2 Kings 23

Ika 2018 Bible

← Chapter 22 Jump to: Chapter 24 →

1Ya kẹ eze wụ Josaya nọ kpọkikomẹ ndị-isi ile rị Juda lẹ imẹ Jerusalẹm.

2Ọ nọ duru ndị Juda shi imẹ Ụlọ-nsọ Osolobuẹ: kẹ ndị bi Jerusalẹm kẹ ndị nchụn-ẹjan kẹ ndị-amụma — ịhịan ile rị alị Juda, kẹ onyẹ-uku kẹ onyẹ-nta. Ọ nọ gụnpụhachanrịn nị wẹ oku ile rị imẹ Ẹkụkwọ Nkwerigbama hụ wẹ hụn imẹ Ụlọ-nsọ Osolobuẹ, wẹ ile nọ nụ a.

3Eze nọ wuzo ọnọdị a ẹhụ adansụn Ụlọ-nsọ, nọ ebẹhụ, idẹnya Osolobuẹ, kwedọnzi nkwa kẹ Osolobuẹ dọn chọ: n'o k'e sọn Osolobuẹ, n'o k'e gi obi ẹ ile lẹ umẹ-ndụn a ile mẹ ẹ, e mẹ ihiẹn ọ sị wẹ mẹ, e sọn usọnrọn ẹ, e sọn uhi ile o yi, gi ẹ mẹzu ihiẹn ndị rị nkwerigbama wẹ deye imẹ ẹkụkwọnị. Ndị Juda ile nọzị kwe nkwa hụ.

4Eze nọ ye Hil'kia onyẹ isi nchụn-ẹjan lẹ ndị nchụn-ẹjan a hansọnn'ẹ iwu, uwẹ lẹ ndị e che ọnụmụzọ, sị wẹ gha imẹ Ụlọ-NSỌ Osolobuẹ kpọnpụchanrịn ihiẹn ile wẹ gi a rụa kẹ Baalụ kẹ Ashẹra kẹ kokisẹ kẹ ihiẹn ndị ọzọ ile rị igwere. Ọ nọ gha imẹ Jerusalẹm bupụchanrịn wẹ ile, nọ ọfịa Ọdanmgbugbu-Kidrọnụ dụn wẹ ọkụn, kpọnrin ntụn wẹ shi Bẹtẹlụ.

5Ọ nọ chụ ndị ile ndị-nze Juda te tumẹ nị w'a chụn ẹjan nsẹnsi ebe jẹnsọnmẹ elu: kẹ imẹ obodo ndị rịsọnmẹ alị Juda kẹ ndị rịchanrịn ẹgbẹrẹ Jerusalẹm, chụzị ndị hụn a mụye nsẹnsi e gi a rụa kẹ Baalụ kẹ ẹnyanwụn kẹ ifọn kẹ kokisẹ kẹ ihiẹn ndị ọzọ ile rị igwere.

6Ọ nọ wepụ osisi ahụn wẹ zumẹ imẹ Ụlọ-nsọ Osolobuẹ wẹ gi a rụa Ashẹra, wepụ a imẹ Jerusalẹm, weshi ẹ Ọdanmgbugbu-Kidrọnụ, nọ ebẹhụ dụn a ọkụn. O gweriẹn ẹ, fesọnmẹ ẹ ye ikpẹkpẹ ndị alị.

7Ọ nọzị tikpọchanrịn ebe ikẹnnyẹ wụ ịgbaraja ụnọ-mmọn bi imẹ Ụlọ-nsọ Osolobuẹ lẹ ebe ikpoho a nọdị a kpa ihiẹn mmọn Ashẹra.

8Josaya nọzị mẹ ndị nchụn-ẹjan Osolobuẹ ile rịsọnmẹ obodo ndị rị alị Juda bịa Jerusalẹm, mẹrụchanrịn ebe ile jẹn elu wẹ te nọ a mụyeni Osolobuẹ nsẹnsi imẹ alị Juda ile — ghakwọrị Gẹba d'e ru Biẹshẹba. O tikpọchanrịn “Ebe jẹn elu rị ọnụ-mgbọn” hụn rị ọnụ-mgbọn iwe Joshụa gọvanọ Jerusalẹm, ẹka-ekpẹn onyẹ rị ọnụ-mgbọn Jerusalẹm.

9Ọsụọn'a nị anịnị wẹ nwan ndị nchụn-ẹjan Osolobuẹ ndịnị te rịsọnmẹ obodo ichẹn-ichẹn imẹ alị Juda a rụn ebe jẹnsọnmẹ elu sọn ibe wẹ rụn ọrụn ihun ukpo nchụn-ẹjan Osolobuẹ imẹ Ụlọ-nsọ rị Jerusalẹm, kanị a nịghọ wẹ wẹ e sọn ibe wẹ e ri brẹdi yisti rịlẹni.

10Josaya e mẹrụzịghọ Tofẹtị hụn rị Ọdanmgbugbu Bẹn-Hinọm, makẹ wẹ ghazị e gi ụmụ wẹ ikẹnnyẹ lẹ ikpoho a chụnnị Molẹkị ẹjan w'a dụn ọkụn.

11O kpọnpụ ẹshin ndị te rị ebe wẹ gha a banye Ụlọ-nsọ Osolobuẹ, ẹshin ndị hụ ndị-nze bu ẹ ụzọ kị Juda gi kwanị ẹnyanwụn. Ẹhụ mmughẹ Natanị-Mẹlẹkị hụn a rụn ọrụn imẹ ọgwa kẹ ẹshin ndị hụ te rị. Josaya a kpọzịghọ ụgbọ-ẹshin agha ndị hụ wẹ te gi kwanị ẹnyanwụn ọkụn.

12Ọ kụtu ukpo nchụn-ẹjan ndị hụ ndị-nze Juda rụnye elu obi-eze ẹhụ mmughẹ Ahazị rị ibe elu, kụtuzi hụn ndị Manasẹ rụnye imẹ ezi-ọgwa ẹbụbụọ rị Ụlọ-nsọ Osolobuẹ. O bupụ wẹ ebẹhụ, kụkpọchanrịn wẹ kpọnye Ọdanmgbugbu-Kidrọnụ.

13Eze nọzị mẹrụsọnmẹ ebe jẹnsọnmẹ elu wẹ nọ a rụa mmọn nkọ ọwụwa ẹnyanwụn Jerusalẹm, nkọ ọdịdan ẹnyanwụn Ugu-Ụrụ, ndị hụ Solomọnụ wụ eze Izrẹlụ tụnnị onyẹnnyẹ-mmọn Ash'ta hụn wụ ụrụ ndị Sidọnụ e fe lẹ hụn ọ tụnnị Kẹmọshi hụn wụ ụrụ ndị Mụabụ e fe lẹ hụn ọ tụnnị Molẹkị hụn wụ ụrụ ndị Amọnụ e fe.

14O tikpọzịghọ ọmụma ndị wẹ tumẹ w'e fe, gbutusọnmẹ osisi ndị wẹ zumẹ wẹ gi e fe Ashẹra, kpọn ọkpụkpụ ịhịan jun ebẹhụ gi mẹrụ a.

15O tikpọzịghọkwọ ukpo nchụn-ẹjan hụ rị Bẹtẹlụ, ebẹhụ jẹn elu Jerobụam nwa Nebatị mẹmẹ — Jerobụam hụn dọ ndị Izrẹlụ Ẹbamịn ugu ye imẹ njọ. Ọ dụn ụlọ-mmọn ahụn rị ebe jẹn elu ọkụn, gweriẹn ẹ, dụnzị osisi rịn'a w'a nọ e fe mmọn Ashẹra ọkụn.

16Ogẹn Josaya gi gbehutọ, hụn ili ndị rị mkpọtu òke ebẹhụ, ọ nọ sị wẹ kpọnpụha ọkpụkpụ rị imẹ ili ndị hụ, ọ nọ nọ ukpo nchụn-ẹjan hụ dụn wẹ ọkụn, gi ẹ mẹrụ a. Ihiẹn ndịnị kẹ Osolobuẹ gi odibo Chuku nẹi ku mbụ-mbụ n'o k'e mẹ.

17Ya eze wụ Josaya nọ sị, “Ili onyẹ kẹ wẹ tụnye ihiẹn ahụn m rị e legha ebẹhụ?” Ya ndị obodo hụ nọ sị a, “Ili odibo Chuku nẹi gha Juda bịa rọ: onyẹ hụn ku ni wẹ jẹnkọ d'e mẹ ukpo nchụn-ẹjannị rị Bẹtẹlụ ihiẹn ndịnị ị m'ẹ nwan.”

18Josaya nọ sị wẹ, “Hatun'ẹ ye; anịlẹ ni onyẹ ọwụlẹ mẹ ọkpụkpụ a ihiẹn ọwụlẹ.” Ya wẹ nọ hatu ọkpụkpụ a lẹ nke onyẹ-amụma Sameria nẹi.

19Kẹ Josaya mẹ imẹ Bẹtẹlụ, ẹrịra k'o dọnzi wepụ ụlọ-mmọn ile ndị-nze Izrẹlụ Ẹbamịn ugu rụntọ ebe jẹnsọnmẹ elu imẹ Sameria hụn wẹ gi kpasu Osolobuẹ iwe, Josaya nọ mẹrụ wẹ.

20Josaya nọ gbuchanrịn ndị ihẹnrẹn-mmọn ile a nọ ụlọ-mmọn ndị hụ a ghọ mmọn tọ elu ukpo nchụn-ẹjan ndị hụ, dụn ọkpụkpụ ịhịan ọkụn tọ elu wẹ. Ya ọ nọ lakin Jerusalẹm.

21Eze nọ sị ndị alị Izrẹlụ ile, “Mẹni ni Osolobuẹ wụ Chuku ẹnyi Mmẹmmẹ-Nghafe kẹ wẹ dọn de ẹ imẹ Ẹhụhụọ Nkwerigbama Osolobuẹ.”

22Emẹtuni wẹ Mmẹmmẹ-Nghafe nọ ẹrịra kete ogẹn Ndị Han Eṅẹn gi du ndị Izrẹlụ mọbụ ogẹn ndị-nze ile kịpụ Izrẹlụ Ẹbamịn-ugu lẹ ndị-nze Juda bu Josaya ụzọ kị;

23hụn mẹ ẹ ahụa mmẹsatọ Josaya kịma kẹ wẹ mẹni Osolobuẹ Mmẹmmẹ-Nghafe hụ imẹ Jerusalẹm.

24Josaya e wepụzịghọ ndị a gba ẹfa lẹ ndị e du ndị-mmọn e ku lẹ mmọn ndị alị kọmasọnmẹ iwe wẹ lẹ mmọn-lẹ-iyi ichẹn-ichẹn lẹ ihiẹn ọzọ ile w'e fe, kẹ imẹ alị Juda ile kẹ imẹ obodo Jerusalẹm. Ihiẹn ndịnị ile k'o gi mẹzu Iwu Osolobuẹ wẹ de imẹ ẹkụkwọ hụ onyẹ-isi nchụn-ẹjan wụ Hil'kia hụn imẹ Ụlọ-nsọ Osolobuẹ.

25Kẹ ndị-nze bu Josaya ụzọ kị kẹ ndị o bu ụzọ kị, onwọnni onyẹ nọ kẹ ịya — onyẹ hụn gi obi ẹ ile, umẹ-ndụn a ile lẹ ikẹn ẹ ile bihutọ ẹka sọnmẹzi Osolobuẹ kẹ Iwu Mozizi dọn ku.

26K'osilẹrị, okẹn olulu rị Osolobuẹ obi arọkwọnị, olulu hụn ọ rị e buni Juda yeni ihiẹn ile Manasẹ mẹ gi kpasu Osolobuẹ iwe.

27Osolobuẹ nọ sị, “M k'e wepụzị Juda ihun m kẹ m dọn wepụ ndị Izrẹlụ rị Ẹbamịn ugu; m k'a jụzịkwọ Jerusalẹm, obodo hụn m họrị lẹ ụlọ-nsọnị hụn m te sị, ‘Ebẹhụ kẹ ẹfan m k'a rị.’ ”

28Ihiẹn ndị ọzọ mẹni kẹ Josaya rị a kị lẹ ihiẹn ile o mẹ rị imẹ ẹkụkwọ w'e detọ ihiẹn mẹ ogẹn ndị-nze Juda gisọnmẹ kị.

29Kẹ Josaya rị a kị, Fẹro wụ Nẹko, eze Ijiptu, jẹn Iyi-Yufretisi d'e yeni eze Asiria ẹka lụ agha. Ya eze wụ Josaya nọ jẹn d'a maye ẹ ọgụn, Nẹko nọ sọn ẹ lụ, gbu ẹ imẹ obodo Mẹgido hụn o gihụ hụn a.

30Ndị-agha Josaya nọ gi ụgbọ-ẹshin buru ozun ẹ gha Mẹgido lụaha Jerusalẹm, wẹ nọ li ẹ ye imẹ ili ọ tụntọ. Ndị alị ahụn nọ weri Jeho-ahazị nwa Josaya hukpu ẹ udẹn-ntumẹ, kin ẹ eze gi nọkin ẹnya nẹdi ẹ.

31Jeho-ahazị rị nwa ahụa ẹtọ kwasị ọgụn k'o họnrin eze. Imẹ Jerusalẹm k'ọ nọ kị; ifọn ẹtọ k'ọ kị. Nnẹ ẹ wụ Hamutalụ nwa Jerimaya onyẹ Libna.

32Jeho-ahazị mẹ ihiẹn rịlẹni mma ẹnya Osolobuẹ kẹ ndị nẹdi ẹ kanị dọn mẹ.

33Fẹro wụ Nẹko, eze alị Ijiptu nọ kpọkin ẹ ye ụlọ-ngan imẹ obodo Ribla rị alị Hamatị makẹ ọ ghazị a kị ọkịkị imẹ Jerusalẹm. Fẹro nọ be ndị Juda ẹkpa siliva uku ọgụn-isẹn lẹ ẹkpa goru uku ohu.

34Fẹro wụ Nẹko nọ tumẹ nwẹnẹ Jeho-ahazị wụ Ẹliakim nwa Josaya eze n'o risọn nẹdi ẹ wụ Josaya eze; o gụnhutọ Ẹliakim ẹfan, kpọ a Jehoyakim. Ọ nọ nwụnrụn Jeho-ahazị, w'ẹ la Ijiptu. Ijiptu ebahụn kẹ Jeho-ahazị nwụntọ.

35Jehoyakim a kụghọ Fẹro wụ Nẹko siliva lẹ goru hụ o be alị Izrẹlụ, kanị ụtụ ọ waye ndị alị hụ olu tụ k'o gi kụ a — onyẹ-onyẹ lẹ ihiẹn o be ẹ.

36Ahụa isẹn kwasị ọgụn kẹ Jehoyakim rị k'o họnrin eze. Jerusalẹm k'ọ nọ kị. Ahụa mmanaị k'ọ kị. Nnẹ ẹ wụ Zebida nwa Pẹdaya onyẹ obodo Ruma.

37Jehoyakim mẹ ihiẹn rịlẹni mma ẹnya Osolobuẹ. O mẹ kẹ ndị nẹdi ẹ kanị dọn mẹ.

← Chapter 22 Jump to: Chapter 24 →