Acts 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1เถา อีโคนียูม ฒี่ง, เปาโล เหธา บานาบัด ฮนั้ง เหยียด เกา นอ, มี่ง ยิวไท เมี่ยน เญย หวุ่ย ต้อง. นิ่น บัว ฒุ่น โต์ ม่าย เอ๋ย เล์ย ไห่ ฯฒฯ ม่าย ยิวไท เมี่ยน เหธา จั๋น เสียน ธั้ม เญย.

2มป่า ไม้ เสียน วั้ว เต๋ย ยิวไท เมี่ยน โธะ จั๋น ปุน นิ่น บัว ม่าย เฮญี้ยว อ๋อย โหฒว โตะ วั้ว เต๋ย ก๋อ-โย์ว.

3เปาโล เหธา บานาบัด เยียม วั้ว เล่า เญย, ปู๋ง หล่าง เญย ก๊อง เฒี้ยว เญย โต์. เฒี้ยว หย่า ปุน นิ่น บัว โหฒว จั๋ง-โห่ เหธา บัวะ ฮ่อง ไห่ เญย สี่ ธั้ม เญย, ปุน ธีง นิ่น บัว ฒุ่น เฒี้ยว เหธย เอน เญย โต์ เซ เฒียน เญย.

4ฒี่ง เญย หฒวัง เมี่ยน ฯฒฯ ปุน ฆอย เหฑ่ง. ม่าย เต๋ย กัน ยิวไท เมี่ยน, ม่าย เต๋ย กัน กง-โฒ่ บัว.

5วั้ว หฒั่น, ม่าย เต๋ย จั๋น เหธา ยิวไท เมี่ยน เหธา นิ่น บัว โหฒว โฮล เญย เมี่ยน ธ่าง ล่าง โหฒว โตะ เปาโล เหธา บานาบัด, อ๋อย เฒาะ หละเปย๊ย ฒง นิ่น บัว.

6มป่า กง-โฒ่ บัว ฮิ้ว ตุ๊ ฯฒฯ เปย๋า มี่ง ลิคาโอเนีย เต่ย เญย ลิสะตา มู้ง เหธา เดบี ฒี่ง เหธา ฮวีง หฑวน วั้ว เต๋ย ต๋อง,

7เยียม วั้ว ฒุ่น คู้ เฝียน.

8เยียม ลิสะตา มู้ง ม่าย ล่าน เยียม-ทอย เหฒา หว่าย เญย เมี่ยน เฒว์ย เจี๊ยน วั้ว, ไม้ ยั่ง เจี๋ย เจ๊า.

9นิ่น เฒว์ย เจี๊ยน วั้ว หมวัง เปาโล ก๊อง. เปาโล นุๆ เญย หมั่ง, ปวัด นิ่น ม่าย เสียน ฟิม ไฮ่ หฒ่อ ตุ๊ เหฒา หลง,

10ฯฒฯ หล่ง เฉีย โฮล เญย ก๊อง, “เจี์ย ซิน ต้าย โซ้ว เจี๊ยน หฒะ เญย ม่าะ!” วั้ว ล่าน เมี่ยน ฯฒฯ เลี่ยม เฒ่ย ฆวะ เจี์ย ซิน ต้าย ยั่ง เจ๊า.

11หฒวัง เมี่ยน ปวัด, นิ่น บัว หล่ง ลิคาโอเนีย หว่า เหน่าๆ เญย เห่ว, “ม่าย เฒี่ยน หฮวา เป๋น เมี่ยน เญย ซิน เหฌี่ย บัว น้าย ต้าย อ๊ะโล่ะ!”

12บานาบัด นิ่น บัว ธ้วด บั๋ว เห่ว ซุด. เปาโล นิ่น บัว เห่ว เฮเม้ด, เหว่ย หฒุ นิ่น ฒุ่น โต์ เก้า ธั้ม.

13ซุด เฒี่ยน เญย หมิ่ว-เปย๊า เยียม ฒี่ง กะเหญี่ย. ซุด เญย ไซ เมี่ยน ต้อ ง่ง โก๊ว, ต้อ เปี้ยง ต้าย เถา ฒี่ง แก้ง อ๋อย เหธา หฒวัง เมี่ยน เหฒี่ย ปุน เปาโล บัว.

14บานาบัด เหธา เปาโล ไฮ์ เมี่ยน ก๊อง นิ่น บัว อ๋อย ฮนั้ง น้าย นอ โหฒว, นิ่น บัว ฯฒฯ เป๊ด กั้น เญย ลุย, ถิว เปียะ หฒวัง เมี่ยน กะญั์ว มี่ง, เหน่าๆ เญย เห่ว เจี๊ยน ก๊อง,

15“เม่ย บัว เหว่ย หาย ติ่ว ฮนั้ง น้าย โหฒว แล่? เยีย บัว หย่า ป้าม เมี่ยน ฮนั้ง เม่ย บัว นอ. เยีย บัว ต้าย ฒุ่น คู้ เฝียน บั๋ว เม่ย บัว กวั่ง ฆอย น้าย เต๋ย เฮ่น สี่ แอ๋ง ล์อ เฒี่ยง เจี๊ยน เญย ทิน-ฮู่ง, ต้ง เหฒย ลู่ง เหฒย เดา เหฒย ค้อย หย่า เหฒย เยียม น้าย เต๋ย กะญั์ว เญย หม่าน หมวด กะน้าย วั้ว เต้า.

16โล์-ฮนอย ทิน-ฮู่ง ปุน หม่าน ฝีง เซว่ย นิ่น บัว กั้น เญย เฮญี้ยว โหฒว.

17มป่า นิ่น หาย หฒั่น โหฒว หลง ปุน บัว, โหฒว ฒอง-เหฒง ปิ๋ว เม่ง นิ่น เฒี่ยง เจี๊ยน เญย. นิ่น ปุน ลู่ง ตุ้ย บยู่ง, ปุน แกง-หฒวัง เอย ธุน-เธียว ธ้วด ตุ๊ หอบ. นิ่น หย่า ปุน เม่ย บัว หญั่น เป๊ว, เฌียน-โย่ว ไห่.”

18กง-โฒ่ บัว ก๊อง น้าย เต๋ย หว่า ต๊น นิ่น บัว มป่า ค้า เต๋ย ก๊อง ไม้ ฮี่ง. หฒวัง เมี่ยน หธ่อ อ๋อย ต้อ กะน้าย ต้าย เหฒี่ย ปุน นิ่น บัว.

19ม่าย เต๋ย ยิวไท เมี่ยน เยียม อันทีโอก เหธา อีโคนียูม ต้าย ดั๊ว หฒวัง เมี่ยน เหธา นิ่น บัว ต้ง เฮญี้ยว หล่ง หละเปย๊ย ฒง เปาโล. ฒง ลิ์ว, ทอ ธ้วด กะเหญี่ย หฒิ ฒี่ง, หล่าย นิ่น ไต่ หมี่ อ๊ะ.

20มป่า เสียน เยซู เญย ก๋อ-โย์ว ต้าย เว่ย เจี๊ยน นิ่น, นิ่น ฯฒฯ เจี์ย ซิน ต้าย แอ๋ง เปียะ มู้ง. ตะเหญ่ย ฮนอย นิ่น เหธา บานาบัด แอ๋ง มี่ง เดบี ฒี่ง.

21เปาโล เหธา บานาบัด เยียม เดบี ฒี่ง ฒุ่น คู้ เฝียน ฯฒฯ ตุ๊ เมี่ยน ธั้ม เญย ต้าย โหฒว ไซ-ก๋อ. ฆะฮ้า เปาโล บัว หฑวน ลิสะตา มู้ง, อีโคนียูม ฒี่ง เหธา ปิสิเดีย เต่ย เญย อันทีโอก ฒี่ง,

22เยียม วั้ว เต๋ย ต๋อง เถง ไซ-ก๋อ บัว เสียน ว้วน หย่า ขวิน นิ่น บัว หาย หฒั่น อ๋อย หฒุ กัน หลง เสียน เยซู เญย เจ๊า, หย่า บั๋ว นิ่น บัว, “บัว อ๋อย หฒุ เตี๊ย ธั้ม-หญู่ง โค้ว หน่าน หธีง ต้าย ไฮ่ ตุ๊ เปียะ ทิน-ฮู่ง เญย กั๊วะ.”

23เยียม นอมๆ จิว-ปาง นิ่น บัว ออน เมี่ยน โหฒว เมี่ยน โก๋. นิ่น บัว เต๋า เก๋า, เฒย ไม้ หญั่น หาย หญู่ง ฯฒฯ เฒาะ น้าย เต๋ย เมี่ยน โก๋ ฝูง ปุน นิ่น บัว เสียน เขา วั้ว เต้า เฒี้ยว.

24เปาโล เหธา บานาบัด แอ๋ง เจี๋ย ปิสิเดีย เต่ย-ปูง มี่ง เถา ปัมฟีเลีย.

25เยียม วั้ว เปกา ฒี่ง ฒุ่น ลิ์ว โต์, นิ่น บัว ฯฒฯ เหฌี่ย เถา อัดทาลิยา มู้ง.

26เยียม หน่าย เปียะ ฑั้ง หฑวน ซีเลีย เต่ย-ปูง, อันทีโอก ฒี่ง หมี่ อ๊ะ. น้าย นอม ฒี่ง เซ ต้ง ฒิ่น ด่าง ไซ-ก๋อ บัว เฒาะ เปาโล บัว ฝูง ปุน ทิน-ฮู่ง เอย นิ่น เญย เอน โก๋ว, เถง นิ่น บัว ไฮ่ โหฒว ธ้วด อี้ หฒั่น โหฒว เหฒียง น้าย เต๋ย กง.

27หฑวน เถา อันทีโอก, เปาโล บัว เห่ว หฒวัง จิว-ปาง กั๊บ ฒุ้น. นิ่น บัว ฯฒฯ ก๊อง ทิน-ฮู่ง เถง นิ่น บัว โหฒว เญย เจ๊า-โหล่ว, หย่า ก๊อง ทิน-ฮู่ง ฮนั้ง หาย นอ คอย เจ๊า ปุน จั๋น เสียน เยซู.

28นิ่น บัว หย่า เหธา ไซ-ก๋อ บัว เยียม เล่า เญย.

← Chapter 13 Jump to: Chapter 15 →