2 Kings 19

Ika 2018 Bible

← Chapter 18 Jump to: Chapter 20 →

1Ogẹn eze wụ Hezikaya gi nụ ihiẹn ọnụ-eze Asiria ku, ọ nọ dọka ẹkwa ye enwẹn ẹ olu, yiri ẹkwa-achọ ndị rị a kwan ịhịan, shi imẹ Ụlọ-nsọ Osolobuẹ.

2O zi Ẹliakim hụn e lepụ obi-eze ẹnya, Shẹbụna hụn wụ akanwe lẹ ndị-isi ndị nchụn-ẹjan d'e kunrun onyẹ-amụma wụ Azaya nwa Emọzụ. Wẹ ile o zi yi ẹkwa-achọ ndị rị a kwan ịhịan.

3Wẹ nọ sị Azaya, “Eze wụ Hezikaya sị: Tannị wụ ụhụọhịn nsọngbu, mkpari lẹ ịfa, rịkẹ ebe mmụ nọ rugụ ebe wẹ gha a mụpụha wẹ, kanị ndụn w'e gi kịn wẹ arịa.

4Ikẹnkwọ Osolobuẹ wụ Chuku i a nụghọ oku-ọnụ onyẹ-isi-aghanị di-nwọnn'ẹ wụ eze Asiria zihẹ d'a kpari Chuku rị ndụn; ikẹnkwọ Osolobuẹ wụ Chuku i a jụgbọ a banyeni oku ndị ahụn Osolobuẹ nụ ọnụ a. Mẹni nwan ẹnyi ndị họdụ imẹ alị Juda ekpere.”

5Ogẹn idibo ndị hụ Eze wụ Hezikaya zi gi kunrun Azaya,

6Azaya nọ sị wẹ, “D'a gwa nị di-nwọnni ụnụ, sị: Osolobuẹ sị, ‘Atụlẹ egun ihiẹn ị nụ hụn ụmụẹka eze Asiria gi kpari m.

7Lee ẹ, m jẹnkọ d'e bu mmọn ohu che imẹ ẹ, kẹni, ọ nụ ihiẹn o jẹnkọ d'a nụ, ọ lakin alị a, a nọ m alị a ebẹhụ mẹ wẹ gi ọpịa-agha gbu ẹ.’ ”

8Mgbe onyẹ isi-agha eze Asiria hụ gizi ru Lakishi, ọ nụ nị eze wẹ, eze Asiria, a ghagụọ Lakishi pụ, n'ọ rị nwan a lụsọn obodo Libna agha.

9Eze Asiria wụ Sẹnakaribu nkẹ nọ nụ ozi: “Tir'haka wụ eze Ẹtiopịa lala d'a lụsọn i agha.” Ya ọ nọzị zigụ ụkọ d'e kunrun Hezikaya,

10sị, “Sị nị eze Juda wụ Hezikaya: Anịkwọlẹ Chuku ahụn ị rị e fe hụn i gi dọn ẹnya dufie i, ebe ọ rị a sị, ‘Jerusalẹm abankọ eze Asiria ẹka.’

11“A marịnghọ m nị y'a nụgụọ ihiẹn ndị-nze Asiria mẹ alị ndị ọzọ ile, tikpọ wẹ ru alị. I ro n'o nwọn onyẹ k'a gbapụha yụ nwẹn?

12Mmọn ndị alị hụ ile ndị nẹdi m kanị tikpọ a saghọ ẹka gbapụha wẹ: mmọn ndị Gozanị, ndị Haranị, ndị Rezẹfụ lẹ ndị Idẹni te rị Tẹlụ-Asa?

13Elebe kẹ eze Hamatị lẹ eze Apadị rị nwan? Mọbụ eze Sẹfavụ mọbụ eze Hẹna mọbụ eze Iva?”

14Ogẹn Hezikaya gi narịngụ ndị-ozi hụ ẹkụkwọ-ozi hụ, gụngụ a, ya ọ nọ shi Ụlọ-nsọ Osolobuẹ, shịapụ a ihun Osolobuẹ.

15Hezikaya nọ mẹ ekpere rịọ Osolobuẹ, sị, “Euu Osolobuẹ, Chuku Izrẹlụ, ịyụ hụn nọdị ukpo-eze elu ndị chẹrobu ẹbụbụọ hụ, ịyụ sụọ wụ Chuku hụn alị-eze ile rị ụwa rị okpuru ẹ. Ịyụ ke elu-igwee lẹ alị.

16Osolobuẹ, dodo, gọn ntịn n'ị nụ; Osolobuẹ, dodo, shịapụ ẹnya n'ị hụn. Gọn ntịn n'ị nụ oku-mkpari Sẹnakẹribụ zihẹ d'e gi kpari Osolobuẹ hụn rị ndụn.

17“Euu, Osolobuẹ, ezioku rọ nị ndị-nze Asiria e tikpọgụọ ndị alị ndịnị lẹ alị wẹ la iwi.

18A tụgụọ wẹ mmọn-lẹ-iyi alị ndị hụ ye ọkụn, wiwi wẹ, makẹni mmọn ndị hụ ẹlẹ Chuku, wẹ wụhụ osisi lẹ ọmụma, ọrụn-ẹka ịhịan.

19Osolobuẹ, Chuku ẹnyi, dodo nwan, gbapụha ẹnyi ẹka a, nị ndị alị-eze ile rị ụwa hụn ụzọ marịn nị ịyụ sụọ, hụn wụ Osolobuẹ, wụ Chuku.”

20Ogẹnni kẹ Azaya nwa Emọzụ gi zi ozi jẹnni Hezikaya, sị a, “Lee ihiẹn Osolobuẹ wụ Chuku Izrẹlụ ku. Ọ sị: A nụgụọ m ekpere i mẹ banyeni Sẹnakẹribụ eze Asiria.

21Lee ihiẹn Osolobuẹ ku banyen'ẹ: Nwagbọọ wụ Zayọnụ e legberi i, ọ mụgbu i ẹmụ. Okpoho wụ Jerusalẹm e finfinn'i isi ebe ị gbakọ ọsọ.

22Onyẹ k'i rị a kpari, e kuja oku ẹ? Onyẹ k'i gandẹ ọgịngan hụ, e leshi elu e leshi alị? Onyẹ nsọ Izrẹlụ rọ!

23Y'e zihẹgụọ ndị ụkọ ị, a kpari wẹ Osolobuẹ ọda-ọda. Ị hụ a sị, ‘Makẹni m nwọn ụgbọ-ẹshin agha bu ọda, e rugụọ m elu ugu ndị jẹnsọnmẹ elu, rudẹ mkpọnụnụ ugu Lẹbanọnụ. E gbutugụọ m osisi sida a ndị kachanrịn e sue, osisi-paịnị a ndị kachanrịn mma. E rugụọ m ebe kachanrịn e te imẹ ọfịa Lẹbanọnụ, ebe kachanrịn ẹnya e kin imẹ ẹgboko Lẹbanọnụ.

24A nọgụọ m alị ichẹn-ichẹn guru ọmị, ra mirin rị imẹ wẹ. E gigụọ m ọbụkụ m zọ iyi ile rị Ijiptu mẹ wẹ tahị.’

25“Y'e ke nụ? E tumẹgụọ m'a mbụ-mbụ n'o k'a rị ẹnịna. A kayegụọ m'a mbụ-mbụ; a nịgụọ m'a nwan mẹ, ya haịn i gi saẹka e gi obodo ndị wẹ tụnhunmẹ mgbọn e họnrin mkpọkọ-ụlọ mkpọkọ-ụlọ;

26ndụn a gụ ndị alị ndị hụ, uhue e gbu wẹ, ifẹnrẹn e mẹgbu wẹ. Wẹ hụ a la kẹ ihiẹn wẹ kụn imẹ ugbo, ihiẹn pupụha nke ọhụn, nọkẹ ẹfịfịa pu elu ụlọ, hụn a nwụnhụn ebe o kelẹni sue.

27“Kanị a marịnghọ m ebe ị rị, marịnzịkwọ ọbanhan ị lẹ ọpụpụ ị lẹ k'i dọn rị a bannị m mban.

28Ebe ị rị a bannị m mban, ebe o mẹni mkpari ị rị a kpari m e rugụọ m ntịn, m k'e kọn ukpo m ye i imi, kwa ị ngan ọnụ, gi ẹ wekin i ụzọ ị gha bịa.

29“Hezikaya, lee ihiẹn i jẹnkọ d'e gi marịn n'o jẹnkọ d'e mẹ: Ihiẹn dan ndịdan kẹ ụnụ k'e ri ahụanị, ahụa bọ ụnụ e ri ihiẹn hụn dan ẹdịdan k'e wepụha. Kanị ahụa ẹtọ ihun, kụn nị, ghọrị; gbọ nị alị vaịnị, ri mkpụrụ wẹ.

30Ndị họdụnị imẹ ikpụlọ Juda k'a gbazị mkpọgụn ye alị, mị mkpụrụ ibe elu.

31Ẹghẹẹ, o nwọnghọ ndị k'a họdụnị imẹ Jerusalẹm, igunrun ịhịan k'a wanahịnrịrị imẹ ugu Zayọnụ. Adụdụ Osolobuẹ gi e mẹ ihiẹn kẹ Osolobuẹ k'e gi mẹ ihiẹnni.

32“Lee nwan ihiẹn Osolobuẹ ku banyeni eze Asiria: Ọ banhankọ imẹ obodoni mọbụ gba akpụ ọbara-ụta ohu ebeni. Ndị-agha a lẹ akpaịn wẹ anọchimẹkọ obodoni mọbụ rụn ihiẹn wẹ gi a lụsọn obodo wẹ kehunmẹ ye ẹ.

33Ụzọ ọ gha bịa k'o k'a gha la; ọ banhankọ imẹ obodoni. Ya kẹ Osolobuẹ ku.

34M k'e gi ufiri ẹfan m lẹ ufiri odibo m wụ Defidi nọ obodoni ye azụụn, zụọpụha a.”

35Imẹ uhinhin ahụn, mmọn-ozi Osolobuẹ nọ ban ebe ndị-agha Asiria ziẹntọ, gbu ndị-agha nnụ-uku isẹn-kwasị-nnụ-itenẹi (185,000). E tẹnhin wẹ ụran ụz'ụtụntụn, e lee ozun wẹ ile!

36Ya Sẹnakẹribụ eze Asiria nọ buli, pụ, lakin Ninivẹ ebe o bi d'a nọdị.

37Ụhụọhịn ohu, ebe ọ rị imẹ ụlọ-mmọn Nis'rọkụ hụn wụ mmọn a, a rụa a, ya ụmụ a ikẹnnyẹ ẹbụọ wụ Adramẹlẹki lẹ Sharẹza nọ gi ọpịa-agha gbu ẹ, gbashi alị Araratị. Ya kẹ nwa a wụ Ẹsahadọnụ nọ nọkin ẹnya a, kịma.

← Chapter 18 Jump to: Chapter 20 →