Acts 15

Mien Bible (Thai Script) © Thailand Bible Society, 2007

1ม่าย เต๋ย เมี่ยน เยียม ยูเดีย แซ้ง มี่ง เถา อันทีโอก ฒี่ง หฌาว เสียน เยซู เญย ก๋อ-โย์ว. นิ่น บัว ก๊อง, “สี ก๊อง เม่ย บัว ไม้ เอย เจี๊ยน โมเซ เญย เล์ย เจี๋ย ก๊าด เญย เล์ย นอ, เม่ย บัว ไม้ ไฮ่ ตุ๊ เหฌียว.”

2เปาโล เหธา บานาบัด เหธา นิ่น บัว เหฌี่ย ชะ แฑง-แหง่ง หลวน เล์ย. จิว-ปาง ฯฒฯ ตี่ง พ้าย เปาโล เหธา บานาบัด เหธา เต๋ย ก๋อ-โย์ว มี่ง เยลูซาเลม ฒี่ง ล์อ กง-โฒ่ เหธา เมี่ยน โก๋ บัว ธ่าง ล่าง น้าย เต๋ย สี่.

3จิว-ปาง ฯฒฯ ฝูง นิ่น บัว ธ้วด เจ๊า มี่ง. นิ่น บัว เจี๋ย ฟีนีเซีย เหธา สะมาเลีย แซ้ง, เถา หาย ก๊อง บั๋ว เมี่ยน จั๋น ฮนั้ง หาย นอ ก๊อย เฮญี้ยว เสียน เยซู. หฒวัง ก๋อ-โย์ว ไฮ์ น้าย เต๋ย เฝียน นิ่น บัว หฒะเก้ง อะเฮน้ย ไห่.

4มี่ง เถา เยลูซาเลม ฒี่ง วั้ว หฒั่น, จิว-ปาง เมี่ยน, กง-โฒ่ บัว, เหธา เมี่ยน โก๋ บัว อะเฮน้ย ฒิบ. เปาโล เหธา บานาบัด หย่า ก๊อง เหฑ่ง ทิน-ฮู่ง ฮนั้ง หาย นอ หล่ง นิ่น บัว โหฒว นิ่น เญย กง.

5มป่า ม่าย เต๋ย ฟาลิสี วั้ว เจ๊า เสียน เยซู เญย เมี่ยน โซ้ว เจี์ย ต้าย ก๊อง, “ด่ง หาย อ๋อย หฒุ เห่ว จั๋น เจี๋ย ก๊าด เญย เล์ย หย่า หัด นิ่น บัว เอย เหฑ่ง โมเซ เญย เล์ย-หลัด.”

6กง-โฒ่ เหธา เมี่ยน โก๋ เหยียด ฒู้ง กั๊บ ฒุ้น ธ่าง ล่าง น้าย เต๋ย สี่.

7นิ่น บัว หลวน เล์ย เล่า เญย, ปีเต ฯฒฯ โซ้ว เจี์ย ต้าย ก๊อง, “ก๋อ-โย์ว อ้า! เม่ย บัว ฮิ้ว ตุ๊ ฒิ่น ด่าง ทิน-ฮู่ง เยียม เม่ย บัว กะญั์ว กิ๊น เยีย ธ้วด มี่ง ฒุ่น คู้ เฝียน ปุน จั๋น หมวัง หย่า เสียน.

8ทิน-ฮู่ง ฮิ้ว ตุ๊ หม่าน เมี่ยน เญย เฮญี้ยว หย่า ปุน ธีง นิ่น อะเฮน้ย จั๋น, เหว่ย หฒุ นิ่น เหธย สีง ลี่ง ปุน นิ่น บัว ฮนั้ง เหธย ปุน บัว นอ.

9ยิวไท เมี่ยน ไฟ จั๋น ทิน-ฮู่ง ไม้ ฝุน กั้น หญู่ง. เหว่ย นิ่น บัว เสียน, ทิน-ฮู่ง หฑาว นิ่น บัว เญย เฮญี้ยว ธีง-เหฑ่ง.

10วั้ว หญู่ง, เม่ย บัว เหว่ย หาย ติ่ว อ๋อย เสย ทิน-ฮู่ง? อ๋อย เฒาะ เฮนี้ย เญย กะน้าย ปุน น้าย เต๋ย ไซ-ก๋อ เหญีย, ต้ง บัว กั้น เหธา บัว เญย อง-ถาย ฒู้ง เหญีย ไม้ ต์ง เญย กะน้าย.

11ไม้ เฒ์ย ฮนั้ง หน่าย เหลาะ. บัว เสียน บัว ตุ๊ เหฌียว เซ เหว่ย เฒี้ยว เยซู เญย เอน ฮนั้ง นิ่น บัว นอ.”

12หฒวัง เมี่ยน เซ้กๆ เญย หมวัง บานาบัด เหธา เปาโล ก๊อง ทิน-ฮู่ง หล่ง นิ่น บัว เยียม จั๋น กะญั์ว โหฒว เญย จั๋ง-โห่ เหธา บัวะ ฮ่อง เญย สี่.

13ก๊อง เซ้ด, ยากอบ แอ๋ง ก๊อง, “ก๋อ-โย์ว อ่า, หมวัง เยีย ก๊อง โอ่.

14ซีโมน โธะ โหะ ก๊อง ลิ์ว ทิน-ฮู่ง ล์อ จั๋น ต้าว หฑุ่น, กิ๊น ธ้วด เต๋ย ต้าย โหฒว นิ่น เญย เมี่ยน.

15น้าย หฒะเก้ง ต๋อย หฒุ โต่ว หว่า เมี่ยน เญย หว่า ฮนั้ง เฟี้ย เจี๊ยน ก๊อง นอ,

16‘ฆะฮ้า เยีย อ๋อย หฑวน ต้าย, อ๋อย เหลียบ เจี์ย ดาวิด เญย เปย๊า-บาง, แอ๋ง หล่ง โล์-เปย๊า เญย กะน้าย กั้น เซียง-เหธย เจี์ย.

17ฮนั้ง หน่าย เซ เหว่ย ปุน เหญี่ย เญย เมี่ยน อ๋อย ต้าย ล์อ เฒี้ยว, ต้ง เยีย เห่ว ต้าย โหฒว เยีย เญย เมี่ยน วั้ว เต๋ย หม่าน ฝีง จั๋น.

18โล์-ฮนอย ปุน เมี่ยน ฮิ้ว ตุ๊ น้าย เต๋ย สี่ อ๋อย ธ้วด ต้าย วั้ว เต้า เฒี้ยว ก๊อง น้าย เต๋ย หว่า.’”

19ยากอบ แอ๋ง ก๊อง, “หฒิว เยีย หมั่ง, บัว ไม้ หอบ หฒุ โหฒว หาย หญู่ง ปุน ฮวิน ต้าย ล์อ ทิน-ฮู่ง วั้ว เต๋ย จั๋น ไฮ์ อะ ไห่.

20มป่า บัว อ๋อย หฒุ เฟี้ย เฝียน บั๋ว นิ่น บัว เก่, ไม้ ตู๋ง หญั่น เหฒี่ย เจี๋ย หมิ่ว-ฝัง ฯฒฯ ม่าย หวุย เญย กะน้าย, ไม้ ตู๋ง โหฒว ไม้ หลวน ห่อง เญย สี่, ไม้ ตู๋ง หญั่น แหนะ จาง ไต่ เญย แซง-คู้ อ๊อ, หย่า ไม้ ตู๋ง หญั่น ฑย้าม.

21เหว่ย หฒุ โล์-ฮนอย เถา อี้ หฒั่น เยียม นอมๆ ฒี่ง ม่าย เมี่ยน ฒุ่น โมเซ เญย เล์ย. นอมๆ ตี้ง กง ฮนอย ม่าย เมี่ยน เยียม หวุ่ย ต้อง โตะ นิ่น เญย เล์ย-หลัด โซว.”

22วั้ว หฒั่น กง-โฒ่ เหธา เมี่ยน โก๋ เหธา หฒวัง จิว-ปาง เมี่ยน ธ่าง ล่าง หอบ กิ๊น เต๋ย เมี่ยน พ้าย กัน เปาโล เหธา บานาบัด มี่ง อันทีโอก ฒี่ง. นิ่น บัว กิ๊น เญย เมี่ยน ม่าย ล่าน เห่ว ยูดาด, แอ๋ง ม่าย นอม บั๋ว เห่ว บาซับบาด. ม่าย ล่าน เห่ว ซีลา. น้าย เต๋ย อี ล่าน เยียม ก๋อ-โย์ว บุด๋ง โหฒว เปย๊ย เฒ้ย เญย เมี่ยน.

23กง-โฒ่ เหธา เมี่ยน โก๋ ฯฒฯ เฟี้ย เฝียน ปุน นิ่น บัว ต้อ เจี๊ยน มี่ง. เฝียน ก๊อง, “เธียน อ๋อย เญย เยียม อันทีโอก ฒี่ง, ซีเลีย เต่ย เหธา ซีลีเซีย แซ้ง กั้น ฝีง เญย หฒวัง ก๋อ-โย์ว อ่า, เยีย บัว กง-โฒ่ เหธา เมี่ยน โก๋, เม่ย บัว เญย ก๋อ-โย์ว, เฟี้ย เฝียน ปุน เม่ย บัว. เยีย บัว จั๋ง เถา เม่ย บัว.

24เยีย บัว ไฮ์ เมี่ยน ก๊อง ม่าย เต๋ย เยียม เยีย บัว น้าย เญย เมี่ยน มี่ง เม่ย บัว หน่าย ฒุ่น โต์ โธะ เม่ย บัว เญย เฮญี้ยว หลุ่น เหฑ่ง. มป่า ไม้ เฒ์ย เยีย บัว พ้าย นิ่น บัว มี่ง โอ่.

25เยีย บัว ฯฒฯ ต้ง เฮญี้ยว กิ๊น เต๋ย เมี่ยน ต้าย พ้าย นิ่น บัว มี่ง เม่ย บัว หน่าย เหธา เจี๊ยน เยีย บัว ฮนั้ม เญย ต่อย, บานาบัด เหธา เปาโล.

26น้าย เต๋ย อี ล่าน เหว่ย เฒี้ยว เยซู กีตู่ เญย บั๋ว ไม้ ฝุน แหม่ง เญย โหฒว.

27ฮนั้ง หน่าย, เยีย บัว พ้าย ยูดาด เหธา ซีลา มี่ง เหธา เม่ย บัว ต๋อย เฮมียน ก๊อง เม่ง น้าย เฒ้ย เฝียน เญย สี่.

28สีง ลี่ง เหธา เยีย บัว ฟี่ ฮนั้ง เญย ไม้ อ๋อย ทิบ หาย หญู่ง จา ปุน เม่ย บัว เฮนี้ย, ธ้วด ลิ์ว อี้ หฒั่น เฟี้ย เจี๊ยน น้าย เต๋ย ฮนั้ง.

29เม่ย บัว อ๋อย หฒุ เก่ ไม้ ตู๋ง หญั่น เหฒี่ย เจี๋ย หมิ่ว-ฝัง เญย กะน้าย. ไม้ ตู๋ง หญั่น ฑย้าม, ไม้ ตู๋ง หญั่น แหนะ จาง ไต่ เญย แซง-คู้ อ๊อ, หย่า ไม้ ตู๋ง โหฒว ไม้ หลวน ห่อง เญย สี่. สี ก๊อง เม่ย บัว เก่ เจี๊ยน น้าย ปั๊วะ กะน้าย ฯฒฯ หลง อ๊ะ. แป้ง ออน เญย เยียม โอ่.”

30เสียน เยซู เญย ก๋อ-โย์ว ฯฒฯ ฝูง น้าย เต๋ย เมี่ยน ธ้วด เจ๊า มี่ง อันทีโอก ฒี่ง. เถา วั้ว นิ่น บัว เห่ว จิว-ปาง เมี่ยน กั๊บ ฒุ้น ฯฒฯ เฒาะ วั้ว เฒ้ย เฝียน ปุน นิ่น บัว.

31โตะ ตอง น้าย เฒ้ย เฝียน, ไฮ์ เฝียน ออน นิ่น บัว เญย เฮญี้ยว, เต้าๆ ฯฒฯ อะเฮน้ย ไห่ อ๊ะ.

32ยูดาด เหธา ซีลา โหฒว โต่ว หว่า เมี่ยน หย่า ก๊อง ธั้ม เญย ขวิน ก๋อ-โย์ว บัว, ออน นิ่น บัว เญย เฮญี้ยว, เถง นิ่น บัว เก้า เสียน ตุ๊ เฮ้น.

33เยียม เหยียด หธาม วั้ว, ก๋อ-โย์ว บัว ฯฒฯ ฝูง นิ่น บัว แป้ง ออน เญย ธ้วด เจ๊า หฑวน เถา พ้าย นิ่น บัว ต้าย วั้ว เต๋ย.

34มป่า ซีลา ตี่ง เฮญี้ยว เยียม วั้ว.

35เปาโล เหธา บานาบัด หธ่อ เยียม อันทีโอก ฒี่ง. นิ่น บัว เหธา เมี่ยน ธั้ม เญย หฌาว หย่า ฒุ่น เฒี้ยว เญย โต์.

36ฆะฮ้า ธั้ม-ฮนอย เต๋ย เญย, เปาโล ก๊อง บั๋ว บานาบัด, “บัว อ๋อย หฒุ หฑวน มี่ง หมั่ง ก๋า, ต้ง บัว มี่ง ฒุ่น เจี๋ย เฒี้ยว เญย โต์ เญย นอมๆ มู้ง วั้ว เต๋ย ก๋อ-โย์ว ฮนั้ง หาย นอ เอาะ?”

37บานาบัด หย่า อ๋อย ต้อ โยฮัน มาโค เหธา เจี๊ยน มี่ง.

38มป่า เปาโล ไฮ์ ไม้ หอบ หฒุ ต้อ, เหว่ย หฒุ ฒิ่น ด่าง วั้ว หฑุ่น, เถา ปัมฟีเลีย, โยฮัน มาโค กวั่ง นิ่น บัว, ไม้ เหธา นิ่น บัว โหฒว กง.

39นิ่น บัว อี เต้า ฟิ้ว-หธง ลิ์ว, ฯฒฯ ปุน ฆอย ต่อย หมี่ อ๊ะ. บานาบัด ต้อ เจี๊ยน มาโค เปียะ ฑั้ง มี่ง ไซปัด ค้อย-โฑว.

40มป่า เปาโล กิ๊น ซีลา เหธา นิ่น มี่ง. เสียน เยซู เญย หฒวัง เมี่ยน ฯฒฯ เฒาะ นิ่น บัว อี ล่าน ฝูง ปุน เฒี้ยว เอย นิ่น เญย เอน โก๋ว.

41ธ้วด เจ๊า มี่ง, นิ่น เจี๋ย ซีเลีย เหธา ซีลีเซีย แซ้ง เถง หฒวัง จิว-ปาง เก้า เสียน ตุ๊ ว้วน.

← Chapter 14 Jump to: Chapter 16 →