Acts 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1ฒี่ง เญย เมี่ยน หลุ่น ป่า, ฆะฮ้า เปาโล เห่ว เสียน เยซู เญย หฒวัง เมี่ยน ต้าย ฒุ้น. นิ่น ขวิน ลิ์ว หย่า ก๊อง ลิ์ว เล่ย ฮยาง หว่า ฯฒฯ ธ้วด เจ๊า มี่ง มาซีโดเนีย เต่ย-ปูง.

2เจี๋ย น้าย นอม เต่ย-ปูง มี่ง เถา หาย, นิ่น ขวิน เสียน เยซู เญย เมี่ยน หย่า ฒุ่น โต์ ธั้ม เญย. ฮนั้ง น้าย นอ โหฒว เจี๊ยน มี่ง เถา กีก เต่ย-ปูง,

3เยียม วั้ว ปัว หฮลา เหญียะ. อ๋อย เปียะ ฑั้ง มี่ง ซีเลีย เต่ย-ปูง วั้ว หฒั่น, นิ่น ฮิ้ว ตุ๊ ยิวไท เมี่ยน ต๊า หฒะเอ๋ย ห่อย นิ่น. นิ่น ฯฒฯ ตี่ง เฮญี้ยว ต๋าว ซิน หฑวน มาซีโดเนีย.

4เหธา นิ่น มี่ง เญย เมี่ยน ม่าย เยียม เบโลอา ฒี่ง ต้าย วั้ว เต้า ปีลัด เญย ตอน, โสปาเท, เหธา เยียม เทสะโลนิกา ฒี่ง วั้ว เต๋ย อี เต้า อาลิดทาคัด เหธา เสคุนดัด, เหธา เยียม เดบี ฒี่ง วั้ว เต้า กายอัด, แอ๋ง ม่าย ทิโมไท หย่า ม่าย เอเซีย แซ้ง วั้ว เต๋ย อี เต้า ทีคิกัด เหธา โตฟีมัด.

5น้าย เต๋ย มี่ง ด่าง เยียม วั้ว โตอัด ฒั้ว เยีย บัว.

6เจี๋ย ลิ์ว ไม้ อัน ปี๊ง เญย ฌั้ว เญย ฒิบ, เยีย บัว เยียม ฟีลิบพอย เปียะ ฑั้ง มี่ง ปยา ฮนอย เถา โตอัด, กั๊บ เจี๊ยน ต่อย เยียม เหยียด นอม เล์ย-ป๋าย วั้ว.

7วั้ว นอม เล์ย-ป๋าย เญย ต้าว ฮนอย วั้ว ม์วน, ต้ง เยีย บัว กั๊บ ฒุ้น แมะ ฌั้ว วั้ว หฒั่น, เปาโล ก๊อง หว่า หฌาว หฒวัง เมี่ยน. นิ่น ฮิ้ว ตุ๊ ตะเหญ่ย ฮนอย นิ่น อ๋อย หฒุ ธ้วด เจ๊า ฯฒฯ ก๊อง หว่า ด๊าว เญย, เถา ด๊าม ม์วน.

8เยีย บัว กั๊บ ฒุ้น วั้ว ฑั่ง เปย๊า ปั๊ว เจี๊ยน ตัง ธั้ม เญย.

9ม่าย ล่าน เมี่ยน หลุน เมี่ยน, บั๋ว เห่ว ยูทิกัด, เฒว์ย เจี๊ยน ฟง ม่วน หมวัง เปาโล ก๊อง หว่า เล่า ไห่, ฯฒฯ มฌ่อม ตะฮงัด. เปาโล ก๊อง เจี๊ยน หว่า มี่ง, ยูทิกัด เฒียง หน่าย มฌ่อม โด เญย, เยียม ปัว ฑั่ง เปย๊า ด๊อด เหฌี่ย เถา เดา. เมี่ยน มี่ง ฮล้อบ เจี์ย ต้าย ปวัด ไต่ หมี่ อ๊ะ.

10เปาโล เหฌี่ย มี่ง บ๊าบ เหฌี่ย ชัม เจี๊ยน วั้ว เต้า ตอน หย่า ก๊อง, “ไม้ ตู๋ง กั้ม เหฑีย, นิ่น หธ่อ ม่าย แหม่ง เญย.”

11เปาโล แอ๋ง ฝาว กู้ หงว่าย มี่ง เฒาะ ฌั้ว ต้าย แมะ ปุน ฆอย หญั่น แอ๋ง ก๊อง หว่า เล่า เญย, เถา ลู่ง ฌัง, ฯฒฯ มี่ง หมี่ อ๊ะ.

12หฒวัง เมี่ยน ต้อ วั้ว เต้า ม่าย แหม่ง เฒี่ยง เจี๊ยน เญย ตอน หฑวน เปย๊า, ไฮ์ เฮญี้ยว ฟง เหฑ่ง อ๊ะ.

13เยีย บัว เปียะ ฑั้ง มี่ง อัดโสด ฒี่ง ด่าง, อ๋อย เยียม หน่าย ฒิบ เปาโล เหธา เยีย บัว เปียะ ฑั้ง. น้าย เซ เปาโล กั้น ตี่ง เหฒียง, เหว่ย หฒุ นิ่น อ๋อย ยั่ง เจ๊า กัน เบี๋ยน มี่ง.

14เยียม อัดโสด ฒี่ง, เปาโล ต้าย ปวั้ง เยีย บัว, เยีย บัว ฯฒฯ ฒิบ นิ่น เปียะ ฑั้ง มี่ง มิทิเลนี.

15ยั่ง ฑั้ง มี่ง, ตะเหญ่ย ฮนอย เยีย บัว เถา คีโอด ค้อย-โฑว. แอ๋ง ตะฟาม ฮนอย เจี๋ย มี่ง เถา สาม้อด ค้อย-โฑว, แอ๋ง ตะเฝย ฮนอย เยีย บัว มี่ง เถา มิเลทัด ฒี่ง.

16เปาโล ตี่ง เฮญี้ยว ไม้ ฮิด เอเฟโซ ฒี่ง, ไม้ อ๋อย เยียม เอเซีย แซ้ง เล่า. ไฮ่ ก๊าน ตุ๊ ฮี่ง นอ, นิ่น อ๋อย มี่ง เถา เยลูซาเลม ฒี่ง ด่าง เซียว เซียง-เบย้า เญย ฒิบ.

17เยียม มิเลทัด ฒี่ง, เปาโล พ้าย เมี่ยน มี่ง เอเฟโซ ฒี่ง บั๋ว จิว-ปาง เญย เมี่ยน โก๋ ต้าย ปวั้ง นิ่น.

18นิ่น บัว ต้าย เถา ฑ่อย, เปาโล บั๋ว นิ่น บัว, “เยียม เยีย เปียะ เอเซีย ต้าว ฮนอย เหธา เม่ย บัว เยียม เญย เฒี่ยง โห่, เยีย ฮนั้ง หาย นอ เยียม, ฮนั้ง หาย นอ โหฒว, เม่ย บัว ฮิ้ว เญย.

19เยีย เหญี่ยม กั้น โหฒว ไฝ, หย่า ม่าย ววม-เหมว่ย เหลี่ยว เจี๊ยน ฟู-สู เฒี้ยว หย่า หฒุ เหฒีย หญู่ง โค้ว เหว่ย หฒุ ยิวไท เมี่ยน ต๊า หฒะเอ๋ย ห่อย เยีย.

20เม่ย บัว หย่า ฮิ้ว ตุ๊ ม่าย หาย หญู่ง ไฮ่ เถง เม่ย บัว เยีย ฒุ่น บั๋ว เม่ย บัว, ไม้ เลี่ยว. เยียม ต้ม หฒวัง เญย ต๋อง หย่า เยียม เก๊าะ-เมี่ยน เญย เปย๊า เยีย หฌาว เหฑ่ง เม่ย บัว.

21ไม้ กุ๊น ยิวไท เมี่ยน ไฟ จั๋น, เยีย หลงๆ เญย ขวิน นิ่น บัว อ๋อย หฒุ ก๊อย เฮญี้ยว กวั่ง ฒุ์ย หฑวน ต้าย ล์อ ทิน-ฮู่ง หย่า เสียน บัว เญย เฒี้ยว เยซู กีตู่.

22“อี้ หฒั่น เหว่ย สีง ลี่ง อ๊าบ เยีย, เยีย ฯฒฯ มี่ง เยลูซาเลม ฒี่ง, มป่า เถา วั้ว อ๋อย ปวั้ง หฒุ หาย หญู่ง สี่ หย่า ไม้ ฮิ้ว.

23ขูง ฮิ้ว ตุ๊ เยียม นอมๆ ฒี่ง สีง ลี่ง โป๋ ปุน เยีย ฮิ้ว ตุ๊ อ๋อย หฒุ หววน โล่ หย่า อ๋อย หฒุ เสี่ยว เหฒีย หญู่ง โค้ว.

24เยีย หย่า ไม้ ฝุน เยีย เญย แหม่ง เหว่ย เยีย ม่าย หาย หญู่ง จ๋า-ฒิ่น. เยีย ขูง อ๋อย โหฒว เหฒียง เฒี้ยว เยซู พ้าย เยีย โหฒว เญย กง. น้าย เซ โหฒว ฒอง-เหฒง ก๊อง ทิน-ฮู่ง เญย เอน เญย คู้ เฝียน.

25“เยีย มี่งๆ ต้ายๆ เยียม เม่ย บัว น้าย ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน ปุน เม่ย บัว หมวัง. อี้ หฒั่น เยีย ฮิ้ว ตุ๊ ฆะฮ้า ฮี้ง เม่ย บัว ไม้ ตุ๊ ปวัด เยีย เญย เฮมียน อ๊ะ.

26เหว่ย น้าย เยีย หลงๆ เญย ก๊อง, สี ก๊อง เม่ย บัว หาย เต้า หฒุ เหมียด, ฒุ์ย ไม้ ด๊อด หฒุ เยีย.

27เหว่ย หฒุ เยีย เฒาะ ทิน-ฮู่ง เญย หฒะเอ๋ย เหยียด ฒู้ง ฒุ่น บั๋ว เม่ย บัว เหฑ่ง หมี่ อ๊ะ, ไม้ เลี่ยว เหยียด หญู่ง.

28เม่ย บัว อ๋อย หฒุ บู้ง เจี๊ยน โอ่. อ๋อย หฒุ โก๋ว หลง เม่ย บัว กั้น หย่า โก๋ว หลง สีง ลี่ง ปุน เม่ย บัว โก๋ว วั้ว เต๋ย เมี่ยน. อ๋อย หฒุ โก๋ว ทิน-ฮู่ง เญย จิว-ปาง, ต้ง นิ่น หล่ง นิ่น เญย ตอน เญย ฑย้าม ม์าย เญย จิว-ปาง, ฮนั้ง ยู์ง ยู่ง เญย เมี่ยน โก๋ว นิ่น บัว เญย ยู่ง นอ.

29เยีย ฮิ้ว ตุ๊ เยีย เล่ย ฆอย เม่ย บัว ลิ์ว, ฆะฮ้า ม่าย เธี้ยว ไห่ เญย เฮยี่ย จู๊ อ๋อย เปียะ เม่ย บัว กะญั์ว. นิ่น บัว หย่า ไม้ หญ่าง น้าย เต๋ย ยู่ง.

30เยียม เม่ย บัว กะญั์ว ฒู้ง อ๋อย ม่าย เมี่ยน เฒาะ เฒียน เล์ย ทิ้ว เป๋น จ๊า เล์ย ดั๊ว เสียน เยซู เญย เมี่ยน มี่ง กัน.

31อ๋อย หฒุ กีง เฮญี้ยว จั๋ง เจี๊ยน. ปัว หฮญัง กะญั์ว เยีย เฒี่ยง ฮนอย เฒี่ยง ม์วน ม่าย ววม-เหมว่ย เหลี่ยว เจี๊ยน ขวิน เม่ย บัว เต้าๆ.

32“อี้ หฒั่น เยีย เฒาะ เม่ย บัว จิว ปุน ทิน-ฮู่ง เหธา นิ่น เหธย เอน เญย โต์. น้าย โต์ ไฮ่ เหธย เม่ย บัว เจี์ย ต้าย หย่า ปุน เม่ย บัว เหธา นิ่น เญย ธีง-เหฑ่ง เมี่ยน ตุ๊ หฑิบ เม่ย บัว เญย ป่วน.

33เยีย หย่า ไม้ เม้า เจี๋ย หาย เต้า เญย เจียม ญ่าน ไฟ ลุย-โหว.

34เม่ย บัว กั้น ฮิ้ว ตุ๊ เยีย หล่ง เยีย กั้น เญย ปั์ว ล์อ ตุ๊ เยีย แอ๋ง เหธา เยีย เยียม เญย เมี่ยน เฉียม หล่ง เญย กะน้าย.

35เยีย โหฒว เญย หญู่งๆ เซ โหฒว หญู่ง เฒ้ย ปุน เม่ย บัว ฮิ้ว ตุ๊ อ๋อย หฒุ ฮนั้ง น้าย นอ โหฒว กง โค้ว เหว่ย เถง เมา เญย เมี่ยน. จั๋ง เจี๊ยน เฒี้ยว เยซู ก๊อง เญย หว่า. นิ่น ก๊อง, ‘ปุน เญย เก้า ม่าย ออน-เหลาะ ตุ๊ ฒิบ เญย.’”

36เปาโล ก๊อง เซ้ด น้าย เต๋ย หว่า นิ่น เหธา วั้ว เต๋ย หฒวัง เมี่ยน เกว่ย เหฌี่ย เดา เต๋า เก๋า.

37หฒวัง เมี่ยน เญี้ยม เหฑ่ง, ชัม เจี๊ยน เปาโล เญย จาง ฒม.

38นิ่น บัว เก้า เฑ่า เจี๋ย เซ เหว่ย นิ่น ก๊อง ฆะฮ้า ฮี้ง ไม้ ตุ๊ แอ๋ง ปวัด นิ่น เญย เฮมียน วั้ว โจ๋ว หว่า. นิ่น บัว ฯฒฯ ล่ม ฑ่อย ฝูง เปาโล มี่ง เปียะ ฑั้ง อ๊ะ.

← Chapter 19 Jump to: Chapter 21 →