Acts 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1ปีเต เหธา โยฮัน เหธา หฒวัง เมี่ยน ก๊อง เจี๊ยน หว่า วั้ว หฒั่น, ม่าย เต๋ย ไซ เมี่ยน เหธา โก๋ว หฒั่ง ทิน-ฮู่ง เญย เปย๊า เญย แปง-เปย๊ย เหธา เต๋ย สะดูสี เมี่ยน ต้าย ล์อ นิ่น บัว.

2นิ่น บัว ไม้ หอบ เฮญี้ยว หลาย กง-โฒ่ บัว หฌาว หฒวัง เมี่ยน เยซู ไต่ แอ๋ง นั่ง ต้าย, ปุน ธีง เมี่ยน ไต่ มป่า ไฮ่ นั่ง ต้าย.

3นิ่น บัว ฯฒฯ เฒาะ น้าย เต๋ย อี เต้า หววน เจี๊ยน โล่ เถา ตะเหญ่ย ฮนอย, เหว่ย หฒุ วั้ว หฒั่น หฮมวัง อ๊ะ.

4มป่า หมวัง ลิ์ว โต์ ม่าย เมี่ยน จา เสียน ธั้ม เญย. เลี่ยม โล์ เญย ม่าย มจั่ง ตอน เล่ย ไม้ โก ปยา ธิน เต้า.

5ตะเหญ่ย ฮนอย โหฒว โฮล เญย ยิวไท เมี่ยน เหธา เมี่ยน โก๋ เหธา หฌาว เล์ย เญย ฟิน-แซง กั๊บ ฒุ้น เยียม เยลูซาเลม ฒี่ง.

6แอ๋ง ม่าย อันน้าด ต้ม ไซ เมี่ยน เหธา คายาฟ้าด, โยฮัน, อาเล้กซานเด เหธา เจี๊ยน ต้ม ไซ เมี่ยน เญย เหฒีย เต้า เธียน-เธะ.

7นิ่น บัว เห่ว เมี่ยน ต้อ ปีเต เหธา โยฮัน ต้าย โซ้ว เจี๊ยน นิ่น บัว เญย หฑะเฮมียน หน่าย ก๋า, “เม่ย บัว หล่ง หาย หญู่ง หลี่ง ไฟ เต๊ง หาย เต้า เญย บั๋ว โหฒว น้าย เต๋ย สี่?”

8ปีเต ตุ๊ สีง ลี่ง ปวั๊ง เฮญี้ยว ฯฒฯ เตา นิ่น บัว. นิ่น ก๊อง, “เหยียด หฒวัง โหฒว โฮล เญย ยิวไท เมี่ยน เหธา เมี่ยน โก๋ อ้า!

9สี ก๊อง เม่ย บัว อี้ ฮนอย หน่าย เถา โหฒว น้าย เต๋ย คู้ สี่ ปุน น้าย เต้า เหฒา ไบ เญย เมี่ยน หย่า หน่าย เถา นิ่น ฮนั้ง หาย นอ หฒ่อ หลง,

10เม่ย บัว หฒวัง เมี่ยน เหธา อิสะลาเอน เญย เหยียด ฒู้ง เมี่ยน อ๋อย หฒุ ฮิ้ว, อี้ หฒั่น โซ้ว เจี๊ยน เม่ย บัว เญย หฑะเฮมียน น้าย เต้า เมี่ยน เหฒา หลง เหฑ่ง เซ เหว่ย นาซาเล้ด มู้ง เญย เยซู กีตู่ เญย บั๋ว, ต้ง เม่ย บัว ตีง เหฒียบ หฑั่ง จ๋า ไต่ มป่า ทิน-ฮู่ง ปุน นั่ง ต้าย.

11เยซู เซ ต้ง กีง-โซว เฟี้ย เจี๊ยน ก๊อง, ‘เม่ย บัว ก๊ม เปย๊า หฒั่ง เฆ่ม ธ้วด วั้ว นอม หละเปย๊ย, ฒู้ง เป๋น อัน เปย๊า-เก๊าะ เก้า หล่ง เจี๊ยน เจี๋ย วั้ว นอม.’

12“ธ้วด ลิ์ว เยซู, ไม้ ม่าย หาย เต้า ไฮ่ ปุน เมี่ยน ตุ๊ เหฌียว, เหว่ย หฒุ เยียม ลู่ง เดี๊ย หม่าน เมี่ยน บุด๋ง, ทิน-ฮู่ง ไม้ เหธย กั้น นอม บั๋ว, ปุน บัว อ๋อย หฒุ เขา ตุ๊ เหฌียว.”

13วั้ว เต๋ย โหฒว โฮล เญย เมี่ยน เหธา เมี่ยน โก๋ ปวัด ปีเต เหธา โยฮัน ปู๋ง ตุ๊ หล่าง ไห่, เตา นิ่น บัว, หย่า ฮิ้ว ตุ๊ น้าย เต๋ย อี ล่าน เมี่ยน ไม้ ตุ๊ เค้า เจี๋ย โซว-หฑั่ง, ขูง โหฒว โพว-ทง เมี่ยน ฮนั้ง, นิ่น บัว บัวะ ฮ่อง ไห่ ฯฒฯ จั๋ง หฒุ น้าย เต๋ย อี ล่าน เมี่ยน กัน เจี๋ย เยซู.

14นิ่น บัว หย่า ปวัด หฒ่อ หลง วั้ว ล่าน เมี่ยน โซ้ว เจี๊ยน ปีเต เหธา โยฮัน เญย กะเฮลน, เฒียง หน่าย ไม้ ม่าย หว่า ก๊อง อ๊ะ.

15นิ่น บัว เห่ว ปีเต บัว ธ้วด กุ๊น สี่ หวุ่ย. นิ่น บัว กั้น เยียม วั้ว ธ่าง ล่าง

16ก๊อง, “บัว อ๋อย หฒุ ฮนั้ง หาย นอ โหฒว ปุน น้าย เต๋ย เมี่ยน นี? เยียม เยลูซาเลม ฒี่ง เต้าๆ ฮิ้ว ตุ๊ ต้ง น้าย เต๋ย อี ล่าน โหฒว น้าย เต๋ย บัวะ ฮ่อง ไห่ เญย จั๋ง-โห่. บัว กั้น ไม้ ไฮ่ แหง่ง ก๊อง ไม้ เฒ์ย.

17บัว อ๋อย หฒุ หัด เจี๊ยน ไม้ ตู๋ง ปุน นิ่น บัว เต๊ง เยซู เญย บั๋ว เหธา หาย เต้า ก๊อง หาย หญู่ง, เหว่ย ปุน น้าย เต๋ย สี่ ไม้ ไฮ่ ฒุ่น จั๊ง มี่ง.”

18ธ่าง ล่าง ป่า, นิ่น บัว แอ๋ง เห่ว ปีเต เหธา โยฮัน เปียะ ต้าย, หัด นิ่น บัว ธิน-หม่าน ไม้ ตู๋ง เต๊ง เยซู เญย บั๋ว ก๊อง ไฟ หฌาว หาย หญู่ง.

19มป่า ปีเต เหธา โยฮัน เตา นิ่น บัว, “เม่ย บัว ฮนั้ม หมั่ง ก๋า, เอย ทิน-ฮู่ง หมั่ง, เยีย บัว หมวัง เม่ย บัว เก้า หอบ หมวัง ทิน-ฮู่ง ไฟ?

20เยีย บัว ปวัด เจี๋ย, ไฮ์ เจี๋ย เญย สี่, เยีย บัว ไม้ ไฮ่ กวั่ง ไม้ ก๊อง.”

21กุ๊น สี่ เมี่ยน ฮนั้ม ไม้ ทง ฮนั้ง หาย นอ ไฮ่ ตี่ง ปีเต บัว เญย ฒุ์ย, เหว่ย หฒุ ปวัด หฒวัง เมี่ยน เหว่ย น้าย คัง สี่ เธง ทิน-ฮู่ง. ฮนั้ง หน่าย, กุ๊น สี่ เมี่ยน จา หัด เฮนี้ย เญย ลิ์ว, ฯฒฯ ปู๋ง นิ่น บัว อ๊ะ.

22ต้ง ตุ๊ บัวะ ฮ่อง เญย จั๋ง-โห่ หฒ่อ หลง วั้ว ล่าน เมี่ยน เญย หฮญัง-เจ๊ย ตุ๊ เฝย เหฒียบ เล่ง หฮญัง.

23กุ๊น สี่ เมี่ยน ปู๋ง ปีเต เหธา โยฮัน ธ้วด วั้ว หฒั่น, ปีเต บัว แปง หฒะ เญย หฑวน นิ่น บัว กั้น วั้ว กวั้น เมี่ยน, เฒาะ ไซ เมี่ยน เปย๊ย เหธา เมี่ยน โก๋ บัว ก๊อง เญย หว่า บั๋ว เหฑ่ง นิ่น บัว.

24ไฮ์ ลิ์ว น้าย เต๋ย หว่า, วั้ว เต๋ย เมี่ยน ล่ม ฑ่อย หอบ ฟิม ต้ง เอ๋ย ธ้วด เฉีย เต๋า เก๋า บั๋ว ทิน-ฮู่ง, “เฒี้ยว อ้า! เม่ย เหฒย ลู่ง เหฒย เดา เหฒย ค้อย, หย่า เหฒย เยียม น้าย เต๋ย กะญั์ว เญย หม่าน หมวด.

25เม่ย หล่ง สีง ลี่ง ปุน เยีย บัว เญย อง-ถาย, เม่ย เญย โปว, ดาวิด, โต่ว หว่า ก๊อง, ‘หม่าน ฝีง จั๋น เหว่ย หาย ติ่ว เฉีย เจี์ย? นิ่น บัว เหว่ย หาย ติ่ว ต๊า ธ้วด ไม้ ลั่ม หล่ง เญย หฒะเอ๋ย?

26ป้าม เกน เญย ฮู่ง เบ่น เหฒียง, ต้ม เจียน หย่า กั๊บ ฒุ้น ต้ง เฮญี้ยว เหธา เฒี้ยว เหธา นิ่น ออน ต้าย วั้ว เต้า ต๋อย-เตก.’

27“หฒะเก้ง ม่าย เฮโล้ด ฮู่ง เหธา ปอนทิอัด ปีล้าด เยียม น้าย นอม ฒี่ง เหธา เจี๊ยน จั๋น, เหธา อิสะลาเอน เมี่ยน กั๊บ ฒุ้น ต้าย ต้ง เฮญี้ยว แหง่ง เจี๊ยน เม่ย เญย ธีง-เหฑ่ง โปว, เยซู, ต้ง เม่ย พ้าย โหฒว กีตู่ วั้ว เต้า.

28นิ่น บัว โหฒว หญู่งๆ เอย เม่ย กั้น เญย หัด ม์า เหธา เอย เม่ย เญย เอ๋ย จา-ด่าง ตี่ง เหฒียง อ๋อย ธ้วด ต้าย เญย สี่.

29เฒี้ยว อ้า! โท้ เม่ย อี้ หฒั่น จั๋ง เจี๊ยน นิ่น บัว ก๊อง แฮะ เยีย บัว วั้ว เต๋ย หว่า, หย่า ปุน เยีย บัว, เม่ย เญย โปว, ปู๋ง หล่าง เญย ก๊อง เม่ย เญย โต์.

30“โท้ เฒี้ยว ซูง ปั์ว ธ้วด ต้าย หฒ่อ แป่ง แอ๋ง ปุน เยีย บัว เขา เม่ย เญย ธีง-เหฑ่ง โปว, เยซู, เญย บั๋ว โหฒว ธ้วด บัวะ ฮ่อง เญย จั๋ง-โห่ เหธา ฮนั้ม ไม้ เม่ง แปะ เญย สี่.”

31เต๋า เก๋า ป่า, ต้ง นิ่น บัว กั๊บ ฒุ้น วั้ว นอม ต๋อง ต์ง เหฑ่ง. เต้าๆ ตุ๊ สีง ลี่ง ปวั๊ง เฮญี้ยว ฯฒฯ ปู๋ง หล่าง เญย ก๊อง ธ้วด ทิน-ฮู่ง เญย หว่า.

32หฒวัง เสียน เยซู เญย เมี่ยน หอบ ฟิม ต้ง เอ๋ย. ไม้ ม่าย หาย เต้า ก๊อง หาย หญู่ง เป๋น นิ่น กั้น เญย สิ เจ๊ย กะน้าย. เหยียด ฒู้ง เป๋น ต้ม หฒวัง เญย, จวั่ง เจี๊ยน หล่ง.

33กง-โฒ่ บัว ม่าย ต้ม ชะ โหฒว ฒอง-เหฒง ก๊อง เฒี้ยว เยซู นั่ง ต้าย เญย เจ๊า-โหล่ว. ทิน-ฮู่ง หย่า ธั้มๆ เญย เหธย ฟุ ปุน นิ่น บัว โม์ว ล่าน เมี่ยน.

34เยียม น้าย กวั้น เมี่ยน ไม้ ม่าย หาย เต้า ธา หาย หญู่ง เหว่ย หฒุ หาย เต้า ม่าย ลี่ง เต่ย, ม่าย เปย๊า, ฯฒฯ หม่าย มี่ง ต้อ ญ่าน ต้าย จิว ปุน กง-โฒ่ บัว.

35กง-โฒ่ บัว ฯฒฯ เอย เก๊าะ-เมี่ยน เฉียม หล่ง เญย ปุน ฆอย เก๊าะ-เมี่ยน.

36ม่าย เต้า เลวี เมี่ยน, บั๋ว เห่ว โยเซ้บ, เยียม ไซปัด ค้อย-โฑว ธ้วด เสย. กง-โฒ่ บัว แอ๋ง ธ้วด นอม บั๋ว เห่ว บานาบัด. เอ๋ย เล์ย เซ “ออน เฮญี้ยว เญย ตอน.”

37นิ่น หม่าย ฑง นิ่น เญย เด่ย, ต้อ ญ่าน ต้าย จิว ปุน กง-โฒ่ บัว.

← Chapter 3 Jump to: Chapter 5 →