2 Kings 24

Ika 2018 Bible

← Chapter 23 Jump to: Chapter 25 →

1Ogẹn Jehoyakim gi rị a kị, Nebukadineza wụ eze Babilọnụ nọ bịa ọgụn. Jehoyakim lẹ ndị Juda nọ rị okpuru ẹ ọrọgbọ ahụa ẹtọ. Kanị, o mẹgụ, Jehoyakim nọ rohutọ, femẹni Nebukadineza isi.

2Ya Osolobuẹ nọ zihẹmẹn'ẹ ndị-agha Kal'di alị Babilọnụ, ndị-agha alị Aram, ndị-agha alị Mụabụ lẹ ndị-agha alị Amọnụ d'a maye ya lẹ ndị Juda ọgụn. Osolobuẹ zi ndịnị kẹni wẹ tikpọ Juda, nọkẹ kẹ Osolobuẹ dọn gi ndị idibo ẹ wụ ndị-amụma ku ẹ.

3Eziẹ, Osolobuẹ sị ihiẹn ndịnị mẹ Juda, kẹn'o gi ufiri njọ Manasẹ lẹ ihiẹn ile o mẹ wepụ ndị Juda ihun ẹ —

4kẹ ẹdeke ndị nwọnlẹni ihiẹn wẹ mẹ Manasẹ gbu. Makẹni Manasẹ mẹ ẹdeke ndị nwọnlẹni ihiẹn wẹ mẹ jun imẹ Jerusalẹm — ndị nwọnlẹni ihiẹn wẹ mẹ hụn o gbu; ufiri ẹ, Osolobuẹ achọnị n'ọ gbagharị.

5Ihiẹn ndị ọzọ mẹni kẹ Jehoyakim rị a kị lẹ ihiẹn ile o mẹ rị imẹ ẹkụkwọ w'e detọsọnmẹ ihiẹn mẹ ogẹn ndị-nze Juda gisọnmẹ kị.

6Jehoyakim a nwụnhụn, laburu ndị nẹdi ẹ, nwa a wụ Jehoyakini nọ họnrin eze nọkin ẹnya a.

7Eze Ijiptu aghazịnị alị a pụha d'a kpa ikẹn, makẹni eze Babilọnụ a narịnchanrịngụọ a ẹgbẹrẹ ile o te weri — ghakwọrị Iyi Udu-mirin Ijiptu d'e ru Iyi Yufretisi.

8Jehoyakini rị nwa ahụa mmẹsatọ k'o họnrin eze; Jerusalẹm k'ọ nọ kị. Ifọn ẹtọ k'ọ kị. Nnẹ ẹ wụ Nehush'ta nwa Ẹl'natanị onyẹ Jerusalẹm.

9Jehoyakini mẹ ihiẹn rịlẹni mma ẹnya Osolobuẹ kẹ nẹdi ẹ dọnchanrịn mẹ.

10Ogẹn ahụn, ndị-agha Nebukadineza eze Babilọnụ nọ bịa d'e kehunmẹ Jerusalẹm.

11Nebukadineza nkẹ nọ bịa obodo ahụn kẹ ndị-agha a kehunmẹ ẹ.

12Jehoyakini eze Juda lẹ nnẹ ẹ lẹ ndị ọrụn a lẹ ndị-isi lẹ ndị ile a rụnn'a ọrụn imẹ obi-eze nọ we enwẹn wẹ ye eze Babilọnụ. Ọ rị ahụa ẹsatọ eze Babilọnụ kịma k'ọ nwụnrụn Jehoyakini.

13Kẹ Osolobuẹ dọn ku ẹ mbụ-mbụ, Nebukadineza nọ buruchanrịn ihiẹn ile wẹ dọnmẹ imẹ Ụlọ-NSỌ Osolobuẹ lẹ imẹ obi-eze, ọ kwarị ihiẹn goru ile Solomọnụ eze Izrẹlụ mbụ-mbụ mẹmẹ wẹ gi e mẹ ihiẹn imẹ Ụlọ-nsọ Osolobuẹ.

14Nebukadineza nọ kpụnrụnchanrịn ndị Jerusalẹm, ndị-isi ile lẹ ndị-agha ile lẹ ndị omẹ-nka ile lẹ ndị a kpụ ụzụn; uwẹ ile rị mmadụ nnụ-uku iri (10,000). Ndị kachanrịn ogbẹnnyẹ e mẹ sụọ họdụ imẹ alị hụ.

15Nebukadineza nọ kpụn Jehoyakini shi Babilọnụ; ọ kpụnrụnzị nnẹ eze lẹ inyẹnmẹ eze lẹ ndị-isi lẹ ndị w'a nụ oku wẹ imẹ alị ahụn, kpụn wẹ ile shi Babilọnụ.

16Ndị-agha ile alị Juda nwọn kẹ eze Babilọnụ kpụnrụn: mmadụ nnụ-uku ẹsa (7,000) lẹzi mmadụ nnụ-uku ndị omẹ-nka lẹ ndị a kpụn ụzụn; wẹ ile wụchanrịn ndị zeni ma lụ agha.

17Eze Babilọnụ nọ tumẹ Matania nwẹnẹ nẹdi Jehoyakini eze, gi ẹ nọkin ẹnya Jehoyakini, gụnhutọ Matania ẹfan, kpọ a Zẹdikaya.

18Zẹdikaya rị nwa ahụa ohu kwasị ọgụn k'o họnrin eze. Imẹ Jerusalẹm k'ọ nọ kị, ahụa mmanaị k'ọ kị; nnẹ ẹ wụ Hamutalụ nwa Jerimaya onyẹ Libna.

19Zẹdikaya mẹ ihiẹn rịlẹni mma ẹnya Osolobuẹ kẹ Jehoyakim dọn mẹ.

20Olulu Osolobuẹ haịn ihiẹnni ile gi mẹ obodo Jerusalẹm lẹ alị Juda ile, o mẹgụ, Osolobuẹ nọ ma wẹ tuhu. Omẹgụ Zẹdikaya nọ nwan nupụ isi okpuru eze Babilọnụ.

← Chapter 23 Jump to: Chapter 25 →