụ ị di-nwọnni i tannị?” Ẹlaịsha nọ sị wẹ, “A marịngụọ m. Gba nị nkịtịn.”

4Ẹlaịja nọzị sị Ẹlaịsha, “Ẹlaịsha, nọdị ebeni, nị Osolobuẹ zi m Jẹriko.” Ẹlaịsha nọ sị a, “Ma Osolobuẹ lẹ isi i, aghakọ m ebe ị rị ị pụ.” Ya wẹ nọ shi Jẹriko.

5Itu ndị amụma rị Jẹriko nọ jẹnburu Ẹlaịsha, sị a, “Y'a marịnghọ nị Osolobuẹ k'a napụ ị di-nwọnni i tannị?” Ẹlaịsha nọ sị wẹ, “A marịngụọ m. Gba nị nkịtịn.”

6Ẹlaịja nọ sị Ẹlaịsha, “Nọdị ebeni; Osolobuẹ zi m Iyi Jọdanị.” Ẹlaịsha nọ sị a, “Ma Osolobuẹ lẹ isi i, aghakọ m ebe ị rị pụ.” Ya wẹ ẹbụọ nọ jẹnsọnmẹ.

7Ya mmadụ iri kwasị ọgụnnaị imẹ itu ndị-amụma nọ jẹn d'e wuzo ebe te ẹkẹrẹ, e lee Ẹlaịja lẹ Ẹlaịsha ebe wẹ wuzo mkpẹnrẹn iyi Jọdanị.

8Ẹlaịja nọ weri ẹkwa o yi elu ẹwuru ẹ, fịfịma a, gi ẹ fịan mirin hụ. Mirin nwẹn nọ kewa, nọdị azụụnnị lẹ azụụnnị, wẹ ẹbụbụọ nọ gha ebẹhụ kọrọnị fetu.

9E fetugụ wẹ, Ẹlaịja nọ jụ Ẹlaịsha, “Kị m'e mẹn'i wẹ gini d'e wepụ m ebe ị rị?” Ya Ẹlaịsha nọ sị a, “Dodo, nị m nwọnhẹn ikẹn ị ụzọ ẹbụọ kẹni m nọkin ẹnya ị.”

10Ẹlaịja nọ sị a, “Ihiẹn ị rịọ e zekẹ; kanị omẹni y'a hụn m ogẹn wẹ gi wepụkọ m ebe ị rị, y'e nwọnhẹn ẹ, o mẹkwọnị y'a hụnnị m o rukọ ị ẹka.”

11Hụn ahụn wẹ ẹbụọ shikọ inyẹnrẹn jẹnkọ, idẹnmizi, ụgbọ-ẹshin wụchanrịn ọkụn lẹ ẹshin ndị dọkpụnkọn'a wụzị ọkụn nọ pụha, gha ẹgbata wẹ ẹbụọ, kebe wẹ. Ufere-ohiohi nọ buru Ẹlaịja lashi elu-igwee.

12Ẹlaịsha hụ e lee ẹ, e yi, “Baba, Baba! Ụgbọ-ẹshin lẹ ndị e nyin ẹshin alị Izrẹlụ!” Ẹlaịsha eleghazịnị Ẹlaịja. Ẹlaịsha nọ kwọndọn ẹwuru ya nwẹn yi, dọwa wẹ.

13Ya ọ nọ tụtụrụ ẹwuru Ẹlaịja e yiye elu ẹwuru ẹ, hụn dannahịn Ẹlaịja; ọ nọ kin azụụn, wuzo mkpẹnrẹn Iyi-Jọdanị.

14Ọ nọ weri ẹwuru Ẹlaịja ahụn, gi ẹ fịan mirin hụ, sị, “Elebe kẹ Osolobuẹ wụ Chuku Ẹlaịja rị?” Hụn o gihụ gi ẹ fịan mirin ahụn, mirin nọ kewa ẹbụọ, nọdị azụụnnị lẹ azụụnnị; ya Ẹlaịsha nọ ghafe.

15Ogẹn itu ndị-amụma hụ gha Jẹriko bịa, hụn rị e lechen'ẹ gi hụn ihiẹnni, wẹ nọ sị, “Mmọn Ẹlaịja a bangụọ imẹ Ẹlaịsha.” Wẹ nọ jẹnburu Ẹlaịsha, hulụan'a isi alị.

16Wẹ nọ sị a, “Lee ẹ, ẹnyi ndị idibo i nwọn mmadụ iri kwasị ọgụnnaị ka-ẹhụ ọhụnma-ọhụnma. Dodo, nị wẹ jẹnlele d'a chọ di-nwọnni i. Ikẹnkwọ Mmọn Osolobuẹ e burugụọ a, butọ enu ugu mọbụ imẹ ọdanmgbugbu.” Ọ nọ sị wẹ, “Mba; ezilẹ ni wẹ.”

17Kanị a tọ w'a a sị nị wẹ jẹn, nị wẹ jẹn, d'e ru n'ọ nịzịn'a jụ. Ya ọ nọ sị, “Zi ni wẹ nwan.” Wẹ nọ zi mmadụ iri kwasị ọgụnnaị d'a chọ a. A chọ wẹ Ẹlaịja akp'ọhịn ẹtọ, ahụnnị w'a.

18Mgbe wẹ gi kinhẹn d'e kunrun Ẹlaịsha imẹ Jẹriko, ọ nọ sị wẹ, “Agwagụọnị m ụnụ ejẹnlẹ?”

19Ndị obodo Jẹriko hụ Ẹlaịsha rị nọ sị a, “Diọkpa, y'a hụnghọ nwan nị ebe obodoni rị e te rịka mma; kanị mirin rịn'a arị mma, alị nkẹ arị e mẹ ihiẹn.”

20Ọ nọ sị wẹ, “Wẹhẹni ni m afẹrẹ ọhụn, ụnụ e bu nnu che imẹ ẹ.” Ya wẹ nọ wẹhẹn'ẹ.

21Ọ nọ jẹn isi-mirin ahụn, ebe ọ gha a gbapụha, hu nnu hụ ye ẹ, sị, “Lee ihiẹn Osolobuẹ ku, ‘E mẹgụọ m mirinni rị mma. O gbukọzị ihiẹn; ọ hankọzị alị emẹlẹ ihiẹn.’ ”

22Mirin ahụn rịkwọ nwan mma d'e ru tannị. Oku Ẹlaịsha a bụnghọ.

23Ẹlaịsha nọ gha Jẹriko shi Bẹtẹlụ. Ebe ọ ghakọ ụzọ, ikorọbịa nọ gha imẹ obodo pụha, mụma a ẹmụ, a sị, “Isi-akpan, e jẹn! Isi-akpan, e jẹn!”

24Ogẹn Ẹlaịsha gi gbehutọ, hụn wẹ, ọ nọ gi ẹfan Osolobuẹ bụ wẹ ọnụ. Ya kẹ onyẹnnyẹ eje-anụ biẹ ẹbụọ nọ gha imẹ ẹgboko hụ pụha, dọrinrin mmadụ ẹbụọ kwasị ọgụnnaị imẹ wẹ.

25Ẹlaịsha nọ gha ebẹhụ shi Ugu-Kamẹlụ, gha ebẹhụ lakin Sameria.

← Chapter 1 Jump to: Chapter 3 →