Ezekiel 27

Ilokano (Ti Biblia (1973))

← Chapter 26 Jump to: Chapter 28 →

1Ti sao ni Jehova dimteng manen caniac, a kinunana,

2Ket sica, anac ti tao, unnoyam ti Tiro;

3Ket cunaem iti Tiro, O sica nga agnaed iti pagsercan ti baybay, a sica ti pagtagilacoan dagiti il-ili agingga cadagiti adu a purpuro, castoy ti cuna ni Apo Jehova: Sica, O Tiro, kinunam, siac naananayac iti imnas.

4Dagiti beddengmo addada iti puso dagiti baybay; dagiti manangibangon kenca lineppasda ti pintasmo.

5Isuda inaramidda dagiti amin a tablonmo cadagiti caycayo a cantingen nanipud Senir; nangalada iti cantingen nanipud idiay Libano nga inaramidda a palo ti sasacayan kenca.

6Inaramidda dagiti gaudmo cadagiti calantas ti Basan; inaramidda dagiti bangcom iti marfil a naibutac iti cayo nga alamo, a naggapu cadagiti purpuro ti Kitim.

7Ti nalapat a lienzo a nabordaan a naggapu idiay Egipto isu ti layagmo, tapno isu coma kenca ti maipaay a maysa a wagayway; azul ken purpura a naggapu cadagiti purpuro ti Elisa isu ti linongmo.

8Dagiti agnaed iti Sidon ken Arvad isuda idi dagiti paggagaudem: dagiti mamasiribmo, O Tiro, addada idi kenca, isuda dagiti pilotom.

9Dagiti lallacay iti Gebal ken dagiti mamasiribna a lallaki addada idi kenca a cas manggalagala kenca: amin dagiti sasacayan ti baybay agraman dagiti marinero addada idi kenca a makibiang iti tagilacom.

10Ti Persia ken Lud ken Put addada idi iti buyotmo, cas dagiti lallakim iti gubat: imbitinda ti calasag ken ti cabal ti olo kenca; isuda imparangda ti dayagmo.

11Dagiti lallaki ti Arvad agraman ti buyotmo addada idi iti rabaw dagiti bacudmo iti aglicmut, ket dagiti natured a lallaki addada idi cadagiti torrem; imbitinda dagiti calasagda cadagiti bacudmo iti aglicmut; inananayda ti imnasmo.

12Ti Tarsis isu ti kinatinnagilacom gapu iti caadu dagiti amin a kita ti kinabacnang; dagiti pirac, landoc, lata, ken buli, pinagsucatda cadagiti tagtagilacom.

13Ti Javan, Tubal ken Mesec, isuda dagiti kinatinnagilacom; insucatda dagiti tattao ken dagiti alicamen a gambang cadagiti tagilacom.

14Dagiti naggapu iti balay ti Togarma insucatda dagiti cabayo ken cabayo ti gubat ken mulos cadagiti tagtagilacom.

15Dagiti lallaki ti Dedan isuda dagiti kinatinnagilacom; adu a purpuro idi ti nagtagilacoan ti imam; inyegda kenca nga insucat dagiti saong a marfil ken bal-latinaw.

16Ti Siria isu ti kinatinnagilacom gapu iti caadu dagiti cucuam nga aramid ti ima; insucatda cadagiti tagtagilacom dagiti esmeraldas, purpura, ken nabordaan nga aramid, ken nalapat a lienzo, ken coral, ken rubrubi.

17Ti Juda, ken ti daga ti Israel, isuda dagiti kinatinnagilacom: insucatda iti tagilacom dagiti trigo ti Minith, ken pannag, ken diro, ken lana, ken balsamo.

18Ti Damasco isu ti kinatinnagilacom gapu iti caadu dagiti cucuam nga aramid ti ima, gapu iti caadu dagiti amin a kita ti kinabacnang, agraman ti arac ti Helbon, ken napudaw a de lana.

19Ti Vedan ken Javan insucatda ti sagut cadagiti tagtagilacom: nasileng a landoc, casia, ken calamo addada idi cadagiti tagtagilacom.

20Ti Dedan isu ti kinatinnagilacom cadagiti napateg a luplupot a pagsacay.

21Ti Arabia, ken amin a principes ti Cedar, isuda ti pagtagtagilacoen ti imam; iti corcordero, carcarnero a lallaki, ken calcalding, cadagitoy isuda dagiti kinatinnagilacom.

22Dagiti agbaniaga ti Seba ken Raama, isuda dagiti kinatinnagilacom; insucatda cadagiti tagilacom ti cangronaan cadagiti amin a recrecado, ken cadagiti amin a napateg a batbato, ken balitoc.

23Ti Haran ken Canneh, ken Eden nga agbaniaga ti Saba, Asiria, ken Kilmad, isuda dagiti kinatinnagilacom.

24Dagitoy isuda dagiti kinatinnagilacom cadagiti napili a tagtagilaco, cadagiti pagbalcut nga azul ken nabordaan a trabajo, ken cadagiti laclacasa ti napateg a cawes, a nareppet cadagiti taltali ken naaramid iti cantingen, a nainayon cadagiti tagtagilacom.

25Dagiti sasacayan ti Tarsis isuda dagiti bonggoy a nagcarga cadagiti tagtagilacom: ket sica napnecca, ken naaramidca a nadayag unay iti tengnga dagiti baybay.

26Dagiti paggagaudem impandaca cadagiti dadackel a dandanum: ti angin ti daya binuracnaca iti tengnga dagiti baybay.

27Dagiti kinabacnangmo, ken dagiti tagtagilacom, ti tagilacom, dagiti marinerom, ken dagiti pilotom, dagiti manggalagala kenca, ken dagiti makibibiang cadagiti tagtagilacom, ken amin dagiti lallakim ti gubat nga adda kenca, agraman ti amin a bonggoymo nga adda iti tengngam, matnagdanto iti tengnga dagiti baybay, iti aldaw ti pannacarbecmo.

28Gapu iti uni ti riaw dagiti pilotom dagiti arubayanmo agkintayegdanto.

29Ket amin dagiti agiggem ti gaud, dagiti marineros, ken amin dagiti pilotos ti baybay, dumsaagdanto manipud cadagiti sasacayanda; isuda agtacderdanto iti daga,

30Ket ipangngegdanto ti timecda kenca, ket agriawdanto a sipapait, ket agipurruacdanto iti tapuc iti rabaw dagiti ol-oloda; isuda aglubnacdanto cadagiti dapdapu;

31Ket agcalvodanto a maipuon kenca, ket agbarikesda iti nakersang a lupot, ket agsangitdanto a maipuon kenca a sipapait ti cararua ken iti napait a panagladingit.

32Ket iti panagdung-awda agunnoydanto maipuon kenca, ket agasugdanto maipuon kenca, a cunada, Siasino ti cas iti Tiro, cas kencuana a napagulimec iti tengnga ti baybay?

33Idi dagiti tagtagilacom rimmuarda cadagiti baybay, sica pinunnom ti adu nga il-ili; pinabacnangmo dagiti ar-ari ti daga iti caadu dagiti kinabacnangmo ken tagilacom.

34Idi pannawen ti pannacaburacmo babaen dagiti baybay iti caadalman dagiti dandanum, ti tagilacom ken amin ti bonggoymo napasagda iti tengngam.

35Amin dagiti agnaed cadagiti purpuro agsiddaawda kenca, ket dagiti ar-arida agbutengda a napalalo; langada ti mariribuc.

36Dagiti agtagtagilaco iti nagtengngaan dagiti il-ili sanamticandaca; nagbalinca a pagbutngan, ket awancanton nga agnanayon.

← Chapter 26 Jump to: Chapter 28 →