Ezekiel 18

Ilokano (Ti Biblia (1973))

← Chapter 17 Jump to: Chapter 19 →

1Ti sao ni Jehova dimteng manen caniac, a kinunana,

2Ania ti cayatyo a saoen, nga aramatenyo daytoy a proverbio a maipapan iti daga ti Israel, a cunayo, dagiti amma kinnanda ti uvas a naalsem, ket dagiti ngipngipen dagiti ub-ubbing naalinoda?

3Cas sibibiagac, cuna ni Apo Jehova, dicayto aramatenen daytoy a proverbio ditoy Israel.

4Adtoy, nga amin a cararua cucuac ida; cas ti cararua ti ama, casta met ti cararua ti anac a lalaki cucuac; ti cararua nga agbasol matayto.

5Ngem no ti maysa a tao nalinteg, ket aramidenna ti mayalubog iti linteg ken umisu,

6Ket saan a nangan iti rabaw dagiti banbantay, ket dina met intangad dagiti matana cadagiti didiosen iti balay ti Israel, ket saanna met a tinulawan ti asawa ti padana a tao, wenno inasitgan ti maysa a babai nga agcadawyan,

7Ket saanna a rinanggasan ti siasinoman, no di ket insublina ti insalda ti nacautang, awan ti innalana a tinacaw, intedna ti tinapayna iti mabisin, ket kinawesanna ti lamolamo iti pagan-anay;

8Isu saan a nagpaanac, ket di met immawat iti nalabes, nga inlisina ti imana iti kinadangkes, inaramidna ti pudno a kinajusticia iti lalaki ken lalaki,

9Nagna cadagiti linlintegco, ket sinalimetmetna dagiti bilbilinco, nga agaramid a sipupudno; isu nalinteg, di bumurong nga isu agbiagto, cuna ni Apo Jehova.

10No isu agputotto iti lalaki a mannanacaw, a managibuyat iti dara, ket agaramid iti aniaman cadagitoy a banag,

11Ket saanna nga aramiden ti aniaman cadagidiay a rebbengen, no di ket nangan iti rabaw dagiti banbantay, ket tinulawanna ti asawa ti padana a tao,

12Pinarigatna ti napanglaw ken addaan pannacasapul, nagala iti tinacaw, dina insubli ti salda, ket intangadna dagiti matana cadagiti didiosen, nagaramid iti kinarimon,

13Nagpaanac ken immawat iti nalabes; isu agbiagto aya ngarud? saanto nga agbiag: inaramidna amin dagitoy a kinarimon; di bumurong nga isu matayto; ti darana addanto iti rabawna.

14Ngem, adtoy, no aputotto iti lalaki, a macakita cadagiti amin a basbasol ni amana nga inaramidna, ket agbuteng, ket dina aramiden ti cas cadagidiay;

15A di nangan iti rabaw dagiti banbantay, ket dina met intangad dagiti matana cadagiti didiosen iti balay ti Israel, saanna a tinulawan ti asawa ti padana a tao;

16Dina met rinanggasan ti siasinoman, saan nga immawat iti salda, ket di met nangala iti tinacaw, no di ket intedna ti tinapayna iti mabisin, ket kinawesanna ti lamolamo iti pagan-anay;

17Nga inlisina ti imana iti napanglaw, saan nga immawat iti paanac wenno tubo, tinungpalna dagiti bilbilinco, nagna cadagiti linlintegco; isu dinto matay gapu iti kinadangkes ni amana, isu agbiagto a di bumurong.

18No maipapan ken amana, gapu ta nangparigat a sidadawel, inagawanna ni cabsatna, ket inaramidna ti saan a naimbag iti tengnga ti ilina, adtoy, isu matayto iti kinadangkesna.

19Ngem cunayo pay, Apay a ti anac saanna nga awiten ti basol ni amana? No ti anac a lalaki maaramidna dayta a mayalubog iti linteg ken umisu, ket tinungpalna amin dagiti linlintegco, ket inaramidna ida, isu agbiagto a di bumurong,

20Ti cararua nga agbasol, matayto: ti anac a lalaki dinanto awiten ti kinadangkes ti ama, ket ti ama dinanto met awiten ti kinadangkes ti anac a lalaki; ti kinalinteg ti nalinteg addanto kencuana, ket ti kinadakes ti managdacdakes addanto kencuana.

21Ngem no ti nadangkes paglicudanna dagiti amin a basbasolna nga inaramidna, ket tungpalenna amin dagiti linlintegco, ket aramidenna daydiay a mayannugot iti linteg ken umisu, isu agbiagto a di bumurong, saanto a matay.

22Awanto cadagiti salungasingna nga inaramidna ti maipalagip a maibusor kencuana: babaen ti kinalintegna nga inaramidna isu agbiagto.

23Adda aya aniaman a ragsacco iti ipapatay ti nadangkes? cuna ni Apo Jehova; saan aya a nasaysayaat nga isu agsubli coma manipud iti dalanna, ket agbiag?

24Ngem no ti nalinteg sumina iti kinalintegna, ket agaramid ti kinadangkes, ket agaramid iti mayannugot cadagiti amin a kinarimon nga aramiden ti nadangkes a tao, isu aya agbiagto? Awanto cadagiti nalinteg a gapuananna nga inaramidna ti maipalagip: babaen ti labsingna a pinaglabsingna, ken iti basolna a binasolanna, cadacuada isu matayto.

25Nupay casta cunaenyo, Ti dalan ti Apo saan a padapada. Denggenyo ita, O balay ti Israel: Saan aya a padapada ti dalanco? saan aya a dagiti daldalanyo ti aggigidiat?

26No ti nalinteg a tao sumina iti kinalintegna, ket agaramid iti kinadangkes, ket isu matay kencuana; babaen ti kinadangkes nga inaramidna isu matayto.

27Manen, no ti nadangkes a tao sumina iti kinadangkesna nga inaramidna, ket aramidenna daydiay a mayalubog iti linteg ken umisu, ispalennanto ti cararuana a sibibiag.

28Agsipud ta otobenna, ket sumina cadagiti amin a salungasingna nga inaramidna, isu agbiagto a di bumurong, saanto a matay.

29Nupay casta ti balay ti Israel cunana, Ti dalan ti Apo saan a padapada. O balay ti Israel, saan aya a padapada dagiti daldalanco? saan aya a dagiti daldalanyo ti aggigiddiat?

30Gapuna nga ocomencanto, O balay ti Israel, tunggal maysa cas mayannugot iti dalanna, cuna ni Apo Jehova agsublicayo, ket italawanyo dagiti amin a salungasingyo; tapno ti kinadangkes saanto nga isu ti pacadadaelanyo.

31Iyadayuyo cadacayo dagiti amin a salungasingyo, isuda a sinalungasingyo; ket mangaramidcayo iti maysa a puso a baro ken maysa nga espiritu a baro: ta apay a mataycayto, O balay ti Israel?

32Ta awan ti ragsacco iti ipapatay daydiay a matay, cuna ni Apo Jehova; agbalbaliwcayo ngarud, ket agbiagcayo.

← Chapter 17 Jump to: Chapter 19 →