Ezekiel 16 — Ilokano (Ti Biblia (1973))

1Ti sao ni Jehova dimteng manen caniac, a kinunana,

2Anac ti tao, ipacaammom iti Jerusalem dagiti kinarimonna;

3Ket cunam, Castoy ti cuna ni Apo Jehova iti Jerusalem: Ti naggapuam ken ti nacayanacam isu ti daga ti Cananeo; ti Amorreo isu ni amam, ket ni inam Hetea.

4Ket no maipapan iti pannacayanacmo, idi aldaw a pannacayanacmo ti pusegmo saan a naputed, ket dica met nabuggoan iti danum tapno madalusanca; saanca a naasinan a pulos, ket dica met nabungon a pulos.

5Awan ti mata a nangilala kenca, tapno aramidenna ti aniaman cadagitoy kenca, a caasiannaca; no di ket naibellengca iti nalawa a tay-ac, gapu ta ti kinataom naumsi idi aldaw a pannacayanacmo.

6Ket idi limmabasac iti arpadmo, ket nakitac a nailubnacca iti daram, kinunac kenca, Uray pay addaca iti daram, agbiagca; wen, kinunac kenca, Uray pay addaca iti daram, agbiagca.

7Siac pinaaduca cas iti daydiay tumubo iti tay-ac ket immaduca ken dimmackelca, ket nagbalinca a napintas unay nga arcos; dagiti susom napasayaatda, ket ti boocmo timmubo: nupay casta lamolamoca idi ken awan ti abbongmo.

8Itay limmabasac iti arpadmo, ket minatmatanca, adtoy, ti pannawenmo pannawenen ti ayat; ket inyucradco ti cagayco iti rabawmo, ket inabbongac ti kinalamolamom: wen, insapatac kenca, ket nakitulagac kenca, cuna ni Apo Jehova, ket nagbalinca a cucuac.

9Ket dinigusca iti danum; wen, dinalusac a naimbag ti daram kenca, ket sinapsapoanca iti lana.

10Kinawesanca met cadagiti nabordaan nga aramid, sinapatosanca iti lalat ti foca, ket binaricsanca iti nalapat a lienzo, ket inabbonganca iti seda.

11Ket inarcosanca cadagiti alajas, ket iniccac cadagiti pulceras dagiti imam, ken maysa a tanicala dayta tengngedmo.

12Ket incabilco ti maysa a singsing iti agongmo, ken aritos cadagiti lapayagmo, ken napintas a balangat iti olom.

13Castoy ti pannacaarcosmo iti balitoc ken pirac; ket ti pagan-anaymo nalapat a lienzo, ken seda, ken nabordaan nga aramid; nanganca ti namayecmec nga harina, ken diro, ken lana; ket napintasca unay idi, ket rimmang-ayca agingga iti casasaad a naarian.

14Ket ti dayawmo nagracurac iti nagtengngaan dagiti nasnacion gapu iti pintasmo; ta isu awan pagcuranganna a gapu iti kinadaegco nga insaadco kenca, cuna ni Apo Jehova.

15Ngem sica nagtalecca iti imnasmo, ket nagbalangcantisca a gapu iti dayawmo, ket imbuyatmo dagiti kinabalangcantismo iti tunggal aglabas; ket tinagicuana.

16Ket sica innalam cadagiti cawesmo, ket inaramidmo a maipaay kenca dagiti nangato a disso a naarcosan cadagiti nadumaduma a color, ket nagbalangcantisca iti rabawda: ti umasping cadagitoy saanto a dumteng, ket awanto met ti casta.

17Innalam met dagiti napintas nga alajasmo a balitoc ken piracco, nga intedco kenca, ket inaramidmo a maipaay kenca a ladladawan ti lallaki, ket nagbalangcantisca cadacuada;

18Ket innalam dagiti cawesmo a nabordaan, ket inabbongam ida, ket incabilmo ti lanac ken inciensoc iti sangoananda.

19Ti tinapayco met nga intedco kenca, namayecmec nga harina, ken lana, ken diro, a pinangtaraonco kenca, incabilmo pay iti sangoananda a nabanglo a sayamusom; ket castoy ti napasamac, cuna ni Apo Jehova.

20Maysa pay, innalam dagiti annacmo a lallaki ken babbai, isuda nga impasngaymo a maipaay caniac, ket dagitoy indatonmo cadacuada tapno maalun-unda. Dagiti kinabalangcantismo babassitda aya a banag,

21Idinto a pinapataymo dagiti annacco, ket inyawatmo ida, babaen ti pannacaipalabasda iti apuy nga agpaay cadacuada?

22Ket cadagiti amin a kinarimon ken kinabalangcantismo saanmo a linagip dagiti aldaw ti kinaubingmo, idi lamolamoca ken awan abbongmo, ken naitublacca iti daram.

23Ket naaramid calpasan ti amin a kinadakesmo, (ay, asica pay, cuna ni Apo Jehova),

24Ta namangonca a maipaay kenca, ti naarcoan a disso, ket nangaramidca iti nangato a disso iti tunggal lansangan.

25Binangonmo ti nangato a dissom iti oloanan ti tunggal dalan, ket inaramidmo ti imnasmo a kinarimon, ket incayangmo dagiti sacsacam iti tunggal maysa a limmabas, ket pinaadum ti kinabalangcantismo.

26Nakicamalalaca met cadagiti Egipcios, dagiti carrubam, a nalasag; ket pinaadum ti kinabalangcantismo a panggargari caniac nga agpungtot.

27Adtoy ngarud, inyunnatco ti imac kenca, ket pinabassitco ti cadawyan a taraonmo, ket inyawatca iti pagayatan dagidiay a gumura kenca, dagiti annac a babbai dagiti Filisteos, a mabainda gapu iti naderrep a dalanmo.

28Nakicamalalaca met cadagiti Asirios, a gapu ta awan ti pannacapnecmo: wen, nagbalangcantisca cadacuada, nupay casta dica pay napnec.

29Pinaadum met ti kinabalangcantismo iti daga ti Canaan, agingga iti Caldea; nupay casta dica napnec kencuana.

30Anian a capsut iti pusom, cuna ni Apo Jehova, idinto nga aramidem amin dagitoy a banbanag, aramid ti nasabrac a balangcantis;

31Iti panangbangonmo cadagiti naarcoam a disso cadagiti oloanan ti tunggal dalan, ket aramidem iti nangato a disso ti tunggal lansangan, ket saanca a cas la balangcantis, gapu ta ababiem ti tangdan.

32O asawa a babai nga agaramid iti pannakicamalala! nga awatenna dagiti sangsangaili iti lugar ni asawana!

33Maited ti sagut cadagiti isu-amin a babalangcantis; ngem sica mangtedca cadagiti sagutmo cadagiti amin nga agararem kenca, ket sucsucam ida tapno umayda kenca ti isu-amin nga aglicmut maipanggep iti kinabalangcantismo.

34Ket sica maigiddiatca cadagiti sabali a babbai cadagiti kinabalangcantismo agsipud ta awan ti sumursurot kenca tapno agbalangcantis; ket idinto a sica mangmangtedca iti tangdan, ket awan ti tangdan a maited kenca, isu ti gapuna a maigiddiatca.

35Gapuna, O balangcantis, denggem ti sao ni Jehova:

36Castoy ti cuna ni Apo Jehova, Agsipud ta naibuyat ti kinarugitmo, ket ti kinalamolamom nalucaisan gapu cadagiti kinabalangcantismo cadagiti caayanayatmo; ket gapu ti isu-amin a ladladawan dagiti kinarimonmo, ken iti dara dagiti annacmo, nga intedmo cadacuada;

37Iti casta, adtoy, siac ummongec amin dagiti caayanayatmo a nacaalaam ti ragragsac, ket amin a nagayatam, agraman amin dagiti kinaguram; ket tiponecto ida iti maicaniwas kenca iti amin a licmut, ket lucaisacto ti kinalamolamom cadacuada, tapno makitada ti amin a kinalamolamom.

38Ket ocomencanto, cas iti pannacaocom dagiti babbai a makiabig iti dida asawa ken mangibuyat iti dara; ket yegconto kenca ti dara ti pungtot ken panangimon.

39Ket yawatcanto met iti imada, ket duprakendanto ti naarcoan a dissom ket racrakendanto dagiti nangato a disdissom; ket labusendanto ti pagan-anaymo, ket alaendanto dagiti napintas nga alajasmo; ket panawandacanto a lamolamo ken awan abbongmo.

40Ket mangisang-atdanto met ti sangacuyugan a maicaniwas kenca, ket uborendacanto cadagiti batbato, ket salputendacanto cadadagiti camcampilanda.

41Ket puurandanto dagiti balbalaymo iti apuy, ket ocomendacanto iti imatang dagiti adu a babbai, ket siac pagsardengencanto iti panagbalangcantismo, ket saancanto metten a mangted iti abang.

42Ket iti casta mapasardengacto iti pungtotco kenca, ket iti panagimonco maisinanto kenca, ket siac agulimecacto, ket saanacto a maapasen.

43Gapu ta dica linaglagip dagidi aldaw ti kinaubingmo, no di ket nagpungtotca a maibusor caniac cadagitoy amin a banbanag, gapuna adtoy siac isublic met ti dalanco iti rabaw ti olom, cuna ni Apo Jehova: ket dicanto aramiden daytoy a kinaderrep, agraman ti isu-amin a kinarimonmo.

44Adtoy, tunggal mangaramat cadagiti proverbios aramatendanto daytoy a proverbio a maicaniwas kenca, a cunana, No ania ti ina castamet ti anacna a babai.

45Sica ti anac a babai ni inam, a nanglais ti asawana ken annacna; ket cabsatdaca dagiti cacabsatmo a babbai, isuda a nanglais cadagiti assawada ken annacda: ni inayo Hetea, ket ni amayo Amorreo.

46Ket ti cabsatmo a babai nga inauna isu ti Samaria, nga agnaed iti macatigidmo, isu ken dagiti annacna a babbai: ket ti inaudi a cabsatmo a babai, nga agnaed iti macanawanmo isu ti Sodoma ken dagiti annacna a babbai.

47Nupay casta saanca a nagna cadagiti daldalanda, ket dica met nagaramid a cas cadagiti kinarimonda; no di ket cas dayta bassit unay a banag, sica narugrugitca ngem isuda cadagiti amin a daldalanmo.

48Cas sibibiagac, cuna ni Apo Jehova, ti Sodoma a cabsatmo a babai saan a nagaramid, isu ken uray dagiti annacna a babbai ti cas ti inaramidmo, sica ken dagiti annacmo a babbai.

49Adtoy, daytoy ti kinadangkes ni cabsatmo a babai a Sodoma: kinacuspag, kinabuslon iti tinapay, ken nalabes a kinatalged ti adda kencuana ken cadagiti annacna a babbai; ket saanna met a pinapigsa ti ima dagiti napanglaw ken addaan pannacasapul.

50Ket isuda nacuspagda, ket nangaramidda iti kinarimon iti sangoc: gapuna nga iniccatco ida, cas nakitac a pagimbagan.

51Ti Samaria saan met a nagar-aramid iti uray cagudua laeng dagiti basbasolmo; ngem pinaadum dagiti kinarimonmo nga adadda ngem isuda, ket cas la pinaglintegmo dagiti cacabsatmo a babbai babaen dagiti amin a kinarimonmo nga inaramidmo.

52Sica met, awitem ti bucodmo a bain agsipud iti panangipatom cadagiti cacabsatmo a babbai; maipuon cadagiti basbasol nga inaramidmo a nacarcaro a kinarimon ngem cadagidiay, isuda nalinlintegda ngem sica: wen, mariroca met, ket awitem ti bainmo, agsipud ta cas la pinaglintegmo dagiti cacabsatmo a babbai.

53Ket siac yegconto manen ti pannacacayawda, ti pannacacayaw ti Sodoma ken dagiti annacna a babbai, ken ti pannacacayaw ti Samaria ken dagiti annacna a babbai, ken ti pannacacayaw dagiti caycayawmo iti tengngada;

54Tapno awitem ti bucodmo a bain, ket agbainca gapu cadagiti isu-amin nga inaramidmo, a pangliwliwa cadacuada.

55Ket dagiti cacabsatmo a babbai, Sodoma ken dagiti annacna a babbai agsublidanto iti immuna a casasaadda; ket ti Samaria ken dagiti annacna a babbai agsublidanto iti immuna a casasaadda; sica met ken dagiti annacmo agsublicayto iti immuna a casasaadyo.

56Agsipud ta ti Sodoma a cabsatmo a babai saan a nainaganan dita ngiwatmo idi aldaw ti kinacuspagmo,

57Idi dayta kinadakesmo dipay nalucasan, a cas idi pannawen ti pannacabain dagiti annac a babbai ti Siria, ken amin a naglicmut kencuana, nga annac a babbai dagiti Filisteos, nga agranggas kenca iti aglicmut.

58Sica inawitmo ti kinaderrepmo ken dagiti kinarimonmo, cuna ni Jehova.

59Ta castoy ti cuna ni Apo Jehova: Aramidecto met kenca ti cas ti inaramidmo, sica a nanguyaw iti sapata iti panangdadaelmo iti tulag.

60Nupay casta lagipecto ti intulagco kenca cadagiti aldaw ti kinaubingmo, ket bangonecto kenca ti maysa a tulag nga agnanayon.

61Iti casta malagipmonto dagiti daldalanmo, ket agbaincanto, intono awatem dagiti cacabsatmo a babbai, dagiti inauna a cacabsatmo a babbai ken dagiti inaudi; ket itedconto ida kenca a cas annac a babbai, ngem saan a babaen ti tulagmo.

62Ket bangonecto ti tulagco kenca, ket mabigbigmonto a siac ni Jehova;

63Tapno malagipmo, ket mariroca, ket nicaanoman dicanto agtimeken, a gapu iti bainmo; intono pacawanec kenca dagiti amin nga inaramidmo, cuna ni Apo Jehova.