Ezekiel 41

Ilokano (Ti Biblia (1973))

← Chapter 40 Jump to: Chapter 42 →

1Ket isu inyegnac iti templo, ket rinucodna dagiti adigi, innem a sico ti caacaba iti maysa a sikigan, ken innem a sico ti caacaba iti sabali a sikigan, nga isu ti caacaba ti tabernaculo.

2Ket ti caacaba ti pagsercan sangapulo a sico; ket dagiti sikigan ti pagsercan lima a sico iti maysa a sikigan, ken lima a sico iti sabali a sikigan: ket rinucodna ti caatiddugna, uppat a pulo a sico, ket ti caacaba duapulo a sico.

3Idin nagpauneg, ket rinucodna tunggal adigi iti pagsercan, dua a sico; ket ti pagsercan, innem a sico; ket ti caacaba ti pagsercan, pito a sico.

4Ket rinucodna ti caatiddugna, duapulo a sico, ken ti caacaba, duapulo a sico, iti sangoanan ti templo: ket kinunana caniac, Daytoy isu ti casantoan a disso.

5Idin rinucodna ti diding ti balay, innem a sico; ken ti caacaba ti tunggal sagumbi, uppat a sico, iti aglicmut ti balay iti tunggal sikigan.

6Ket dagiti sagumbi tallo a catoon, maysa iti ngato ti sabali, ket tallopulo a nagsasaganad; ket kimpetda iti diding iti balay a maipaay cadagiti sagumbi, iti aglicmut, tapno dagidiay agsawasaw idiay ti pagpatayanda coma, ket saanda nga agpatay coma iti diding ti balay.

7Ket dagiti sagumbi nalawlawa dagiti akinngato iti panaglicmutda iti balay; ta lumawada iti ingangatoda iti aglicmut ti balay: gapuna a ti caacaba iti balay immacaba a nagpangato; ket iti casta no adda umuli manipud iti cababaan agingga iti cangatoan a sagumbi lumasat iti nagtengnga a sagumbi.

8Nakitac met a ti balay nangato ti cababaan a cadsaaranna iti aglicmutna: dagiti pammuon dagiti sagumbi sanganayon a runo nga innem a dadackel a sico.

9Ti capuscol ti diding, dagiti sagumbi, iti ruar, lima a sico: ket dayta a nabati isu ti disso dagiti sagumbi a paset ti balay.

10Ket iti nagbaetan dagiti sagumbi adda calawa ti duapulo a sico iti aglicmut ti balay iti tunggal sikigan.

11Ket dagiti ruangan dagiti sagumbi nagturongda iti disso a nabati, maysa a ruangan nga agpaamianan, ken maysa a ruangan nga agpaabagatan: ket ti calawa ti disso a nabati lima a sico nga aglicmut.

12Ket ti balay nga adda idi iti sangoanan ti naisina a disso iti sikigan nga agpalaud pitopulo a sico ti caacaba; ket ti diding ti balay lima a sico ti capuscol nga aglicmut, ket ti caatiddugna siam a pulo a sico.

13Iti casta rinucodna ti balay, sangagasut a sico ti caatiddug; ket ti naisina a disso, ken ti balay, agraman dagiti didingna, sangagasut a sico ti caatiddug;

14Castamet ti caacaba ti sango ti balay, ken ti naisina a disso nga agpadaya, sangagasut a sico.

15Ket rinucodna ti caatiddug ti balay iti sangoanan ti naisina a disso nga adda iti licudanna, ken dagiti balconna iti maysa a sikigan ken iti sabali a sikigan, sangagasut a sico: ket ti makinuneg a templo ken dagiti balcon ti paraangan;

16Dagiti dapian, ken dagiti naripcan a tawtawa, ken dagiti balcon iti aglicmut cadagiti tallo a cadsaaran a maibatog iti dapian, a nabobedaan iti cayo nga aglicmut, ket manipud iti daga agingga cadagiti tawtawa (ta dagiti tawtawa naabbonganda),

17Agingga iti lugar ti ngato ti ruangan, agingga met laeng iti makinuneg a balay, ken iti ruar, ken iti arpad ti amin a diding iti aglicmut iti uneg ken iti ruar, narucodda.

18Ket naaramid nga adda dagiti kerubin ken caycayona a palma; ket maysa a cayo a palma adda iti nagbaetan ti kerubin ken kerubin, ket tunggal kerubin adda dua a rupana;

19Iti casta adda idi rupa ti maysa a lalaki a sumango idi cayo a palma iti maysa a sikigan, ken rupa ti maysa nga urbon a leon a sumango idi cayo a palma iti sabali a sikigan. Castoy ti pannacaaramidna iti amin a balay iti aglicmut.

20Manipud iti daga agingga iti ngato ti ruangan adda idi dagiti kerubin ken caycayo a palma a naaramid; castoy idi ti diding ti templo.

21No maipapan iti templo, dagiti ad-adigi ti ruangan cuadradoda; ket no maipapan iti rupa ti santuario, ti langana cas ti langa ti templo.

22Ti altar cayo, tallo a sico ti cangato, ket ti caatiddugna dua a sico; ket dagiti sulina, ken ti caatiddugna, ken dagiti didingna, cayoda; ket kinunana caniac, Daytoy ti lamesaan nga adda iti sangoanan ni Jehova.

23Ket ti templo ken ti santuario adda idi dua a ruanganda.

24Ket dagiti ruangan adda idi dua a cabulongna tunggal maysa, dua nga agpusipus a cabulong: dua a cabulong a maipaay iti maysa a ruangan, ken dua a cabulong iti sabali.

25Ket naaramid cadacuada, cadagiti ruangan ti templo, dagiti kerubin ken caycayo a palma, cas cadagiti naaramid cadagiti diding; ket adda idi maysa a dapian a cayo iti sango ti balcon iti ruar.

26Ket adda idi naripcan a tawtawa ken caycayo a palma iti maysa a sikigan ken iti sabali a sikigan, cadagiti sikigan ti balcon: castoy idi dagiti sagumbi ti balay, ken dagiti dapian.

← Chapter 40 Jump to: Chapter 42 →