Acts 23

Mien Bible (Thai Script) © Thailand Bible Society, 2007

← Chapter 22 Jump to: Chapter 24 →

1เปาโล นุๆ เญย หมั่ง กุ๊น สี่ หวุ่ย เญย เมี่ยน หย่า ก๊อง, “เยีย เญย ก๋อ-โย์ว อ่า, เยีย เยียม น้าย เสย หฒั่ง เถา อี้ ฮนอย, ทิน-ฮู่ง ปวัด เยีย ฮนั้ง หาย นอ เยียม, เอย เยีย เญย คู้ ล่าง ฟิม เยีย โหฒว ตุ๊ หอบ.”

2อานาเนีย ต้ม ไซ เมี่ยน เห่ว โซ้ว เจี๊ยน เปาโล เญย กะเฮลน วั้ว เต๋ย เมี่ยน ไบ๋ เปาโล เญย ฑุ่ย.

3เปาโล ก๊อง, “เฮมียน เหฑว่ย เฮญี้ยว เธี้ยว เญย เมี่ยน อ้า! ทิน-ฮู่ง หย่า อ๋อย ไบ๋ เม่ย อ๊ะ. เม่ย เฒว์ย หน่าย หล่ง เล์ย-หลัด ตุ๋น เยีย เญย สี่, มป่า เม่ย กั้น หย่า โหฒว ต่อง เล์ย-หลัด บั๋ว เมี่ยน ไบ๋ เยีย.”

4โซ้ว เปาโล เญย กะเฮลน วั้ว เต๋ย เมี่ยน ก๊อง, “เม่ย ฮนั้ง น้าย นอ ก๊อง โตะ ทิน-ฮู่ง เญย ต้ม ไซ เมี่ยน?”

5เปาโล แอ๋ง ก๊อง, “ก๋อ-โย์ว อ้า! เยีย ไม้ ฮิ้ว ตุ๊ นิ่น โหฒว ต้ม ไซ เมี่ยน. กีง-โซว เฟี้ย เจี๊ยน ก๊อง, ‘ไม้ ตู๋ง ก๊อง โตะ กุ๊น แปะ ฝีง เญย เจียน.’”

6เปาโล ปวัด เยียม วั้ว เญย หฒวัง เมี่ยน ม่าย เต๋ย เซ สะดูสี เมี่ยน, ม่าย เต๋ย ฟาลิสี เมี่ยน. นิ่น ฯฒฯ เห่ว บุย เญย บั๋ว กุ๊น สี่ หวุ่ย เญย เมี่ยน, “ก๋อ-โย์ว อ้า! เยีย หย่า ฟาลิสี เมี่ยน, หย่า โหฒว ฟาลิสี เมี่ยน เญย ตอน. เยีย เยียม น้าย หฒุ เซี้ยม เซ เหว่ย หฒุ เยีย ม่าย ลั่ม ฮนั้ม. เยีย เสียน เมี่ยน ไต่ มี่ง แอ๋ง ไฮ่ นั่ง ต้าย.”

7เปาโล ฮนั้ง น้าย นอ ก๊อง, ฟาลิสี เมี่ยน เหธา สะดูสี เมี่ยน แฑง เจี์ย จ๋า ต้าย. หวุ่ย เญย หฒวัง เมี่ยน ฯฒฯ ปุน ฆอย โหฒว อี กวั้น หมี่ อ๊ะ.

8เหว่ย หฒุ สะดูสี เมี่ยน ไม้ เสียน เมี่ยน ไต่ มี่ง แอ๋ง ไฮ่ นั่ง ต้าย, ไม้ เสียน ม่าย ฟิน-เมี่ยน, หย่า ไม้ เสียน ม่าย เมี้ยน, มป่า ฟาลิสี เมี่ยน เสียน น้าย เต๋ย ปัว หญู่ง ฒู้ง ม่าย เญย.

9หฒวัง เมี่ยน ฯฒฯ แฑง เจี์ย ต้ม จ๋า. ม่าย เต๋ย ฟาลิสี เมี่ยน หย่า โหฒว หฌาว เล์ย เญย ฟิน-แซง โซ้ว เจี์ย ต้าย ธ่ง เฉีย ก๊อง, “เยีย บัว ไม้ ปวัด น้าย ล่าน เมี่ยน โหฒว ต่อง หาย หญู่ง. สี ก๊อง เมี้ยน ไฟ ฟิน-เมี่ยน ต้าย เหธา นิ่น ก๊อง หว่า ฮนั้ง หาย นอ?”

10กุ๊น แฑง เกา เฉีย เจี์ย, ต้ม แปง-เปย๊ย กั้ม เหฑีย นิ่น บัว ไฮ่ เป๊ด เหฑ่ง เปาโล. นิ่น ฯฒฯ พ้าย แปง เหฌี่ย หฒวัง เมี่ยน บุด๋ง มี่ง เฒาะ เปาโล ธ้วด ต้าย แอ๋ง ต้อ มี่ง แปง เยียม เญย ต๋อง.

11วั้ว ม์วน เฒี้ยว ต้าย โซ้ว เจี๊ยน เปาโล เญย กะเฮลน ก๊อง, “กุ๊น ปู๋ง เฮญี้ยว โอ่. เม่ย เยียม น้าย เยลูซาเลม ฒี่ง เถง เยีย โหฒว ฒอง-เหฒง, เม่ย หย่า อ๋อย หฒุ ฟี่ ฮนั้ง เญย มี่ง โลมา ฒี่ง โหฒว ฒอง-เหฒง.”

12ตะเหญ่ย ดอม เฑี้ยว เญย, ม่าย เต๋ย ยิวไท เมี่ยน เป่ย เดี๊ย ธ่าง ล่าง. นิ่น บัว ล่ม ฑ่อย โด๊ว เจี์ย เหฒียว ก๊อง นิ่น บัว ไม้ หญั่น หาย หญู่ง ไม้ ฮบ หาย หญู่ง เถา ตุ๊ ไต๋ ลิ์ว เปาโล.

13ต้ง เฮญี้ยว โหฒว เญย เมี่ยน ม่าย เฝย เหฒียบ เล่ง ล่าน.

14นิ่น บัว มี่ง ไซ เมี่ยน เปย๊ย เหธา เมี่ยน โก๋ บัว วั้ว ก๊อง บั๋ว นิ่น บัว, “เยีย บัว ล่ม ฑ่อย โด๊ว เจี์ย เหฒียว โฮล เญย. เยีย บัว ไม้ หญั่น หาย หญู่ง เถา ตุ๊ ไต๋ กวั่ง เปาโล.

15ฮนั้ง หน่าย, เม่ย บัว เหธา กุ๊น สี่ หวุ่ย เญย เมี่ยน อ๋อย หฒุ โท้ ต้ม แปง-เปย๊ย ต้อ เปาโล ต้าย เม่ย บัว น้าย โหฒว ฮนั้ง เม่ย บัว หฒะเก้ง อ๋อย ฮิ้ว หม่วน นิ่น เญย เจ๊า-โหล่ว. มป่า นิ่น ไม้ แก้ง เถา เม่ย บัว น้าย, เยีย บัว อ๋อย ตั๊ง เจี๊ยน ด๊าม-เจ๊า ไต๋ นิ่น.”

16มป่า เปาโล เญย หมั่ว เญย ตอน ไฮ์ ก๊อง น้าย เต๋ย เมี่ยน ฮนั้ง น้าย นอ โหฒว, นิ่น ฯฒฯ มี่ง แปง เยียม เญย ต๋อง วั้ว บั๋ว เปาโล.

17เปาโล ฯฒฯ เห่ว เต้า แปง-เปย๊ย ต้าย บั๋ว นิ่น, “โท้ เม่ย ต้อ น้าย เต้า โฮ่ว แซง มี่ง ต้ม แปง-เปย๊ย วั้ว. น้าย เต้า ตอน ม่าย โจ๋ว หว่า อ๋อย ก๊อง บั๋ว นิ่น.”

18แปง-เปย๊ย ฯฒฯ ต้อ นิ่น มี่ง ปวั้ง ต้ม แปง-เปย๊ย ฯฒฯ ก๊อง, “หววน โล่ วั้ว เต้า เปาโล โท้ เยีย ต้อ น้าย เต้า โฮ่ว แซง ต้าย. นิ่น ม่าย โจ๋ว หว่า อ๋อย ต้าย บั๋ว เม่ย.”

19ต้ม แปง-เปย๊ย ฯฒฯ เคน วั้ว เต้า โฮ่ว แซง มี่ง เล่ง เต๋ย หน่าย นิ่น, “เม่ย ม่าย หาย หญู่ง อ๋อย บั๋ว เยีย?”

20วั้ว เต้า โฮ่ว แซง ก๊อง, “โหฒว โฮล วั้ว เต๋ย ยิวไท เมี่ยน ต้ง เฮญี้ยว โท้ เม่ย ฌัง ฮนอย ต้อ เยีย เญย ต้ม เน์า เปาโล มี่ง นิ่น บัว เญย กุ๊น สี่ หวุ่ย วั้ว. นิ่น บัว อ๋อย โหฒว ฮนั้ง อ๋อย ฮิ้ว นิ่น เญย เจ๊า เก้า หม่วน เต๋ย.

21มป่า โท้ เม่ย ไม้ ตู๋ง หมวัง นิ่น บัว เญย หว่า เหว่ย หฒุ ม่าย เฝย เหฒียบ เล่ง เต้า ฒั้ว เจี๊ยน ด๊าม-เจ๊า. นิ่น บัว โด๊ว เจี์ย เหฒียว ก๊อง นิ่น บัว ไม้ หญั่น หย่า ไม้ ฮบ หาย หญู่ง เถา ตุ๊ ไต๋ เปาโล กวั่ง. นิ่น บัว เบ่น เหฒียง อ๊ะ, ขูง ฒั้ว เจี๊ยน เม่ย ฆอย ฑุ่ย ปุน เปาโล มี่ง เญย หว่า ฮนั้ง.”

22ต้ม แปง-เปย๊ย บั๋ว วั้ว เต้า ตอน หฑวน อ๊ะ. แอ๋ง จา หว่า ก๊อง, “ธิน-หม่าน ไม้ ตู๋ง ปุน หาย เต้า ฮิ้ว เม่ย ต้าย บั๋ว น้าย โจ๋ว หว่า เยีย.”

23ต้ม แปง-เปย๊ย ฯฒฯ เห่ว อี เต้า แปง-เปย๊ย ต้าย บั๋ว นิ่น บัว, “เม่ย บัว อ๋อย หฒุ หลิ่ว เล์ย เหฒียง หญี่ แป๊ะ เต้า ยั่ง เจ๊า เญย แปง, เธี้ยด เหฒียบ เต้า เก้ ม์า เญย แปง, เหธา หญี่ แป๊ะ เต้า ดาม ธัง เญย แปง. อี้ ม์วน ดั้ว นอม เฒี่ยง โห่ อ๋อย หฒุ ธ้วด เจ๊า มี่ง ซีซาลียา ฒี่ง.

24หย่า อ๋อย หฒุ หลิ่ว เล์ย ม์า ปุน เปาโล เก้, โก๋ว เจี๊ยน นิ่น เจ๊า หฒั่ง แป้ง ออน เญย มี่ง เฟลิก หฒูง วั้ว.”

25ต้ม แปง-เปย๊ย หย่า เฟี้ย เฒ้ย เฝียน. เฝียน ฮนั้ง น้าย ก๊อง.

26“เฒียน อ๋อย เญย เฟลิก หฒูง อ้า! เยีย คาลาวดิอัด ลีเซี้ยด เฟี้ย เฝียน ปุน เม่ย. เยีย จั๋ง เถา เม่ย.

27ยิวไท เมี่ยน เฒาะ น้าย ล่าน เมี่ยน หย่า ค้า เต๋ย ไต๋ นิ่น หมี่ อ๊ะ. มป่า เยีย ไฮ์ ก๊อง นิ่น โหฒว โลมา เมี่ยน, เยีย เหธา แปง ฯฒฯ มี่ง ธ้าง นิ่น ธ้วด ต้าย.

28เยีย อ๋อย ฮิ้ว ตุ๊ นิ่น บัว เหว่ย หาย ติ่ว โก๋ นิ่น ฯฒฯ ต้อ นิ่น มี่ง เถา นิ่น บัว เญย กุ๊น สี่ หวุ่ย วั้ว.

29เยีย ฯฒฯ ฮิ้ว ตุ๊ นิ่น ไม้ ต่อง หาย หญู่ง หฒี่ ตุ๊ ไต๋ ไฟ หฒี่ ตุ๊ หววน โล่. นิ่น บัว โก๋ เญย เซ แฑง ยิวไท เมี่ยน เญย เล์ย ฮนั้ง.

30เยีย ฮิ้ว ตุ๊ ม่าย เต๋ย เมี่ยน ต๊า หฒะเอ๋ย อ๋อย เฒาะ นิ่น เญย แหม่ง, เยีย ฯฒฯ เลี่ยม เฒ่ย ฝูง นิ่น มี่ง เม่ย หน่าย. เยีย หย่า เห่ว โก๋ นิ่น วั้ว เต๋ย เมี่ยน มี่ง เม่ย วั้ว โก๋.”

31แปง ฯฒฯ เอย เจี๊ยน ต้ม แปง-เปย๊ย เญย หว่า โหฒว. วั้ว ม์วน นิ่น บัว ฝูง มี่ง อันทิปาตี มู้ง วั้ว.

32ตะเหญ่ย ฮนอย ยั่ง เจ๊า เญย แปง ต๋าว ซิน หฑวน. ขูง เก้ ม์า เญย แปง กั้น ฝูง นิ่น มี่ง ฮนั้ง.

33มี่ง เถา ซีซาลียา ฒี่ง, นิ่น บัว เฒาะ เฝียน ปุน หฒูง หย่า จิว เปาโล ปุน นิ่น หมี่ อ๊ะ.

34หฒูง โตะ ลิ์ว เฝียน, นิ่น หน่าย ก๋า เปาโล นิ่น เยียม หาย นอม แซ้ง ต้าย เญย เมี่ยน. ฮิ้ว ตุ๊ เปาโล เยียม ซีลีเซีย ต้าย นิ่น ฯฒฯ บั๋ว เปาโล,

35“ฒั้ว โก๋ เม่ย วั้ว เต๋ย เมี่ยน ต้าย เถา, เยีย ฯฒฯ หมวัง เม่ย เญย กอน-แป๋ง.” ก๊อง ลิ์ว, หฒูง ฯฒฯ พ้าย แปง ต้อ มี่ง เยียม เฮโล้ด เญย ฮู่ง ติ่น โก๋ว เจี๊ยน.

← Chapter 22 Jump to: Chapter 24 →