Acts 12

Mien Bible (Thai Script) © Thailand Bible Society, 2007

← Chapter 11 Jump to: Chapter 13 →

1วั้ว หฒั่น เฮโล้ด ฮู่ง เจี์ย กอน โหฒว โตะ ห่อย เหฒีย ล่าน จิว-ปาง เมี่ยน.

2นิ่น หล่ง หฑุ ด๊าว ไต๋ โยฮัน เญย ก๋อ, ยากอบ.

3ปวัด ยิวไท เมี่ยน อะเฮน้ย นิ่น ฮนั้ง น้าย โหฒว, นิ่น แอ๋ง มี่ง เฒาะ ปีเต. วั้ว หฒั่น ต๋อย เจี๋ย ไม้ อัน ปี๊ง เญย ฌั้ว เญย ฒิบ.

4เฮโล้ด เฒาะ ปีเต ต้าย หววน เจี๊ยน โล่, จิว ปุน เปยย กวั้น แปง ฒั้ว เจี๊ยน. เหยียด กวั้น ม่าย เปยย ล่าน. นิ่น ต๊า เหฒียง หฒะเอ๋ย ฒั้ว เจี๋ย ลิ์ว เสีย แหม่ง ฒิบ, อ๋อย ตอง เจี๊ยน หฒวัง เมี่ยน เซี้ยม ปีเต เญย ฒุ์ย.

5ปีเต หฒุ หววน เจี๊ยน โล่ มป่า จิว-ปาง เมี่ยน หล่ง เฮญี้ยว เหฌี่ย ชะ เหว่ย นิ่น เต๋า เก๋า.

6เถา เฮโล้ด ฮู่ง อ๋อย ต้อ ปีเต ธ้วด ฒิ่น ด่าง วั้ว ม์วน, ปีเต เปว๋ย อี เต้า แปง เญย บุด๋ง มฌ่อม, หย่า ม่าย อี ติ้ว เฮลียะ-หลิ่ม โด้ เจี๊ยน. แอ๋ง ม่าย อี เต้า แปง ฒั้ว เจี๊ยน โล่ แก้ง.

7เลี่ยม เฒ่ย ม่าย เต้า เฒี้ยว เญย ฟิน-เมี่ยน หิ่น ธ้วด ต้าย หย่า ม่าย ฌัง หฒิว เจี๊ยน วั้ว ฉง โล่. ฟิน-เมี่ยน ไบ๋ ปีเต เญย หละญ้าบ บั๋ว นิ่น, “ปีเต อ้า! ปีเต! ฆ่ง เจี์ย ซิน ต้าย ม่าะ!” โด้ ปีเต เญย ปั์ว วั้ว เต๋ย อี ติ้ว หลิ่ม เลี่ยม เฒ่ย ตั๋ง ดุ๊ด เหฑ่ง หมี่ อ๊ะ.

8ฟิน-เมี่ยน ก๊อง บั๋ว นิ่น, “ไซ เจี๊ยน โหว-ฮลาง แอ๋ง ตาบ เจี๊ยน เม่ย เญย เฮ่.” ปีเต ฯฒฯ เอย เจี๊ยน โหฒว. ฟิน-เมี่ยน แอ๋ง ก๊อง, “เฒาะ เม่ย เญย ต้ม ลุย ปุ๋ย เจี๊ยน กัน เจี๊ยน เยีย มี่ง อ๊ะ.”

9ปีเต กัน เจี๊ยน ฟิน-เมี่ยน ธ้วด โล่. นิ่น ไม้ ฮิ้ว ตุ๊ ฟิน-เมี่ยน โหฒว เญย เซ เฒียน สี่. หล่าย ตุ๊ ปวัด หิ่น ย่าง เญย สี่ ฮนั้ง.

10นิ่น บัว เจี๋ย ฒั้ว โล่ เญย แปง ตะเยี้ยด คัง, แอ๋ง เจี๋ย ตะเหญ่ย คัง, แอ๋ง เจี๋ย เถา ต้ม เฮลียะ-แก้ง, ต้ง ธ้วด มี่ง เปียะ ฒี่ง วั้ว คัง แก้ง. เถา วั้ว, แก้ง กั้น ฆอย, นิ่น บัว ฯฒฯ ธ้วด หมี่ อ๊ะ. กัน เจ๊า มี่ง ตั้ง, ฟิน-เมี่ยน เฒียง หน่าย เล่ย ฆอย ปีเต หมี่ อ๊ะ.

11วั้ว หฒั่น ปีเต ฯฒฯ เม่ง แปะ น้าย เต๋ย สี่ เซ เฒียน เญย. นิ่น ก๊อง, “อี้ หฒั่น เยีย หฒะเก้ง ฮิ้ว ตี่ง เฒี้ยว พ้าย นิ่น เญย ฟิน-เมี่ยน ต้าย ต้อ เยีย เปย๋า ดุ๊ด เฮโล้ด เญย ปั์ว-เดี๊ย เหธา ยิวไท เมี่ยน อ๋อย โหฒว ห่อย เยีย วั้ว เต๋ย เหยียด ฒู้ง สี่.”

12ปีเต ฮิ้ว ตุ๊ น้าย เต๋ย สี่ ธีง เญย, นิ่น ฯฒฯ มี่ง โยฮัน มาโค เญย มา, มาลียา, เญย เปย๊า. ม่าย เมี่ยน ธั้ม เญย กั๊บ ฒุ้น เยียม วั้ว เต๋า เก๋า.

13ปีเต มี่ง แง้ง กะเหญี่ย วั้ว เต้า แก้ง. ม่าย เต้า มเซียะ โปว, บั๋ว เห่ว โลดา, มี่ง หมั่ง ก๋า หาย เต้า ต้าย.

14นิ่น เฒียะ ตุ๊ ปีเต เญย เฉีย ฯฒฯ อะเฮน้ย ไห่ แอ๋ง ถิว เปียะ เปย๊า, ไม้ จั๋ง คอย แก้ง. นิ่น ก๊อง บั๋ว เยียม เปย๊า เญย เมี่ยน, “ปีเต ฒู้ง เถา วั้ว เดา แก้ง ด่าง ต้าย อ๊ะโล่ะ!”

15นิ่น บัว ก๊อง, “เม่ย ไม้ ฑัง บอ ล่อ.” มป่า วั้ว เต้า เซียะ ชะ ก๊อง ปีเต หฒะเก้ง เถา อ๊ะ. นิ่น บัว ก๊อง, “วั้ว หญู่ง มเหฑีย ปีเต เญย ฟิน-เมี่ยน มเปย.”

16ปีเต หธ่อ เยียม วั้ว แง้ง แก้ง. นิ่น บัว ฯฒฯ มี่ง คอย แก้ง ปวัด ปีเต โซ้ว เจี๊ยน วั้ว. นิ่น บัว หฒะเก้ง! บัวะ ฮ่อง ไห่.

17ปีเต หฮวัง ปั์ว บั๋ว นิ่น บัว ไม้ ตู๋ง โค โล. นิ่น ฯฒฯ ก๊อง เฒี้ยว ฮนั้ง หาย นอ เถง นิ่น ธ้วด โล่ ต้าย. นิ่น แอ๋ง ก๊อง, “น้าย เต๋ย เจ๊า เม่ย บัว อ๋อย หฒุ บั๋ว ยากอบ แอ๋ง เหธา เหยียด ฒู้ง เสียน เยซู เญย ก๋อ-โย์ว.” ก๊อง ลิ์ว น้าย เต๋ย หว่า, นิ่น ฯฒฯ มี่ง กั้น นอม ต๋อง หมี่ อ๊ะ.

18ตะเหญ่ย ดอม ฒั้ว โล่ เญย แปง หลุ่น เหฑ่ง. ไม้ ฮิ้ว ตุ๊ ปีเต เจี๋ย หาย หมี่ อ๊ะ.

19เฮโล้ด เห่ว แปง ก๊าน ล์อ, นิ่น บัว ฯฒฯ หาย เดา ล์อ เหฑ่ง หย่า ล์อ ไม้ ปวัด. เฮโล้ด ฯฒฯ ฒ่า หน่าย วั้ว เต๋ย แปง. ฒ่า ลิ์ว, ต้อ มี่ง ไต๋ กวั่ง หมี่ อ๊ะ. ฆะฮ้า เฮโล้ด ธ้วด ยูเดีย แซ้ง มี่ง เยียม โต่ว ซีซาลียา ฒี่ง.

20เฮโล้ด เฉีย เจี์ย ไห่ ไทละ เหธา ไซดอน ฒี่ง เญย เมี่ยน. น้าย เต๋ย อี นอม ฒี่ง เญย เมี่ยน ฯฒฯ ต้ง เฮญี้ยว มี่ง ล์อ เฮโล้ด. ไม้ แก้ง ล์อ วั้ว หฒั่น, นิ่น บัว เป่ย เดี๊ย มี่ง โท้ โก๋ว ฮู่ง ติ่น วั้ว เต้า ต้ม เจียน, บะละสะทัด, เถง นิ่น บัว เหธา ฮู่ง เตี๋ย โท้ ก๊อง หอบ, เหว่ย หฒุ นิ่น บัว เญย เต่ย-ปูง ปั่ง เฮโล้ด กุ๊น วั้ว นอม เต่ย-ปูง เญย ล่าง หฒิ ยู์ง แปะ ฝีง.

21ตุ๋น เญย ฮนอย-เหญียะ เถา, เฮโล้ด ฒอง เจี๊ยน นิ่น เญย ฮู่ง ลุย-โหว ฝาว ติ่น เฒว์ย เจี๊ยน ก๊อง ปุน หฒวัง เมี่ยน หมวัง.

22หฒวัง เมี่ยน เหน่าๆ เญย เห่ว เจี๊ยน ก๊อง, “น้าย เซ เหยียด เต้า เฒี่ยน เญย เฉีย, ไม้ เฒ์ย ป้าม เมี่ยน ก๊อง เญย หว่า.”

23ม่าย เต้า เฒี้ยว เญย ฟิน-เมี่ยน เลี่ยม เฒ่ย ปุน เฮโล้ด ปุ๊ด แกง. แกง ฯฒฯ หญั่น นิ่น ไต่ หมี่ อ๊ะ, หลาย นิ่น ไม้ ท่าย ทิน-ฮู่ง.

24มป่า ทิน-ฮู่ง เญย โต์ เหยียด เฒย ฒุ่น จั๊ง เจี๊ยน มี่ง.

25บานาบัด เหธา เซาโล เยียม เยลูซาเลม ฒี่ง เบ่น ซูง นิ่น บัว เญย กง, นิ่น บัว ฯฒฯ หฑวน หย่า ต้อ โยฮัน มาโค เหธา เจี๊ยน หฑวน.

← Chapter 11 Jump to: Chapter 13 →