Acts 26

Mien Bible (Thai Script) © Thailand Bible Society, 2007

← Chapter 25 Jump to: Chapter 27 →

1อาฆีพา ฮู่ง ก๊อง บั๋ว เปาโล, “อี้ หฒั่น เยีย อี๊ ธ่ง เม่ย ก๊อง เม่ย กั้น เญย เจ๊า อ๊ะ.” เปาโล ฯฒฯ ซูง ปั์ว ธ้วด ก๊อง ไจ๊ ซิน เญย หว่า.

2นิ่น ก๊อง, “อาฆีพา ฮู่ง อ้า! เยีย อี้ ฮนอย ม่าย ต้ม หว่วน เฉีย ตุ๊ เยียม เม่ย เญย หฑะเฮมียน ก๊อง ยิวไท เมี่ยน โก๋ เยีย เญย เหยียด ฒู้ง สี่,

3เหว่ย หฒุ เม่ย ฮิ้ว ยิวไท เมี่ยน เญย เล์ย-ฝีง หย่า ฮิ้ว ตุ๊ นิ่น บัว แฑง เญย เจ๊า ธั้ม เญย. ฮนั้ง หน่าย, เยีย โท้ เม่ย หล่ง หน่อย หมวัง เยีย ก๊อง โอ่.

4“หฒวัง ยิวไท เมี่ยน ฮิ้ว ตุ๊ เยีย เญย เสย ฮนั้ง หาย นอ. เยียม เยีย หลุน เญย เฒี่ยง โห่ เยีย เยียม เยีย กั้น เญย ป๊วน-กั๊วะ เญย แปะ ฝีง บุด๋ง หย่า เยียม เยลูซาเลม ฒี่ง.

5นิ่น บัว ฮิ้ว ตุ๊ เยีย เล่า ไห่ อ๊ะ. สี ก๊อง นิ่น บัว หญุ่น เถง เยีย โหฒว ฒอง-เหฒง นอ, นิ่น บัว ฮิ้ว ตุ๊ เยีย โหฒว ฟาลิสี เมี่ยน, ต้ง กัน เล์ย เก้า หม่วน เจี๋ย วั้ว เจ๊า.

6อี้ หฒั่น เยีย โซ้ว เจี๊ยน น้าย หฒุ เซี้ยม เซ เหว่ย เยีย ม่าย ลั่ม ฮนั้ม ทิน-ฮู่ง อ๋อย โหฒว เอย นิ่น เหธา เยีย บัว เญย อง-ถาย แล์ง เจี์ย เญย แหง่ง หว่า.

7เยีย บัว เหฒียบ เหญ่ย ฝีง ยิวไท เมี่ยน หย่า ฟี่ ฮนั้ง เญย ม่าย น้าย หญู่ง ม่าย ลั่ม ฮนั้ม หธีง ต้าย ดอม ฒิ่น เฑี้ยว หฮมวัง หฒั่ง ทิน-ฮู่ง ฒั้ว เจี๊ยน. ฮู่ง เตี๋ย อ้า! เซ เหว่ย น้าย หญู่ง ม่าย ลั่ม ฮนั้ม ยิวไท เมี่ยน หธีง ต้าย โก๋ เยีย.

8เม่ย บัว ยิวไท เมี่ยน เหว่ย หาย ติ่ว ไม้ ไฮ่ เสียน เมี่ยน ไต่ มี่ง มป่า ทิน-ฮู่ง ไฮ่ ปุน นั่ง ต้าย?

9“ฒิ่น ด่าง เยีย หย่า ฮนั้ม เยีย อ๋อย หฒุ หล่ง เหฑ่ง หฒะเอ๋ย โหฒว โตะ นาซาเล้ด มู้ง วั้ว เต้า เยซู เญย บั๋ว.

10เยีย หย่า เยียม เยลูซาเลม ฒี่ง ฮนั้ง หน่าย โหฒว. ไซ เมี่ยน เปย๊ย ปุน เยีย ม่าย หลี่ง เฒาะ เสียน เยซู เญย เมี่ยน ธั้ม เญย ต้าย หววน เจี๊ยน โล่. นิ่น บัว หฒุ ตี่ง ไต๋ วั้ว หฒั่น เยีย หย่า อะเฮน้ย เญย.

11เยีย มี่ง นอมๆ หวุ่ย ต้อง ห่อย นิ่น บัว ธั้ม-หฑุ่น อ๊ะ. อ๋อย อ๊าบ นิ่น บัว ก๊อง คี เยซู. เยีย เฉีย เจี์ย ไห่ นิ่น บัว, ฒู้ง มี่ง เถา เหญี่ย กั๊วะ เญย ฒี่ง โหฒว โตะ นิ่น บัว.

12“ม่าย หฑุ่น เยีย ตุ๊ ไซ เมี่ยน เปย๊ย เญย หัด ม์า เหธา หลี่ง มี่ง ดามัดกัด ฒี่ง.

13ฮู่ง เตี๋ย อ้า! เยีย กัน เจ๊า มี่ง เกา, ลู่ง อ๋าน อ๊ะ. เยีย ปวัด เยียม กู้ หงว่าย ลู่ง ม่าย ฌัง, เก้า ฌัง เจี๋ย บะฮนอย, หฒิว ก๋อม เยีย เหธา กัน เจี๊ยน เยีย วั้ว เต๋ย เมี่ยน.

14เยีย บัว เหยียด ฒู้ง คีง เหฌี่ย เดา หมี่ อ๊ะ. เยีย หย่า ไฮ์ ม่าย เฉีย ก๊อง เป๋น ฮิบลู หว่า บั๋ว เยีย, ‘เซาโล อ้า! เซาโล! เม่ย เหว่ย หาย ติ่ว โหฒว โตะ เยีย? เม่ย ฮนั้ง ง่ง ดิ๊ หฒุ่น ง่ง ปย๊า ห่อย กั้น หฒุ มุน.’

15“เยีย ฯฒฯ หน่าย ก๋า, ‘เฒี้ยว อ้า! เม่ย ต้ง หาย เต้า?’ “เฒี้ยว เตา, ‘เยีย เซ เยซู, ต้ง เม่ย โหฒว โตะ วั้ว เต้า.

16อี้ หฒั่น เจี์ย ซิน โซ้ว เจี๊ยน ม่าะ! เยีย หิ่น ปุน เม่ย ปวัด เหว่ย พ้าย เม่ย โหฒว เยีย เญย โปว. เยีย อ๋อย เม่ย กัน เยีย โหฒว ฒอง-เหฒง ก๊อง อี้ ฮนอย เม่ย ปวัด เยีย น้าย เต๋ย สี่ แอ๋ง เหธา ฆะฮ้า เยีย อ๋อย ปุน เม่ย ปวัด เญย สี่.

17เยีย อ๋อย เหฌียว เม่ย ธ้วด ยิวไท เมี่ยน เญย ปั์ว-เดี๊ย แอ๋ง เหธา เยีย พ้าย เม่ย มี่ง วั้ว เต๋ย จั๋น เญย ปั์ว-เดี๊ย.

18เยีย พ้าย เม่ย มี่ง ปุน นิ่น บัว ไฮ่ หมั่ง ตุ๊ ปวัด, ปุน เยียม หฮมวัง เญย เมี่ยน ไฮ่ ธ้วด ต้าย เยียม ฌัง, หย่า เยียม ซาตาน เญย ปั์ว-เดี๊ย ธ้วด ต้าย ล์อ ทิน-ฮู่ง. นิ่น บัว ฯฒฯ ตุ๊ ฒุ์ย กวั่ง ลิ์ว, หย่า ตุ๊ เหธา เหว่ย เสียน เยีย เป๋น ธีง-เหฑ่ง เมี่ยน วั้ว เต๋ย, ม่าย นิ่น บัว เญย ป่วน.’

19“อาฆีพา ฮู่ง อ้า! เยีย ไม้ แหง่ง เหยียด เต๋ย เยียม ลู่ง หิ่น ย่าง เญย สี่.

20เยีย ฯฒฯ เยียม ดามัดกัด ฒี่ง ฒุ่น โต์ ด่าง, ฆะฮ้า มี่ง เยลูซาเลม ฒี่ง, แอ๋ง มี่ง ก๋อม อิสะลาเอน เต่ย-ปูง, แอ๋ง ธ้วด มี่ง จั๋น เญย ต๋อง ฒุ่น โต์ ปุน หฒวัง เมี่ยน ฮิ้ว ตุ๊ นิ่น บัว อ๋อย หฒุ ก๊อย เฮญี้ยว กวั่ง ฒุ์ย หฑวน ต้าย ล์อ ทิน-ฮู่ง หย่า โหฒว สี่ ปุน ธีง นิ่น บัว หฒะเก้ง ก๊อย เฮญี้ยว กวั่ง ฒุ์ย หมี่ อ๊ะ.

21เหว่ย น้าย, เยียม หฒั่ง ทิน-ฮู่ง เญย เปย๊า, ยิวไท เมี่ยน เฒาะ เยีย, อ๋อย ไต๋ เยีย.

22มป่า ม่าย ทิน-ฮู่ง เถง เยีย เถา อี้ ฮนอย, เยีย ฯฒฯ โซ้ว เจี๊ยน น้าย หฒวัง เมี่ยน เญย หฑะเฮมียน โหฒว ฒอง-เหฒง ปุน โหฒว โฮล โหฒว ไฝ เญย หมวัง. เยีย ก๊อง เญย เซ ฟี่ ฮนั้ง โต่ว หว่า เมี่ยน เหธา โมเซ ก๊อง อ๋อย ธ้วด ต้าย เญย สี่ ฮนั้ง.

23นิ่น บัว ก๊อง กีตู่ อ๋อย หฒุ เสี่ยว โค้ว, หย่า ก๊อง นิ่น โหฒว ไต่ มี่ง แอ๋ง นั่ง ต้าย เญย ต้าว เต้า, นิ่น ฯฒฯ หฒิว ฌัง ปุน ยิวไท เมี่ยน เหธา หม่าน ฝีง จั๋น.”

24เปาโล ฮนั้ง น้าย นอ ก๊อง ไจ๊ ซิน เญย หว่า, เฟสะทัด ฯฒฯ เห่ว เฉีย โฮล เญย ก๊อง, “เปาโล อ้า! เม่ย ไม้ ฑัง บอ ล่อ. โตะ ตุ๊ โซว ฮลัง ไห่, ปุน เม่ย ไม้ ฑัง อ๊ะ.”

25เปาโล เตา, “เฟสะทัด ต้ม เฒี้ยว อ้า! เยีย ไม้ เฒ์ย ไม้ ฑัง เหลาะ. เยีย ก๊อง เญย เซ ไม้ เฒ์ย ไม้ ฑัง เญย หว่า. เซ หฒะเก้ง เฒียน เญย, ธีง-โธ้ เญย.

26ฮู่ง เตี๋ย ฮิ้ว เหฑ่ง น้าย เต๋ย หญู่งๆ สี่, เยีย ฯฒฯ ปู๋ง หล่าง เญย ก๊อง เหฑ่ง ปุน เม่ย หมวัง. เยีย เสียน ไม้ ม่าย เหยียด หญู่ง เม่ย ไม้ ฮิ้ว, เหว่ย หฒุ ไม้ เฒ์ย ปี๋ง เจี๊ยน โหฒว เญย สี่.

27อาฆีพา ฮู่ง อ้า! เม่ย เสียน ทิน-ฮู่ง เญย หฒวัง โต่ว หว่า เมี่ยน เญย หว่า ไฟ? เยีย ฮิ้ว ตุ๊ เม่ย เสียน เญย.”

28อาฆีพา ฮู่ง บั๋ว เปาโล, “เฒี่ยง โห่ ด่ง น้าย นั้ง เม่ย ฮนั้ม ต้าย เม่ย ไฮ่ ปุน เยีย อ๋อย เป๋น กีตู่ เมี่ยน ไฟ?”

29เปาโล เตา, “ไม้ กุ๊น เฒี่ยง โห่ ด๊าว ไฟ นั้ง, เยีย โท้ ทิน-ฮู่ง ปุน เม่ย เหธา เยียม น้าย เญย หฒวัง เมี่ยน เหยียด ฒู้ง เป๋น เหฑ่ง ฮนั้ง เยีย นอ, ธ้วด ลิ์ว ไม้ ม่าย เฮลียะ-หลิ่ม โด้ ฮนั้ง.”

30ก๊อง ลิ์ว, อาฆีพา ฮู่ง เหธา หฒูง เหธา เบนิด เหธา เยียม วั้ว เญย หฒวัง เมี่ยน เจี์ย ซิน

31ธ้วด มี่ง. ล่าน เหธา ล่าน ก๊อง, “ไม้ ปวัด น้าย ล่าน เมี่ยน ต่อง หาย หญู่ง หฒี่ ตุ๊ ไต๋ ไฟ หววน โล่.”

32อาฆีพา หย่า ก๊อง บั๋ว เฟสะทัด, “สี ก๊อง น้าย ล่าน เมี่ยน ไม้ แก้ง โท้ ปุน โลมา ฮู่ง ตุ๋น สี่, ปู๋ง ตุ๊ เญย.”

← Chapter 25 Jump to: Chapter 27 →