Acts 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1น้าย เต๋ย เมี่ยน ไต๋ สะเทเฟน, เซาโล หย่า อะเฮน้ย เญย. ต้ง วั้ว ฮนอย เมี่ยน เจี์ย กอน โหฒว โตะ ห่อย เยลูซาเลม ฒี่ง เญย จิว-ปาง เมี่ยน โค้ว ไห่. ธ้วด ลิ์ว กง-โฒ่ บัว, เสียน เยซู เญย เมี่ยน เหยียด ฒู้ง เปย๋า หฑาน, มี่ง เยียม ยูเดีย แซ้ง เหธา สะมาเลีย แซ้ง.

2ม่าย เต๋ย กัน หลง ทิน-ฮู่ง เญย เมี่ยน ต้อ สะเทเฟน เญย เซย มี่ง หฒัง, เฮญี้ยว เฑ่า ไห่, เหฌี่ย ชะ เญี้ยม เบี้ยวๆ เญย.

3มป่า เซาโล อ๋อย เหมียด จิว-ปาง, นิ่น ฯฒฯ เฒว่ย เปย๊า ล์อ เสียน เยซู เญย เมี่ยน มจั่ง มเซียะ เฒาะ ทอ มี่ง หววน เจี๊ยน โล่.

4เปย๋า หฑาน วั้ว เต๋ย เสียน เยซู เญย เมี่ยน มี่ง เถา หาย, นิ่น บัว ฒุ่น เจี๊ยน คู้ เฝียน มี่ง.

5ฟีลิบ มี่ง เถา สะมาเลีย แซ้ง เญย เหยียด นอม ฒี่ง ฒุ่น บั๋ว เมี่ยน กีตู่ เซ ต้ง เยซู.

6หฒวัง เมี่ยน ไฮ์ ฟีลิบ ก๊อง เญย หว่า หย่า ปวัด นิ่น โหฒว ธ้วด บัวะ ฮ่อง ไห่ เญย สี่, นิ่น บัว ฯฒฯ หลงๆ เญย หมวัง.

7เฮยี่ย ไกว๊ เมี้ยน เยียม เมี่ยน เญย ซิน ง้าวๆ เญย เห่ว เจี๊ยน ธ้วด. เหฒา ไบ เหฒา หว่าย เญย เมี่ยน ตุ๊ หฒ่อ หลง ธั้ม ไห่.

8วั้ว นอม ฒี่ง เญย เมี่ยน ฯฒฯ เฌียน-โย่ว ออน-เหลาะ ไห่ อ๊ะ.

9ม่าย เต้า เมี่ยน, บั๋ว เห่ว ซีโมน, เยียม วั้ว นอม ฒี่ง โหฒว ฟ้าด เล่า เต๋ย อ๊ะ, ปุน สะมาเลีย เมี่ยน บัวะ ฮ่อง ไห่ นิ่น. นิ่น เธง นิ่น กั้น เซ เหยียด เต้า โหฒว โฮล เญย เมี่ยน.

10ไม้ กุ๊น หาย ฮ่อง เมี่ยน, เหยียด ฒู้ง อ๋อย หมวัง นิ่น เญย หว่า. นิ่น บัว ก๊อง, “น้าย ล่าน เมี่ยน ม่าย เยียม ทิน-ฮู่ง ต้าย เญย ชะ. เซ ต้ง เมี่ยน เห่ว, ‘ต้ม ชะ’ วั้ว เต้า.”

11ซีโมน โหฒว ฟ้าด ปุน เมี่ยน บัวะ ฮ่อง ไห่, นิ่น บัว ฯฒฯ กัน นิ่น เล่า อ๊ะ.

12มป่า ฟีลิบ ฒุ่น คู้ เฝียน ก๊อง ทิน-ฮู่ง ต้าย โหฒว เฒี้ยว กุ๊น เมี่ยน หย่า ก๊อง เยซู กีตู่ เญย เจ๊า-โหล่ว. หฒวัง เมี่ยน เสียน นิ่น เญย หว่า, เลี่ยม มจั่ง มเซียะ เจี๋ย ววม เญย เล์ย เหฑ่ง.

13ซีโมน กั้น หย่า เสียน. นิ่น เจี๋ย ลิ์ว ววม เญย เล์ย. นิ่น หฒั่นๆ กัน เจี๊ยน ฟีลิบ มี่ง หย่า บัวะ ฮ่อง ไห่ ฟีลิบ โหฒว เญย ต้ม จั๋ง-โห่ เหธา บัวะ ฮ่อง เญย สี่.

14กง-โฒ่ บัว เยียม เยลูซาเลม ฒี่ง ไฮ์ ก๊อง สะมาเลีย เมี่ยน ฒิบ ตุ๊ ทิน-ฮู่ง เญย โต์ หมี่ อ๊ะ. นิ่น บัว ฯฒฯ พ้าย ปีเต เหธา โยฮัน มี่ง นิ่น บัว วั้ว.

15ปีเต เหธา โยฮัน มี่ง เถา, ฯฒฯ เถง เสียน เญย เมี่ยน เต๋า เก๋า, โท้ ทิน-ฮู่ง ปุน นิ่น บัว ฒิบ สีง ลี่ง,

16เหว่ย หฒุ สีง ลี่ง ไม้ แก้ง เหฌี่ย เหธา หาย เต้า เยียม. เมี่ยน ขูง เต๊ง เฒี้ยว เยซู เญย บั๋ว เจี๋ย ววม เญย เล์ย ฮนั้ง.

17ปีเต เหธา โยฮัน หล่ง ปั์ว มาน เจี๊ยน นิ่น บัว, เต้าๆ ฯฒฯ ตุ๊ ฒิบ สีง ลี่ง หมี่ อ๊ะ.

18ซีโมน ปวัด กง-โฒ่ บัว หล่ง ปั์ว มาน เจี๊ยน เมี่ยน, หย่า ปวัด ทิน-ฮู่ง เหธย สีง ลี่ง ปุน นิ่น บัว, นิ่น ฯฒฯ ต้อ ญ่าน ต้าย อ๋อย ปุน ปีเต เหธา โยฮัน.

19นิ่น ก๊อง, “โท้ เม่ย บัว ปุน น้าย หญู่ง ชะ เยีย, ปุน เยีย ไฮ่ หล่ง ปั์ว มาน หาย เต้า, วั้ว เต้า ฯฒฯ ตุ๊ ฒิบ สีง ลี่ง.”

20ปีเต เตา นิ่น, “หลาย เม่ย ฮนั้ม ต้าย ไฮ่ หล่ง ฒิ่น ญ่าน ม์าย ตุ๊ ทิน-ฮู่ง เญย ฒี่ง เหญ่ย, เม่ย เหธา เม่ย เญย ฒิ่น ญ่าน เหยียด ฒู้ง หฒุ เหมียด ม่าะ!

21เม่ย เยียม เยีย บัว เญย กง ไม้ ม่าย เม่ย เญย ป่วน, เหว่ย หฒุ ทิน-ฮู่ง ปวัด เม่ย เญย เฮญี้ยว ไม้ หฒีง.

22เม่ย อ๋อย หฒุ ก๊อย เฮญี้ยว กวั่ง เหฑ่ง น้าย หญู่ง หว่าย ไห่ เญย หฒะเอ๋ย. เม่ย เยียม เฮญี้ยว ฮนั้ม ธ้วด น้าย เต๋ย หว่าย สี่ มป่า เม่ย อ๋อย หฒุ เต๋า เก๋า โท้, เหฑีย เฒี้ยว ไฮ่ กวั่ง ฆอย ปุน เม่ย มเปย.

23เยีย ปวัด เม่ย เญย เฮญี้ยว ปะหละ เหมว่ย เจี๊ยะ ไห่, หฒุ ฒุ์ย โด้ เจี๊ยน อ๊ะ.”

24ซีโมน ก๊อง บั๋ว ปีเต เหธา โยฮัน, “โท้ เม่ย บัว เถง เยีย เต๋า เก๋า โท้ เฒี้ยว ไม้ ตู๋ง ปุน เยีย หฒุ ฮนั้ง เม่ย บัว ก๊อง วั้ว นอ โอ่.”

25ปีเต เหธา โยฮัน โหฒว ลิ์ว ฒอง-เหฒง หย่า ฒุ่น ลิ์ว เฒี้ยว เญย โต์, นิ่น บัว หฑวน เยลูซาเลม ฒี่ง. หฑวน วั้ว หฒั่น นิ่น บัว ยั่ง สะมาเลีย แซ้ง เญย ธั้ม-นอม ล์าง ฒุ่น เจี๊ยน คู้ เฝียน หฑวน.

26ม่าย เต้า เฒี้ยว เญย ฟิน-เมี่ยน ต้าย บั๋ว ฟีลิบ, “อ๋อย หฒุ มี่ง น่าม ปูง แหมง, เยียม เยลูซาเลม ฒี่ง มี่ง กาซา ฒี่ง วั้ว ติ้ว เจ๊า.” (น้าย ติ้ว เจ๊า เจี๋ย เต่ย-ปูง-ฮวาง.)

27ฟีลิบ ฯฒฯ ธ้วด เจ๊า มี่ง อ๊ะ. ม่าย เต้า เอทีโอเปีย กั๊วะ เญย ต้ม เจียน เถง เอทีโอเปีย ฮู่ง หม่า, คานดาสี, โก๋ว นิ่น เญย เหยียด ฒู้ง ฒิ่น ญ่าน. น้าย เต้า ต้ม เจียน มี่ง เยลูซาเลม ฒี่ง ป๋าย ทิน-ฮู่ง หฑวน, เฒว์ย เจี๊ยน ม์า-เธีย โตะ เจี๊ยน โต่ว หว่า เมี่ยน, อิสะยา, เญย โซว หฑวน.

29สีง ลี่ง ก๊อง บั๋ว ฟีลิบ, “เม่ย อ๋อย หฒุ หฒุ่น หฒ่าย วั้ว จ๋า ม์า-เธีย หย่า นิด เจี๊ยน นิ่น เญย กะเฮลน มี่ง ม่าะ!”

30ฟีลิบ ฯฒฯ ถิว เจี๊ยน มี่ง เถา นิ่น เญย กะเฮลน, ไฮ์ ต้ม เจียน โตะ เจี๊ยน โต่ว หว่า เมี่ยน, อิสะยา, เญย โซว. ฟีลิบ ฯฒฯ หน่าย ก๋า, “เม่ย โตะ เจี๊ยน หน่าย นอม ต๋อง, เม่ย เม่ง แปะ เญย ซ่าะ?”

31ต้ม เจียน เตา, “ไม้ ม่าย หาย เต้า พ้อ เม่ง บั๋ว เยีย, เยีย ฝู่ง ไฮ่ ฮิ้ว ตุ๊?” นิ่น ฯฒฯ เห่ว ฟีลิบ ฝาว ต้าย เฒว์ย เจี๊ยน นิ่น เญย ม์า-เธีย.

32ต้ม เจียน โตะ วั้ว โต่ว กีง-โซว เญย หว่า ฮนั้ง น้าย นอ ก๊อง, “นิ่น ฮนั้ง เต้า ปะกี ยู่ง นอ, หฒุ ต้อ มี่ง ไต๋, หย่า ฮนั้ง เต้า ปะกี ยู่ง ตอน หฒุ เมี่ยน จั๊บ เปยย, นิ่น หย่า ไม้ โค โล.

33นิ่น หฒุ เมี่ยน ป่าย นิ่น เญย เฮมียน, หล่ง ม่าน เล์ย ห่อย นิ่น. ไม้ ม่าย หาย เต้า ตุ๊ ก๊อง เถา นิ่น เญย ฟุน-ฟะ เหว่ย หฒุ นิ่น เยียม ป้าม เกน เญย แหม่ง เจี๋ย เหฑ่ง หมี่ อ๊ะ.”

34วั้ว เต้า ต้ม เจียน หน่าย ฟีลิบ, “โท้ เม่ย บั๋ว เยีย โอ่. น้าย เต้า โต่ว หว่า เมี่ยน ก๊อง หฒุ หาย เต้า? ก๊อง หฒุ นิ่น กั้น ไฟ ก๊อง หฒุ กั้น เต้า?”

35ฟีลิบ ฯฒฯ เจี์ย กอน หล่ง น้าย โต่ว กีง-โซว ก๊อง เยซู เญย คู้ เฝียน ปุน ต้ม เจียน หมวัง.

36นิ่น บัว เฒว์ย เจี๊ยน ม์า-เธีย มี่ง เกา, เถา นอม ต๋อง ปวัด ม่าย ววม เญย. วั้ว เต้า เจียน ก๊อง, “หมั่ง ก๋า, น้าย ม่าย ววม เญย. ม่าย หาย หญู่ง ปุน เยีย ไม้ แก้ง ไฮ่ เจี๋ย ตุ๊ ววม เญย เล์ย ไฟ?”

37ฟีลิบ เตา, “สี ก๊อง เม่ย เหลียบ ตี่ง เฮญี้ยว เสียน, เจี๋ย ตุ๊ เญย เหลาะ.” วั้ว เต้า เจียน ก๊อง, “เยีย เสียน อ๊ะ. เยีย เสียน เยซู กีตู่ เซ ทิน-ฮู่ง เญย ตอน.”

38ก๊อง ลิ์ว, นิ่น เห่ว ม์า-เธีย ตี้ง เจี๊ยน. นิ่น บัว อี เต้า ฯฒฯ เปียะ ววม. ฟีลิบ หย่า เถง ต้ม เจียน เจี๋ย ววม เญย เล์ย.

39นิ่น บัว ธ้วด ววม ต้าย, เฒี้ยว เญย สีง ลี่ง เลี่ยม เฒ่ย ต้อ ฟีลิบ มี่ง หมี่ อ๊ะ. ต้ม เจียน เฒียง หน่าย แอ๋ง ไม้ ตุ๊ ปวัด นิ่น อ๊ะ. มป่า ต้ม เจียน เฌียน-โย่ว เญย กัน เจี๊ยน เจ๊า หฑวน.

40ฆะฮ้า เมี่ยน ปวัด ฟีลิบ เยียม วั้ว อาโซทัด ฒี่ง. นิ่น เยียม หน่าย เฒว่ย มู้ง เฒว่ย ล์าง ฒุ่น เจี๊ยน คู้ เฝียน มี่ง เถา ซีซาลียา ฒี่ง.

← Chapter 7 Jump to: Chapter 9 →