Ezekiel 43

Ilokano (Ti Biblia (1973))

← Chapter 42 Jump to: Chapter 44 →

1Calpasanna impannac iti ruangan, daydi ruangan a sumango iti daya.

2Ket, adtoy, ti dayag ti Dios ti Israel immay nanipud iti dalan ti daya; ket ti timecna cas la ti daranudor dagiti adu a dandanum; ket ti daga nagraniag babaen ti dayagna.

3Ket isu cas la iti langa ti sirmata a nakitac, wen, cas iti sirmata a nakitac idi immayac a mangdadael iti ili; ket dagiti sirmata umaspingda iti sirmata a nakitac iti denna ti carayan a Kebar; ket nagpaclebac.

4Ket ti dayag ni Jehova immay iti balay iti dalan ti ruangan a simmango iti daya.

5Ket ti Espiritu impangatonac, ket impannac iti makinuneg a paraangan; ket, adtoy, ti dayag ni Jehova pinunnona ti balay.

6Ket nangngegco ti maysa a nagsao caniac manipud iti balay; ket maysa a tao nagtacder iti arpadco.

7Ket kinunana caniac, Anac ti tao, daytoy ti disso ti tronoc, ken ti disso dagiti dapanco, isu a pagnaedac iti agnanayon iti tengnga dagiti annac ti Israel. Ket ti balay ti Israel saandanton a tulawan ti nasantoan a naganco, uray isuda wenno dagiti arida, gapu iti kinabalangcantisda ken gapu cadagiti bangcay dagiti arida cadagiti nangato a dissoda.

8Iti panangicabilda iti dapianda iti denna ti dapianco, ken ti adigi ti ruanganda iti arpad ti adigi ti ruanganco, ket ti adda iti nagbaetac ken isuda isu laeng ti diding; ket tinulawanda ti nasantoan a naganco babaen cadagiti kinarimonda nga inaramidda: gapuna inibusco ida babaen ti pungtotco.

9Ngarud ipanawda coma ti kinabalangcantisda, ken dagiti bangcay dagiti arida, iti adayu caniac; ket agnaedacto iti tengngada iti agnanayon.

10Sica, anac ti tao, ipakitam ti balay iti balay ti Israel, tapno mabainanda coma cadagiti kinadakesda; ket rucodenda coma ti pagwadan.

11Ket no mabainanda cadagiti amin nga inaramidda, ipacaammom cadacuada ti tabas ti balay ken ti langana, ken dagiti pagruaranna ken dagiti pagsercanna, ken amin dagiti wagasna, ken amin dagiti alagadenna, ken amin dagiti langana, ken amin dagiti lintegna; ket isu isuratmo iti imatangda; tapno salimetmetanda ti amin a wagasna, ken amin dagiti alagadenna, ket aramidenda ida.

12Daytoy ti linteg iti balay: iti rabaw ti tuctoc ti bantay ti amin a beddengna iti aglicmut isunto ti casantoan. Adtoy, daytoy ti linteg ti balay.

13Ket dagitoy dagiti rucod ti altar iti sico (ti sico isu ti maysa a sico ken sangadaculapan): ti lansad maysanto a sico, ti caacaba maysa a sico, ket ti ngarabna iti aglicmut sangadangan; ket daytoy isunto ti pagbatayan ti altar.

14Ket manipud iti lansad iti rabaw ti daga agingga iti makinbaba a barikes duanto a sico, ket ti caacaba maysa a sico; ket manipud iti basbassit a barikes agingga iti dacdackel a barikes uppatto a sico, ket ti caacaba maysa a sico.

15Ket ti makinngato a paset ti altar uppatto a sico; ket manipud iti paggangatan ti altar ken agpangato addanto uppat a sara.

16Ket ti paggangatan ti altar sangapulonto ket dua a sico ti caatiddug ken sangapulo ket dua ti caacaba cuadrado cadagiti uppat a sikiganna.

17Ket ti barikes sangapulonto ket uppat a sico ti caatiddug ket sangapulo ket uppat ti caacaba cadagiti uppat a sikiganna; ket ti ngarab nga aglicmut caguduanto a sico; ket ti lansadna maysanto a sico iti aglicmut; ket dagiti tucadna sumangodanto iti daya.

18Ket kinunana caniac, Anac ti tao, castoy ti cuna ni Apo Jehova: Dagitoy isuda dagiti alagaden ti altar iti aldaw a panagannongdanto, tapno mangipaayda cadagiti daton a mapuuran iti rabawna, ken mangiwarsida iti dara iti rabawna.

19Itedmonto cadagiti papadi a Levitas nga adda iti capuonan ni Sadoc, isuda nga asideg caniac, nga agannong caniac, cuna ni Apo Jehova, maysa nga urbon a vaca a maipaay a daton gapu iti basol.

20Ket sica mangalaca iti darana, ket icabilmo cadagiti uppat a sarana, ken cadagiti uppat a suli ti barikes, ken iti ngarab iti aglicmut: castoy ti panangdalusmo kencuana ken panangaramidmo iti subbotna.

21Alaem met ti vaca a daton gapu iti basol, ket, mapuuranto iti nakedngan a disso ti balay, iti ruar ti santuario.

22Ket iti maicadua nga aldaw mangidatoncanto iti maysa a calding a lalaki nga awan ti pacapilawanna a maipaay a daton gapu iti basol; ket dalusandanto ti altar, cas ti panangdalusda iti pannacaaramat ti vaca.

23Intono malpasmo ti panangdalus kencuana, mangidatoncanto iti maysa nga urbon a vaca nga awan ti pacapilawanna, ken maysa a carnero a lalaki nga awan ti pacapilawanna a naggapu iti arban.

24Ket yegmonto ida iti asideg iti sangoanan ni Jehova, ket dagiti papadi mangipurruacdanto ti asin cadacuada, ket idatondanto ida a maipaay a daton a mapuuran ken ni Jehova.

25Bayat ti pito nga aldaw saganaemto tunggal aldaw maysa a calding a maipaay a daton gapu iti basol: mangisaganadanto met ti maysa nga urbon a vaca, ken maysa a carnero a lalaki, nga awan ti pacapilawanna a naggapu iti arban.

26Bayat ti pito nga aldaw mangaramiddanto ti subbot a maipaay iti altar ken isu gugurandanto; castoy ti panangonsagrarda kencuana.

27Ket intono matungpalda dagiti aldaw maaramidto nga iti maicawalo nga aldaw, ken iti masacbayan, dagiti papadi aramidendanto dagiti datonyo a mapuuran iti rabaw ti altar, ken dagiti datonyo iti cappia; ket awatencayto, cuna ni Apo Jehova.

← Chapter 42 Jump to: Chapter 44 →