Acts 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1ฆะฮ้า เปาโล ธ้วด อาเทน ฒี่ง แอ๋ง มี่ง โคลินโท ฒี่ง.

2เยียม วั้ว นิ่น ปวั้ง หฒุ เต้า ยิวไท เมี่ยน, บั๋ว เห่ว อาควินลา, เยียม ปอนทัด เต่ย-ปูง ธ้วด เสย เญย เมี่ยน. นิ่น เหธา นิ่น เญย เอ๊า, ปิดสินลา, เยียม อิตาลี กั๊วะ โคะ โหะ เปย๋า ต้าย เยียม โคลินโท ฒี่ง, เหว่ย หฒุ คาลาวดิอัด ฮู่ง หัด เหยียด ฒู้ง ยิวไท เมี่ยน ธ้วด โลมา ฒี่ง. เปาโล มี่ง ล์อ นิ่น บัว

3แอ๋ง เหธา นิ่น บัว เยียม จวั่ง กง โหฒว เหว่ย หฒุ เปาโล ฮนั้ง วั้ว เต๋ย อี ฮมวั้ง นอ, โหฒว ด๊บ-ลิ่ว เญย หฒั่ง.

4นอมๆ ตี้ง กง ฮนอย, เปาโล มี่ง วั้ว หวุ่ย ต้อง เหธา ยิวไท เมี่ยน เหธา จั๋น-กีก หลวน เล์ย ขวิน นิ่น บัว เสียน.

5ซีลา เหธา ทิโมไท เยียม มาซีโดเนีย เต่ย-ปูง ต้าย เถา, เปาโล กู๊ เจี๊ยน หล่ง นิ่น เญย เฒี่ยง โห่ ฒุ่น โต์ ฮนั้ง, ก๊อง เม่ง บั๋ว ยิวไท เมี่ยน เยซู เซ ต้ง กีตู่.

6ยิวไท เมี่ยน เหธา นิ่น ต๋อย-เตก, ก๊อง โตะ นิ่น วั้ว หฒั่น, เปาโล ฯฒฯ โซว นิ่น เญย ลุย-โหว เญย เนีย-บูง หย่า ก๊อง, “เม่ย บัว หฒุ ไต่ เญย ฒุ์ย เม่ย บัว กั้น อ๋อย หฒุ ดาม-ตอง. ฒุ์ย ไม้ ด๊อด หฒุ เยีย อ๊ะ. ยั่ง น้าย เจี๋ย เยีย มี่ง ล์อ จั๋น.”

7เปาโล ธ้วด วั้ว นอม หวุ่ย ต้อง มี่ง, เยียม เต้า หฒั่ง ทิน-ฮู่ง เญย จั๋น เญย เปย๊า. น้าย เต้า จั๋น เญย บั๋ว เห่ว ทิทิอัดยุสะทัด. นิ่น เยียม หวุ่ย ต้อง เญย กะเฮลน.

8โก๋ว หวุ่ย ต้อง เญย เมี่ยน โก๋ วั้ว เต้า คะลิดปัด เหธา นิ่น เญย เปย๊า ฒง เมี่ยน เสียน เฒี้ยว เหฑ่ง. แอ๋ง ม่าย โคลินโท ฒี่ง เญย เมี่ยน ธั้ม เญย ไฮ์ ลิ์ว โต์ ฯฒฯ เสียน แอ๋ง เจี๋ย ววม เญย เล์ย.

9ม่าย ม์วน นอ, เปาโล ปวัด หิ่น ย่าง เญย สี่. เฒี้ยว ก๊อง บั๋ว นิ่น, “เม่ย ไม้ ตู๋ง กั้ม เหฑีย โอ่. กุ๊น ก๊อง เจี๊ยน มี่ง, ไม้ ตู๋ง ตี้ง,

10เหว่ย หฒุ เยีย เหธา เม่ย เยียม. ฒู้ง ไม้ ม่าย หาย เต้า โหฒว หาย หญู่ง ห่อย เม่ย, เหว่ย หฒุ เยียม น้าย นอม ฒี่ง ม่าย เยีย เญย เมี่ยน ธั้ม เญย.”

11เปาโล ฯฒฯ เยียม หฮญัง-เปี๋ยน วั้ว, เฒาะ ทิน-ฮู่ง เญย โต์ หฌาว นิ่น บัว.

12กันลิโอ โหฒว อาคายา แซ้ง เญย หฒูง วั้ว หฒั่น, ยิวไท เมี่ยน ต้ง เฮญี้ยว มี่ง เฒาะ เปาโล ต้อ มี่ง วั้ว สี่ ต้อง.

13นิ่น บัว โก๋ นิ่น ก๊อง, “น้าย ล่าน เมี่ยน หฌาว เมี่ยน หฒั่ง ทิน-ฮู่ง มป่า หฌาว นิ่น บัว หฒั่ง ต่อง เล์ย.”

14เปาโล อ๋อย ก๊อง หว่า วั้ว หฒั่น, กันลิโอ ฯฒฯ ก๊อง ด่าง บั๋ว ยิวไท เมี่ยน, “สี ก๊อง นิ่น โหฒว หว่าย ไฟ โหฒว หาย หญู่ง เอ๊าะ เญย สี่, เยีย หอบ หฒุ หล่ง หน่อย หมวัง.

15มป่า เม่ย บัว แฑง ญิ่น เต๋า โญ์ว, แฑง บั๋ว, แฑง เม่ย บัว กั้น เญย เล์ย. เซว่ย เม่ย บัว กั้น เบ่น อ๊ะ. เยีย ไม้ อ๋อย เถง เม่ย บัว พ้าย น้าย เต๋ย สี่.”

16ก๊อง ลิ์ว, กันลิโอ ฯฒฯ หฒุ่น นิ่น บัว ธ้วด สี่ ต้อง หมี่ อ๊ะ.

17ธ้วด มี่ง นิ่น บัว ฯฒฯ เญา เจี๊ยน โก๋ว หวุ่ย ต้อง เญย เมี่ยน โก๋, โสสะเทเน้ด, เยียม วั้ว สี่ ต้อง เญย แก้ง ด่าง เบ๊าะ. มป่า กันลิโอ ไม้ กุ๊น นิ่น บัว อ๊ะ.

18เปาโล แอ๋ง เยียม โคลินโท ฒี่ง ธั้ม-ฮนอย เต๋ย เญย. ฆะฮ้า นิ่น เหธา เสียน เยซู เญย ก๋อ-หมั่ว ก๊อง ลิ์ว เล่ย ฮยาง หว่า, เปาโล เหธา เจี๊ยน ปิดสินลา เหธา อาควินลา เปียะ ฑั้ง มี่ง ซีเลีย เต่ย-ปูง. เยียม เคนเคเลีย วั้ว หฒั่น, เปาโล เถย เหฑ่ง บะเปยย เหว่ย หฒุ นิ่น เหธา ทิน-ฮู่ง แล์ง แหง่ง หว่า.

19เถา เอเฟโซ ฒี่ง, เปาโล เหธา ปิดสินลา, อาควินลา บัว อี ฮมวั้ง ปุน ฆอย ต่อย. เปาโล เปียะ หวุ่ย ต้อง มี่ง เหธา ยิวไท เมี่ยน หลวน เล์ย.

20หฒวัง เมี่ยน เลี่ยว นิ่น เยียม วั้ว เก้า เล่า เต๋ย มป่า นิ่น ไม้ แล์ง.

21นิ่น มี่ง วั้ว หฒั่น, นิ่น ก๊อง, “สี ก๊อง เอย ทิน-ฮู่ง เญย หฒะเอ๋ย เยีย แอ๋ง ต้าย หฑุ่น เม่ย บัว น้าย.” นิ่น ฯฒฯ เปียะ ฑั้ง ธ้วด เอเฟโซ ฒี่ง อ๊ะ.

22เถา ซีซาลียา ฒี่ง, นิ่น ธ้วด ฑั้ง มี่ง เยลูซาเลม. ปวั้ง ลิ์ว จิว-ปาง ต่อย นิ่น แอ๋ง มี่ง อันทีโอก ฒี่ง.

23เยียม หธาม วั้ว, นิ่น แอ๋ง มี่ง โย่ว กาลาเทีย เหธา ฟาลีเจีย เต่ย-ปูง เถง เสียน เยซู เญย เมี่ยน เสียน เฮ้น เจี๊ยน ฝาว.

24ม่าย เต้า ยิวไท เมี่ยน, บั๋ว เห่ว อาปอโล, ต้าย เถา เอเฟโซ ฒี่ง. นิ่น เซ เยียม อาเล้กซานเดเลีย ฒี่ง ธ้วด เสย เญย เมี่ยน. นิ่น ฒุ่น โต์ ก๊อง หว่า บย่าง หย่า ฮิ้ว ตุ๊ กีง-โซว โถว.

25นิ่น ตุ๊ โหะ เจี๋ย เฒี้ยว เญย เจ๊า ฯฒฯ จอม เฮญี้ยว หฌาว ปุน เมี่ยน ฮิ้ว ตุ๊ เยซู, หย่า หฌาว ตุ๊ เฒียน เญย. มป่า นิ่น ขูง ฮิ้ว ตุ๊ ม่าย โยฮัน เถง เมี่ยน เจี๋ย วั้ว หญู่ง เล์ย ฮนั้ง.

26อาปอโล เยียม หวุ่ย ต้อง ปู๋ง หล่าง เญย ฒุ่น โต์ หฌาว เมี่ยน. ปิดสินลา เหธา อาควินลา ไฮ์ นิ่น ก๊อง ฯฒฯ ฒิบ นิ่น มี่ง นิ่น บัว เญย เปย๊า แอ๋ง ก๊อง ทิน-ฮู่ง เญย เจ๊า ปุน นิ่น เก้า ฮิ้ว ตุ๊ ฑ่อย.

27อาปอโล อ๋อย เจี๋ย เถา อาคายา แซ้ง, เอเฟโซ เญย จิว-ปาง เมี่ยน เถง เจี๊ยน หย่า เฟี้ย เฝียน บั๋ว อาคายา แซ้ง เญย เสียน เยซู เญย เมี่ยน ฒิบ นิ่น. อาปอโล มี่ง เถา วั้ว, นิ่น เถง เขา ทิน-ฮู่ง เญย เอน เสียน ลิ์ว วั้ว เต๋ย เมี่ยน ธั้ม,

28เหว่ย หฒุ นิ่น ตอง หฒวัง แฑง ฮี่ง ยิวไท เมี่ยน. นิ่น หล่ง กีง-โซว ปุน ธีง เยซู เซ ต้ง กีตู่.

← Chapter 17 Jump to: Chapter 19 →