Acts 13

Mien Bible (Thai Script) © Thailand Bible Society, 2007

1เยียม อันทีโอก จิว-ปาง ม่าย เต๋ย โต่ว หว่า เมี่ยน เหธา เต๋ย หฌาว เล์ย เญย ฟิน-แซง. ม่าย บานาบัด, ม่าย สิเมโอน, สิเมโอน แอ๋ง ม่าย นอม บั๋ว เห่ว นีเก, ม่าย ไซลีน เมี่ยน, ลูสิอัด, ม่าย มานาเอน, (มานาเอน เหธา เฮโล้ด ฮู่ง จวั่ง เปย๊า โฮล ต้าย,) แอ๋ง ม่าย เซาโล.

2นิ่น บัว ป๋าย เฒี้ยว หย่า เฒย ไม้ หญั่น หาย หญู่ง วั้ว หฒั่น, สีง ลี่ง บั๋ว นิ่น บัว, “พ้าย บานาบัด เหธา เซาโล ธ้วด มี่ง เหว่ย โหฒว เยีย อ๋อย เห่ว นิ่น บัว โหฒว เญย กง.”

3นิ่น บัว เฒย ไม้ หญั่น หาย หญู่ง หย่า เต๋า เก๋า, แอ๋ง หล่ง ปั์ว มาน ลิ์ว บานาบัด เหธา เซาโล, ฯฒฯ พ้าย นิ่น บัว มี่ง หมี่ อ๊ะ.

4บานาบัด เหธา เซาโล ฯฒฯ เอย สีง ลี่ง พ้าย มี่ง เถา เซลูเคีย, เยียม วั้ว เปียะ ฑั้ง มี่ง ไซปัด ค้อย-โฑว.

5นิ่น บัว มี่ง เถา ซาลามิด มู้ง ฯฒฯ เยียม ยิวไท เมี่ยน เญย นอมๆ หวุ่ย ต้อง ฒุ่น ทิน-ฮู่ง เญย โต์. โยฮัน มาโค หย่า เหธา นิ่น บัว เยียม, เถง นิ่น บัว.

6เจี๋ย จ่ม ค้อย-โฑว, เถา ปาโฟ้ด ต้ม ฒี่ง ปวั้ง หฒุ เต้า ยิวไท เมี่ยน, บั๋ว เห่ว บาเยซู. นิ่น โหฒว ฟ้าด หย่า โหฒว จ๊า โต่ว หว่า เมี่ยน.

7บาเยซู เหธา กุ๊น ค้อย-โฑว วั้ว เต้า ต้ม เจียน, เสจีอัด เปาโล, เยียม. น้าย เต้า เสจีอัด เปาโล เซ ไกว ไห่. นิ่น อ๋อย หมวัง ทิน-ฮู่ง เญย โต์ ฯฒฯ เห่ว บานาบัด เหธา เซาโล ต้าย ฒุ่น ปุน นิ่น หมวัง.

8มป่า โหฒว ฟ้าด วั้ว เต้า เอลีม้าด, ล่าน เจี๊ยน, ไม้ อ๋อย ปุน แซ้ง-เฒี้ยว เสียน. เอลีม้าด วั้ว นอม บั๋ว ก๊อง เป๋น กีก หว่า เซ โหฒว ฟ้าด เญย เมี่ยน.

9เซาโล, ต้ง เมี่ยน หย่า เห่ว เปาโล วั้ว เต้า, ตุ๊ สีง ลี่ง ปวั๊ง เฮญี้ยว ฯฒฯ นุๆ เญย หมั่ง เอลีม้าด.

10นิ่น ก๊อง, “เมี้ยน เญย ตอน-เจว๊ย อ้า! หาย หญู่ง หลง เญย, เม่ย ต๋อย วั้ว หญู่ง โหฒว วิน-วั้ง. ขูง ก๊อง-แปะ ดั๊ว เมี่ยน ฮนั้ง. เม่ย ไม้ ตี้ง เหฌี่ย หฒั่นๆ โหฒว ปุน เฒี้ยว เญย เจ๊า-หฒะ เป๋น เจ๊า-ฌ้วด ไฟ?

11อี้ หฒั่น เฒี้ยว เญย ปั์ว เหฌี่ย เถา เม่ย, อ๋อย ปุน เม่ย เญย มฒีง บั๊ว เหยียด หธาม, หมั่ง ไม้ ปวัด ลู่ง ฮนอย เญย ฌัง.” เอลีม้าด เลี่ยม เฒ่ย ไฮ์ ฮนั้ง ม่าย โหม่ว อ๋อม เจี๊ยน นิ่น เญย มฒีง มับ แม่ง มับ หฮมวัง เญย. นิ่น ฮลัว น้าย ฮลัว วั้ว ล์อ เมี่ยน เคน.

12ต้ม เจียน ปวัด น้าย เต๋ย สี่ ธ้วด, นิ่น ฯฒฯ เสียน อ๊ะ. นิ่น บัวะ ฮ่อง ไห่ เฒี้ยว เญย โต์.

13เปาโล เหธา นิ่น เญย ต่อย เยียม ปาโฟ้ด เปียะ ฑั้ง มี่ง ปัมฟีเลีย เต่ย-ปูง, เปกา ฒี่ง. เยียม วั้ว นิ่น บัว ปุน ฆอย ต่อย, โยฮัน มาโค หฑวน เยลูซาเลม ฒี่ง.

14เปาโล บัว แอ๋ง ยั่ง เจ๊า มี่ง เถา ปิสิเดีย เต่ย-ปูง เญย อันทีโอก ฒี่ง. เถา ตี้ง กง ฮนอย นิ่น บัว เปียะ หวุ่ย ต้อง เฒว์ย เจี๊ยน.

15ต้อ เล์ย-ป๋าย เญย เมี่ยน โตะ เล์ย-หลัด โซว เหธา ทิน-ฮู่ง เญย โต่ว หว่า เมี่ยน เญย โซว. โตะ ลิ์ว, หวุ่ย ต้อง เญย กุ๊น สี่ เมี่ยน พ้าย เมี่ยน มี่ง บั๋ว เปาโล บัว, “ก๋อ-โย์ว อ่า, สี ก๊อง เม่ย บัว ม่าย หาย หญู่ง หว่า อ๋อย ขวิน เยีย บัว, กุ๊น ก๊อง โอ่.”

16เปาโล ฯฒฯ โซ้ว เจี์ย ต้าย หฮวัง ปั์ว ก๊อง, “อิสะลาเอน เมี่ยน เหธา เหยียด ฒู้ง หฒั่ง ทิน-ฮู่ง เญย เมี่ยน อ้า! หมวัง ม่าะ!

17อิสะลาเอน เมี่ยน เญย ทิน-ฮู่ง กิ๊น บัว เญย อง-ถาย. นิ่น บัว เยียม เจี๊ยน อียิบ เต่ย-ปูง วั้ว หฒั่น, ทิน-ฮู่ง ปุน นิ่น บัว หฮยาง, หย่า หล่ง ต้ม ชะ ต้อ นิ่น บัว ธ้วด อียิบ เต่ย-ปูง,

18ฯฒฯ เยียม เต่ย-ปูง ฮวาง เญี์ยน เจี๊ยน นิ่น บัว โหฒว เญย สี่ เล่ย ไม้ โก เฝย เหฒียบ หฮญัง.

19ทิน-ฮู่ง เหมียด เหฑ่ง เยียม คานาอัน เต่ย-ปูง เญย เสี่ย ฝีง จั๋น, หย่า เฒาะ วั้ว นอม เต่ย-ปูง ปุน นิ่น เญย แปะ ฝีง, อิสะลาเอน เมี่ยน หฑิบ.

20น้าย เต๋ย เจ๊า-โหล่ว หล่ง เฒี่ยง โห่ เล่ย ไม้ โก เฝย แป๊ะ ฮม์ เหฒียบ หฮญัง. “ฆะฮ้า ทิน-ฮู่ง ปุน นิ่น บัว ม่าย เบ่น สี่ เมี่ยน กุ๊น นิ่น บัว เถา โต่ว หว่า เมี่ยน, ซามูเอน, เญย เสย เฒ้ย.

21น้าย เต๋ย เมี่ยน โท้ ซามูเอน ปุน นิ่น บัว ม่าย ฮู่ง กุ๊น นิ่น บัว. ทิน-ฮู่ง ฯฒฯ ปุน เบนยามิน ฝีง, คี้ด เญย ตอน, เซาโล, โหฒว ฮู่ง กุ๊น เฝย เหฒียบ หฮญัง.

22ทิน-ฮู่ง ถุย เซาโล ธ้วด มี่ง, ฆะฮ้า ออน ดาวิด โหฒว นิ่น บัว เญย ฮู่ง. ทิน-ฮู่ง ก๊อง เถา ดาวิด. นิ่น ก๊อง, ‘เยีย ปวัด เจียดซี เญย ตอน, ดาวิด, หอบ เยีย เญย เฮญี้ยว ไห่. นิ่น หย่า อ๋อย เยียม หม่าน สี่ เอย เจี๊ยน เยีย เญย หฒะเอ๋ย โหฒว.’

23“ทิน-ฮู่ง เอย แล์ง เญย หว่า ปุน เต้า ดาวิด เญย เฒ้ย-ฟุน, บั๋ว เห่ว เยซู, ธ้วด ต้าย โหฒว อิสะลาเอน เมี่ยน เญย เหฌียว เฒี้ยว.

24เยซู ไม้ แก้ง ธ้วด ต้าย ฒุ่น โต์ วั้ว หฒั่น, โยฮัน ฒุ่น บั๋ว อิสะลาเอน เญย หฒวัง เมี่ยน นิ่น บัว อ๋อย หฒุ ก๊อย เฮญี้ยว กวั่ง ฒุ์ย, เจี๋ย ววม เญย เล์ย.

25โยฮัน โหฒว นิ่น เญย กง อ๊า ลั่ม เหฒียง, นิ่น บั๋ว หฒวัง เมี่ยน, ‘เม่ย บัว หล่าย เยีย ต้ง หาย เต้า? เยีย ไม้ เฒ์ย เม่ย บัว ฒั้ว วั้ว เต้า โอ่. เยีย ต้าย ด่าง, นิ่น ฆะฮ้า ต้าย, เยีย เลี่ยม ไม้ ผุย เถง นิ่น ไจ๊ เฮ่ ฮลาง.’

26“หฒวัง ก๋อ-โย์ว, อับลาฮัม เญย เฒ้ย-ฟุน เหธา เยียม เม่ย บัว บุด๋ง ป๋าย ทิน-ฮู่ง เญย เมี่ยน อ้า! น้าย เหฌียว เอน เญย โต์ เซ ฒุ่น ต้าย ปุน บัว อ๊ะ.

27เยียม เยลูซาเลม ฒี่ง เญย หฒวัง เมี่ยน เหธา โหฒว โฮล เญย วั้ว เต๋ย ไม้ ฮิ้ว ตุ๊ เยซู โหฒว เหฌียว เฒี้ยว. นอมๆ ตี้ง กง ฮนอย นิ่น บัว หมวัง เมี่ยน โตะ หฒวัง โต่ว หว่า เมี่ยน เญย โซว หย่า ไม้ เปียะ เฮญี้ยว. มป่า นิ่น บัว ตี่ง เยซู เญย ฒุ์ย วั้ว หฒั่น, นิ่น บัว โหฒว เหฒียง ต๋อย เหฑ่ง วั้ว เต๋ย โต่ว หว่า เมี่ยน ก๊อง เญย หว่า.

28นิ่น บัว ฒ่า ไม้ ธ้วด หาย หญู่ง กอน หฒี่ ตุ๊ ไต๋ นิ่น, มป่า นิ่น บัว โท้ ปีล้าด ปุน นิ่น หฒุ ไต่.

29นิ่น บัว เอย กีง-โซว เฟี้ย เจี๊ยน ก๊อง เยซู เญย เหยียด ฒู้ง เจ๊า-โหล่ว โหฒว เหฒียง, ฯฒฯ เฒาะ เยซู เญย เซย เหฌี่ย เหฒียบ หฑั่ง จ๋า ต้าย, หฒัง เจี๊ยน โฒ้ว.

30มป่า ทิน-ฮู่ง ปุน นิ่น นั่ง ต้าย.

31นิ่น หิ่น ธ้วด ปุน เยียม กาลิลี กัน นิ่น มี่ง เยลูซาเลม ฒี่ง วั้ว เต๋ย เมี่ยน ปวัด ธั้ม-ฮนอย เญย. น้าย เต๋ย เมี่ยน อี้ หฒั่น โหฒว ฒอง-เหฒง ปุน อิสะลาเอน เมี่ยน หมวัง.

32“เยีย บัว ต้อ น้าย คู้ เฝียน ต้าย บั๋ว เม่ย บัว. ฒิ่น ด่าง ทิน-ฮู่ง แล์ง ปุน บัว เญย อง-ถาย วั้ว เต๋ย หว่า,

33อี้ หฒั่น นิ่น เหว่ย บัว, อง-ถาย เญย เฒ้ย-ฟุน โหฒว เหฒียง, เซ ต้ง นิ่น ปุน เยซู แอ๋ง นั่ง ต้าย. ฮนั้ง เฟี้ย เจี๊ยน ตะเหญ่ย ติ้ว สีง ฑูง ก๊อง นอ, ‘เม่ย โหฒว เยีย เญย ตอน, อี้ ฮนอย เยีย เป๋น เม่ย เญย เตีย.’

34แอ๋ง ม่าย หว่า ก๊อง เถา เยซู ไต่ มป่า ทิน-ฮู่ง ปุน นิ่น นั่ง ต้าย, เหยียด ลิ์ว ไม้ ปุน นิ่น เญย เซย ฮู้. ทิน-ฮู่ง ก๊อง, ‘เยีย แล์ง ปุน ดาวิด วั้ว เต๋ย ธีง-เหฑ่ง, เขา ตุ๊ ว้วน เญย เอน, เยีย อ๋อย เหธย ปุน เม่ย บัว.’

35แอ๋ง ม่าย กั้น นอม ต๋อง ก๊อง, ‘เม่ย ไม้ ปุน เม่ย เญย ธีง-เหฑ่ง โปว เญย เซย ฮู้.’

36“ดาวิด ฮู่ง เญย เสย เฒ้ย เอย ทิน-ฮู่ง เญย หฒะเอ๋ย โหฒว เหฒียง, ฯฒฯ เกวย เสย หมี่ อ๊ะ, หย่า เหธา นิ่น เญย อง-ถาย หฒัง เจี๊ยน. นิ่น เญย เซย หย่า ฮู้ หมี่ อ๊ะ.

37มป่า ทิน-ฮู่ง ปุน นั่ง ต้าย วั้ว เต้า เญย เซย ไม้ ฮู้.

38“เยีย เญย ก๋อ-โย์ว อ้า! เม่ย บัว อ๋อย หฒุ ฮิ้ว ตุ๊, เหว่ย น้าย เต้า เยซู เยีย บัว หธีง ตุ๊ ฒุ่น บั๋ว เม่ย บัว, ทิน-ฮู่ง ฮนั้ง หาย นอ กวั่ง เมี่ยน เญย ฒุ์ย.

39เม่ย บัว หย่า อ๋อย หฒุ ฮิ้ว ตุ๊ กัน โมเซ เญย เล์ย-หลัด ไม้ ไฮ่ ปุน เมี่ยน เล่ย ดุ๊ด ฒุ์ย. มป่า หาย เต้า เสียน เขา เยซู, วั้ว เต้า เล่ย ดุ๊ด เหยียด ฒู้ง ฒุ์ย.

40ไฝ ฟิม โอ่. เฑ่า เหย เม่ย บัว ไฮ่ หฒุ โต่ว หว่า เมี่ยน ก๊อง เญย หว่า. นิ่น บัว ก๊อง,

41‘หมั่ง ม่าะ! เม่ย บัว หมั่ง เผีย เมี่ยน เญย เมี่ยน อ้า! อ๋อย หฒุ บัวะ ฮ่อง หย่า หฒุ เหมียด, เหว่ย หฒุ เยียม เม่ย บัว เญย ฮนอย-เหญียะ เยีย โหฒว ธ้วด เหยียด หญู่ง สี่. ไม้ กุ๊น เมี่ยน ก๊อง บั๋ว เม่ย บัว, เม่ย บัว ฒู้ง ไม้ เสียน.’”

42เปาโล เหธา บานาบัด ธ้วด หวุ่ย ต้อง วั้ว หฒั่น, หฒวัง เมี่ยน โท้ นิ่น บัว เถา ตะเหญ่ย นอม ตี้ง กง ฮนอย แอ๋ง ต้าย ก๊อง น้าย เต๋ย หว่า ปุน นิ่น บัว หมวัง.

43หฒวัง เมี่ยน ปุน หฑาน วั้ว หฒั่น, ม่าย ยิวไท เมี่ยน เหธา กัน ยิวไท เมี่ยน เสียน เญย จั๋น ธั้ม เญย กัน เปาโล เหธา บานาบัด มี่ง. กง-โฒ่ บัว เหธา นิ่น บัว ก๊อง หย่า ขวิน นิ่น บัว อ๋อย หฒุ หฒั่นๆ เขา ว้วน ทิน-ฮู่ง เญย เอน.

44เถา ตะเหญ่ย นอม ตี้ง กง ฮนอย เฒี่ยง มู้ง เญย เมี่ยน อ๊า ลั่ม เต้าๆ มี่ง กั๊บ ฒุ้น หมวัง ทิน-ฮู่ง เญย โต์.

45มป่า ยิวไท เมี่ยน ปวัด เมี่ยน ต้าย ตุ๊ ด่ง หน่าย ธั้ม, นิ่น บัว ฯฒฯ หั่น ไห่, มี่ง แฑง เปาโล ก๊อง เญย หว่า, หย่า ก๊อง โตะ นิ่น.

46เปาโล เหธา บานาบัด ฯฒฯ ปู๋ง หล่าง เญย ก๊อง, “เยีย บัว ด่ง หาย อ๋อย หฒุ ต้าย ฒุ่น ทิน-ฮู่ง เญย หว่า ปุน เม่ย บัว หมวัง ด่าง. มป่า เม่ย บัว เฆ่ม, ไม้ ฝุน เม่ย บัว กั้น ผุย ตุ๊ ฒิบ เหยียด ลิ์ว เญย แหม่ง, เยีย บัว ฯฒฯ กวั่ง เม่ย บัว มี่ง ฒุ่น ปุน จั๋น หมวัง.

47เหว่ย หฒุ เฒี้ยว ฮนั้ง น้าย นอ พ้าย เยีย บัว, ‘เยีย ปุน เม่ย โหฒว นอม ฌัง หฒิว ปุน จั๋น, เหว่ย ปุน เม่ย ต้อ เหฌียว เอน มี่ง เถา จ่ม ลู่ง เดี๊ย.’”

48จั๋น ไฮ์ น้าย เต๋ย หว่า ฯฒฯ อะเฮน้ย ไห่, เธง เฒี้ยว เญย โต์. ทิน-ฮู่ง กิ๊น ต้าย เหว่ย ตุ๊ เหยียด ลิ์ว เญย แหม่ง วั้ว เต๋ย ฯฒฯ เสียน เยซู อ๊ะ.

49เฒี้ยว เญย โต์ ฯฒฯ ซีง ปวั๊ง วั้ว นอม เต่ย-ปูง.

50มป่า ยิวไท เมี่ยน โธะ-ฮู้ วั้ว นอม มู้ง โหฒว โฮล เญย มจั่ง ตอน เหธา กัน หลง ทิน-ฮู่ง หฒั่ง ตั๊ง เญย มเซียะ ตอน โหฒว โตะ เปาโล เหธา บานาบัด, หย่า หฒุ่น นิ่น บัว ธ้วด นิ่น บัว เญย เต่ย-จ๋าย.

51กง-โฒ่ บัว ฯฒฯ เฝง กั๊วะ เหฒา เญย เนีย-บูง เหว่ย โหฒว จั๋ง-โห่ ไกว๋ นิ่น บัว, ฆะฮ้า แอ๋ง มี่ง อีโคนียูม ฒี่ง.

52เยียม อันทีโอก ฒี่ง เญย เสียน เยซู เญย เมี่ยน เฌียน-โย่ว ไห่ หย่า ม่าย สีง ลี่ง ปวั๊ง เหฑ่ง นิ่น บัว เญย เฮญี้ยว.

← Chapter 12 Jump to: Chapter 14 →