Ezekiel 40 — Ilokano (Ti Biblia (1973))

1Iti maicaduapulo ket lima a tawen ti pannacacayawmi, iti pangrugian ti tawen, iti maicapul-lo nga aldaw ti bulan, iti maicapul-lo ket uppat a tawen calpasan ti pannacarbec ti ili, iti dayta met laeng nga aldaw ti ima ni Jehova adda idi caniac, ket isu impannac idiay.

2Cadagiti sirmata ti Dios isu impannac iti daga ti Israel, ket indissonac iti rabaw ti maysa a nangato unay a bantay, isu a yan idi ti cas caasping ti maysa nga ili iti abagatan.

3Ket impannac idiay; ket adtoy, adda idi maysa a lalaki, a ti langana cas la langa ti gambang, nga adda lubid a lino iti imana, ken maysa a pangrucod a runo; ket isu nagtacder iti ruangan.

4Ket daydi lalaki kinunana caniac, Anac ti tao, matmatam, ket timudem, ket ipapusom dagiti amin nga iparangconto kenca; tapno iti casta isuda maiparangco coma, kenca maiyegca ditoy, ipalawagmo amin a makitam iti balay ti Israel.

5Ket, adtoy, maysa a bacud iti ruar ti balay nga aglicmut, ket iti ima daydi lalaki adda pagrucod a runo, innem a sico ti caatiddugna, a maysa a sico ken sangadaculapan ti tunggal sico: iti casta rinucodna ti capuscol ti balay, maysa a runo; ket ti cangato, maysa a runo.

6Idin isu immay agingga iti ruangan a simmango iti daya, ket immuli cadagiti tuctucadna: ket rinucodna ti dapian ti ruangan, maysa a runo ti caacabana; ket ti sabali a dapian, maysa a runo ti caacabana.

7Ket tunggal siled maysa a runo ti caatiddugna, ken maysa a runo ti caacaba; ket iti nagbaetan dagiti siled lima a sico; ket ti dapian ti ruangan iti arpad ti balcon ti ruangan nga agturong iti balay maysa a runo.

8Rinucodna met ti balcon ti ruangan nga agturong iti balay, maysa a runo.

9Idin rinucodna ti balcon ti ruangan, walo a sico; ken dagiti adigina, dua a sico; ket ti balcon ti ruangan nagturong iti balay.

10Ket dagiti silsiled ti ruangan nga agpadaya talloda idi iti daytoy a sikigan, ken tallo iti dayta a sikigan; isuda a tallo sangsangcarucodda: ket dagiti adigi sangsangcarucodda iti daytoy a sikigan ken iti dayta a sikigan.

11Ket rinucodna ti caacaba ti pangluctan ti ruangan, sangapulo a sico; ket ti caatiddug ti ruangan sangapulo ket tallo a sico,

12Ken maysa a baet iti sangoanan dagiti silsiled, maysa a sico iti daytoy a sikigan, ken maysa a baet, maysa a sico iti dayta a sikigan; ket dagiti silsiled, innem a sico iti daytoy a sikigan, ken innem a sico iti dayta a sikigan.

13Ket rinucodna ti ruangan manipud iti atep ti maysa a siled agingga iti atep ti sabali, a caacaba ti duapulo ket lima a sico; ruangan a maibatog iti ruangan;

14Isu nangaramid met cadagiti ad-adigi, innem a pulo a sico; ket ti paraangan dimmanon agingga cadagiti ad-adigi, iti aglicmut iti ruangan.

15Ket manipud iti pamarang ti ruangan, iti pagsercan agingga iti pamarang ti makinuneg a balcon ti ruangan limapulo a sico.

16Ket adda naripcan a tawtawa cadagiti silsiled, ken dagiti ad-adigida iti uneg ti ruangan nga aglicmut, ket castamet cadagiti baccuco; ket dagiti tawtawa addada idi iti aglicmut iti uneg; ket iti tunggal adigi naarcosan iti cayo ti palma.

17Idin impannac iti makinruar a paraangan; ket adtoy, adda idi silsiled ken maysa a papayaten a naaramid a maipaay iti paraangan iti aglicmut: tallopulo a siled addada idi iti rabaw ti papayaten.

18Ket ti papayaten adda idi iti arpad dagiti ruangan a cas iti caatiddug dagiti ruangan, ti met laeng makinbaba a papayaten.

19Idin rinucodna ti caacaba manipud iti pamarang ti makinbaba a ruangan agingga iti pamarang ti makinuneg a paraangan iti ruar, sangagasut a sico, isuda a dua iti daya ken iti amianan.

20Ket ti ruangan ti makinruar a paraangan a nacasango iti amianan, rinucodna ti caatiddugna ken ti caacabana.

21Ket dagiti siledna talloda iti daytoy a sikigan ken tallo iti dayta a sikigan; ket dagiti adigina ken dagiti baccucona casda ti rucod ti umuna a ruangan: ti caatiddugna limapulo a sico, ket ti caacaba duapulo ket lima a sico.

22Ket dagiti tawana, ken dagiti baccucona, ken dagiti caycayona a palma casda iti rucod ti ruangan a simmango iti daya: ket ti pagulian kencuana pito a tucad; ket dagiti baccucona addada iti sangoananda.

23Ket adda idi maysa a ruangan ti makinuneg a paraangan a maibatog ti sabali a ruangan iti amianan ken casta met iti daya; ket rinucodna manipud ruangan agingga iti ruangan sangagasut a sico.

24Ket isu inturongnac iti abagatan; ket adtoy, maysa a ruangan nga agturong iti abagatan: ket rinucodna dagiti adigina ken dagiti baccucona a cas cadagitoy a rucod.

25Ket adda idi tawtawa kencuana ken cadagiti baccucona iti aglicmut cas cadagidiay a tawtawa: ti caatidug limapulo a sico, ket ti caacaba duapulo ket lima a sico.

26Ket adda idi pito a tucad a pagulian kencuana, ket dagiti baccucona addada iti sangoananda; ket adda idi caycayona a palma, maysa iti daytoy a sikigan, ken maysa iti dayta a sikigan cadagiti adigina.

27Ket adda idi maysa a ruangan iti makinuneg a paraangan iti agpaabagatan: ket rinucodna manipud ruangan agingga iti ruangan nga agpaab agatan sangagasut a sico.

28Idin impannac iti makinuneg a paraangan iti arpad ti makinabagatan a ruangan: ket rinucodna ti makinabagatan a ruangan a cas cadagitoy a rucod;

29Ket dagiti siledna, ken dagiti adigina, ken dagiti baccucona, a cas cadagitoy a rucod: ket adda idi tawtawa kencuana ken cadagiti baccucona iti aglicmut; limapulo a sico ti caatiddugna ken duapulo ket lima a sico ti caacabana.

30Ket adda idi bacbaccucona iti aglicmut, duapulo ket lima a sico ti caatidugda, ken lima a sico ti caacabada.

31Ket dagiti baccucona agturongda idi iti makinruar a paraangan; ket caycayo a palma nayarcosda cadagiti adigina: ket ti pagulian kencuana adda walo a tucadna.

32Ket impannac iti makinuneg a paraangan iti agpadaya: ket rinucodna ti ruangan a cas cadagitoy a rucod;

33Ket dagiti siledna, ken dagiti adigina, ken dagiti baccucona, a cas cadagitoy a rucod: ket adda idi tawtawa idiay ken cadagiti baccucona iti aglicmut; limapulo a sico ti caatidugna ken duapulo ket lima a sico ti caacabana.

34Ket dagiti baccucona nagturongda iti makinruar a paraangan; ket dagiti caycayo a palma nayarcosda cadagiti adigina, iti daytoy a sikigan, ken iti dayta a sikigan, ket ti pagulian kencuana adda walo a tucadna.

35Ket impannac iti makinamianan a ruangan: ket isu rinucodna a cas cadagitoy a rucod;

36Dagiti siledna, dagiti adigina, ken dagiti baccucona: ken adda idi tawtawa idiay iti aglicmut; ti caatidug limapulo a sico, ket ti caacaba duapulo ket lima a sico.

37Ket dagiti adigina nagturongda iti makinruar a paraangan; ket dagiti caycayo a palma nayarcosda cadagiti adigina, iti daytoy a sikigan, ken iti dayta a sikigan; ket ti pagulian kencuana adda walo a tucadna.

38Ket maysa a siled agraman ti ruanganna adda idi ti arpad dagiti ad-adigi cadagiti ruruangan; idiay inugasanda ti daton a mapuuran.

39Ket iti balcon ti ruangan adda idi dua a lamesaan iti daytoy a sikigan, ken dua a lamesaan iti dayta a sikigan tapno patayen idiay ti daton a mapuuran ken ti daton gapu iti basol ken ti daton gapu iti salungasing.

40Ket iti sikigan iti ruar, a pagulian iti pagsercan ti ruangan nga agpaamianan, adda idi dua a lamesaan; ket iti sabali a sikigan, a paset ti balcon ti ruangan adda idi dua a lamesaan.

41Uppat a lamesaan adda idi iti daytoy a sikigan, ken uppat a lamesaan iti dayta a sikigan, iti arpad ti ruangan; walo a lamesaan, a pagpatayan cadagiti datdaton.

42Ket adda idi uppat a lamesaan a tinagaan a bato, maysa a sico ket gudua ti caatiddug, ken maysa a sico ket gudua ti caacaba, ken maysa a sico ti cangato a maipaay iti daton a mapuuran; iti rabawda insaadda dagiti alicamen a pangpapatayda iti daton a mapuuran ken ti daton.

43Ket dagiti callawit sangadaculapan ti caatiddug, naigalut iti uneg ti aglicmut: ket iti rabaw dagiti lamesaan adda idi ti lasag ti daton.

44Ket iti ruar ti makinuneg a ruangan adda idi silsiled a maipaay cadagiti cumacanta iti makinuneg a paraangan, nga adda idi iti arpad ti makinamianan a ruangan; ket simmangoda iti abagatan; maysa iti sikigan ti makindaya a ruangan a simmango iti amianan.

45Ket isu kinunana caniac, Daytoy a siled, a sumango iti abagatan, maipaay cadagiti papadi, dagiti agayaywan iti balay:

46Ket ti siled a sumango iti amianan maipaay cadagiti papadi, dagiti agayaywan iti altar: dagitoy isuda dagiti annac a lallaki ni Sadoc, dagidiay aggapu cadagiti annac a lallaki ni Levi, umasidegda ken ni Jehova nga agannong kencuana.

47Ket rinucodna ti paraangan sangagasut a sico ti caatiddug, ken sangagasut a sico ti caacaba a cuadrado; ket ti altar adda idi iti sangoanan ti balay.

48Idin impannac iti balcon ti balay, ket rinucodna ti tunggal adigi ti balcon, lima a sico iti daytoy a sikigan, ken lima a sico iti dayta a sikigan; ket ti caacaba ti ruangan tallo a sico iti daytoy a sikigan, ken tallo a sico iti dayta a sikigan.

49Ti caatiddug ti balcon duapulo a sico, ket ti caacabana sangapulo ket maysa a sico; iti met laeng arpad dagiti tucad a pagulian kencuana: ket adda idi monmon iti arpad dagiti adigi, maysa iti daytoy a sikigan, ken sabali iti dayta a sikigan.