Acts 9

Mien Bible (Thai Script) © Thailand Bible Society, 2007

1เซาโล หาย หฒั่น หย่า เซีย เจี๊ยน หว่า อ๋อย ไต๋ เฒี้ยว เญย เมี่ยน. นิ่น ฯฒฯ มี่ง เถา ต้ม ไซ เมี่ยน วั้ว

2โท้ โซว ต้อ มี่ง ดามัดกัด ฒี่ง, ยิวไท เมี่ยน เญย นอมๆ หวุ่ย ต้อง, ล์อ กัน เฒี้ยว เญย เจ๊า เญย เมี่ยน, ไม้ กุ๊น มจั่ง มเซียะ, เฒาะ นิ่น บัว โด้ เจี๊ยน ฝูง มี่ง เยลูซาเลม ฒี่ง.

3เซาโล มี่ง เกา, อ๊า ลั่ม เต๋ย เถา ดามัดกัด ฒี่ง. เลี่ยม เฒ่ย เยียม วั้ว ลู่ง ธ้วด นอม ต้ม ฌัง หฒิว ก๋อม เซาโล เญย ซิน.

4นิ่น ฯฒฯ คีง เหฌี่ย เดา หย่า ไฮ์ ก๊อง, “เซาโล อ้า! เซาโล! เม่ย เหว่ย หาย ติ่ว โหฒว โตะ เยีย?”

5เซาโล ฯฒฯ หน่าย ก๋า, “เฒี้ยว อ้า! เม่ย ต้ง หาย เต้า?” เซาโล แอ๋ง ไฮ์ หว่า เตา นิ่น, “เยีย เซ เยซู, ต้ง เม่ย โหฒว โตะ วั้ว เต้า.

6เจี์ย ซิน ต้าย เปียะ ฒี่ง อ๊ะ. เม่ย อ๋อย หฒุ โหฒว เญย ฯฒฯ ม่าย เมี่ยน บั๋ว เม่ย.”

7เหธา เซาโล ต้าย วั้ว เต๋ย เมี่ยน ตี้ง เจี๊ยน วั้ว, เลี่ยม ก๊อง หว่า ไม้ ธ้วด. นิ่น บัว ไฮ์ ม่าย เฉีย มป่า ไม้ ปวัด หาย เต้า.

8เซาโล เจี์ย ซิน ต้าย หนูง ฆอย มฒีง หย่า หมั่ง ไม้ ปวัด หาย หญู่ง. กัน นิ่น ต้าย วั้ว เต๋ย เมี่ยน เคน นิ่น มี่ง เถา ดามัดกัด ฒี่ง.

9ตุ๊ ปัว ฮนอย กะญั์ว นิ่น เญย มฒีง หมั่ง ไม้ ปวัด หาย หญู่ง. นิ่น หย่า ไม้ หญั่น ไม้ ฮบ หาย หญู่ง.

10เยียม ดามัดกัด ฒี่ง ม่าย เต้า ไซ-ก๋อ, บั๋ว เห่ว อานาเนีย, ปวัด หิ่น ย่าง เญย สี่. เฒี้ยว เห่ว นิ่น, “อานาเนีย อ้า!” นิ่น ฯฒฯ เตา, “เฒี้ยว อ้า! เยีย เยียม น้าย โอ่.”

11เฒี้ยว ก๊อง บั๋ว นิ่น, “อ๋อย หฒุ มี่ง ม่าย บั๋ว เห่ว เจ๊า-หฒะ วั้ว ติ้ว เจ๊า. เถา ยูดาด เญย เปย๊า อ๋อย หฒุ หน่าย, ทาซัด ฒี่ง เญย เซาโล เยียม หาย. นิ่น เต๋า เก๋า เจี๊ยน เญย,

12หย่า ปวัด หิ่น ย่าง เญย สี่. นิ่น ปวัด ล่าน เมี่ยน, บั๋ว เห่ว อานาเนีย, เปียะ ต้าย หล่ง ปั์ว มาน นิ่น, ปุน นิ่น แอ๋ง ไฮ่ หมั่ง ตุ๊ ปวัด ต้าย.”

13อานาเนีย เตา, “เฒี้ยว อ้า! เยีย ไฮ์ เมี่ยน ธั้ม เญย ก๊อง วั้ว ล่าน เมี่ยน เยียม เยลูซาเลม ฒี่ง กวัด โตะ ห่อย เม่ย เญย ธีง-เหฑ่ง เมี่ยน โค้ว ไห่ น่อ.

14นิ่น หย่า ตุ๊ ไซ เมี่ยน เปย๊ย เญย หลี่ง ต้าย น้าย, ดามัดกัด ฒี่ง, เฒาะ เหยียด ฒู้ง เสียน เม่ย เญย เมี่ยน โด้ เจี๊ยน.”

15เฒี้ยว ก๊อง บั๋ว นิ่น, “กุ๊น มี่ง ม่าะ! เยีย กิ๊น นิ่น ต้าย โหฒว เยีย เญย โปว. นิ่น อ๋อย หฒุ ฒุ่น เยีย เญย บั๋ว ปุน หม่าน ฝีง จั๋น เหธา นิ่น บัว เญย ฮู่ง เตี๋ย แอ๋ง เหธา อิสะลาเอน เมี่ยน หมวัง.

16เยีย กั้น อ๋อย ปุน นิ่น ฮิ้ว ตุ๊ นิ่น เหว่ย เยีย เญย บั๋ว อ๋อย หฒุ เสี่ยว ด่ง หาย โค้ว.”

17อานาเนีย ฯฒฯ มี่ง อ๊ะ. เถา วั้ว นิ่น เปียะ เปย๊า มี่ง, ฯฒฯ มาน เจี๊ยน เซาโล ก๊อง, “เซาโล โย์ว อ้า! ต้ง เยียม ด๊าม-เจ๊า หิ่น ย่าง ปุน เม่ย ปวัด วั้ว เต้า เฒี้ยว เยซู, พ้าย เยีย ต้าย เหว่ย ปุน เม่ย แอ๋ง ไฮ่ หมั่ง ตุ๊ ปวัด, หย่า ตุ๊ สีง ลี่ง ปวั๊ง เม่ย เญย เฮญี้ยว.”

18เลี่ยม เฒ่ย ม่าย กะน้าย ฮนั้ง เบย์า-เจี๋ย นอ, เยียม เซาโล เญย มฒีง ด๊อด เหฌี่ย. นิ่น ฯฒฯ หมั่ง ตุ๊ ปวัด อ๊ะ. นิ่น เจี์ย ซิน ต้าย เจี๋ย ววม เญย เล์ย.

19หญั่น ลิ์ว หฮนาง, นิ่น ฯฒฯ เฮ้น ต้าย อ๊ะ. เซาโล เหธา ดามัดกัด ฒี่ง เสียน เยซู เญย เมี่ยน เยียม อี เหฒีย ฮนอย.

20นิ่น เลี่ยม เฒ่ย มี่ง ยิวไท เมี่ยน เญย หวุ่ย ต้อง ฒุ่น บั๋ว เมี่ยน เยซู หฒะเก้ง ทิน-ฮู่ง เญย ตอน.

21หมวัง ไฮ์ เญย เมี่ยน เหยียด ฒู้ง บัวะ ฮ่อง ไห่ ฯฒฯ หน่าย, “น้าย ล่าน เมี่ยน ต้ง เยียม เยลูซาเลม ฒี่ง โหฒว โตะ ห่อย เสียน เยซู เญย เมี่ยน วั้ว เต้า ไม้ เฒ์ย? นิ่น ป่าๆ ต้าย น้าย เฒาะ เสียน เยซู เญย เมี่ยน โด้ เจี๊ยน ต้อ มี่ง ปุน ไซ เมี่ยน เปย๊ย ซ่าะ?”

22เซาโล กุ๊น โหฒว กุ๊น ม่าย หัด ม์า ฒุ่น โต์, ไฮ่ ก๊อง ตุ๊ เม่ง ปุน ธีง เยซู ต้ง กีตู่. ดามัดกัด ฒี่ง เญย ยิวไท เมี่ยน เลี่ยม ไม้ ไฮ่ เตา นิ่น อ๊ะ.

23เยียม วั้ว ธั้ม-ฮนอย เต๋ย เญย, ยิวไท เมี่ยน ธ่าง ล่าง ต๊า หฒะเอ๋ย ไต๋ เซาโล.

24มป่า นิ่น บัว ต๊า เญย หฒะเอ๋ย เซาโล ฮิ้ว หมี่ อ๊ะ. วั้ว เต๋ย เมี่ยน เฒี่ยง ฮนอย เฒี่ยง ม์วน ฒั้ว เจี๊ยน ฒี่ง แก้ง อ๋อย ไต๋ นิ่น.

25มป่า ม่าย ม์วน เซาโล เญย ไซ-ก๋อ หล่ง นอม บาด ปู๋ง นิ่น กัน ฒี่ง หลาด ค้วด ธ้วด กะเหญี่ย หฒิ ฒี่ง หมี่ อ๊ะ.

26เซาโล มี่ง เถา เยลูซาเลม ฒี่ง, นิ่น อ๋อย เหธา ไซ-ก๋อ บัว เยียม มป่า ไซ-ก๋อ บัว กั้ม เหฑีย ไห่. ไม้ เสียน นิ่น หย่า โหฒว ไซ-ก๋อ.

27มป่า บานาบัด ต้อ นิ่น มี่ง กง-โฒ่ บัว วั้ว ก๊อง ปุน นิ่น บัว ฮิ้ว ตุ๊, เซาโล เยียม ด๊าม-เจ๊า วั้ว หฒั่น เฒี้ยว หิ่น ย่าง ปุน นิ่น ปวัด หย่า เหธา นิ่น ก๊อง หว่า. บานาบัด แอ๋ง ก๊อง เซาโล เยียม ดามัดกัด ฒี่ง ปู๋ง หล่าง เญย เต๊ง เยซู เญย บั๋ว ฒุ่น โต์.

28เซาโล ฯฒฯ เหธา นิ่น บัว เยียม เยลูซาเลม ฒี่ง เปียะๆ ธ้วดๆ, ปู๋ง หล่าง เญย เต๊ง เยซู เญย บั๋ว ฒุ่น โต์.

29นิ่น หย่า เหธา ก๊อง กีก หว่า วั้ว เต๋ย ยิวไท เมี่ยน ก๊อง เล์ย หลวน เล์ย, มป่า นิ่น บัว อ๋อย ต๊า หฒะเอ๋ย ไต๋ นิ่น.

30ก๋อ-โย์ว บัว ฮิ้ว ตุ๊ เมี่ยน อ๋อย ไต๋ นิ่น, นิ่น บัว ฯฒฯ ต้อ เซาโล มี่ง ซีซาลียา ฒี่ง, แอ๋ง ฝูง นิ่น ธ้วด เจ๊า มี่ง ทาซัด ฒี่ง.

31น้าย เต๋ย เจ๊า เจี๋ย ลิ์ว, เยียม ยูเดีย, กาลิลี เหธา สะมาเลีย แซ้ง นอมๆ ต๋อง เญย จิว-ปาง ตุ๊ โต่ว แป้ง ออน เญย เยียม หย่า ตุ๊ เหธย เจี์ย ต้าย. นิ่น บัว ท่าย เฒี้ยว. สีง ลี่ง หย่า ออน นิ่น บัว เญย เฮญี้ยว หย่า ปุน เมี่ยน จา ธั้ม เจี๊ยน ฝาว.

32ปีเต โย่ว ก๋อม นอมๆ ต๋อง. ม่าย หฑุ่น นิ่น มี่ง ลิดดา มู้ง หมั่ง เสียน เยซู เญย เมี่ยน.

33เยียม วั้ว นิ่น ปวัด ล่าน เมี่ยน, บั๋ว เห่ว ไอเนอัด. น้าย ล่าน เมี่ยน ปุ๊ด แป่ง-ไบ, ไม้ ไฮ่ เจี์ย ซิน, เปว๋ย เจี๊ยน ตุ๊ เหฮยียด หฮญัง อ๊ะ.

34ปีเต ก๊อง บั๋ว นิ่น, “ไอเนอัด อ้า! เยซู กีตู่ หฒ่อ หลง เม่ย อ๊ะ. เจี์ย ซิน ต้าย เซียว เจี์ย เม่ย เญย หฒิ ม่าะ!” ไอเนอัด เลี่ยม เฒ่ย เจี์ย ซิน ต้าย อ๊ะ.

35เหยียด ฒู้ง เยียม ลิดดา เหธา ซาโลน มู้ง เญย เมี่ยน ปวัด น้าย ล่าน เมี่ยน หลง, นิ่น บัว ฯฒฯ ก๊อย เฮญี้ยว เสียน เฒี้ยว.

36เยียม ยับฟา มู้ง ม่าย เต้า เสียน เยซู เญย มเซียะ ตอน, บั๋ว เห่ว ทาบิทา. (ก๊อง เป๋น กีก หว่า เซ โดคัด.) นิ่น หฒั่นๆ โหฒว คู้ สี่ หย่า ธ้วด ฟิม เถง เมี่ยน จ่ม เมี่ยน.

37ต้ง วั้ว เต๋ย เฒี่ยง โห่ นิ่น ปุ๊ด แป่ง ไต่ หมี่ อ๊ะ. เมี่ยน หฑาว นิ่น เญย ซิน แอ๋ง เกะ เจี๊ยน กู้ หงว่าย วั้ว ฑั่ง เปย๊า.

38ลิดดา เหธา ยับฟา มู้ง เล่ย ไม้ โก. ยับฟา มู้ง เญย เสียน เยซู เญย เมี่ยน ไฮ์ ก๊อง ปีเต เยียม ลิดดา มู้ง, นิ่น บัว ฯฒฯ พ้าย อี ล่าน เมี่ยน มี่ง วั้ว บั๋ว นิ่น, “โท้ เม่ย ก๊าน ต้าย เยีย บัว น้าย.”

39ปีเต ฯฒฯ กัน นิ่น บัว มี่ง อ๊ะ. มี่ง เถา, เมี่ยน ฯฒฯ ต้อ นิ่น ฝาว กู้ หงว่าย วั้ว ฑั่ง เปย๊า. เหยียด ฒู้ง เอ๊า-กว๊า เว่ย เจี๊ยน ปีเต, เญี้ยม เจี๊ยน เฒาะ โดคัด เฒี่ยง เสย ลุ่น เญย ลุย-โหว ปุน นิ่น หมั่ง.

40มป่า ปีเต เห่ว นิ่น บัว เหยียด ฒู้ง ธ้วด กะเหญี่ย ฯฒฯ เกว่ย เหฌี่ย เต๋า เก๋า. เต๋า เก๋า ป่า, นิ่น ฮวิน หฑวน บั๋ว จั๋น-ไต่, “ทาบิทา อ้า! เจี์ย ซิน ต้าย ม่าะ!” ทาบิทา ฯฒฯ หนูง ฆอย มฒีง, ปวัด ปีเต, นิ่น ฯฒฯ เจี์ย ซิน ต้าย เฒว์ย เจี๊ยน.

41ปีเต ซูง ปั์ว เคน นิ่น เจี์ย ซิน ต้าย โซ้ว เจี๊ยน, แอ๋ง เห่ว เสียน เยซู เญย หฒวัง เมี่ยน เหธา วั้ว เต๋ย เอ๊า-กว๊า ต้าย, จิว น้าย เต้า นั่ง ต้าย เญย มเซียะ ตอน ปุน นิ่น บัว.

42น้าย เต๋ย สี่ เญย เฝียน ซีง ปวั๊ง ยับฟา มู้ง. เมี่ยน ธั้ม เญย หย่า เสียน เฒี้ยว.

43ฆะฮ้า ปีเต เยียม หธาม ยับฟา มู้ง, วั้ว เต้า ด๊บ-หฒั่ง, ซีโมน, เญย เปย๊า.

← Chapter 8 Jump to: Chapter 10 →