Acts 10

Mien Bible (Thai Script) © Thailand Bible Society, 2007

1ซีซาลียา ฒี่ง ม่าย เต้า โลมา จั๋น, บั๋ว เห่ว โคเนลิอัด. นิ่น โหฒว เต้า, ต้ง เมี่ยน เห่ว “อิตาลี วั้ว กวั้น,” เญย แปง-เปย๊ย, กุ๊น เหยียด แป๊ะ เต้า แปง.

2นิ่น เหธา นิ่น เญย เหยียด เปย๊า เมี่ยน กัน หลง ทิน-ฮู่ง, ท่าย ทิน-ฮู่ง. นิ่น หย่า ธ้วด ฟิม เถง ยิวไท ฝีง เญย เมี่ยน จ่ม เมี่ยน ธั้ม เญย, หย่า หฒั่นๆ เต๋า เก๋า.

3ม่าย ฮนอย, เหฌี่ย อ๋าน เล่ย ไม้ โก ปัว นอม เฒี่ยง โห่, โคเนลิอัด ปวัด ทิน-ฮู่ง เญย ฟิน-เมี่ยน หิ่น ย่าง, ปวัด ตุ๊ เม่ง! เญย. ฟิน-เมี่ยน เปียะ ต้าย ก๊อง บั๋ว นิ่น, “โคเนลิอัด อ้า!”

4แฮะ โคเนลิอัด กั้ม เหฑีย ไห่, นุๆ เญย หมั่ง ฟิน-เมี่ยน. นิ่น หน่าย ก๋า, “เฒี้ยว อ้า! หาย หญู่ง?” ฟิน-เมี่ยน ก๊อง, “ทิน-ฮู่ง หมวัง ไฮ์ เม่ย เต๋า เก๋า เญย หว่า, หย่า ปวัด เม่ย ธ้วด ฟิม เถง เมี่ยน จ่ม เมี่ยน เญย สี่, นิ่น ฯฒฯ จั๋ง เถา เม่ย.

5อี้ หฒั่น เม่ย อ๋อย หฒุ ปุน เมี่ยน มี่ง ยับฟา มู้ง ล์อ ต้ง ม่าย บั๋ว เห่ว ซีโมน ปีเต วั้ว เต้า ต้าย น้าย.

6นิ่น เยียม ค้อย-เฮลน, วั้ว เต้า ด๊บ-หฒั่ง, ซีโมน, เญย เปย๊า.”

7เหธา นิ่น ก๊อง หว่า เญย ฟิน-เมี่ยน เล่ย ฆอย หมี่ อ๊ะ. โคเนลิอัด ฯฒฯ เห่ว อี เต้า นิ่น เญย โปว เหธา เต้า นิ่น เญย ซิน-เฮลน แปง ต้าย. วั้ว เต้า แปง หย่า กัน หลง ทิน-ฮู่ง.

8โคเนลิอัด เฒาะ ฟิน-เมี่ยน บั๋ว เญย หว่า ก๊อง ปุน นิ่น บัว หมวัง, ฯฒฯ พ้าย นิ่น บัว มี่ง ยับฟา มู้ง.

9ตะเหญ่ย ฮนอย นิ่น บัว กัน เจ๊า มี่ง เถา ฟัด เต๋ย ยับฟา มู้ง อ๊ะ. ลู่ง อ๊า ลั่ม อ๋าน, ปีเต ฝาว เปย๊า-ง่อ, ปี๋ง ล่าง เญย ต๋อง, เต๋า เก๋า.

10นิ่น ไฮ์ เฮญี้ยว เซีย เญย, อ๋อย หญั่น หฮนาง. วั้ว หฒั่น เยียม เปย๊า เญย เมี่ยน หลิ่ว เล์ย เจี๊ยน ไล-หฮนาง, ปีเต ปวัด หิ่น ย่าง เญย สี่ ฮนั้ง เบ๋ยๆ นอ.

11ปวัด ลู่ง แก้ง ฆอย. แอ๋ง ม่าย หญู่ง กะน้าย ฮนั้ง เหยียด คว้าย เดีย จั๊ง เญย, หย่า ฮนั้ง นั้น เจี๊ยน เปยย นอม เก๊าะ ปู๋ง เหฌี่ย เถา เดา นอ.

12วั้ว คว้าย เดีย กะญั์ว ม่าย หญู่งๆ แซง-คู้, หญู่งๆ เฮยี่ย ฒ่อย, ญอง เดา เญย กะน้าย, เหธา ได๋ ด๊าม-ลู่ง เญย เหนาะ.

13นิ่น แอ๋ง ไฮ์ เฉีย ก๊อง, “ปีเต อ้า! เจี์ย ซิน ต้าย ไต๋ น้าย เต๋ย กะน้าย หญั่น อ๊ะ.”

14มป่า ปีเต ก๊อง, “เฒี้ยว อ้า! ไม้ หอบ หญั่น ซ่าะ? อ๋อย หฒุ เก่ เญย เหธา ม่าย หวุย เญย กะน้าย เยีย ไม้ หญั่น เจี๋ย.”

15แอ๋ง ม่าย เฉีย ก๊อง ตะเหญ่ย หฑุ่น บั๋ว นิ่น, “ทิน-ฮู่ง ปุน หาย หญู่ง ธีง-เหฑ่ง, ไม้ ตู๋ง ฝุน ม่าย หวุย.”

16ฮนั้ง น้าย ปัว หฑุ่น ลิ์ว, วั้ว คว้าย กะน้าย ฯฒฯ เซียว ฝาว ลู่ง หมี่ อ๊ะ.

17ปีเต ปวัด ลิ์ว น้าย เต๋ย หิ่น ย่าง เญย สี่, นิ่น หธ่อ ฮนั้ม ไม้ ทง น้าย เต๋ย สี่ ม่าย หาย หญู่ง เอ๋ย เล์ย มเปย. ต๋อย วั้ว นอม เฒี่ยง โห่, โคเนลิอัด พ้าย ต้าย เญย เมี่ยน หน่าย เจี๊ยน ต้าย ล์อ ปวัด ซีโมน เญย เปย๊า, ฒู้ง โซ้ว เจี๊ยน วั้ว หลาด แก้ง ด่าง.

18นิ่น บัว ฯฒฯ เห่ว หน่าย ก๋า, “ม่าย ล่าน เมี่ยน, บั๋ว เห่ว ซีโมน ปีเต, ฮิด น้าย ไฟ?”

19วั้ว หฒั่น ปีเต หธ่อ ฮนั้ม ไม้ ทง นิ่น ปวัด ลิ์ว วั้ว เต๋ย หิ่น ย่าง เญย สี่. สีง ลี่ง ก๊อง บั๋ว นิ่น, “หมวัง ก๋า! ม่าย ปัว ล่าน เมี่ยน ต้าย ล์อ เม่ย.

20เม่ย เจี์ย ซิน ต้าย เหฌี่ย อ๊ะ. ไม้ ตู๋ง ซั่ม โซะ. กุ๊น กัน นิ่น บัว มี่ง อ๊ะ, เหว่ย หฒุ เยีย พ้าย นิ่น บัว ต้าย.”

21ปีเต ฯฒฯ เหฌี่ย มี่ง บั๋ว วั้ว เต๋ย เมี่ยน, “เยีย เซ ต้ง เม่ย บัว ล์อ วั้ว ล่าน เมี่ยน. เม่ย บัว ต้าย ล์อ เยีย ม่าย เต๋ย หาย หญู่ง เจ๊า ไฟ?”

22นิ่น บัว เตา, “โคเนลิอัด แปง-เปย๊ย เห่ว เยีย บัว ต้าย. นิ่น โหฒว เต้า คู้ เมี่ยน หย่า กัน หลง ทิน-ฮู่ง. เหยียด ฝีง ยิวไท เมี่ยน ท่าย นิ่น. ม่าย เต้า ธีง-เหฑ่ง ฟิน-เมี่ยน ต้าย บั๋ว นิ่น อ๋อย หฒุ โท้ เม่ย มี่ง นิ่น เญย เปย๊า เหว่ย ปุน นิ่น หมวัง เม่ย ก๊อง เญย หว่า.”

23ปีเต ฯฒฯ เห่ว วั้ว เต๋ย เมี่ยน เปียะ เปย๊า เหธา นิ่น ฮิด วั้ว. ตะเหญ่ย ฮนอย ปีเต เบ่น ต้าย เหธา เจี๊ยน นิ่น บัว มี่ง อ๊ะ. แอ๋ง ม่าย เต๋ย ยับฟา มู้ง เญย ก๋อ-โย์ว หย่า เหธา นิ่น มี่ง.

24แอ๋ง เจี๋ย ต้าย เหยียด ฮนอย, ปีเต บัว มี่ง เถา ซีซาลียา ฒี่ง หมี่ อ๊ะ. เถา วั้ว ปวัด โคเนลิอัด เหธา เจี๊ยน ฮมวั้ง ต่อย เธียน-เธะ แอ๋ง เหธา นิ่น เห่ว ต้าย วั้ว เต๋ย โล์-แกง ต่อย เยียม วั้ว ฒั้ว เจี๊ยน นิ่น.

25ปีเต เปียะ เปย๊า วั้ว หฒั่น, โคเนลิอัด มี่ง ฒิบ, ฯฒฯ พัวะ เหฌี่ย นิ่น เญย เหฒา-เฮลน ป๋าย.

26มป่า ปีเต เคน นิ่น เจี์ย ซิน หย่า ก๊อง, “เจี์ย ซิน ต้าย ม่าะ! เยีย มป่า ป้าม เมี่ยน ฮนั้ง เหลาะ.”

27ปีเต เหธา โคเนลิอัด ก๊อง เจี๊ยน หว่า เปียะ เปย๊า มี่ง ฯฒฯ ปวัด เมี่ยน ธั้ม เญย กั๊บ ฒุ้น เยียม วั้ว.

28นิ่น ก๊อง, “เม่ย บัว ฮิ้ว ตุ๊, เอย เยีย บัว เญย เล์ย, ยิวไท เมี่ยน ไม้ ไฮ่ เปียะ จั๋น เญย ต๋อง, ไม้ ไฮ่ เหธา จั๋น จิว ทง. มป่า ทิน-ฮู่ง ปุน เยีย ฮิ้ว ตุ๊ ไม้ หอบ หฒุ ฝุน หาย เต้า ไม้ ธีง-เหฑ่ง, ไฟ ม่าย หวุย.

29ฮนั้ง หน่าย, เม่ย บัว พ้าย เมี่ยน มี่ง เห่ว เยีย ต้าย, เยีย ไม้ หน่าย หาย หญู่ง ฯฒฯ ต้าย อ๊ะ. อี้ หฒั่น เยีย หน่าย ก๋า เม่ย บัว, เม่ย บัว เหว่ย หาย ติ่ว เห่ว เยีย ต้าย?”

30โคเนลิอัด ก๊อง, “ฒิ่น ด่าง เปยย ฮนอย, เล่ย ไม้ โก น้าย นอม เฒี่ยง โห่, เซ ต๋อย เหฌี่ย อ๋าน ปัว นอม เฒี่ยง โห่ เญย ต๋อง, เยีย เยียม เยีย เญย เปย๊า เต๋า เก๋า. เลี่ยม เฒ่ย ม่าย เต้า เมี่ยน ฒุ เจี๊ยน ลุย-โหว ฌัง เญย, โหย่ว! โหย่ว วั้ว, ต้าย โซ้ว เจี๊ยน เยีย เญย หฑะเฮมียน.

31นิ่น ก๊อง, ‘โคเนลิอัด อ้า! ต้ง เม่ย โท้ ทิน-ฮู่ง วั้ว เต๋ย หว่า, ทิน-ฮู่ง ไฮ์ หมี่ อ๊ะ, หย่า ปวัด เม่ย ธ้วด ฟิม เถง เมี่ยน จ่ม เมี่ยน.

32เม่ย อ๋อย หฒุ พ้าย เมี่ยน มี่ง ยับฟา มู้ง ล์อ ล่าน เมี่ยน, บั๋ว เห่ว ซีโมน ปีเต, ต้าย. อี้ หฒั่น นิ่น เยียม วั้ว ค้อย-เฮลน, ซีโมน ด๊บ-หฒั่ง เญย เปย๊า.’

33เยีย ฯฒฯ เลี่ยม เฒ่ย พ้าย เมี่ยน มี่ง ล์อ เม่ย, เม่ย ฯฒฯ ต้าย อ๊ะ. หฒะเก้ง! หลง ไห่. อี้ หฒั่น เยีย บัว เหยียด ฒู้ง เยียม น้าย ทิน-ฮู่ง เญย หฑะเฮมียน, อ๋อย หมวัง เฒี้ยว พ้าย เม่ย ก๊อง เญย เหยียด ฒู้ง หว่า.”

34ปีเต ฯฒฯ ก๊อง, “อี้ หฒั่น เยีย ฮิ้ว ตุ๊ ทิน-ฮู่ง ไม้ หมั่ง หาย เต้า เญย เฮมียน.

35ไม้ กุ๊น หาย ฝีง เมี่ยน, หาย เต้า กั้ม เหฑีย นิ่น, หย่า โหฒว หอบ เญย เจ๊า, ทิน-ฮู่ง ฯฒฯ ฒิบ วั้ว เต้า อ๊ะ.

36“เม่ย บัว ฮิ้ว ตุ๊ นิ่น จิว ปุน อิสะลาเอน เมี่ยน เญย โต์, ต้ง เมี่ยน เขา เยซู กีตู่ ไฮ่ ตุ๊ แป้ง ออน วั้ว หญู่ง คู้ เฝียน. เยซู กีตู่ โหฒว หม่าน หมวด เญย เฒี้ยว.

37“เม่ย บัว หย่า ฮิ้ว ตุ๊ เยียม โยฮัน ฒุ่น บั๋ว เมี่ยน เจี๋ย ววม เญย เล์ย, ฆะฮ้า เยียม กาลิลี เจี์ย กอน ธ้วด ต้าย ก๋อม ยูเดีย แซ้ง เญย สี่.

38“เม่ย บัว หย่า ฮิ้ว ตุ๊ นาซาเล้ด มู้ง เญย เยซู เญย เจ๊า-โหล่ว, หย่า ฮิ้ว ตุ๊ ทิน-ฮู่ง เหธย สีง ลี่ง เหธา ต้ม ชะ ปุน นิ่น. ทิน-ฮู่ง เหธา นิ่น เยียม, นิ่น ฯฒฯ มี่ง นอมๆ ต๋อง โหฒว คู้ สี่ หย่า หฒ่อ หลง เหยียด ฒู้ง หฒุ เมี้ยน เญย ฮู่ง ห่อย เญย เมี่ยน.

39“นิ่น เยียม เยลูซาเลม ฒี่ง หย่า เยียม ยิวไท เมี่ยน เญย เต่ย-ปูง โหฒว เญย เหยียด ฒู้ง สี่, เยีย บัว ปวัด หย่า เถง นิ่น โหฒว ฒอง-เหฒง. “เมี่ยน หย่า เฒาะ เยซู ตีง เยียม เหฒียบ หฑั่ง จ๋า ไต่.

40มป่า ฆะฮ้า ปัว ฮนอย ทิน-ฮู่ง ปุน นิ่น นั่ง ต้าย ฯฒฯ หิ่น ปุน เมี่ยน ปวัด.

41ไม้ เฒ์ย หิ่น ปุน เต้าๆ เมี่ยน ตุ๊ ปวัด. ขูง ต้ง ฒิ่น ด่าง ทิน-ฮู่ง กิ๊น เยีย บัว ต้าย เถง โหฒว ฒอง-เหฒง เญย เมี่ยน ตุ๊ ปวัด ฮนั้ง, เซ นิ่น ไต่ มี่ง แอ๋ง นั่ง ต้าย, เยีย บัว ตุ๊ เหธา นิ่น จวั่ง หญั่น จวั่ง ฮบ เญย เมี่ยน.

42นิ่น บั๋ว เยีย บัว อ๋อย หฒุ ฒุ่น นิ่น เญย คู้ เฝียน ปุน เมี่ยน ฮิ้ว ตุ๊ นิ่น เซ ทิน-ฮู่ง พ้าย ต้าย โหฒว เซี้ยม ฒุ์ย เจียน, เซี้ยม เฒี่ยง เจี๊ยน เญย เมี่ยน เหธา ไต่ มี่ง เญย เมี่ยน เญย ฒุ์ย.

43“เหยียด ฒู้ง โต่ว หว่า เมี่ยน หย่า เถง นิ่น โหฒว ฒอง-เหฒง. นิ่น บัว ก๊อง, หาย เต้า เสียน เยซู, หย่า เขา นิ่น เญย บั๋ว ฯฒฯ ตุ๊ ทิน-ฮู่ง กวั่ง ฒุ์ย.”

44ปีเต หธ่อ ก๊อง เจี๊ยน หว่า วั้ว หฒั่น, สีง ลี่ง เลี่ยม เฒ่ย เหฌี่ย ต้าย เยียม นิ่น บัว เต้าๆ หมวัง เล์ย เญย เมี่ยน เญย ซิน.

45เยียม ยับฟา มู้ง กัน ปีเต ต้าย วั้ว เต๋ย ยิวไท เมี่ยน, ต้ง เสียน เยซู วั้ว เต๋ย เมี่ยน, หฒะเก้ง บัวะ ฮ่อง ไห่ ทิน-ฮู่ง ปุน สีง ลี่ง จั๋น.

46นิ่น บัว ไฮ์ จั๋น ก๊อง กั้น หญู่ง หว่า, หย่า เธง ทิน-ฮู่ง เว่ย โฮล.

47ปีเต ก๊อง, “น้าย เต๋ย เมี่ยน ฒิบ สีง ลี่ง ฮนั้ง เยีย บัว นอ. วั้ว หญู่ง ม่าย หาย เต้า ไฮ่ ล่าน เจี๊ยน ไม้ ปุน นิ่น บัว เจี๋ย ววม เญย เล์ย ไฟ?”

48นิ่น ฯฒฯ หัด นิ่น บัว อ๋อย หฒุ เต๊ง เยซู กีตู่ เญย บั๋ว เจี๋ย เล์ย. วั้ว เต๋ย เมี่ยน แอ๋ง โท้ ปีเต เหธา นิ่น บัว เยียม อี เหฒีย ฮนอย.

← Chapter 9 Jump to: Chapter 11 →