Acts 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1กง-โฒ่ บัว เหธา เยียม ยูเดีย แซ้ง เญย ก๋อ-โย์ว ไฮ์ ก๊อง จั๋น หย่า ฒิบ ทิน-ฮู่ง เญย โต์.

2ปีเต มี่ง เถา เยลูซาเลม ฒี่ง วั้ว หฒั่น, ม่าย เต๋ย เสียน เยซู เญย ยิวไท เมี่ยน, ต้ง อ๋อย ปุน เสียน เยซู เญย จั๋น เจี๋ย ก๊าด เญย เล์ย วั้ว เต๋ย, ก๊อง ปีเต.

3นิ่น บัว ก๊อง, “เม่ย เปียะ จั๋น เญย เปย๊า, นิ่น บัว หย่า ไม้ แก้ง เจี๋ย ก๊าด เญย เล์ย. เม่ย ฒู้ง เหธา นิ่น บัว หญั่น หฮนาง.”

4ปีเต ฯฒฯ เยียม กอน เฒว่ย เยี้ยด เฒว่ย เหญ่ย ก๊อง เหฑ่ง น้าย เต๋ย เจ๊า-โหล่ว ปุน นิ่น บัว หมวัง.

5นิ่น ก๊อง, “เยีย เยียม ยับฟา มู้ง เต๋า เก๋า วั้ว หฒั่น, ปวัด หิ่น ย่าง เญย สี่ ธ้วด. เยีย ปวัด ม่าย หญู่ง กะน้าย ฮนั้ง เหยียด คว้าย เดีย จั๊ง เญย, หย่า ฮนั้ง นั้น เจี๊ยน เปยย นอม เก๊าะ เยียม กู้ หงว่าย ลู่ง ปู๋ง เหฌี่ย ต้าย ตี้ง เจี๊ยน เยีย เญย หฑะเฮมียน.

6เยีย หมั่ง หลง วั้ว คว้าย เดีย กะญั์ว ปวัด ม่าย แซง-คู้, ม่าย เฮยี่ย ฒ่อย, ม่าย ญอง เดา เญย กะน้าย, หย่า ม่าย ได๋ ด๊าม-ลู่ง เญย เหนาะ.

7เยีย หย่า ไฮ์ ม่าย เฉีย ก๊อง, ‘ปีเต อ้า! เจี์ย ซิน ไต๋ น้าย เต๋ย กะน้าย หญั่น อ๊ะ.’

8“มป่า เยีย เตา ก๊อง, ‘เฒี้ยว อ้า! ไม้ หอบ หญั่น ซ่าะ? อ๋อย หฒุ เก่ เญย เหธา ม่าย หวุย เญย กะน้าย ฒู้ง ไม้ เปียะ เจี๋ย เยีย เญย ฑุ่ย.’

9“มป่า ม่าย เฉีย เยียม ลู่ง ก๊อง ตะเหญ่ย หฑุ่น, ‘ทิน-ฮู่ง ปุน หาย หญู่ง ธีง-เหฑ่ง, ไม้ ตู๋ง ฝุน ม่าย หวุย.’

10ฮนั้ง น้าย นอ ก๊อง ปัว หฑุ่น ลิ์ว, วั้ว คว้าย กะน้าย ฯฒฯ เซียว ฝาว ลู่ง หมี่ อ๊ะ.

11“ต๋อย วั้ว นอม เฒี่ยง โห่, เยียม ซีซาลียา ฒี่ง เมี่ยน พ้าย ต้าย ล์อ เยีย วั้ว เต๋ย ปัว ล่าน เมี่ยน ต้าย เถา เยีย ฮิด วั้ว นอม เปย๊า ต้าย อ๊ะ.

12สีง ลี่ง บั๋ว เยีย กัน นิ่น บัว มี่ง หย่า ไม้ ตู๋ง ซั่ม โซะ. น้าย เต๋ย จุ๊ เต้า ก๋อ-โย์ว หย่า เหธา เยีย มี่ง เปียะ โคเนลิอัด เญย เปย๊า.

13โคเนลิอัด ฯฒฯ บั๋ว เยีย บัว นิ่น ฮนั้ง หาย นอ ปวัด เต้า ฟิน-เมี่ยน โซ้ว เจี๊ยน นิ่น เญย เปย๊า กะญั์ว บั๋ว นิ่น, ‘เม่ย อ๋อย หฒุ พ้าย เมี่ยน มี่ง ยับฟา มู้ง ล์อ ล่าน เมี่ยน, บั๋ว เห่ว ซีโมน ปีเต, เห่ว นิ่น ต้าย เม่ย น้าย.

14นิ่น อ๋อย ก๊อง เต๋ย หว่า บั๋ว เม่ย. เม่ย เหธา เม่ย เญย เหยียด เปย๊า เมี่ยน ฯฒฯ เหว่ย น้าย เต๋ย หว่า ตุ๊ เหฌียว.’

15“เยีย เจี์ย กอน ก๊อง หว่า วั้ว หฒั่น, สีง ลี่ง ฯฒฯ เหฌี่ย ต้าย เยียม นิ่น บัว เญย ซิน, ฮนั้ง ฒิ่น ด่าง เหฌี่ย ต้าย เยียม บัว วั้ว นอ.

16เยีย ฯฒฯ จั๋ง หฒุ ฒิ่น ด่าง เฒี้ยว ก๊อง เญย หว่า, ‘โยฮัน หล่ง ววม เถง เมี่ยน เจี๋ย เล์ย, มป่า ทิน-ฮู่ง อ๋อย หล่ง สีง ลี่ง เถง เม่ย บัว เจี๋ย เล์ย.’

17ฮนั้ง หน่าย, สี ก๊อง ทิน-ฮู่ง เหธย ฒี่ง เหญ่ย ปุน วั้ว เต๋ย จั๋น ฮนั้ง บัว เสียน เฒี้ยว เยซู กีตู่ วั้ว หฒั่น นิ่น ปุน บัว นอ, เยีย ฝู่ง ไฮ่ ล่าน ทิน-ฮู่ง?”

18หฒวัง เมี่ยน ไฮ์ นิ่น ก๊อง น้าย เต๋ย หว่า, นิ่น บัว ฯฒฯ ไม้ ม่าย หว่า ก๊อง อ๊ะ. ขูง เธง ทิน-ฮู่ง ฮนั้ง. นิ่น บัว ก๊อง, “ฮนั้ง น้าย, ทิน-ฮู่ง หย่า ปุน จั๋น ไฮ่ ก๊อย เฮญี้ยว กวั่ง ฒุ์ย ตุ๊ เฒี่ยง เจี๊ยน.”

19เมี่ยน ไต๋ ลิ์ว สะเทเฟน, ฆะฮ้า หลาย เมี่ยน โหฒว โตะ ห่อย, เสียน เยซู เญย เมี่ยน ฯฒฯ เปย๋า หฑาน เหฑ่ง. ม่าย เต๋ย เปย๋า เถา ฟีนีเซีย เต่ย-ปูง, ไซปัด ค้อย-โฑว, เหธา อันทีโอก ฒี่ง. นิ่น บัว ฒุ่น ทิน-ฮู่ง เญย คู้ เฝียน มป่า ขูง ก๊อง ปุน ยิวไท เมี่ยน หมวัง ฮนั้ง.

20มป่า ม่าย เต๋ย เยียม ไซปัด ค้อย-โฑว เหธา ไซลีน มู้ง เญย ยิวไท เมี่ยน มี่ง อันทีโอก ฒี่ง ก๊อง เฒี้ยว เยซู เญย คู้ เฝียน ปุน จั๋น-กีก หมวัง.

21ทิน-ฮู่ง เญย ชะ เถง นิ่น บัว ก๊อง ฯฒฯ ม่าย เมี่ยน ธั้ม เญย เสียน ฯฒฯ ฮวิน ต้าย ล์อ เฒี้ยว เยซู.

22เยลูซาเลม ฒี่ง เญย จิว-ปาง ไฮ์ น้าย เต๋ย เฝียน เถา นิ่น บัว วั้ว, นิ่น บัว ฯฒฯ พ้าย บานาบัด มี่ง อันทีโอก ฒี่ง.

23มี่ง เถา, ปวัด ทิน-ฮู่ง ฮนั้ง น้าย นอ เหธย เอน ปุน น้าย เต๋ย เมี่ยน, นิ่น ฯฒฯ อะเฮน้ย ไห่ หย่า ขวิน นิ่น บัว เหลียบ ตี่ง เฮญี้ยว หฒั่นๆ กัน หลง เฒี้ยว.

24บานาบัด โหฒว เต้า คู้ เมี่ยน, เสียน ตุ๊ หลง, หย่า ม่าย สีง ลี่ง ปวั๊ง เฮญี้ยว, ฯฒฯ จา ม่าย เมี่ยน ธั้ม เญย เสียน เฒี้ยว.

25บานาบัด ฯฒฯ มี่ง ทาซัด ฒี่ง ล์อ เซาโล.

26ล์อ ปวัด, เซาโล เหธา เจี๊ยน หฑวน อันทีโอก ฒี่ง. นิ่น บัว อี เต้า เยียม วั้ว เหยียด หฮญัง, หฒั่นๆ เหธา จิว-ปาง กั๊บ ฒุ้น หฌาว เมี่ยน ธั้ม. เมี่ยน เห่ว เสียน เยซู เญย เมี่ยน โหฒว “กีตู่ เมี่ยน” เซ เยียม อันทีโอก ฒี่ง เจี์ย กอน เห่ว ต้าย.

27วั้ว เต๋ย หธาม ม่าย เต๋ย โต่ว หว่า เมี่ยน เยียม เยลูซาเลม ฒี่ง มี่ง เถา อันทีโอก.

28ม่าย เต้า น้าย เต๋ย เมี่ยน, บั๋ว เห่ว อากาบัด, โซ้ว เจี์ย ต้าย. สีง ลี่ง หล่ง นิ่น โต่ว หว่า ก๊อง ลู่ง เดี๊ย เมี่ยน อ๋อย หฒุ ปวั้ง ต้ม ฮวาง ต้ม หง่อ. (คาลาวดิอัด โหฒว ต้ม ฒิ่ว ฮู่ง วั้ว หฒั่น หฒะเก้ง ปวั้ง น้าย หฑุ่น ต้ม หง่อ.)

29ฮนั้ง หน่าย, ไซ-ก๋อ บัว ธ่าง ล่าง ตี่ง หฒิว เก๊าะ-เมี่ยน เญย ปั้น เหฒ่ย ธ้วด ฟิม เถง ยูเดีย แซ้ง เญย ก๋อ-โย์ว.

30นิ่น บัว ฯฒฯ กั๊บ ญ่าน ต้าย จิว ปุน บานาบัด เหธา เซาโล ต้อ มี่ง ปุน จิว-ปาง เญย เมี่ยน โก๋.

← Chapter 10 Jump to: Chapter 12 →