Ezekiel 45

Ilokano (Ti Biblia (1973))

← Chapter 44 Jump to: Chapter 46 →

1Castamet, intono bingbingayenyo ti daga iti ginnasat a tawidenyo, mangidatoncayto iti maysa a daton ken ni Jehova, maysa a nasantoan a bingay ti daga; ti caatiddugna duapulonto ket lima ribu a runo, ket ti caacabana sangapulo ribu: isu nasantoanto iti amin a beddengna nga aglicmut.

2Iti daytoy maipaayto iti nasantoan a disso a limagasut iti caatiddug ken limagasut iti caacaba, cuadrado iti aglicmut; ken limapulo a sico a maipaay cadagiti arubayan iti aglicmut.

3Ket iti daytoy a rucod rucodemto ti caatiddug ti duapulo ket lima ribu, ken ti caacaba ti sangapulo ribu: ket kencuana addanto ti santuario, isu a casantoan.

4Isu ti nasantoan a paset ti daga; maipaayto cadagiti papadi, dagiti agannong iti santuario, nga umasideg nga agannong ken ni Jehova; ken disso a maipaayto cadagiti balbalayda, ken nasantoan a disso a maipaay iti santuario.

5Ket ti duapulo ket lima ribu ti caatiddug, ken sangapulo ribu ti caacaba, maipaayto cadagiti Levitas, dagiti agannong ti balay, a maipaay a cucuada met laeng, a pagianan ti duapulo a siled.

6Ket kednganyonto ti cucua ti ili lima ribu ti caacaba, ken duapulo ket lima ribu ti caatiddug, a maidenna iti daton a nasantoan a bingay: maipaayto iti amin a balay ti Israel.

7Ket ti maipaay iti principe addanto iti maysa a sikigan ken iti sabali a sikigan ti nasantoan a daton ken ti cucua ti ili, iti sangoanan ti nasantoan a daton ken iti sangoanan iti cucua ti ciudad, iti makinlaud nga agpalaud, ken iti makindaya nga agpadaya; ket iti caatiddug mayannugot iti maysa cadagiti bingay, manipud iti makinlaud a beddeng agingga iti makindaya a beddeng.

8Maipapan iti daga cucuananto idiay Israel: ket dagiti piprincipe saandanton nga irurumen ti ilic; no di ket iteddanto ti daga iti balay ti Israel a cas mayannugot cadagiti caputotanda.

9Castoy ti cuna ni Apo Jehova: umdas coma cadacayo, O piprincipe ti Israel: iccatenyo ti panangranggas ken panagsamsam, ket agaramidcayo iti kinajusticia ken kinalinteg; iccatenyo ti panangirurumen iti ilic, cuna ni Apo Jehova.

10Addanto cadacayo nalinteg a timbenganyo, ken apagisu nga efa ken apagisu a bat.

11Ti efa ken ti bat agpadpadadanto a pagsucatan, tapno ti bat laonenna coma ti apagcapul-lo ti maysa nga homer, ket ti efa ti apagcapul-lo ti maysa nga homer: ti sucatna mayannurotto iti homer.

12Ket ti siclo duapulonto a gera; duapulo a siclo, duapulo ket lima a siclo, sangapulo ket lima a siclo, isunto ti minayo.

13Daytoy ti daton nga idatagyonto: ti apagcanem ti maysa nga efa iti maysa nga homer a trigo; ket itedyonto ti apagcanem ti maysa nga efa iti maysa nga homer a cebada;

14Ket ti nailasin a bingay ti lana, iti bat ti lana ti apagcapul-lo ti maysa a bat iti cor, nga isu ti sangapulo a bat, maysa met laeng nga homer (ta sangapulo a bat isu ti maysa nga homer);

15Ket maysa a cordero ti arban, iti tunggal duagasut, nga agtaud cadagiti nasayaat ti padanumna a pagpaaraban ti Israel—a maipaay a daton a macan, ken daton a mapuuran, ken datdaton iti cappia, tapno aramiden a subbot cadacuada, cuna ni Apo Jehova.

16Amin ti umili ti daga mangteddanto iti daytoy a daton a maipaay iti principe iti Israel.

17Ket pannacabiangto ti principe ti panangted cadagiti daton a mapuuran, ken dagiti daton a macan ken dagiti daton a mainum, cadagiti fiesta, ken cadagiti lutuad, ken cadagiti aldaw a panaginana, cadagiti amin a nakedngan a fiesta ti balay ti Israel; isaganananto ti daton a maipaay iti basol, ken ti daton a macan, ken ti daton a mapuuran, ken dagiti daton iti cappia, tapno aramiden a subbot a maipaay iti balay ti Israel.

18Castoy ti cuna ni Apo Jehova: iti umuna a bulan, iti umuna nga aldaw ti bulan, mangalacanto ti bumaro a vaca nga awan ti pacapilawanna; ket guguramto ti santuario.

19Ket ti padi mangalanto iti dara ti daton a maipaay iti basol, ket icabilna cadagiti adigi ti ruangan ti balay, ken cadagiti uppat a suli iti ngarab ti altar, ken cadagiti adigi ti ruangan ti makinuneg a paraangan.

20Ket castoy ti aramidemto iti maicapito nga aldaw ti bulan a maipaay iti bumiddut, ken iti nanengneng: castoy ti panangaramidyonto ti subbot a maipaay iti balay.

21Iti umuna a bulan, iti maicapul-lo ket uppat nga aldaw ti bulan, addanto cadacayo ti pascua, a fiesta bayat ti pito nga aldaw; ti awan levadurana a tinapay macanto.

22Ket iti dayta nga aldaw ti principe isaganananto ti maipaay kencuana met laeng ken maipaay cadagiti amin a tattao iti daga maysa a bumaro a vaca a maipaay a daton gapu iti basol.

23Ket bayat ti pito nga aldaw ti fiesta mangisagananto iti maysa a daton a mapuuran ken ni Jehova, pito a vaca ken pito a carnero a lalaki nga awan ti pacapilawanda iti inaldaw bayat ti pito nga aldaw; ken maysa a calding a lalaki iti inaldaw a maipaay a daton gapu iti basol.

24Ket mangisagananto iti daton a macan, maysa nga efa iti maysa a vaca, ket maysa nga efa iti maysa a carnero a lalaki, ken maysa a hin ti lana iti maysa nga efa.

25Iti maicapito a bulan, iti maicapul-lo ket lima nga aldaw ti bulan, iti fiesta, aramidennanto ti cas cadagiti pito nga aldaw; a cas mayannugot iti daton a maipuon iti basol, a cas mayannugot iti daton a mapuuran ken cas mayannugot iti daton a macan ken cas mayannugot iti lana.

← Chapter 44 Jump to: Chapter 46 →