2 Kings 21

Ika 2018 Bible

← Chapter 20 Jump to: Chapter 22 →

1Manasẹ rị nwa ahụa mmẹbụọ k'o họnrin eze. Jerusalẹm k'ọ gha kị. Ahụa mmisẹn kwasị ọgụnnaị k'ọ kị; ẹfan nnẹ ẹ wụ Hẹf'ziba.

2Manasẹ mẹ ihiẹn rịlẹni mma ẹnya Osolobuẹ, mẹsọnmẹ eje-ihiẹn alị ndị hụ Osolobuẹ chụpụ buche ndị Izrẹlụ mẹ.

3Ọ tụnkinsọnmẹ ụlọ-mmọn ndị ahụn nẹdi ẹ wụ Hezikaya tikpọgụ; o tumẹzighọ ukpo mmọn Baalụ, zumẹ osisi wẹ gi a rụa Ashẹra kẹ Ehabụ wụ eze Izrẹlụ Ẹbamịn ugu dọn mẹ. Ọ kụsọnmẹni kẹ kokisẹ kẹ wẹ ile rị igwere isi-alị, e fe wẹ.

4Ọ tụnghọdẹ ukpo wẹ nọ a chụnnị mmọn ẹjan ye imẹ Ụlọ-nsọ Osolobuẹ, ebe nwẹn Osolobuẹ ku oku ẹ, sị, “Imẹ Jerusalẹm kẹ m k'e buche Ẹfan m.”

5Ọ rụnghọ ukpo ndị wẹ nọ a chụnyeni kẹ kokisẹ kẹ ihiẹn ndị ọzọ ile rị igwere yesọnmẹ imẹ ezi ẹbụbụọ rị Ụlọ-nsọ Osolobuẹ.

6O gi nwa okẹnnyẹ ẹfọ a chụn ẹjan w'a dụn ọkụn, o gizighọ ikẹn ọzọ e mẹ ihiẹn, a gba ẹfa, e buru ndị-ihẹnrẹn lẹ ndị wẹ lẹ ndị mmọn gba e ku. O mẹkẹnmẹ ihiẹn rịlẹni mma ẹnya Osolobuẹ, a kpasu ẹ iwe.

7O weri osisi hụ ọ pịn wẹ gi a rụa Ashẹra che imẹ Ụlọ-nsọ nwẹn Osolobuẹ gwa Defidi lẹ nwa a wụ Solomọnụ oku ẹ, sị, “Imẹ Ụlọ-nsọnị lẹ imẹ Jerusalẹm, obodoni m họrị imẹ alị ebọn ile rị Izrẹlụ, kẹ m k'e buche Ẹfan m jẹnrin ejẹn.

8Onwọnzini ogẹn m'e gi nị ụkụ ndị Izrẹlụ gha imẹ alịnị m ye ndị nẹdi wẹ wahu — omẹkwọnị e dọnringhọ wẹ ẹnya mẹchanrịn ihiẹn ile m sị wẹ mẹ, sọnchanrịn Iwu hụn odibo m wụ Mozizi ye wẹ.”

9Kanị ndị Izrẹlụ egọnni ntịn. Manasẹ e duhuhu wẹ, nke wụnị e mẹ wẹ njọ mẹkarị alị ndị hụ Osolobuẹ tikpọ buche ndị Izrẹlụ.

10Ya Osolobuẹ nọ gha ọnụ idibo ẹ ndị-amụma a sị:

11“Manasẹ wụ eze Juda e mẹọlẹ okẹn njọ ndịnị. O mẹnahịngụọ ndị Amọ bun'ẹ ụzọ eje-ihiẹn, gi mmọn-lẹ-iyi ẹ du ndị nd Juda ye imẹ njọ.

12Lee nwan ihiẹn Osolobuẹ wụ Chuku Izrẹlụ ku: Ọ sị: M k'e tikpọ Jerusalẹm lẹ Juda otikpọ hụn o mẹni onyẹ nụ a, ọ dan a ntịn ‘Taị!!’

13Ihiẹn m gi ma Sameria ikpe tikpọ a kẹ m sikọ nwan d'e gi ma Jerusalẹm ikpe; mkpu m gi ma ikpụlọ Ehabụ m tikpọ kẹ m'e gi ma a. M k'e finchanpụ ihiẹn ile rị Jerusalẹm kẹ w'e finchan afẹrẹ, e finchanpụ m'a, we ẹ ihun kpumẹ alị.

14M k'a jụ ndịnị họdụ imẹ ndị nke m, e bu m wẹ che ẹka ndị-iṅẹnrẹn wẹ. Ndị iwe wẹ k'a napụ wẹ ihiẹn wẹ, a maye wẹ, a kwarị ihiẹn wẹ.

15O k'e mẹ makẹni e mẹọlẹ wẹ eje-ihiẹn ẹnya m, a kpasu m iwe ọkpasu-ọkpasu ghakwọrị ụhụọhịn ndị nẹdi wẹ gha alị Ijiptu pụha d'e ru tannị.”

16Manasẹ e gbuzighọ ndị bu ọda nwọnlẹni ihiẹn wẹ mẹ, nke wụnị ẹdeke wẹ e jun Jerusalẹm, gha isini d'e ru isini, cheni njọ hụn ọ dọ Juda ye imẹ ẹ, nke wụnị e mẹ wẹ eje-ihiẹn ẹnya Osolobuẹ.

17Ihiẹn ndị ọzọ mẹni kẹ Manasẹ rị a kị lẹ ihiẹn ile o mẹ, kẹ njọ o mẹ, wẹ ile rị imẹ ẹkụkwọ w'e detọ ihiẹn mẹ ogẹn ndị-nze Juda gisọnmẹ kị.

18Manasẹ a nwụnhụn, laburu ndị nẹdi ẹ, wẹ nọ li ẹ ye ugbo-obobo rị obi-eze ẹ ọ nọ e zu ikẹn, ugbo-obobo Uza. Nwa a wụ Amọnụ nọ họnrin eze nọkin ẹnya a.

19Amọnụ rị nwa ahụa ẹbụọ kwasị ọgụn k'o họnrin eze. Ahụa ẹbụọ k'ọ kị. Imẹ alị Jerusalẹm k'ọ nọ kị, nnẹ ẹ wụ Meshulẹmẹti nwa Haruzu, onyẹ Jọt'ba.

20O mẹ eje-ihiẹn ẹnya Osolobuẹ kẹ nẹdi ẹ wụ Manasẹ dọn mẹ.

21Ihiẹn nẹdi ẹ mẹ k'o mẹchanrịn; o fe mmọn-lẹ-iyi nẹdi ẹ fe, a kụnị wẹ isi alị.

22Ọ jụ Osolobuẹ, Chuku ndị nẹdi ẹ wẹ; o sọnni ụzọ Osolobuẹ.

23Ịhaịmẹ Amọnụ zun'ẹ eje-umẹ, gbu Amọnụ imẹ obi-eze ẹ.

24Ya ndị Juda nọ gbuchanrịn ndị ile zuni eze wụ Amọnụ eje-umẹ. Wẹ nọ kin nwa a wụ Josaya eze, gi nọkin ẹnya a.

25Ihiẹn ndị ọzọ mẹni kẹ Amọnụ rị a kị lẹ ihiẹn o mẹ rị imẹ ẹkụkwọ w'e detọ ihiẹn ndị mẹ ogẹn ndị-nze Juda gisọnmẹ kị.

26Imẹ ili rị ụgba-obobo Uza kẹ wẹ liye ẹ, nwa a wụ Josaya nọ họnrin eze nọkin ẹnya a.

← Chapter 20 Jump to: Chapter 22 →